هەڵەبجە لە کەرنەڤاڵی فریوداندا … هیدایەت مەلا عەلی

هەموو ساڵێک پێش ١٦/٣ ساڵڕۆژی تاوانی کیمیابارانکردنی هەڵەبجە، دەستەڵاتداران و (حیزبە ڕەسەنەکانی!!!!) کوردستان، زەخیرەی چەواشەکاری بۆ کەرنەڤاڵی فریودانی خەڵکی هەڵەبجە ئامادە دەکەن، زیاتر لە ٢٥ ساڵە خەڵکی هەڵەبجە لەناو تەپوتۆزی فریودان و بەڵێنی چەواشەکارانەی گەندەڵخانەی بەناو حکومەت ، کۆمپانیای بە ناوی حیزبەوە، یاری بە چارەنوس و باری تەندروستی و ژیان و هزریانەوە دەکەن.
هەر ساڵێک و بەڵێنێکی تەماوی دەکەنە هەتوانێکی پڕ لەخوێی ئازارەکانیان، بە پارێزگاکردنی هەڵەبجە سەرەڕای ئومێدی خەڵک، ئەو مەنگەنە ژەنگاویەبوو کە ئامانجی کڵۆمدانی دەنگی ناڕەزایەتی خەڵکی هەڵەبجەبوو، نەک وەڵامدانەوە بە پێداویستیە ئینسانی و ئیداریەکانی شارێکی دوای جەنگ و بەکارهێنانی چەکی کیمیایی.

چۆن هەموو گوڵ و میوەیەک وەرزی خۆی هەیە، بەهەمان شێوە گاڵتەجاڕی و گێڕانەوەی خەڵکی هەڵەبجە بۆ پێش (١٦/٣/١٩٨٨)ی هەموو ساڵێک، بۆ دەستەڵاتدارانی کوردستان ئەو وەرزەیە. خاڵیکردنەوەی هەناوی پەنگخواردووی پڕ لە ئازاری خەڵکی هەڵەبجەش، لەلایەن مافیا و بازرگانەکانی دەستەڵاتەوە، دەبێتە بەر وبوومی وەرزی پیلان بۆ داڕێژراویان، کە لە ئەنجامدا ئەم فریودان و پیلانە تەمەنی دەستەڵات درێژتر و، ئومێد بە ژیانێکی باشتر بۆ خەڵکی هەڵەبجە کورت تر دەکاتەوە.
هەموو ساڵێک مانگێک پێش یادی ١٦/٣، وەرزی کۆکردنەوەی پەیامی بریقەداری ناوەڕۆک تاریکو، فرمێسکی تیمساحی بێگیانی نوێنەری حیزبەکانە، لەڕێگای نوێنەری حکومەت و پەرلەمانتار و ئیدارەی کرێنشینەوە. هەڵەبجە و قوربانیەکانی خەڵکی هەڵەبجە، ئەوەندەی ناویان لە دێڕە شیعری شاعیرە فەرمانبەرەکانی دەستەڵات و، هاواری بەرپرسە گەروگیراوی سەروەت و سامانەکانیان نمایش دەکرێت. وەک چارەکە مووچەکانیان، ئەگەر چارەکێکی هاوارەکانیان خزمەتی هەڵەبجە و خەڵکی هەڵەبجەیان بکردایە، ئێستا ژیان لەوشارە دڵشکاوەدا جۆرێکی تر دەبوو.
ڕۆژی سێشەمە ڕێکەوتی ٢١/٢/٢٠١٧ ئەنجومەنی وەزیرانی حکومەتی هەرێمی کوردستان، بەسەرۆکایەتی سەرۆک و جێگری (ئەنجومەنی وەزیرە گوێڕایەڵەکانی) حکومەت ،کۆبونەوەی ئاسایی خۆیان سازدا. لەم کۆبونەوەیەدا هەر دوو وەزیر (مەحمود حاجی ساڵح )وەزیری کاروباری شەهیدان و ئەنفالکراون، (محەمەد هاودیانی) وەزیری کاروباری کۆمەڵایەتی باسی سەردانەکانی خۆیان کرد بۆ وڵاتانی سوید و جۆرجیا. ئەم دوو وەزیرە دەڵێن لەگەڵ لایەنە پەیوەندیدارە سویدیەکان ڕێکەوتین لەسەر بەگەڕخستن و دابینکردنی داودەرمان بۆ ئەو نەخۆشخانەیەی کە بۆ چارەسەری بەرکەوتوانی چەکی کیمیایی لە هەڵەبجە دروست کراوە.

سەرۆکی حکومەتی (بازرگانەکانیش) وەزارەتی کاروباری شەهیدان و ئەنفالکراوانی ڕاسپارد، لەگەڵ وەزارەتی تەندروستی، هامئاهەنگی لەگەڵ نەخۆشخانەکانی ولاتی ئێران بکەن، بۆ چارەسەری بەرکەوتوانی چەکی کیمیایی چونکە لەم بوارەدا شارەزایان هەیە، وەک ئەوەی (نێچیر و قوباد و وەزیرەکان) بۆ چارەسەری نەخۆشیەکانی خۆیان بڕۆنە نەخۆشخانەکانی (مەریوان و پاوە).
بەپێی لێدوانی (ڕزگار حەمە نوری)نوێنەری پارێزگای هەڵەبجە لە ئەنجومەنی پارێزگای سلێمانی، دوای ٢٥ ساڵ لە دەستەڵات دەڵێت: پرۆژەی کارەبای نیشتیمانیمان گەیاندە ناو گوندی (هاوار)، پاشان دەڵێت ئەم گوندە قوربانی زۆریانداوە لە شۆڕشی کوردا خۆشبەختانە ئێستا کارەبای نیشتیمانیان هەیە.

کاتێک سەیری ئەم هەواڵانە دەکەیت زۆر حەقیقەتی چەواشەکارانە و فریوکارانە دەبینیت، ئەو ڕاستیە بەرجەستە دەبێت کە ئەم هەواڵانە لەیادی کیمیابارانی هەڵەبجەدا ئەمساڵ چۆن دەبنە زەخیرەی وتارو دەسکەوتی گەورە و بەنێوچەوانی خەڵکی هەڵەبجەدا دەدرێت. ئەمساڵ بیبینن چۆن ڕەگی لاملی بەرپرسان بەرزە دەبێتەوەو باسی بەڵێنی بەگەڕخستنی نەخۆشخانەی بەرکەوتوانی چەکی کیمیایی و گەیاندنی کارەبای نیشتمانی دەکەن بۆ گوندەکانی سنورەکە، ئیتر ئێستا سەرەتای وەرزی کەرنەڤاڵی فریودانی خەڵکی هەڵەبجە دەستی پێکردوە، باسی دیزاینی تازەی دەروازەی شاریش بالەولاوە ڕاوەستێت.
نەخۆشخانەی بەرکەوتوانی چەکی کیمایی لە هەڵەبجە چەندین ساڵە تەواو نەبووە، ئەو نەخۆشخانەیە وەک (تاکەکڵاشەکانی مامەلی) لێهاتوە، هەر وەفدێک دەچێتە سەردانی ئەڵێن ٣ مانگی تر تەواو دەبێت. لە کاتێکدا تاکو ئێستا زیاتر لە ٨٠ بەرکەوتوی چەکی کیمیایی گیانیانلەدەستداوە و ژمارەکەش زیاتر دەبێت. ئەو ڕۆژەی ئەم وەزیرانە باسی داودەرمانی سویدی و جۆرجیایان کرد، لەهەڵەبجە نەخۆشخانەی فریاکەوتن ناونراوە (نەقڵیاتی هەڵەبجە بۆ گوێزانەوەی نەخۆشەکان)،کارمەندانی تەندروستی و خەڵک، خۆپیشاندانیان کرد بۆ هۆڵی نەشتەرگەری و میلاکی پزیشک و پێداویستیە سەرەتاییەکانی تر.

کاتێک (سەرۆکی وەزیرە مووچە زۆرەکان) دەڵێت: لەگەڵ نەخۆشخانەکانی وڵاتی ئێران هامئاهەنگی بکەن بۆ چارەسەری بەرکەوتوانی چەکی کیمیایی هەڵەبجە، یەک بەرپرس و یەک سەرمایەدار نیە، سەرەتایترین پێداویستی تەندروستی خۆیان لە وڵاتانی ناوچەکە وەربگرن. بۆ لابردنی پەڵەی دەموچاو، دانکێشان، پەمەی کردنەوەی پێست، تەنانەت بۆ کڕینی پێڵا و جلەکانیان دەڕۆنە پێشکەوتوترین وڵاتانی دنیا، بەگرانترین نرخ لە مارکێت و نەخۆشخانەکان ،جوانکاریەکانیان دەکەن و جل و پێڵاوەکانیان دەکڕن.
لەکاتی سەردانێک لەگەڵ بەرێزان (مەریوان مەغدور، ئیبراهیم حەمەشەریف، گۆران هەڵەبجەی) بۆلای (مامۆستا کامیل عەبدولقادر) یەکێک لە بەرکەوتوانی چەکی کیمیایی هەڵەبجە، بۆ نەخۆشخانەی هامبۆرگ لە وڵاتی ئەڵمانیا. ڕێکەوتی ٢٢/١٠/٢٠١٦، باسی ئەو سەردانانەی کرد کە بۆ چارەسەر دەبرێنە نەخۆشخانەکانی وڵاتی ئێران، ئەو پرۆسەیەی (مامۆستا کامیل عەبدولقادر)باسی کرد، هیچ نیە بێجگە لە نەخۆشخستنەوەیان و کولاندنەوە و قوڵتر کردنەوەی برینەکانیان بەپێی پێوەرە تەندروستیە مۆدێرن و ستاندارەکان.
زەحمەتی و قورسی شێوازی سەفەرکردنیان و گەیاندنیان بە وڵاتی ئێران، ناتەندروستبوونی کەش و هەوای ناو ئەو ئۆتۆمبیل و پاسانەی دەیانگوێزنەوە. گەرما و سەرما، تەپوتۆز و بۆن. تەنانەت نابرێنە نەخۆشخانە پێشکەوتوەکانی وڵاتی ئێران، بەشێوەیەکی زۆر ساکار و نەگونجاو کردەوەی چارەسەر و پشکنینەکانیان بەڕیوە دەچێت. ناوبراو دەڵێت: لەسەر کورسیەک بەرانبەر پزیشکەکە دادەنیشین و سەیرێکمان دەکات ، پاشان دەڵێت: ئێستا چۆنی؟ داودەرمانەکانت ماوە؟ هەندێکی تر دەرمانمان بۆ دەنوسێت و دەگەڕێینەوە. بەڕاست ئەمە ئیهانەیە بە ئینسانیەت و کەرامەتی خەڵک، یان چارەسەری بەرکەوتوانی ترسناکترین چەکی قەدەغەکراوی جەنگی سەرمایەدار و قازانج پەرستەکان لە جیهاندا.

بۆ دەستەڵاتداران و حکومەت و حیزبەکانی (حکومەتی تێکدەری بنکە فراوانی هەرێمی کوردستان)، (پارتی، یەکێتی، گۆڕان، یەکگرتوو، کۆمەڵ) هەر هەموویان، بەشێواز و بەش و پێگەی خۆیان، دۆسیەی کیمیابارانکردنی هەڵەبجە و قوربانیەکانی خەڵکی هەڵەبجە. بۆتە زەخیرە و مەتریال و نیعمەتێکی گەورە بەدەستاینەوە، بۆ گەمەی سیاسی و ململانێی پێگە و گۆڕینی هاوکێشەی هێزی نێوانیان، ئەم حەقیقەتە لە دابەشکردنی کورسی و پۆستی ئیداری پارێزگاو، ئەنجومەنی پارێزگای هەڵەبجەدا وەک خۆر درەوشایەوە و هیچ پەردەیەکی بۆ فریودان نەهێشتەوە.
ئەم حیزبانە جەوهەری بیرکردنەوەیان بۆ خەڵکی هەڵەبجە، هەمان ئەو بیرکردنەوەیە کە یاریزانێکی (شەترەنج) بۆ لەشکرەکەی بەردەستی هەیەتی، ئەوەی ونە لە هەڵسوکەوت کردن لەگەڵ خەڵکی هەڵەبجە و قوربانیەکانی، دیدێکی ئینسانی و شکۆمەندانەیە، ئەم دیدە دژی ئینسانیە لە گێڕانەوەی مناڵە ونبووەکانی هەڵەبجە و چارەسەری بەرکەوتوانی چەکی کیمیایی بەئاشکرا هاوار ئەکات . ئەم حیزبانە پەیامەکەی خۆیان گەیاندوە و پێویست بە چاوەڕوانی زیاتر ناکات لەلایەن خەڵکی هەڵەبجەوە.
لەیادی (٢٩)هەمین ساڵڕۆژی کیمیابارانکردنی هەڵەبجە، من پێشنیارێکم هەیە بۆ خەڵکی ناڕازی، بەرکەوتوانی چەکی کیمیایی، کەسوکاری مناڵە ونبووەکان، ئینسانە مەحروم و زەحمەتکێشەکانی هەڵەبجە. ئەمساڵ وەک ناڕەزایەتیەک لەبەرانبەر دەستەڵاداران و کەرنەڤاڵی فریودانەکانیان، ئەو (قەڵەمەی) ئیمزای بەپارێزگابوونی هەڵەبجەی پێکرا بیشکێنن، شکاندنی ئەو قەڵەمە مانای گەوەری سیاسی و کۆمەڵایەتی هەیە، هێزێک بتوانێت ئەو قەڵەمە بشکێنێت، دەتوانێت ڕێگا لە چەواشەکاری و گاڵتەکردن بە ژیان و چارەنوسی خەڵکی هەڵەبجە بگرێت. هیوادارم یادی ئەمساڵ خاڵی وەرچەرخانی کەلێنی گەورەی نێوان ئیرادەی ڕاستەقینەی خەڵکی هەڵەبجە و بەرژەوەندی فریوکارانەی هاوبەشی حیزبەکان بێت.

هیدایەت مەلا عەلی
٢٥/٢/٢٠١٧




بارزانی و هەڵپەڕاندن… هیدایەت مەلا عەلی

ئازیزان ئەوەی هەڵمانئەپەڕێنێت تەنها فاشیزمی (بارزانیزم) نیە، ئەوەی نیگەرانە لەوەی کە (بارزانی) وەک سەرۆکی میلەتێک قسە ناکات و نابەرپرسە، بەبڕوای من نەدەتوانێت (بارزانی) بناسێت و نەدەتوانێت شیکاری بۆ (بارزانیزم) بکات، ئەم نیگەرانیە هەردوو قاچی لەناو وەهمی کوردایەتی چەقیەوەو فرمێسک هەڵدەڕێژێت بۆ هەڵوەرینی باوەڕی خەڵک بەم گاڵتەجاڕیە کە ناوی کوردایەتیە، لەکاتێکدا کوردایەتی لەهەناوی خۆیدا ئایدۆلۆژیای چەوساندنەوە و بازرگانی و وەهم بەخشینەوەیە.
(بارزانی) زادەی زەمینەیەکی سیاسیە بەهەموو ڕەفتار و کردار و وتەکانیەوە، (بارزانی) پاڵەوانی بێشان و شەوکەتی ناو گەمەیەکی نائینسانیە کە چەپڵەلێدەرەکانی تەنها (پارتیەکان)نین.
فاشیزمی (بارزانیزم) بەبێ مۆڵگە و گۆڕەپانی تاکی گوێلەمست و بەڵێ گفتار نایەتە بەرهەم، وتەکانی (بارزانی) ڕەنگ و شێوەی کۆمەڵگایەکی ناهاوسەنگە کە دەتوانێت زمانی (کوڵە دیکتاتۆرێکی) وەک (مەسعود بارزانی) بپژێنێت و ئەوەی دەیەوێت بیڵێ قووتی نەداتەوە، (بارزانی) بەوپەڕی وریایی و تێگەشتن و بەرژەوەندیخوازیەوە قسەکانی دەکات، ئەگەر کەسێک وەهمێکی ماوە با بەباشی بیپێچێتەوە و بۆنی بکات، بەبڕوای من بەشێک لەو هۆکارانەی کە (بارزانی) دەکاتە هەڵپەڕێنەر ئەمانەن.
یەکەم: ئەوەی هەڵمانئەپەڕێنێت و مۆڵەتی یاریکردن بە چارەنوسی کۆمەڵگایەکی وەک مەدالیایەکی زێڕین داوە لە یەخەی (بارزانی)!!!!!!، (ی ن ک)ە شەریکە عەیار و مەکربازەکەی (بارزانی)، شەریکی دابەشکردنی قووتی خەڵک و بێبەهاکردنی کەرامەتی ئینسان، ئەو شەریکەی لەسەر ترامپۆلینی بۆنی نەوت و قسەی سواوی پەرلەمان و سەرکردە خۆشخوانەکانیان سەرمەوقولات ئەدەن.
دووەم: ئەوەی هەڵمانئەپەڕێنێت تەنها عاشقە و ماشقە بوونی بارزانی نیە لەگەڵ (سەدام و ئۆردۆگان) و هێزە سەرکەتگەرەکان، ئەوە (گۆڕان)ە، ئەو هێزەی کە گەشتنە (بارزانی) شاهیدی دەیان کۆبونەوەی ژوری تاریک و بەڵێنی ٤ ساڵی ئارامی بووین، ئەو بزوتنەوەیەی کە دوای کۆتایهاتنی ماوەی سەرۆکایەتی (بارزانی) بە قەولی خۆیان، بەڵام وەزیری (پێشمەرگەکەیان) بەدووی (بارزانی) دەکەوت و میوانداری وەفدەکانی خاوەن شکۆی دەکرد، لەژێر ناوی پیاوی دەوڵەت و شەڕی داعش مایەوە تاکو دواتر (بارزانی) لەگەڵ هاوڕێ وەزیرەکانی، مۆڵەتێکی بۆکردن و بۆ پشوو ڕەوانەی کردنەوە بۆ ماڵەوە.
سێیەم: ئەوەی (بارزانی) کردە ژمارەیەکی لێکدرا و دابەشکراو، مێژووی لە خوێن هەڵکیشراوی ئەم زاتە نیە، ئەوە ئەو (یەکگرتووەیە) کە لە یاری دۆمینە و تاوڵەی پەرلەمەنتارەکانی، لەکاتی فریودانی هەموارکردنی یاسای سەرۆکایەتی پێنج بە پێنج لەبەرژەوەندی (سەرۆک بارزانی) لە یاری تاوڵە و دۆمینەکەدا یەکسان بوون.
چوارەم: ئەوەی (بارزانی) کردە کابوسی ئازادی و خۆڵی مردوی کرد بەسەر دەنگی ئازاد و ناڕازی بەشێکی فراوان لە جوگرافیای کوردستان، ئەوە (کۆمەڵی ئیسلامیە)، ئەو کۆمەڵەی لەسەر وتارێک و نوسینی کتێبێک، یان بۆ بەرگری لە ئیسلامیەکانی (میسر) شمشێر ڕائەوەشێنن و چوار پەنجەی پشتیوانی بەرز ئەکەنەوە، بەڵام بۆ بەرگری لەخەڵک و ناڕەزایەتیەکانیان ئەڵێی کورسیەکی پەرلەمانیان لە (هەولێر) نەهێناوە.
پێنجەم: ئەوەی (بارزانی) دەکاتە کارئەکتەری سەر میمبەر و شانۆکان، لەشکرێک لە نوسەر و ڕۆشنبیری دەغیلە ئاسایە، کە بیر و ئەندێشە و هزریان بۆتە بۆتەی پارە و سەیارە و شوقە، ئەوە تیپێک لە هەلهەلەکێشە کە زمانیان بێجگە لاواندنەوە و شەرعاندنی تاوانەکانی (بارزانی) ئیتر زمان و ویژدانیان لاڵە.
شەشەم: ئەوەی (بارزانی) کردە بونەورێکی پەنجە ڕاوەشێنەر، ئێمە بووین (چەپەکان) کە لە ٢٥ ساڵدا نەمانتوانی ببینە هێزێک کە هەر ئینسانکوژ و ملهوڕێک پەنجەی ڕاوەشاند لە جێگای خۆی چیچکانی پێبدەینەوە.
ئەوەی کە (بارزانی) مۆڵەتمان ئەدات هەڵپەڕین و هیچ سانسۆرێکی لەسەرمان نیە بە شوکرانە بژێریەوە، کۆمەڵگایەکە کە تاکو ئێستاش کۆمەڵێک هەلپەرست و زمان لووس، ئەتوانن لەسەر ڕەنج و ماندبوون و ناڕازیەتیەکانیان ببن بە (پەرلەمانتار و وەزیر و بەڕێوبەری گشتی).
بەبڕوای من دەبێت وەڵامی هەموو ئەم فاکتەرانە بدەینەوە، کە (بارزانی) دەکاتە سەرچۆپی کێشی شایەکە و کۆمەڵگاش بەگاوان و دڵیشی گەردێک ناگرێت، وەڵام بەم هۆکارە سیاسی و کۆمەڵایەتی و دەسەڵاتداریەتیە (بارزانی) دەکاتە تەیرەکەی مەلای مەشهورە و کوردایەتیش دەچێتە دۆخی گازی ئەسیتلین.

هیدایەت مەلا عەلی




نامەیەک بۆ هاوڕێ (ڕەحمانی حسێنزادە) لە حیزبی کۆمۆنیستی کرێکاری ئێران_حیکمەتیست … هیدایەت مەلا عەلی

هاوڕێی ئازیز سڵاو
ئەم کاتەت باش و هیوادارم ساغ و تەندروست بیت
بەڕێزم: لەدوای دەستپێکردنی ئۆپراسیۆنەکانی هێزە هاوپەیمانەکان و سوپاسی عێراق و پێشمەرگە بۆسەر شاری (موسڵ)، لەلایەن حیزب و هەڵسوڕاو باڵە جیاوازەکانی کۆمۆنیزمی کرێکاری، لێکدانەوە و شیکاری و هەڵوێستگیری جۆراو و جۆر و جیاواز دەبینین و دەبیستین، هەموو ئەمانە دیاردەیەکی سروشتیە و بەپێچەوانەوە نەبوونی جێگای تێڕامانە.
لەڕاستیدا من نامەوێت لەسەر ئەو ئۆپراسیۆنە و کاریگەری و ئامانجەکانی لێرەدا قسەیەک بکەم، بەڵام ئەگەر تەمەن بواریدا ئەوا لە فرسەتێکدا لەم بارەوە بۆچوونەکانی خۆم لە وتارێکدا لەژێر ناوی (چەپ و ئۆپراسیۆنەکانی موسڵ)ڕادەگەیەنم، هۆکارێک کە وایلێکردم ئەم نامەیە بۆ بەڕێزتان بنوسم بەشێک لە وتارێکی هاوڕێی ئازیز (سامان کەریم)ە لە (حیزبی کۆمۆنیستی کرێکاری عێراق) لەژێر ناونیشانی (شەڕی موسڵ و نێوەندگیری ڕاست و چەپ)، ئەم وتارە لە ماڵپەڕی هاوپشتی بڵاوکراوەتەوە.
هاوڕێ (سامان کەریم) لەو بەشەی وتارەکەیدا هەندێک پرسیار ئاڕاستەی بەڕێزتان دەکات و داوای وەڵامتان لێ دەکات، لەڕاستیدا من وەک خۆم کە ڕۆژگارێک لەگەڵ هاوڕێیانێکی وەک بەڕێزتان لە حیزبێکدا پێکەوە کارمان کردوە، ئامانج و ئاسۆیەکی ئینسانی و مارکسیستانە پێکیەوە بەستبووین، ناتوانم بێدەنگی هەڵبژێرم و دوای وەڵامی ئەو پرسیارانەی هاوڕێ (سامان کەریم) لە تۆ نەکەم، بەچاوپۆشی لەوەی پرسیارەکانی هاوڕێ (سامان کەریم) چەندە دروستن یان نا، من بۆخۆم تاکو ئەم چرکەساتە بڕوام بەو پرسیار و ئەگەرانە نیە کە هاوڕێ (سامان کەریم) خستوویەتیە بەرچاوتان و داوای وەڵامتان لێ دەکات، جا نازانم من هەڵەم یان دنیا زۆر گۆڕاوە و من ئاگادارنیم.
بەکورتیەکەی هاوڕێ (سامان کەریم) دەڵێت: لەدوای هێرشی (داعش) بۆسەر شاری (موسڵ)و گەڕانەوەی وەفدێکی ئێوە بۆ کوردستان، بۆ ئەوە نەبووە لەگەڵ هەردوو (حیزبی کۆمۆنیستی کرێکاری عێراق و کوردستان) کۆبونەوە بکەن، ئیوە دەتانەوێت مۆرێکی کۆمۆنیستانە لەسەفەرەکەتان بۆ کوردستان بدەن، هاوڕێ (سامان کەریم) واپیشاندەدات و پرسیارەکان بەجۆرێک دەوروژێنێت، کە ئامانجی سەفەری ئێوە بۆ کوردستان بۆ ئەوە بووە لەگەڵ (پارتی) بەسەرۆکایەتی(مەسعود بەرزانی) کۆبونەوە بکەن و هەندێک پارە و پول چنگبخەن!!!!!، هەر بەقەولی هاوڕێ (سامان کەریم) دوای ئەوەی کە (جەلال تاڵەبانی) نەخۆش دەکەوێت و لەو حیزبەوە وەڵامی نێگەتیڤ وەردەگرن، بە پرسیار و قسەکانی هاوڕێ (سامان کەریم)دا وادەردەکەوێت کە داوای پارە و پولتان لە (یەکێتی) کردبێت!!!!؟؟؟؟؟، ئەمەو چەندین پرسیاری تر لەمبارەوە، کە گرنگ نیە من لێرەدا بینوسمەوە و دەکرێت لە وتارەکەی هاوڕێ (سامان کەریم)دا بخوێنرێتەوە.
لەوای خوێندنەوەی وتارەکەی هاوڕێ (سامان کەریم)وە، چەندین جار ئەم پرسیارانەم لە خۆم کردوە، چۆن هاوڕێیانێک کە ڕۆژگارێک بەشێکبوون لە ڕابەری حیزبەکەمان و سیاسەتەکانیان داڕشتووە، ئێستا دەڕۆن و داوای پارە و پول لە (پارتی و یەکێتی) دەکەن؟؟؟؟؟، چۆن ڕابەرانێک تاکو دوێنێ سەرکردایەتیەکی هاوبەشیان لەگەڵ ئیوە پێکهێنابوو، ئێستا دەڵێن ئێوە دەتانەوێت لەڕێگای (پارتی و یەکێتی)یەوە پارە و پول چنگبخەن؟؟؟؟، (پارتی و یەکێتی) ٢٥ ساڵە یاری بە چارەنووس و کەرامەتی خەڵکی کوردستان دەکەن، موچەی خانەنشین و کەمئەندام و سەرجەم فەرمانبەران و مامۆستایان و کرێکاران پێشمەرگە نادەن، بەڵام خێرە ئیستا دوای پارە و پول لە (پارتی و یەکێتی)بکرێت؟؟؟؟، من دەزانم وەک ئەوەی (چەپ و کۆمۆنیزم) هێزێک نیە لەناو هاوکێشە سیاسی و ڕووداوەکانی ئێستادا، بەداخەوە هەمانکات شانسی ئەوەشمان نیە لانی کەم پلیمێکی مۆدێرن و تەندروست بکەین و لەو بارەوە زۆر هەژارین و مەجبورین بەکاری لاوەکیەوە خۆمان سەرقاڵ بکەین.
هاوڕێ ڕەحمانی ئازیز….
ماوەیەکە کۆماری ئیسلامی سێدارەی ئێران، هەڕەشە دەکات لەوەی کە وڵاتی (سعودیە) خەریکی پیلانڕێژیە لە دژیان، کۆماری ئیسلامی سێدارەی ئێران ناڕاستەوخۆش لە ڕێگای بەرپرسە سەربازی و ئەمنیەکانیەوە، هەڕەشە لە (پارتی)دەکات وەک ئەوەی وڵاتی (سعودیە) سەفارەت و ئۆرگانەکانی لە (هەولێر) بۆ ئەم ئامانجە بەکار بهێنێت، بۆ پەیوەندی کردن بە ئۆپۆزسیۆنی ئێرانەوە، من نابمە وەکیل و قاوەگرەوەی لێکدانەوە و مەبەستی پرسیارەکانی هاوڕێ (سامان کەریم)، بەڵام ئایا پرسیارەکانی هاوڕێ (سامان کەریم) بەم واقیعە سیاسیەوە پەیوەست دەبێت و هیچ حەقیقەتێکی هەیە کە ئاڕاستەی تۆی بەڕێزی کردوە؟؟؟؟.
باشە ئەگەر وەک گریمانەیەک لە جەمسەربەندیەکدا (وڵاتی سعودیە و پارتی و ئۆپۆزسیۆنی ئێرانی) بەرژەوەندیەکی هاوبەشیان لەدژی کۆماری ئیسلامی سێدارەی ئێران هەبوو، ئێوەش خۆتان وەک بەشێک لەو جەمسەربەندی و شەریکە هاوبەشە زانی، کە من بۆ خۆم ناچێتە ئەقڵمەوە کە ئێوە کارێکی وابکەن و هیوادارم وانەکەن، بەڵام داواکردنی پارە و پول لە (یەکێتی) بە قەولی هاوڕێ (سامان کەریم) کە لە وتارەکەیدا پەنجەی بۆ ڕاکێشاوە، چ مانایەکی هەیە لە کاتێکدا (یەکێتی) هاوپەیمانێکی سەرسەختی کۆماری ئیسلامی سێدارەی ئێرانە لە ناوچەکەدا، بۆیە باسی هەردوو وڵاتی (ئێران و سعودیە)م کرد و کەمێک لێکدانەوەم بۆ کرد بۆ ئەوەی کەمێک هاوکاری بەڕێزتان بکات، ئەگەر ویستان وەڵامێک بە نامەکەم یان وتارەکەی هاوڕێ (سامان کەریم) بدەیتەوە.
هاوڕێ ڕەحمانی ئازیز….
سەرەڕای هەر دابڕانێکی حیزبی و سیاسی و کۆمەڵایەتی، من تاکو ئێستاش لە ڕووی ئینسانی و وەفا و خۆشەویستی ڕابوردوەوە، بۆم گرنگە هاوڕێکانم لە دیاردەیەک کە قورسای سیاسی گەوەرەی هەیە بەئاگابهێنمەوە و نامەیان ئاڕاستە بکەم بە ڕاستەوخۆ یان ناڕاستەوخۆ، وەک ئەوپرسیار و ئەگەرانەی هاوڕێ (سامان کەریم) ئاراستەی تۆی کردوە، بەبڕوای من بۆ هەر حیزبێکی سیاسی یان گروپێک یان هەڵسوڕاوێکی سیاسی، بێدیقەتی سیاسی، لێکدانەوە و شیکاری ناواقیعی، هەڵوێست و جیهەتگیری ناعەمەلی و تەنانەت هەڵەش، کارێکی ئاسایی و ڕۆتینیە و هەموومان کردومانە، بەڵام دیبایت و پلیمی سیاسی و مۆدێرن و شارستانی و پاراستنی ئینسانیبوونی یەکتری، بەرپرسیاریەتیەکی گەورەی سەرشانی هەموومانەو هیوادارم کە بتوانین هەموومان پڕنسیبیەکانی بپارێزین.

لەگەڵ ڕێز و خۆشەویستم
هیدایەت مەلا عەلی
٩/١١/٢٠١٦




شۆڕشێک بۆ کەرامەت … شۆڕشێک بۆ کەرامەت

ڕاوچیەکانی دەسەڵات لە کوردستان، پێش ئەوەی موچە بکەن بە نیوە و چارەک، کەرامەتی ئینسانی و شکۆی هاوڵاتیانیان کرد بە ژمارەیەکی دیارنەبوو، لە کۆمەڵگایەکدا کەرامەتی ئینسانی تاکەکان بوویە بارمتەی ژیانیان، ئیتر زۆر سانا موچە و کارەبا و ئاو دەبێتە داواکاری و شیعاری خۆپیشاندانەکانمان.
ڕاستە تاشینی سەر و برۆی (هێمن عبدولخالق) لە لایەن قارەمانەکانی (پارتی دیموکراتی کوردستان)، لەڕوی کۆمەڵایەتی و تێگەشتنی خێڵەکیەوە، نیشانەی ئەتک کردن و شێوازێکی باڵای سوکایەتیە، بەڵام بەبڕوای من ئەو ڕەفتارە قیزەونەی کە دەرهەق بە (هێمن عەبدولخالق) کرا، بڕوانامەیەکی گەورەیە بۆ نمایشکردنی دەسەڵاتێک کە هیچ بەهایەک و کەرامەتێکی ئینسانی نیە، (هێمن) تووانی ئەو بڕوانامەیە وەربگرێت کە بازرگانەکانی دەسەڵات پێیانبەخشیوە، بڕوانامەی بەرژەوەندی جیاواز لەگەڵ دەستەڵاتێکی گەندەڵ و بێناونیشان،(هێمن) پێی ووتین ئێمە چ دەسەڵاتدارێکی نائینسان و کۆنەپەرستمان هەیە، تاشینی سەر و برۆی (هێمن) وەڵامی سەرکوتکردنی (کەرامەت)ە ، بە شیعار و داواکاری (موچە).
کۆمەڵگا کاتێک ئالودە دەبێت بە شیعاری (نانم نیە، موچەم نیە)، هاوڵاتیەک کاتێک لەبەردەم شاشەکانی تەلەفزیۆنەوە دەگری و گیرفانەکانی هەڵدەگێڕێتەوە، ئەم کردەوانە بەرهەمی ٢٥ ساڵ کاری چڕ و پڕی (یەکێتی و پارتی)ە لەسەر سایکۆلۆژیەتی ئینسانەکان، بۆ نابووت کردنی کۆمەڵگا و دەستەمۆ کردنی، تاکێک پێش ئەوەی بگری سانسۆری (کەرامەت)ی کراوە، هاوڵاتیەک پێش ئەوەی برسی بێت یان تینوو، سەرچاوگەی ئیلهام و ئیرادە و (کەرامەت)یان لێ کڵۆمداوە، هیچ ڕێگایەکمان نیە بێجگە گێرانەوەی ئەم (کەرامەت)ە.
ئەم دەسەڵاتە زۆر بە وریایەوە لەهەناوی کۆمەڵگاوە، پێداویستیەکانی سەقامگیری و مسۆگەرکردنی پایەکانی دەسەڵاتەکەی خۆی بەرهەمهێناوە، یەکێک لەو فاکتەر و سێکتەرە گرنگانەی کۆمەڵگا، کە دەستەڵات لە مەنگەنەیداوە و کردویەتیە بارمتەی ژیانی هاوڵاتیان، کارکردنە لەسەر بێبەها کردنی(کەرامەتی ئینسانی و ئیرادەی تاک)، ناڕێکخراوبوون، نەبوونی شیعاری ئینسانی و ئاسۆی سیاسی ڕۆشن، مناڵی ئەو مناڵدانەیە کە دەستەڵات لە هەناوی کۆمەڵگاوە دەریهێناوە.
لە کۆمەڵگایەکدا کە مافی (موچە، ئاو، کارەبا) بۆ هاوڵاتیان بۆتە خەوێک و خەیاڵێکی ئەفسوناوی، هاوڵاتیەک لە دەربەندیخان لەبەر ئەوەی ٣ ڕۆژ ناتوانێت شیر بۆ منداڵەکەی بکڕێت، ئەیەوێت ٢٧/٩/٢٠١٦ لەڕۆژی خۆپیشاندان خۆی بسوتێنێت، بەڵام بەرپرسێکی سەربازی لە (قبر‌‌‌ص) تەنها لە شەوێکدا (٩١ دەفتەر دۆلار) بە قومار بدۆڕێنێت، ئامادەکردنی زەینیەت و هۆشی خەڵک بۆ ستایلێک لەم ژیانە، قبوڵکردنی جۆرێک لەم هەواڵ و ڕەفتارانە، سەرچاوەکەی بێئیرادەکردنی کۆمەڵگا، بێبەها کردنی مافی ژیان و پێشێلکردنی (کەرامەت)ی ئینسانە.
پێش ئەوەی داوای (پێداچونەوەی موچەکانمان) بکەین، ئەبێت داوای گەڕانەوەی (کەرامەتی ئینسانیمان) بکەین، مەبەست لە (کەرامەت) تەعبیرێکی ئەخلاقی نیە، بوونی (کەرامەت) بەمانای شکۆی ئینسان، ئینسانێک کە دەبێت بژی و خاوەن ماف و پێداویستیەکانی بێت، (کەرامەت) بەمانای ئەوەی قبوڵی نەکەین، کە گوێمان لێدەبێت دەڵێن: پەنجا بەرکەوتوی چەکی کیمیاوی لە هەڵەبجە سەرەیان بۆ مەرگ گرتوە، (کەرامەت) بەمانای بەرپرسیاریەتی لەبەرانبەر چارەنوسی ئینسانی کۆمەڵگا بەهەموو بەها بەرزەکانیەوە.
ئەگەر ئینسان و (کەرامەتی ئینسانی) لە کۆمەڵگای کوردستاندا، لەسایەی دەستەڵاتی (یەکێتی و پارتی)، واتە خاوەن کۆمپانیاکانی سیاسەت کێشێکی هەبووایە، نەماندەتوانی گوێبیستی هەڕاجکردن و فرۆشتنی دەیان منداڵ بوینایە لەلایەن خێزانەکانیانەوە، نەماندەتوانی فڕێدانی دەیان کۆرپەی تازە لەدایکبو وەک شنەی بایەک بەلای گوێماندا گوزەر بکات، ئێمە پێویستمان بە خۆپیشاندان نیە بۆ موچە، موچەی بڕاومان لە (کەرامەت)ی گەڕاوەمان بەدەستدەهێنینەوە، پێویستمان بە شۆڕشێکە بۆ گێڕانەوە و مسۆگەر کردنی پاراستنی (کەرامەتی ئینسانیمان)، کاتێک بووینەوە بە خاوەنی (کەرامەت) کە دەستەڵات بە قیمەتی سەرمایەیەکی گەورە، نیشانەی پرسیاری لەسەر دروستکردوە، ئەوە بەدڵنیایەوە هیچ هێزێک ناتوانێت، موچەکانمان بە چارەک و نیوە وەک خێر و سەدەقە پێبفرۆشێتەوە.
لەدوای ٣١ی ئابی ساڵی ١٩٩٦، (پارتی) بڕیاریدا موچەی مانگێک دابەش بکات بەسەر مامۆستایانی سنوری دەستەڵاتی (یەکێتی)دا، ئامانجی (پارتی) لەم هەنگاوە، گاڵتەکردن بە ژیان و بژێوی مامۆستایان و، ململانێی نێوان دوو ئیدارەی (سەوز و زەرد)بوو، داهاتی کوردستان سەروەت و سامانی کۆی گشتی کۆمەڵگای کوردستانە، بەڵام بازرگانەکانی دەستەڵات دەیکەنە شاباشی گاڵتەکردن بە (کەرامەت)ی هاوڵاتیان.
(یەکێتی) هەموو بازگەکانی پڕکرد لە ئاسایشیی خەڵکی ناوچە جیاوازەکان، بۆ ئەوەی ئەو مامۆستایانە بناسنەوە کە دەیانەوێت بڕۆن بۆ سنوری (پارتی) بۆ وەرگرتنی موچە، ناوەڕاستی نەوەدەکان ڕۆژگارێکی زۆر سەخت و گرانیەکی بێوێنە و نەهامەتیەکی سەرسوڕهێنەربوو، (پارتی) ئەم هۆکارانەی کردە کەرەستەی ململانێی ئیدارەکان، مامۆستایانیش بوونە ئەکتەری بێمۆڕاڵی و نائینسانیبونی دوو هێزی (کەرامەت)کوژ.
مامۆستایان بۆئەوەی بگەنە (هەولێر) دەیان چیرۆک و سیناریۆیان دروستکردبوو، بۆ ئەوەی لە بەخشندەی ژەهری موچەکەی (پارتی) و ئیهانە و سوکایەتی (یەکێتی) ڕزگاریان ببێت، ئەبێت دەیان درۆ بکەیت بۆ ئەوەی بە موچەیەک بگەیت، دەیان سوێند بخۆیت کە مامۆستانیت، ئەبێت پێناسی (یەکێتی مامۆستایان) لە لیباسی ژێرەوەی مناڵەکەت بشاریتەوە، چ فەرهود کرنێکی (کەرامەت)ە.
کەسێک کە خۆی ڕۆشتبوو بۆ وەرگرتنی موچەکە ئەم چیرۆکە واقیعییەی بۆ گێڕامەوە، وتی: مەلایەک لە پاڵما دانیشتبوو، مێزەرەی سپی و جبەی لەبەردا بوو، وتی: بەهۆی ئەوەی من مناڵێکم پێبوو،،، مەلاکە یاری و قسەی بۆ منداڵەکەم دەکرد، وتی: کە گەشتینە بازگەیەکی (یەکێتی) لە مەلاکەیان پرسی بۆچی ئەڕۆیت بۆ (هەولێر)؟،، مەلاکەش وتبوی:خوشکێکم خوێندکاری زانکۆیە و توشی ڕوداوێکی ئۆتۆمۆبیل بووە و منیش ئەڕۆم بەدەمیەوە!!!!!.
بۆ بەیانی ئەو مامۆستایانەی کە لە بازگەکان دەربازیانبوبو و گەشتبونە هەولێر، لەوێشەوە بۆ ئەو دەزگا حیزبییەی بەناوی ئیدارەوە موچەکانیان دابەشکردبوو، لەو شوێنە کەسەکە مەلاکەی دوێنێی دیبوو بە کراس و پانتۆڵەوە، کەسەکە لێی پرسیبوو تۆ مەلاکەی دوێنێ نیت لە پاڵما دانیشتبویت ؟، مەلاکەش وتبوی: بەڵێ ئەوم، بۆیە خۆم کرد بە مەلا بۆ ئەوەی لە بازگەکان نەمگرن، نان نیە ماڵەکەمدا و زۆر موحتاجم، هاتووم ئەم موچەیە وەربگرم و سوچێکی ژیان و کەموکوڕیەکانی ماڵەوەمان بۆ پڕبکاتەوە.
ئەم چیرۆکە پێمان ئەڵێت:(کەرامەت)یان کردینە نیشانەی تیرەکانیان، پاشان موچەکەیان پێداین، ئەم چیرۆکە پێمان ئەڵێت: چۆن ژیان و (کەرامەت)ی ئینسان لە نێوان دەستەڵاتی (یەکێتی و پارتی)دا، کەوتۆتە نێوان بەردی دەستاڕەکانیان و، هیچ بەهاو شکۆیەکیان بۆ ئینسان نەهێشتۆتەوە، دەستەڵاتێک مامۆستا بکات بە مەلا بۆ موچەکەی، دەستەڵاتێک ئینسان وەک داشی دامەی مەرامە سیاسی و ناشیرینەکانی خۆی بەکاربهێنێت، بێجگە شۆڕشی گێڕانەوەی (کەرامەت) هیچ ڕێگایەکی تری لەبەردەمدا نیە، شۆڕشی گێڕانەوەی (کەرامەت) واتە لەبنەوە هەڵتەکاندنی ئەم سیستەمە و کۆتایهێنان بە دەسەڵاتی یەکجاری (یەکێتی و پارتی).
هیچ شتێک لەوە ترسناکتر نیە کە دەستەڵاتێک گوێ لە داواکاری و داخوازیەکانی هاوڵاتیان نەگرێت، وەک ئەوەی هیچ لەوەش ترسناکتر نیە کە هاوڵاتیان فریو بە پەیمان و چەواشەکاری دەستەڵات بخۆن، ئەبێت خەڵک بە دەسەڵاتی پێرێ و ئۆپۆزسیۆنی دوێنێ چاوبەست نەبێت و بە شیعاری (کەرامەت، کەرامەت) بۆ بەیانی بڕوانێت، بە گەڕانەوەی (کەرامەت) بۆ ئینسانەکان و شۆڕشی گێڕانەوەی (کەرامەت)، ئینسانەکان دەگەڕێنەوە جێگاوڕێکای کۆمەڵایەتی خۆیان، هیچ ئینسانێک مەجبور نابێت سیما و کەسایەتی خۆی بۆ موچەکەی بگۆڕێت، شۆڕشی گێرانەوەی (کەرامەت) ڕێگایەکە بۆ گەڕانەوەی بەها ئینسانیەکان و ژیانێکی ئارام و ئاسودەی هاوچەرخ.

هیدایەت مەلا عەلی
٢٧/٩/٢٠١٦