دواهـەمین نامەی لاوێک بـۆ دایـکی … هاوتا کوردستانی
ساڵانێک پێش ئێستا سەر لە ئێوارەی زستانێک سەرماو و سۆڵە و کڕێوە و بەفراویی بوو ، دونیا تەواو تەماویی بوو ، وە لەتەنیشت پەنجەرەی ژوورەکەمەوە دانیشتبووم و هەردوو دەستیشم لە ئەژنۆکانم گیر کردبوو و دایکیشم لەبەرانبەرم دانیشت بوو بە دەستە لەرزۆکەکانی خەریکی چنینی جلی زستانە بوو بۆ کوڕە تەنهاکەی وە پەیتا پەیتاش دەستم لە پێنووسەکە گیر دەکرد و دەمویست لەسەر دایک هۆنینەوە بکەم و شوناسی دایک بهۆنمەوە بەڵام هەر وەک پەیامبەرێکی بێ بەزەیی چریپاندبێتی بە گوێمدا هەستم بە پەژارەیەکی بەکوڵ کرد لە ناخمدا و لەو ئان و ساتانەی شەودا و دایکم چووە ناو دوونیای پەڕاوەکان و وشەکانم و پێنووسە لەرزۆکەکەی نەزۆک کردم لە هۆنینەوەی شوناسی دایک ، وە ئەو شەوە بووە یادگاریەکی تاڵ و لەو شەوەوە ژیان و قۆناغێکی تەواو جیاواز و تراژیدیتر هاتە ئاراوە و ڕێگەی بەقسەکردنی زاری دڵم نەدا و بووە کۆسپێکی دیکەی ژینم و وەک ئاگرێکی کڵپەدار وا لەناخمدا قەتیس ماوە و ئەمەوێ بە گوێتدا بچریپێنم لە سۆز و خۆشەویستی .
دایکم هەمان شەو کۆچی کرد بۆ ڕێگا ونبووەکانی خەیاڵەکانم و وەک باڵندەیەکی غەمگین بێ ماڵئاوایی لەقەفەس دەستی کرد بە فڕین ، فڕینێک کە گەڕانەوەی نەبێت ، نازانم ئا خۆ چوە دونیای کامەرانی و شادە بە کۆچەکەی یان دڵمات و زیزە ، گەر نا بۆ ناگەڕێتەوە ، بەڵام بەهەرحاڵ دوای ئەو کۆچەو فڕینەوە من بوومە مرۆیەکی ڕووخاو و دڵشکاو و تێکشکاو و شتێک نەمایەوە تەنها ئەوە نەبێت ببمە دۆستی تەنهایی و کۆنتکردنی ڕۆحم لەنێو چوار دیواردا و بوومە هاوڕێی شەوانی باڵندە بێ لانە و غەمگینەکان ، هێندە دۆستایەتیمان نزیک بوویەوە تا بەرەبەیان پێکەوە تامەزرۆ سەیر یەکمان دەکرد ، ژینێک ئاوا هات و چوو وە تێپەڕی .
ئێستاش نامەیەکی پڕ برینم پێیە ، کە دواهەمین نامەیه بۆ دایکم ، نازانم پۆستە چیەکانی خواوەند و پۆستەچیەکانی ئاسمان ئەم پەیامەم بە پارێزراویی دەگەیەنن یان نا ، تکا کارم لە فریشتەکانی خواوەند ئەم پەیامەکەم بۆ بگەیەنن بە پیرۆزترین ڕۆحی ئاسمان ، با منیش ئەم کڵپە ئاگرەی دەروونم هێوور بێتەوە ، ئەڵێم دایە گیان کۆچت کرد و ڕۆشتیت بێ ماڵئاوایی و فڕیت بۆ ئاسمان بێ لاکردنەوە ، بێ ئەوەی ئاوڕ بدەیتەوە و بێ ئەوەی ماڵئاوایی بکەیت ڕۆشتیت ، وا منیش فرمێسکەکانم چۆڕەی دێت بە بەردەوامی وەک لێزمە باران وەستانی نیە و بەهیچ ڕاناگیرێت ، جەستەم ، ڕۆحم ، دەروونم ، خەیاڵم ، هەستم ، هەمووی هەپڕوون هەپڕوون و شەقار شەقار بووە .
دایە گیان ئێستا ئەڵێم تۆ لەکوێی ؟ چی دەکەیت ؟ من وا وێڵ و سەرگەردان ، بێ ماڵ و دڵگران ، لێرە مرۆڤە دڵڕەقەکان ژینیان لێ بردووین و شتێک نەماوە بەناوی سۆز و وەفا بۆ ناگەڕێیتەوە لەدوای سۆز و ئەوینی تۆ شتێک نەماوە بەناوی ژین و سۆز و وەفاداریی ، نازانم لەشادی و کامەرانی دایت یان نا ، گەر مەیلی گەڕانەوەشت نیە دە دەستم بگرە دایەگیان با من بگەمە دیدارت بگەم بە جوانیت ، بە میهرت ، بە سۆزت ، بە وەفات ، بەشکۆت ، بەڕۆحت ، بەباوەشت ، با تێر لە باوەشت بگرم و بۆن و مەرامی ڕۆح و جەستەت بکەم ، منم کوڕە تەنهاکەی تۆ دە دایە گیان دەستم بگرە با من بگەمە دیدارت گەر مەیلی گەڕانەوەت نیە ، ئەزانی ئیدی توانای فرمێسک ڕشتنیشم نەماوە زۆر تەنهام و زۆریش نیگەران چون وەڵات بە وڵات و نیشتیمان بە نیشتیمان گەڕاندمیان وا فرمێسکەکانیشم بەرەو وشکبوون ئەچن ، چاوم کوێر بێت ، زمانم لاڵ بێت ، گوێم کەڕ بێت ، جەستەم وشک بێت ، گەر تۆی پێ نەبینم و وشەکانتی پێ نەبیستم و چاوەکانتی پێ نەبینم ، بۆ گەشتن بەدیدارت شاخەکان و کێوەکانت بە دەرزی بۆ شی دەکەمەوە و دەریا و ئۆقیانووسەکانت بۆ وشک دەکەم و زەوی و سەرزەمیات بۆ شەق دەکەم ، ڕۆح و جەستە و هەموو ژینم پێشکەش دەکەم بۆ گەشتن بە دیدارت .
وێنەکەت هەمیشە لە پێش چاومە و تا خەو دەمباتەوە تێر تێر سەیری وێنەکەت دەکەم هەرگیز ون نابیت لە پێش چاوم ، کاتێک هەر دایکێک ئەبینم کڵپەی ئاگرێکی بەتین لەڕۆح و جەستەم دێتەوە دەرەوە ، کاتێک سۆزی دایکێک بۆ ڕۆڵەکەی ئەبینم ، ئیتر فرمێسک و خوێن ئاوێتەی یەک دەبن لە جەستە و ڕۆحمدا ، گریان و تەنهایی و غەم و پەشێویی سەرلەباری ژینی منی گیرۆدەی خۆی کردووە ، دایە گیان منم کوڕە تەنهاکەی تۆ ، چرکەیەک نیە یادی تۆ نەکەم و لەغەم و گریان و پەژارەدا نەتلێمەوە بە جۆرێک مرۆڤەکانیش سڵم لێ دەکەنەوە و نایەنەوێ تێکەڵ بەو ژینەی من بن و وەک شێت سەیرم دەکەن ، نازانن شێتی دیداری تۆ و شێتی میهر و جوانی و وەفا و شکۆ و باوەش و ڕۆحی تۆم ، تەنها و تەنها بۆ یەک شەوی دیکە مۆڵەتم بدە لەباوەشتدا بنووم و تووند لە ئامێزت بگرم ، چاوەڕوانی گەڕانەوەت ژینی بردم ، گەر مەیلی گەڕانەوەت نیە دە دەستی کوڕە تەنهاکەت بگرە و با بگات بە دیدارت ، بە پەرۆشی و بە ڕاکردن بۆ ناو ئاگردانیش بۆ ئامێزت ڕا دەکەم .
هاوتا کوردستانی