شیرینم لەناو ئەو (پاس)ە ناسی کە هەفتەی جارێک یان مانگی جارێک لە زانکۆی بەغدا دەگەڕاینەوە بۆ شاری (کەرکووک).
ئەو لەبەشی زمانی عەرەبی دەیخوێند، منیش لە بەشی دەروونناسی. لەناو پاسەکە چەندینجار ئاخافتنێكی کورت دەکەوتە نێوانمانەوە. شیرینی کچێكی ئەندام وردیڵانەو چاو قڵەترێ و شەرمن بوو، هەمیشە مڵپێچێکی رەساسی خەت سپی و ناوازەو نازداری لە گەردنی دەبەسەت. منیش‌ لاوێکی ڕەشتاڵەی نەختۆکەک پیس و چڵکن بووم. ماڵی شیرین لە گەڕەکی تەپە بوو، ماڵێ ئێـمەش کەوتبووە ناو خانووە قوڕەکانی گەڕەکی شۆریجە، لە کۆڵانی ڕەشیدئاوا.
ئێوارەکیان لە بەغدا دەگەڕاینەوە، ڕۆژی پێنج شەمە بوو، هێشتا خۆر ئاوا نەبووبوو. نزیک بە شارۆچکەی (خالس) پێدەچوو شوفێری ئۆتۆبوسەکەمان خەوی لێکەوتبێت، لەسەر جادە قیرتاوەکە لایدا و سووکانی لەدەست دەرچوو. پاسەکە کەوتە ناو دۆلێکەوە، زۆربەی موسافرەکان سەروگوێڵاکیان شکاو برینداربوون. منیش لووتم بەر کورسییەکەی بەردەمم کەوتو خوێنی ڵێبەربوو. ئاوڕێکم بۆ لای شیرین دایەوە، بینیم ئەو تەندرووستی باشە و خەمنی منیەتی. مڵپێچەکەی لە مڵی کردەوە خستیە سەر لووتم تا بەر لە خوێنڕژان بگرێت. لووتم ئاوسابوو، ئازارێكی زۆری هەبوو، بەس لەشەرما دانم بەخۆمدا گرتبوو.
لەپاش پانزە خوولەکێک کە سەرجەم موسافرەکا هەریەک لەلایەک و بەسەروڕووخساری زامارەوە بەسەر زەوی پاڵکەوتبووین. شوفێرەکە بە شەڵە شەڵ بەسەرماندا دەسووڕایاوە و دڵنەوایی دەداینەوە. گوێم ڵێبوو نەفەرێک دەیگووت : ئەلحەمدولا سەلامەتین…
وردە وردە گەشتیارو ئۆتۆمبیلەکانی خەتی ڕێگاوبان فریامان کەوتن. ئەو ئۆتۆمبیلانەی بەرەو بەغدا دەچوون چەند بریندارو موسافرێکیان لەگەل خۆیان گواستەوە.
خۆرئاوابوو، دونیا تاریک داهات، بۆ بەدبەختی ئێمە ئۆتۆمبیلێک نەبوو بەرەو کەرکووک بگەڕێتەوە. شیرین دەیگووت : ئێستا خەمی دایکمە، چاوەڕووانمەونیگەرانە.
دواجار قەمەرەیەکی سپی بەرزایلی ڕایگرت و گووتی : فەرموون، سواربن من دەتانگەیەنمەوە کەرکووک.
لە ڕێگا بە شیرینم گووت: لەگەلتا دێم تا بەردەرگەی ماڵتان بۆئەوەی دایک و باوکت دڵنیابن کە ئێمە تووشی ڕووداو هاتووین.
شیرین بە بزەخەندەیەکەوە گووتی: دەزانیت باسی تۆم کردووە لای دایک و باوکم.
_ بەڕاستە، بۆچی؟
+هەر حەزمکرد کە دایک و باوکم دڵنیابن کە لەو ڕێگایە هەمیشە چەند لاوێکی کوردم لەگەڵدایە.
بەهەربار، کاتژمێر نۆی شەو گەیشتینە سەر کۆلانەکەی ماڵی شیرین، بینیمان دایک و باوکی لەبەردەم دەرگا ڕاوەستاون.
شوفێرەکە ڕووی دەمی لەمن کرد و گووتی : پێویست ناکات تۆ دابەزی، تۆش دەگەینمەوە ماڵ.
_ سوپاس، ماڵت ئاوابێت، من ئەمشەو لێرە دەمێنمەوە.
ڕاستی من نەمویست چیتر شوفێرەکە ئەزێت بەم، چونکە هەرچەند هەوڵماندا پارەی کرێی لێوەرنەگرتین.
لەپاش ئەوەی بەسەرهاتەکەمان بۆ دایک و باوکی شیرین گێڕایەوە، گووتیان: ئێمە خەمی تۆمانە لووتت ئاوساوە پێویستە بچیت بۆ نەخۆشخانە تیمارت کەن.
لەم قسانەدا بووین ( سەردار) برای شیرین بە تویۆتایەکی کۆرۆنا لەبەردەم ماڵ ڕایگرت و هاتە حەوشە، لەپاش هەواڵپرسین گووتی : ئێستا منیش لە نەقلیاتی بەغدا لە شوفێرەکانی خەتم پرسی گووتیان ڕووداوێک بەسەر ئۆتۆبیسێکی خەت هاتووە. یەکسەر هەستمکرد شیرینی خوشکم لەناو ئەو ڕووداوەبێت.
بەهەرحال، براکەی شیرین منی گەیاندە نەخۆشخانەی (کۆماری)، پەرستارەکان بەخێرایی برینەکانی سەر لووتیان پێچاو گووتیان پێناچێت شکابێت، بەلام ئەگەر کاتت بوو سبەینێ بگەڕێوە سکرینی دەکەین.
تا نیوە شەو سەردار برای شیرین بەردەوام لەگەلمابوو. لە ڕێگا کە بەرەو ماڵ دەگەڕاینەوە، گووتم : ڕاستی نازانم چۆنچۆنی سوپاسی تۆ بکەم!
سەردار دەستی خستە سەرشانم و گووتی : بە پێچەوانەوە، ئێمە سوپاست دەکەین، کە هەموو جارێک لەگەڵ شیرین خوشکم دەگەڕێیتەوە و چاوت لێدەبێت. تەنانەت ئەمڕۆ شیرین کە لە گەڕانەوە دواکەوت، باوکم دەیگووت؛ ئەگەر ئەو کوڕە شۆڕیجەیی لەگەڵدابێت، خەمم نییە.
پێشئەوەی کۆتایی بەم بەسەرهاتەم بهێنم، حەزدەکەم پێتان بێژم کە مڵپێچەکەی شیرینم بەردەوام بەدەستەوەبوو. لەماڵ چەندیجار دایکم بەدەستەکانی خۆی شۆری و گووتی؛ کوڕی خۆم، چەند هەوڵدەدەم ناتوانم شوێنی خوێنەکە لێبکەمەوە.
بۆ هەفتەی داهاتوو، مڵپێچەکەم خستبووە ناو زەرفێکەوە لە حانووتی زانکۆ شیرینم بینی و پێمگووت : ببورە، مڵپێچەکەت شوێن دڵۆپە خێنەکانی لووتمی پێوە ڵکاوە ، چەندیجار دایکم بەدەست شۆری نەیتوانی لێیبکاتەوە.
شیرین چاو پڕ لەگریان و بە ڕووخۆشی و پێکەنینەوە گووتی : پێدەچیت ئەو مڵپێچە ببێت بە لەکەیەکی سوور بۆ یادگارییەکانی ژیانم. چونکە چوارساڵ لەمەوبەر کوڕێک لە گەڕەک کە زۆرم خۆشدەویست، بە دیاری بۆی هێنام، ئەویش بە یەکجاری بەجێی هێشتم. ئێستاش دەبێت دڵۆپە خوێنەکانی تۆ لە گەردنم بئاڵێنم.
بەنەرمی نووکی قامکی دەستم نا بەسەرشانیاو گووتم : دڵگران مەبە، هەر یەک لە ئێمە لەکەیەکی سووری بە روحەوە نووساوە. بەس بەڕاستی ئەو مڵپێچە بە گەردنی تۆوە زۆر جوانە!

بەری بەیانێکی ساردی مانگی نەورۆز بوو، نم نم باران دەباری، هەر وەک هەموو سپێدەیەک بەرەو چایخانەکەی بەردەم پەیکەری (سەربازی ون) بەڕێکەوتم. لەژێر کەپری چایخانەکە پیاوێکی تەمەن پەنجا ساڵانم بینی، ڕەشتاڵە و دەم و چاو وردیڵانە، کابۆیەکی شین و چاکەتێکی خاکی خەتخەتی لەبەردابوو، پەرداخێک چای بەدەستەوە بوو، خێرا خێرا مژی لە جگەرەکەی ناو قامکەکانی دەستی دەداو بە نیگەرانییەوە تەماشای ئاسمانی دەکرد. لەم ساتە پەڵە هەورێکی ڕەش و نزم بە ئاسمانەوە کۆچیان دەکرد. من لەژێر کەپرەکە دانیشتم، کابرای چایچی کە هەم ناسیاومە و هاورێی منداڵیشمە، بە بێ سڵاوکردن، بە بێدەنگی پیاڵە چاێیکی لەبەردەمم دانا، سەرم سووڕما، وتم : چییە؟ مام بەکر، سلاوکردنیش لە بیرچووەتەوە
تەماشایەکی کردم، بە قامکی ئیشارەتی بۆ شوێنی پەیکەرەکە کردوو، وتی : نابینیت، نەتبیستووە، ئەمشەو پەیکەری (سەربازی ون) دیارنەماوە
کاتێ سەرم هەڵبڕی، واقم وڕماو حەپەسام. هەستامە سەرپێ، پیاڵە چاکە لەدەستم بەربووە خوارەوە
! کەواتە دەبێت دزرابێت_
نازانین. زەنگمان بۆ پۆلیس کردووەو چاوەڕوانین+
لە جێگەی خۆم دانیشتم. لەدڵ خۆمدا وتم : ئای لەم شارە وێرانە، بۆ تەنها رۆژێک مرۆڤ ناتوانێت بە ئارامی تیایدا بژێت
مەفرەزەیەک لە پۆلیس گەیشتنە شوێنی پەیکەرەکە، بە وردی پشکنین و ڵێکۆڵینەوەیان دەست پێکرد
کابرای چاکەت خاکییە لەبەرەکە، بەدەنگێکی پڕ لەخەم دەیگووت : لەپاش چەندین ساڵ ماندووبوون و نەخشەکێشان بۆ دروستکردنی پەیکەری مرۆڤێکی قارەمان وبێ تاوان و بێ ناونیشان، ئەمەش چارەنووسی بێت، سەیرە، وا چاکترە هەموومان کۆچ بکەین، ئەم شوێنە بەجێبهێڵین
هەستم کرد ئەویش وەک من دڵی تەنگەو تووڕەیە. پێمگووت : هەرچەند ئەو پەیکەرە سمبوولی نەتەوەو نیشتمانمان بوو، بەڵام ئێمە نابێت بۆ هیچ کوێ بچین، دەبێت هەوڵدەین و بزانین ئەو پەیکەرە کێ دزیویەتی، بۆچی دزراوە؟
کابرای چاکەت خاکییەکە، مژێکی قووڵی لە جگەرەکەی دا، وتی : ولات وێران بووە، دەوڵەت و میللەت پێکڕا دزن، ڕێز لە شکۆی نیشتیمان ناگرن. ئێستا وا سەرمانلێشێواوە نازانین دەستی تاوان بۆ کێ درێژکەین. کێ ناڵێت ئەم دزینە مەرامی سیاسی لە پشت نییە
پێمگووت :لەم مەملەکەتە هەموو ڕۆژێک کە لە خەو بێدار دەبیتەوە، گوێ بیستی ڕووداوی سەیروسەمەر دەبیت، دەبێت سەبر بگرین تا ڕۆژدەبێتەوە. بەڵام من سەرم لەوە سووڕماوە، ئەو پەیکەرە زۆر قورس و سەنگین بوو، دەبێت بەچی گواسترابێتەوە؟
لەم کاتە چەند ڕۆژنامەنووس و کامیرەمان نزیک بە باخچەی پەیکەرەکە گرد بوونەوە. داوای زانیاری زۆرتریان دەکرد لە پۆلیسەکان. وتە بێژی پۆلیسی شار لەبەردەم مایکرۆفۆنەکان بەپێوە وەستا و کەوتە دواندن : بەداخەوە، دوێنێ شەو، بەدەستی ناحەزانی گەل، شوێنی پەیکەری سەربازی ونیان ڕووخاندووە و پەیکەرەکەشیان لەگەڵ خۆیان بردووە. ئێمە بەرەدەوامین لە لێکۆلینەوە، هێشتا زووە تا پەنجەی گومان ئاراستەی لایەنێک بکەین
ڕۆژنامەنووس: بەڕێز، ئاخۆ بە چ ئامێرێک توانراوە ئەم پەیکەرە بگوازنەوە؟
وتەبێژ : وەک وتم … لێکۆڵینەوە بەردەوامە، بەڵام زانیاری تەواومان لایە کە ئەم پەیکەرە نە بە شۆفەڵ، نە بە تڕێڵە یان ئۆتۆمبیڵی بارهەڵگر گوازراوەتەوە
ڕۆژنامەنووس: کەواتە دەکرێت، بە هێڵی کۆپتەر ئەم کارە ئەنجام درابێت
_ نازانین.
ئەم چاوپێکەوتنە زۆری نەکێشا، لەپاش نیو کاتژمێر لەدوورەوە دوو دوو، سێ سێ یان بەپۆڵ گەنج و لاوانی شار لە فلکەو باخچەی پەیکەرەکە کۆبوونەوە و دەنگی ناڕازی جەماوەر بەرزبووەوە
سەرەتا پۆلیس هەوڵی دا گردبوونەوەکە ڕوونەدات، بەڵام زۆری پێنەچوو ئەم کۆبوونەوە بوو بە سروود خوێندن و ناڕەزایی دەربرین
پۆلیسەکان دەستڕێژێک تەقەیان ڕوو لە ئاسمان کرد.بەڵام گەنجەکان خوێنگەرم و بەتین بوون، جامی ئۆتۆمبیلی پۆلیسەکانیان شکاند. پۆلیسەکانیش لەترسا لەوناوە دوورکەتنەوە
لەشوێنی پەیکەرەکە، چەند دڵۆپە خوێنێک ڕژا، گەنجە خۆپیشاندەرەکان بە موبایڵەکان وێنەی سێڵفی و بە کۆمەڵ دەگرت، وەک ئەوەی سەرکەوتنێکی مەزنیان ئەنجام دابێت
کابرای چاکەت خاکی، ئاخێکی هەڵکیشا و وتی : ئاخۆ دەبێت دیسان چ دەستێکی پیس هاندەری ئەم گەنجانەبێت، لەسەرەتاوە من بە دانانی ئەم پەیکەرە خۆشحاڵ بووم، نەمزانی ڕۆژێک دادێت خەڵکی قوربانییەکانیان لەبیردەچیتەوە
پێمگووت : برا تۆ زۆر خەراپ بیردەکەیتەوە، هەمیشە گەنج لە هەوڵی ژیانێکی نوێ و پڕ لەبەختەوەری دان، گەنج ئارەزووی دوا ڕۆژێکی ڕووناکە، بەڵام دەستە پیسەکان دەبن بە بەربەست لەبەردەم ئازادی و خۆشییەکانی ژیان
وتی : دەزانم، دەزانم….بەڵام هەرکات و ساتێک تیشکێک و ڕووناکییەک بەدی دەکەین، نازانم ئەم حەمکە بازرگانە سیاسیانە لە کوێوە دێن، دەست دەگرن بەسەر هەموو سەرکەوتنەکانمان. تەماشاکە نیوەی جەماوەرەکە نازانێت بۆچی ڵێرە کۆبوونەتەوە
لەپاش دە خووڵەکێک چەند هێڵی کۆپتەرێک بە ئاسمانی شارەوە دەرکەتن و گەیشتن بە شوێنی خۆپیشاندەرەکان. ئاو گەرم و دووکەڵی غازی فرمێسکاوییان ڕژاند بەسەر خۆپیشاندەرەکان، ئەوانیش ناچار ئەوناوەیان چۆڵ کرد

من و مام بەکر چایچی بە سواری ئۆتۆمیلەکەم گەڕاینەوە بەرەو ماڵ، گوێمان لە بێژەری ڕادیۆکە بوو چاوپێکەتنی لەگەڵ چەند بەرپرسێک ئەنجام دەدا : داوا لە جەماوەر دەکەین، دان بە خۆیان بگرن، ئێمە لەگەڵ بەرپرسانی حکومەت لە گفتوگۆکردنداین

دوا چاوپێکەوتن لەگەل پیرەمێردێک بوو، بەدەنگی بەرز هاواری دەکرد :
ئێوە نوێنەری ئێمە نین، لەگەڵ حکومەت تێر گوو بخۆن
هەندێک جار لەکاتی ناخۆشی، مرۆڤ پێکەنینیشی دێت بە ڕووداوەکان. تووبڵێی کارەساتەکانیش بووبن بە گاڵتەجاڕی!. هەر بەدەم ماشێن لێخووڕینەوە لە مام بەکرم پرسی : ئەرێ ئەو کابرا چاکەت خاکییە کێ بوو؟ پەژارەوخەمبار دیاربوو، گوێم ڵێبوو دەیگووت : پەیکەری پیرۆز نابێت بشوێندرێت
مام بەکر، هەناسەیەکی قووڵی هەڵکێشا و وتی : نایناسیت؟ ئەوە پەیکەرسازەکە بوو!

ن/جەلال قادر

کاتژمێر یانزەوچڵ خوڵەکی پێش نیوەڕۆ. ئافرەتێکی بەتەمەن، فۆەتەیەکی شینی کاڵ بەسەرەوە بوو، گەشتیارم بوو. لەگەڵ دەرگا داخستنی تەکسییەکەم یەکسەر وتی : بە زووترین کات بمگەیەنە گەڕەکی (شۆڕجە).

• بەسەرچاو پوورێ. خێرە ئاوا پەڵەتە؟
• هەورێکی ڕەش بە ئاسمانەوەیە، پێدەچێت بیکات بە بارانێکی بەهێز.
• ئینشاللە نایبارێنێت تا دەگەینە لای ماڵی ئێوە.
• هەورەکە ترسناکە، لەوانەیە ببێت بە زریان.
  پێش بینیەکەی ڕاست دەرچوو، لە پاش چەند خوڵەکێکی دڵۆپە باران باری بەسەر جامی ئۆتۆمبیڵەکەم.
  گەشتیارەکەم بە فۆتە شینەکەی بسکە سپیەکانی شاردەوەو وتی : من خەمی کچەزاکەمە، لەپاش کاتژمێرێکیتر لە قوتابخانە بەردەبێت، نە چەتری پێیە نە قەمسەڵەیەکی زستانەی لەبەردایە
  _ کچەزاکەت چەند ساڵانە؟
• قوربانی بم. ٩ ساڵانە، دایک و باوکی لەسەرکارن، من دایانی دەکەم.
  دڵنەواییم دایەوە : پوورێ، گەڕەکی شۆڕجە زۆر دوورنییە، دە بیست خوڵەکیتر دەگەینە جێ.
• بە تەمای خودا، کەس نازانێت چی دێتە ڕێگامان!

لەسەر پردی ٤ پەڕینەوە، بارانەکە تا دەهات بەخوڕتر دەباری، هەوری ڕەش دونیای تاریک کردبوو، گرمەی هەورە تریشقەو تەقەی بروسکە بەرزبووەوە.
هەستمکرد قسەکانی پوورێ ڕاستدەرچوو، پێدەچوو بقەومێ و ڕێگامان لێبگیرێ.
سەرئەنجام باران بەخوڕ باری و بە ئاستەم بەرچاوی خۆم دەبینی. گڵۆپی چواری ماشێنەکەم داگیرساند و لەسەرخۆ دەمهاژووشت. گەشتیارەکەم دەستی بۆ ئاسمان بەرزکردەوەو کەوتە نزاکردن.
لە ڕێگای پێچاوپێچدا، ئۆتۆمبیڵەکەم بەسەر یەک دوو تاسەدا کەت.
پوورێ بە نیگەرانییەوە وتی : لەسەرخۆ برا، ئەم ناوە تاسەی زۆر لێیە.
ئاوڕێکم ڵێدایەوە و وتم:
بەڵێ، ئەم جادەیە بەناوبانگە بۆ خەراپی تاسە و چاڵی قووڵ قووڵ، من سەرم سووڕماە لەم حکومەتە،پارەی هەیە بۆ جەنگ، پارەی نییە بۆ چاککردنەوەی ڕێگاوبانەکان
نزیک بە شۆستەی جادەکە لاوێکی تەمەن بیست ساڵانم بینی، کەروعارەبانەکەی ڕاگرتبوو، قەمەسەڵە زستانی و باراناوییەکەی بەسەر خۆی و گوێدرێژەکەی دادابوو بۆ ئەوەی تەڕ نەبن.
ئۆتۆمبیڵەکەم بە تەنیشتیانەوە ڕاوەستاند.
پوورێ پرسیاری لێکردم : خێرە برا، خۆ هیچ ڕووینەداوە؟
_ نا پوورێ نیگەران مەبە، ڵێزمە بارانە و بەرچاوی خۆم بە جوانی نابینم. باشترە یەک دوو خوڵکێک بوەستین و چاوەڕوان بین تا ئەم بارانە لێیدەکاتەوە.
پوورێ لەسەر کورسییەکەی بزواو سەری هێنایە پێش و تەماشای دەرەوەی کرد. دیمەنی کەروعارەبانەکەی بینی. بەدەنگێکی پڕ لە سۆز وتی : ئا لێرە بوەستە، ئەو حمالە دەبینی باوەشی بە گوێدرێژەکەی کردووە، ئەوە کوڕی منە، قوربانی بم، چەند مهرەبانە، هاوڕێکەی خۆی جێناهێڵێ و دەیپارێزێت!

لە کۆتایی ساڵانی هەشتاکان جاحێڵ بووم حەزم چووبووە کچە عەجەمێک، ڕۆژانە لەناو باژێری- شارۆچکەی (نەغەدە) دەمبینی و دەردە دڵی خۆم بۆ بەیان دەکرد.
كیژێکی باریکەلانە و چاوڕەشی لێو باریک و خوێن شیرین بوو، بە بێ ئومێدییەوە دەیگووت : زەحمەتە ئێـمە بۆ یەکتربین، ماڵەوەمان ڕازی نابن بمدەن بە کوردی ئێراقی.
سەرەڕای بێ ئومێدبوونم، کەچی ڕۆژانە لەبەردەم دوکانێکی شەربەتفرۆشی سێ چوار کاتژمێر ڕادەوەستام بۆ دیدەنی نیگای ئەو پەرییە شۆخ و شەنگە.
شەربەتفرۆشەکە گەنجێکی گەنم ڕەنگ و قسەخۆش بوو، کە منی دەبینی دەیگووت : لەوەتەی ئەو کچە عەجەمە بێرە تێدەپەڕێت ڕزقم زیادی کردووە.
هەندێکجاریش بە ئەنقەست گۆرانیەکی حەسەن زیرەکی دەهاویشتە سەر زەبتەکەی :
نەسیحەت بێت بۆ دڵداری
عاشق نەبن بە ڕێبواری

کاتێک سێبەری ئەو پەرییە دەردەکەوت، دەپۆشۆکام و ئاگام لەخۆم نەدەما. دەمزانی ئەویش دڵی پێمەوەیە، جارجار ئاوڕی لێدەدامەوە و ئیشارەتی دەدامێ، لی ئەفسووس کە ئێمە لە دوو شوێنی جیاواز لەدایک بووبووین.
لە پاش چوارپێنج مانگ بڕیارمدا ئەو شارە بەجێبهێڵم، بڕیارمدا دوا سەردانی گەڕەکی کچە عەجەمەکە بکەم، ئەگەر بینیم ماچێکی مزری بکەم ئینجا ماڵئاوایی لێبکەم.
کاتێ نزیک بە ماڵیان بوومەوە، شۆک بووم، پەرییم بینی بە کراسی بووکێنی، دەست لەناو دەستی زاوا سواری ئۆتۆمبیڵیکی سووری کەشخە دەبوون.
خەریک بوو مێشکم بتەقێت، لە ئیرەییە سەرم لێشیوابوو. لەم کاتە، لە پڕ گوێم لەدەنگی چەند لاوێک بوو دارێکی ئەستووریان ڕادەکێشا بۆ سەر شەقامەکە، بەدەنگی بەرز دەیانگووت : ڕێ لە بووک و زاوا دەگرین تا بەخشیشێکی باش نەدات ئیزنی نادەین تێپەڕێت.
ئەم کردەوەیەم پێخۆش بوو، منیش بەدڵ و بەگیان هاوکارییانم کرد و کاریتەکەم لەگەڵیان ڕاکێشاو ناوەڕاستی جادەکەمان گرت.
ماشێنی بووک و زاواو کەسووکاری گەیشتە بەردەممان. سەرەتا زاوا بە قسەی خۆش و پاڕانەوە هەولیدا بەربەستەکە بشکێنێت، لەگەڵ گەنجەکان شانماننا بە شانی یەکتر، ئیزنی زاوامان نەدا ڕێگاکە ببڕێت.
زاوا ناچاربوو دەستی خستە گیرفانی بڕێک تمەنی دا بە گەنجەکان، ئەوان دوور کەوتنەوە، خۆم بە تاق و تەنها لە سەنگەر مامەوە، چەند جارێک زاوا پاڵی پێوەنام، وەک بەرد لە شوێنی خۆم چەقیم. دووبارە ناچاربوو دەست بنێت بە گیرفانی بڕێک پوولی پیشاندام، وەرمنەگرت.
بە تووڕيییەوە، یەخەی گرتم و هاورایکرد : هەی ئاژاوەچی، چت لێم دەوێت؟

• ماچێکی بووکە…
  قۆڵمی تووند گرت و گووشی و بایدا و خۆشی لەگەڵ سووڕاند، کەوتمە بەر پێی. نەمکردە نامەردی هەردوو ڵاقیم گرتوو بەزەوییدا و لەبنی خۆمنا، هاواری لێ هەڵسا، توومەز سەر ئەژنۆم بەر گوونی کەوتبوو.
  لەم کاتە بووکە وەک ناوبژیوان دەستی نەرمی خستە سەرشانم و وتی ؛ ئەتۆ شێت بوویتە.
  یەکسەر وەڵامیمدایەوە ؛ ماچێکم دێ ڕێگاتان بۆ واڵا دەکەم.
  زاوا کە هێشتا ئاخ و ئۆفی ژانی گونی بەری نەدابوو، هاواریکرد بەسەر بووک: ماچێکی بەرێ با لە کۆڵمان بێتەوە.
  بووکە لە جێی خۆی وەک پەیکەر ڕاوەستا. لە سەرخۆ و بە جوانی و مهرەبانی لێی نزیک بوومەوە. ماچێکی مزرم کرد. خێرا وەک فیشەکە شێتە، بێئەوەی ئاوڕ لەدوای خۆم بدەمەوە، چووم بە ئاسمانەو ونبووم.

لە سەرەتای سااڵنی هەشتاكان هەرزەكار بووم بە دزی ماڵەوە دەچووم بۆ سینەما. جارێکیان لەناو هۆڵی سینەماكە، ئەو كەسەی
بەتەنیشتمەوە دانیشتبوو پێشتر فیلمەكەی بینیبوو، جارناجارێ دەیگووت; ئێستا وادەبێت، واڕوودەدا
چەند جارێک پێمگووت ; دەتوانیت بێدەنگ بیت
خۆی پێڕاناگیراو بێدەنگ نابوو، گرتە بە گرتەی فیلمەكەی شی دەكردەوە
بێزاربووم، لە تەنیشتی گواستمەوە ،چوومە سەر كوریسیەكیتر
چیرۆكی فیلمەكەش زۆر سەرنج ڕاكێش بوو
پاڵەوانی ناو فیلمەكە مێردمنداڵیێك بوو، برا گەورەكەی هەمیشە تووشی كێشەی دەكرد، ئەمیش هەرچەند دەیزانی براكەی كەسێكی
خەراپە، بەاڵم لەترسی نایەرەکان ناچاربوو بەدوای کاکەی كەوێت
بەهەربار، كاتێ فیلمەكە تەواوبوو، لە سینەما هاتمە دەرەوە ، لەبەر روناكی و تیشكی خۆر بەرچاوم تاریك بوو، هەستمكرد
ونبوومە. ترسێك كەوتە گیانمەوە. لە ڕێبوارێكم پرسی; كام ڕێگا دەچێت بۆ الی پاسەكانی رەحیماوا ؟
وتی ; كوڕی خۆم، نیگەران مەبە، ئەم شارە زۆر بچووكە ، هەر ڕێگایەك بگریت، كۆتایی دێت و دەگەڕێتەوە الی پاسەكان، بەناو
چەند کۆاڵنێکدا چووم، بنبەست بوو و گەڕامەوە شوێنی خۆم. لە سووچی کواڵنیك تووشم بە تووشی ئەو کوڕە الوە بووەوە كە لەناو
سینەماكە بەتەنیشتیەوە دانیشتبووم
ساڵوێكی گەرمی لێكردم و وتی; فیلمەكە خۆش بوو؟
بەلێ .. بەتایبەت كاتێ منداڵەكە ونببوو، دەگریا، كە چاوی بە برا گەورەكەی كەوت گەشایەوە
ئایا تۆ دەزانی، ئەم فیلمە بەشی دووەمیشی هەیە؟
نەوەاڵ، تۆ بەشی دووەمیت بینیووە؟
بە بێزارییەوە وتی ; بەلێ… بەاڵم هەروەك بەشی یەكەم نابێت، لەبەشی دووەم هەر كای كۆن بە با دەكەن
وتم- زۆربەی فیلمەكان هەربەشی یەكەمیان خۆشە
بەم شێوەیە لەگەڵ ئەم الوە كەوتینە ڕێ . هەرچەند ئەو زۆربڵێ بوو، قسەكانی دووبارە بوون، بەاڵم منیش، پێمخۆش بوو تا ترسی
ونبوونم لەبیرباتەوە
لە بەردەم دوكانێكی شەربەتفرۆش تێپەڕین، گوێم لە مۆسیقایەکی خۆش بوو
ئەو دەستی خستە سەرشانم و وتی; ئەرێ ئەوە تۆ بۆ كوێ دەچیت؟
دەچم بۆ وێستگەی پاسەكانی رەحیماوا
.ئێ… منیش دەچم بۆ رەحیماوا، كەواتە باپێكەوە بگەڕێنەوە
وەك منداڵە بچووكەكەی ناو فیلمەكەم لێهات، بە بینینی برا گەورەكەی دلخۆش بوو، ئەگەرچی چاك دەیزانی كاكەی وەك گونی قۆڕ
وایە و پێوەی نووساوە
هاوڕێكەم وتی: وەرە با سەروشەربەتێك بخۆینەوە
سەروشەربەتێكی مێووژمان خواردەوەو لە جادەكە پەڕینەوە، تیمسێكی پۆڵەندیم بینی لەسەری نووسرابوو
(الماس)
وتم. ; با سواربین،ئەو ئۆتۆمبیڵە دەچێت بۆ رەحیماوا
پەلە مەكە.. كەی باوی سەیارەی پۆڵەندی ماوە، ئێستا كۆستەر دێت
دە خووڵەكێك ڕاوەستاین. پێمگووت ; ئەگەر بە سواری پۆڵەندییەكە بڕۆشتینایە، ئێستا لە رەحیماوا بووین
وتی : باشە تۆ پەڵەت چییە
لەم كاتە ئۆتۆمبیڵێكی )پۆڵەندی(تر هات و سەكنەكە لە جامی دەرگاكە سەری دەرهێناو هاواریكرد; رەحیماوا…رەحیماوا یەك نەفەر
لە دڵەوە حەزمدەكرد سواربم ئەو الوە جێبهێلم، بەاڵم لەشەرما بەتەنیشتیەوە ڕاوەستام
بۆ ماوەی نیوكاتژمێر چاوەڕوان بووین، هیچ ئۆتۆمبیڵێك نەهات و وردە وردە دونیاش خەریك بوو تاریك دادەهات
پێمگووت; برا، ئەمجارە هەر ئۆتۆمبیڵێك بوو خۆمانی تێدەكەین
پەڵە مەكە، من دەزانم كۆستەرە سپی و شینەكە هەر دێت
ئاخر درەنگە واشەومان بەسەرهات
تەماشایەكی كردم وتی: تۆ دەڵێیت دەترسێیت، تۆ لەگەڵ برای خۆتی
كە وتی; برا… یەكسەر چیرۆكی فیلمەكەم هاتەوە یاد، لەدڵ خۆم وتم بەخوا ئەم برادەرە تووشی بەاڵیەكم دەكات
لەپاش چاوەڕوانێكی دوورودرێژ، لە كۆتاییدا شەومان بەسەرداهات، ناوشار چۆڵ بوو، تاك تاك ئۆتۆمبیڵێك دەهات و دەچوو،
هەندێكجاریش تەكسی لەبەردەمان ڕادەوەستا، پێدەچوو ئەویش وەك من گیرفانی بەتاڵ بێت، هەربۆیە بە نادڵییەوە وتی; دەزانیت
چی؟ با وردە وردە بە پیاسە بڕۆینەوە
ماندوو و بێزاربووبووم، لێمپرسی; كام ڕێگا بگرین؟
وتی ; تۆ بەس بەدوام بكەوە، حەقت نەبێت
ڕێگا چارەیەكیترم نەبوو، لەگەلی بەڕێ كەوتم، هەرچەندە قسەكانی دووبارە بوون و چەنەی زۆر لێدەدا، بەاڵم چارەم نەبوو جگە
لەوەی كە دەبوو گوێ بگرم تا دەگەمە شوێنی مەبەست

هەرگیز هەستم بە هەژاری و دەست کورتی ماڵەوەمان نەکردبوو، تا ئەو ئێوارەیەی گوێم لە دەنگی باوکم بوو بە دایکمی دەگووت : ژنەکە. ئەگەر پاسکیلێکمان هەبێت، چیتر پێوسیت ناکات بە سواری ئۆتۆمبیڵ بچم بۆ سەرکار، کرێی ئەم سەرو ئەسەرمان بۆ دەگەڕێتەوە.
_ خەمت نەبێت، تۆ پاسکیلەکە بکڕە، من خۆم سبەینێ بە حاجی (زەینەب) دەڵێم کە بۆ سەرمانگی داهاتوو تەنها نیوە کرێی خانووەکەی دەدەینێ. بەڵام…ئایا تۆ دەتوانیت بەو ماندوویەتە، هەموو ڕۆژ ئەو ڕێگا دوورودرێژە بگریت تا دەگەیتە سەرکار؟
باوکم یەک دووجار کۆخی و وەڵامی دایکمی نەداوەیەوە.

چیرۆکی ئەم پاسکیل کڕینەم دەمێک بوو لە دەمی باوکمەوە بیستبوو، بەڵام وادیارە ئەمجارەیان بۆ مەبەستی بژێوی ژیانمان پێوست بوو پاسکیلەکە بکڕێت. بە ئاسپایی خۆمکرد بەژوورا. دایکم بە نیگەرانییەوە پییگووتم : تا دونیا تاریک دانەیەت ناگەڕێیتەوە ماڵ.

لەسووچێکی ژوورەکە دانیشتم، دایکم نانێکی تیری تەڕکرد، لەگەڵ جامێک پڕ لەماست لەبەردەممی دانا. لەگەڵ نان خواردنا هەستم بەشەرمەزاری دەکرد، لەدڵ خۆما بڕیارمدا کە گەورە بووم هاوکاری باوکم بکەم و هەموو ڕۆژ بچم بۆ سەرکار.
باوکم لەسەر جێگەکەی ڕاکشا، منیش بەتەنیشت دایکمەوە دانیشتبووم، لەناکاو بیرۆچکەیەک هاتە مێشکم و بە دایکم وت : سبەینێ دەچم چایخانە و دوکانەکان دەگەڕێم تا کارێک نەدۆزمەوە ناگەڕێمەوە ماڵ!.
دایکم بە ڕووخۆشییەوە وەڵامیدامەوە : نا کوڕی خۆم تۆ هێشتا منداڵیت، ناتوانیت کار بکەیت.
_ ئێ خۆ (عادل) میمکزام هاتەمەنی خۆمە و شاگردی چایخانەیە…

• باشە کوڕم… جارێ تۆ بخەوە بۆ سبەینێ خوا کەریمە…

ئەو ڕۆژە یاری تۆپی پێم زۆرکردبوو، ماندوو بووبووم و خەوم دەهات، سەرم نایە ناو کۆشی دایکم و بەدەم خەوەوە بە دایکم وت : ئەگەر من و باوکم ئیش بکەین دەتوانین پارەیەکی باش پاشەکەوت بکەین، لەماوەی یەک ساڵ دەوڵەمەند دەبین دەتوانین خانووەیەک بکڕین و لە کرێچییەتی ڕزگارمان بێت.
دایکم دەستی بەسەرم داهێناو وتی : ئەگەر خانووەیەکی خۆمان هەبێت، تۆش ژووری تایبەتی خۆت دەبێت، منیش چێشتنگەیەکی گەورەم دەبێت ئەو کات دەتوانم چێشتی خۆشتان بۆ ڵێنێم.
ئیتر ئەو شەوە نازانم چۆنچۆنی خەوم لێکەوت، بەڵام لە خەونما : خانووەیەکی گەورەمان هەبوو، حەوشەیەکی مەزن و باخچەیەکی خنجیلانەی تێدابوو، پاسکیلەکەی باوکم تیا لێدەخوڕی و دەسووڕامەوە!

ئەو ڕۆژەی حاجی ئامین بازاڕییەکەی دا بەدەستی (عەلی شامداڕی) تا بۆی بەرێتە ماڵەوە، هەوا گەرم بوو، بێزاری باڵیکێشابوو بەسەر لەشی (عەلی)یەوە.
ماڵی حاجی ئامین کەوتبووە پشت گردەکەی نەورۆز، دەبوایە عەلی شامداڕی چارەگە خووڵەکێک ڕێگا بکات تا دەگاتە ئەو گەڕەکە، بەڵام لە نیوەی ڕێگە عەلی ئارەق بەناوچاوانی هاتە خوارەوە و شەکەت بوو. لەبرسا ناو هەناوی قوڕەی دەهات و تووشی ژانەسەرێکی بێزارکەر بوو. لەپاش بڕینی چەند کۆڵانێک لەنیوەی ڕێگا پەکی کەوت، ناچار لەژێر سێبەری دیوارێک دانیشت تا پشوویەک بدات، لەم کاتە هەستی بە بەرزی پڵەی گەرمای لەشی کرد و گیانی کەوتە ڵەرزین.
تەماشایەکی ناو کیسەی بازاڕییەکەی کرد کە پێکهاتبوو لە کیڵۆیەک گۆشت و دەرزەنێک نانی گەرمی بۆن خۆش و سەوزەوات و بۆڵەترێ ڕەش و گەش.

عەلی لەو بیرکردنەوەیەدابوو کە بازاڕییەکە زوو بگەیەنێتە ماڵی حاجی ئامین تا حەق دەستییەکەی وەرگرێت و دوونانی گەرم و کیلۆیەک پیازوتەماتە بکڕێت و بگەڕێتەوە بۆ لای دایکە رسییەکەی کە لەبەیانییەوە چاوەڕوانی دوو پارووە نانیەتی… بەو خەیاڵەوە خەوی لێکەوت.
حاجی ئامین لەمێژبوو گەیشتبووە ماڵ و چاوەڕوانی عەلی شامداڕی دەکرد، نەختۆکەک نیگەران بوو، چونکە هەمیشە عەلی پێشتر دەگەیشتە بەردەم ماڵیان.
.
منداڵەکانی حاجی ئامین بە شۆخییەوە بەدایکیان وت کێ ناڵیت عەلی بازاڕییەکی بۆ مالێکیتر نەبردووە!
یەکێکیتریان وتی : برسی بووە و هەمووی خواردووە.
مێردەکەی حاجی ئامین وتی : دەبوایە بە تەکسییەک بازاڕییەکەت بهێنایەوە مال.

بەڵام حاجی ئامین بەزەیی بە عەلی دەهاتەوە و دڵتەنگ ببوو، بە منداڵەکانی وت : کوڕەکانم دەبچن سەرێک لەو کۆڵانانە بدەن، بەڵکو کاک عەلی بدۆزنەوە و بزانن چی بەسەرهاتووە.
منداڵەکانی حاجی ئامین گوێیان لە قسەی دایکیان نەگرت و وەڵامیشیان نەدایەوە.
پاشان داوای لەمێردەکەی کرد کە بە پیاسەیەک تا ناو بازاڕەکە بچێت و لە هەواڵی عەلی شامداڕی ببپرسێت. مێردەکەی وتی : دونیا زۆر گەرمە و ناتوانێت لە ماڵ دەرچێتە دەرەوە.
حاجی ئامین، ناچار خۆی لە ماڵ هاتە دەرەوە، بەناو کۆڵانەکان سووڕایەوە و چاوی گێرا. لەدوورەوە لەژێر سیێبەری دیوارێک عەلی شامداڕی بینی کە بەدیار بازاڕییەکەی خەوی لێکەوتووبوو.
حاجی ئامین چنگێ گۆشت و دووسێ نانی گەرم و بۆڵەترێیەک و چەند دەسکە سەوزەی جوودا کردەوە و خستییە ناو کیسەیەک بەتەنیشت عەلی یەوە داینا، باقی بازاڕییەکەی هەلگرتوو بەرەو ماڵ گەڕایەوە!.

(تێبینی: عەلی شامداریفرۆش کاسبکارێکی ناو بازاڕی رەحیم ئاوایە)

لەبەرئەوەی تەمەنم ڕوو لە هەڵکشان دەچێت و تا لەبیرم نەچوەتەوە، پێمباشبوو ئەفسانەی دڵداری نێوان خۆم و (زارا) یاداشت بکەم کە لە بەهاری ساڵی ٢٠٠٣ بە هۆی ڕووخانی ڕژێمی ستەمکاری بەغدا، بە یەکتر شادبیوونەوە.
من لەناو شاری هەوڵێر بووم، زارای دەزگیرانمیش کە چەندین ساڵ بوو نەمبینبوو لە کەرکوک بوو. لەشاشەی تەلەفزیۆنەکانەوە دەمانبینی هێزەکانی (ئاڕئاڕ) و پێشمەرگە، لەسەر کەل و بناری شاری کەرکوک خۆیان مەلاس دابوو بۆ تاڵان کردن و ئازادکردنی شارەکە.
خزمێکم هات بەدوام و وتی : وەرە لەگەلم دەتبەم بۆ کەرکوک، بەدڵنیاییەوە بە دەستی بەتاڵ ناگەڕێینەوە.

• کێشەی من تەنها دۆزینەوەی زارای دەزگیرانمە، کە لەمنداڵییەوە یەکترمان خۆشدەوێت، بەڵام جارێ پەڵەم نییە تا باروودۆخەکە ئارام دەبێتەوە…
  خزمەکەم و چەند ماڵە هاوسێیەک، بەسواری پیکاب بەڕێکەوتن بەرەو کەرکوک.

بوو بە شەو، خەو نەچووە چاوم و خەیاڵم لای ئەوەبوو کە چەند ڕۆژێکیتر دەبێت بچم بۆ کەرکوک و کۆڵان بەکۆلان بگەڕێم تا ماڵی زارا دەدۆزمەوە.

لەگەڵ بەری بەیان دایکم لەخەو هەڵیساندم و وتی : تەماشاکە کەرکوک ئازاد کراوە، چەند ڕۆژێکیتر ئێمەش بەخۆشی دەگەڕێینەوە.
_ دایکە گیان تووبڵێی بتوانم مالی (زارا)ی دەزگیرانم بدۆزمەوە.
دایکم بە پێکەنینەوە وەلامیدامەوە : خۆزگە ئەم زارایەم ببینیایە بزانم چ کچە سەر ڕشکنێکە…
لەگەل ڕاخستنی سفرە و دانانی چایی و ماست، خزمەکەم لە دەرگەی حەوشە خۆی کرد بەژووراو هێلاک و ماندوو لێ دانیشت و وتی : هەر ئێستا گەڕامەوە، ئێوە نازانن چ حەشامەتێکە، خەلکی لە هەموو لایەکەوە ڕژاونەتە ناو شاری کەرکوک.
دایکم وتی : لەشاشەی تەلەفیزیۆنەکان دەیبینین.
لەپاش ئەوەی خزمەکەم چەند پیاڵە چاێیکی خواردەوە، ڕووی دەمی لەمن کرد و وتی : بەختیار مزگێنیت بەمێ (زارا)ی دەزگیرانتم دۆزیوەتەوە و قسەشم لەگەلی کردووە.
لەخۆشیا پارووە نانەکە لە قوڕگم گیربوو، پەرداخێ ئاوم خواردەوە و لێمپرسی : چۆنچۆنی بۆم باسکە!
_ لە دەروازەی شارەکە خانمێکی ڕووگەش و چاوڕەش و باڵا بەرزم بینی، لەسەر جادەکە ڕاوەستابوو و وێنەیەکی بەدەستەوەبوو پیشانی ڕێبوارەکانی دەدا و پرسیاری ڵێاندەکرد… ڵێی چوومە پێش تا وێنەکەی ناو دەستی ببینم و بزانم ئەم خانمە عەودالی چییە؟ کەچی سەیرمکرد وێنەی سەردەمی هەرزەکاری تۆ بوو. پێشئەوەی خانمەکە لێو ببزوێنێت، من پێمگوت : ئایا تۆ (زارا)یت؟
زارا لەخۆشیا باوەشی پێماکرد و لێمپرسی : چۆن دەمناسیت؟
وەسفی تۆم بۆ کرد و بەسەرهاتەکەم بۆ گێڕایەوە.
زارا لەخۆشیا پێی عەرزی نەدەکەوت. بەهەربار ڕایسپاردووم، کە سبەی ئەم کاتە کاتژمێر هەفتی بەیانی لەکەرکوکەوە بەڕێ دەکەوێت و لەناو شارۆچکەی پردێ چاوەڕوانت دەبێت.
_ ئەی بۆ لەگەل خۆت نەتهێنا؟
وتی : دەبێت ماڵەوە ئاگادارم کەمەوە، هەروەها پێیگووتم کە دەبێت (بەختیار)یش بەپیادە، کاتژمێر هەفتی بەیانی بەڕێ بکەویت.
دایکم وتی ؛ بۆ دەبێت بە پێ بڕوات… با تەکسییەک بگرێت.
_ پوورێ… (زارا)ی دەزگیرانی کوڕەکەت، لەپێناوی خۆشەویستیەکەیان ئەم مەرجەی داناوە، کە ئەو ڕێگایەی نێوانیان بە پێ ببڕن!.
دەستم نایە سەرشانی خزمەکەم وتم : ماڵت ئاوابێت، زۆر سوپاس بۆ ئەو مزگێنییە خۆشە، ئێستا دڵنیام ئەو کچەی بینیوتە زارا بووە، چونکە هەمیشە بۆ ژووانەکانیش مەرجی بۆ دادەنام.

سپێدە کاتژمێر هەفت شاری (قەراومەنارەم) بەجێهێشت و بەرە پردێ بەڕێکەوتم. وەرزی بەهاربوو کژوگیا سەوزو دڵی خەلکی زۆر خۆشببوو.
سەرجادە گشتییەکە پڕ لە ڕێبواربوو، نیوەیان بەدەستی پڕ دەگەرانەوە، نیوەکەیتر بەدەستی خاڵی ڕوو لەشار دەرۆیشتن.
لەڕێگە چەند برادەرو ناسیاوێکم، ئۆتۆمبیلەکەیان ڕاگرت و هاواریانکرد : بەختیار بەختیار وەرە لەگەل ئێمە جێگەمان هەیە.
وتم_ پێویست ناکات، من حەزدەکەم بە پیادە بڕۆم…

ئەو ڕۆژە هەندێک کەس ئەوەیان هەبوو کە چۆن زوو بگەنە شار و شتێک تاڵان کەن، هەندێ کەسیتر ئاواتیان دەخواست بە کەس و کاریان شادبنەوە، منیش یەک کێشەم هەبوو ئەویش چۆن بگەمە زارا و ماچی کەم.

پێشئەوەی کاتژمێر بگاتە ١٢ی نیوەڕۆ لە شارۆچکەی پردێ نزیکە بوومەوە، لەدوورەوە کچێکی کراس زەردم بینی لەسەر جادەکە ڕاوەستابوو. بەغاردان بەرەو ڕووی یەکتر ڕۆیشتین و بە ئامێزی یەکتر شادبووینەوە. تووند لەباوەشمکرد و تێر بۆنم کرد. ئەویش لە خۆشیا دەیچرپاندە بن گوێم و جوێنی پێدەدام و دەیگووت ؛ سەگباب بە درێژایی ئەم هەموو ساڵە تۆ لەکوێ بوویت…
نزیکەی چارەگە سەعاتێک دەست لەناودەست و چاوبازێمان دەکرد و ئاگامان لەکەس نەمابوو، تا لەپڕێکا وردە وردە هەستمانکرد خەلکێکی زۆر لەدەورمان ئاڵاون و دەیانویست بزانن چیرۆک و بەسەرهاتی ئێمە چییە. تەنانەت گوێم لەیەک دوو پیرەمێرد بوو، وتیان ؛ دوورکەونەوە.. کێ ناڵیت خوشک و برا نین.
نیگەران بووم بە خەلکەکەم وت : کاکە گیان دوور کەونەوە چیتان لە ئێمە دەوێت و بۆچی چاودێریمان دەکەن، ئێوە ئەو هەموو تاڵانکردن و ستەمکارییەتان لەبیر چووەتەوە و هاتوون وەک ندیتکەوبتکە تەماشای ئێمـە دەکەن؟
زارا بزە خەندەیەکی کرد و چرپاندییە بن گوێم : بەختیار گوێبگرە، بزانە ئەم خەلکە ئێستا چۆن فریو دەدەم.
زارا دەستی لەناودەستم بەرداو وەک شێر ڕووی لە جەماوەرەکە کرد و هاواریکرد : خەلکینە جوان گوێم لیبگرن، من و ئەم لاوە لە منداڵییەوە یەکترمان خۆشدەوێت و دەیان ساڵە یەکترمان نەبینیوە ئێستا بە دیداری یەکتر شادبووینەوە. دەمەوێت پرسیارێکتان لێبکەم، ئەگەر وەڵامەکەیتان زانی ئامادەم خەڵاتتان کەم.

هەرکە زارا باسی خەڵاتی کرد، جەماوەرەکە پتر گوێچکیان شڵ کرد بۆ قسەکانی.

_ من کاتژمێر هەفتی بەیانی لەشاری کەرکوکەوە بەڕێکەوتووم، هەروەها ئەم دەزگیرانەشم کە لەبەردەمتان ڕاوەستاوە، کاتژمێر هەفتی بەیانی لە شاری هەوڵیرەوە بە پیادە بەڕێکەوتووە، ئایا ئێمە کاتژمێر چەند بە دیداری یەکتر شادبووینەتەوە؟ لەسەر گۆشەی ئەم زەوییەدا، هەرکەس وەلامی ئەم پرسیارە بە دروستی بداتەوە ئامادەین جوانترین خەڵاتی پێشکەش بکەین.
دوو دوو، سێ سێ، خەلکەکە کۆبوونەوە و سەرقاڵی شیکارکردنی هاوکێشەکە و وەڵامدانەوەی پرسیارەکە بوون.
زارا تووند دەستی گوشیم و وتی : بەختیار گیان… وەک دەبینی خەلکی لەپێناو خەڵات کردن ئێمەیان لەبیرچووەتەوە… خێراکە، فرستە با بڕۆین و لێرە دوورکەوینەوە!

ساڵی 2000, بە مەبەستی سوپرایز کردنی دایک و باوکم بڵیتی
( تۆرەنتۆ، ڤییەنا، هەولێر)م بڕی. بەرلەوەی سەفەرکەم، کەسێک لەشارەکەم زەنگی لێدا و وتی : بیستوومە سەردانی کوردستان دەکەیت، تکایە ٣ گەڵات دەدەمێ بیگەیەنە دەستی ماڵەوەمان.

• گەڵا چییە؟
• لە کوردستان بە سەد دۆلاری دەڵێن گەڵا.

ئەم برادەرەی کەنەدا، (کەریم)ی ناوبوو کە چەندین ساڵ بوو نەمبینی بوو، ئیتر نازانم لە کوێ زانیبووی کە من سەفەردەکەم، بەلام وەک دەڵێن ئەم کەریمە گوێچکی ڕاداری هەیە و ئاگای لە جمووجۆڵی هەموو پەناهەندەیەک هەیە!

بەهەربار کەریم سێ سەد دۆلارو نامەیەکی دایە دەستم و وتی : ئەوە ژمارەی تەلەفۆنەکەی (مویەد)ی برامە لە شاری هەولێر دەژێت، ئەمەش دۆلارەکان کە نوێن و تازە لە بانک وەرمگرتووە.
پێمگووت : خەمت نەبێت، من دۆلاری دڕاو وکۆن لەگەل خۆم هەلناگرم. بەڵام یەک تکام هەیە : جارێ خەبەر بە ماڵەوەتان نەدەیت، چونکە دەمەوێت (دایک و باوکم ) سوپرایزکەم!
– بەسەرچاو…وەدەکەم.

لەپاش چەند ڕۆژێک، بەیانییەکی زوو گەیشتمە فڕۆکەخانەی هەوڵێر، بەسواری پاسێک لەگەل چەند گەشتیارێک لە گۆڕەپانێکی خۆلاوی دابەزین. لەوێوەش تەکسییەکی تایبەتم گرت، کە شوفێرەکەی تەمەنی چڵ ساڵ دەبوو، کەپوو خرو سەرکەچەڵیکی قسەخۆشبوو. هیوادارم ناوی ئەم شوفێرەتان (خاڵۆ مەجید) تا کۆتایی بەسەرهاتەکە لەبیر نەچیتەوە!.

شەستی و شەستی بەرەو گەڕەکی (ئیسکان) کەوتینە ڕێ. گزنگی بەیانی بوو،دوکاندارەکان دەڕڕابەکانیان هەڵدەدایەوە، خەلکی لە نانەواخانەکان ریزیان بەستبوو.
بە خاڵۆ مەجیدم وت : لەبەرئەوەی هێشتا زووە دەکرێت بڕۆین لە چایخانەیەک دوو چای گەرم بنۆشین.

• بەسەرچاو…دیارە زۆرت برسیەو پەلەت نییە..
• ئەگەرچی دەزانم دایک و باوکم تا ئێستا دەجار نوێژو ڕکاتیان خوێندووە، بەلام من حەز بە چای چایخانە دەکەم.

لەسەر شەقامی شەستی لە چایخانەیەک نانی بەیانی و سێ چوار چای گەرممان خواردەوە. بەتەنشت چایخانەکەوە دوکانێکی بەقاڵی لێبوو کە تازە خاوەنەکەی شتەکانی دەهێنایە دەرەوە و ڕێکی دەخست. بە شوفێرەکەم وت : دەمەوێت فەردەیەک و شەکرو برنج و ڕۆن و ئاوتەماتە بکڕم بۆ ماڵەوە.
شوفێرەکە پێکەنی و وتی : برا پەلەت چییە؟
بە پێکەنینەوە وتم : بەخوا..خاڵۆ دوای چەند ڕۆژێکتر ماڵەوەمان پێمدەکڕن و براکەم گیرفانم بەتاڵ دەکات!.

• زۆرچاکە تۆ دانیشە، خۆم معاملە لەگەل دوکاندارەکە دەکەم، چونکە ئەگەر بزانێت خارجیت قۆڵتدەبڕێت!.
  زەخیرەی یەک دوو مانگم بۆ ماڵەوە کڕی، شوفێرەکە خستییە سنووقی تەکسییەکە و بەڕێکەوتین!
  کاتێ گەیشتینە بەردەم ماڵ، بینیم پیرەمێردێکی درێژ و ڕەقیتە لەگەل گەنجێک لەبەردەم دەرگە، لەگەل دایکم گفتووگۆیانە. هەرکە دایکم گوێی لەدەنگی ماشێنەکە بوو، خێرا هاتە پێش و باوەشی بۆ کردمەوە.
  تا چەند خووڵەکێک لەباوەشی دایکم بووم، دەستی بەسەرما هیناو تێر بۆنیکردم.
  لەم کاتە پەشۆکابووم نەمزانی کاکی شوفێر چۆنچۆنی جانتای سەفەرییەکەی داگرت و خستییە حەوشەوە، بەلام لەبیرمە ژمارەی تەلەفۆنەکەی پێمدا و بەدایکمی وت : پڵە چاوت ڕۆشن.
  لەبەرچاو ون بوو!.
  لەپاشئەوەی باوکشم لەباوەشکرد، باوکم وتی : کوڕی خۆم، ئەو پیرەمێردە لەگەلە کوڕەکەی چەند ڕۆژە هاتوون لە دەرگە دەدەن و دەڵێن کوڕەکەتان لەخارج دەگەڕێتەوە و پارەی بۆمان هێناوە، تکایە هەرچی ئامەنەتێکی ئەم ماڵەت لایە هەر ئێستا بیاندەرێ.
  وتم : کەواتە ئێوە دەتانزانی من دەگەڕێمەوە، من دەمویست سوپرایزتان دەکەم.
  دایکم وتی : ماوەکەیە خەونم بە تۆوە دەبینی و دەمزانی دەگەڕێیتەوە، بەلام ئەم پیرەمێردە سێ چوار ڕۆژە هەردێت و دەروا و دەڵێ کوڕەکەتان نەهاتەوە، بەڕاستی ئێمەشی نیگەران کردبوو، زۆر دەترسام لەو ڕێگەیە شتێکت بەسەر هاتبێت.
  ناچار چوومە بەردەگە و وتم : فەرموو خاڵۆ؟
• کەریمی کوڕم لە کەنەدا لەگەل تۆ دەژێت،ئامانەتی بە تۆ ناردووە.

فەرمووم لێیانکرد کە بێنە ژوور دانیشن، بەڵام وتیان پەلەمانە ئامەنەتەکەمان بەرێ و دەڕۆین.
لەداخا چوومە ژوور و لەناو جانتاکە زەرفی نامەکەم دەرهێناو سێ سەد دۆلارم دایەدەستیان و وتم : جوان بیژمێرن و سەیری بکەن، کوڕەکەتان سێ سەد دۆلاری بۆ ناردوون!.
براکەی کەریم کە ناوی (مویەد)بوو، دۆلارەکانی خستە گیرفانی و بەپەلە تێیان چەقاند و دوورکەوتنەوە.
بۆ ماوەی نیو کاتژمێرک دەبوو هێشتا دەستم لەناو دەستی باوکم بەرنەدابوو. لەپڕ لەدەرگە درا، برا بچکۆڵانەکەم پێیوتم : کاکە…دیسان ئەو پیرەمێرد و کوڕەکەیەتی دەیانەوێت قسەت لەگەل بکەن.
ڕۆیشتمە بەردەرگە و وتم : فەرموون…
مویەد وتی : لەڕیگە نامەکەمان خوێندەوە براکەم نووسیوویەتی ٨ گەلام ناردووە، کەچی تۆ ٣ گەلات پێداوین!
لەپاشئەوەی چاوم بە نامەکە خشاند بینیم ڕاستدەکەن، کەریم ٨ ی نوویسوە. بە لەپی دەستم ناوچەوانم سڕییەوە و ڕووی دەمم لە پیرەمیردە ڕەق و قیتەکە کرد وتم : مامی خۆم.. من زۆر باش لەبیرمە کە کوڕەکەتان سێ سەد دۆلاری پێداووم…بەلام خۆم چەند ڕۆژێکیتر تەلەفۆن بۆ کەریمی کوڕتان دەکەم، بزانم بۆ لە نامەکە نووسیەتی هەشت سەد!.
باشبوو بێ مشتوومڕ دوور کەوتنەوە، ئەوەی جێگەی سەرسووڕمان بوو، ئەم پیرەمێرد وکوڕەکەی ڕێگەکردنێکی سەیریان هەبوو بەمرۆڤی ئاسایی ناچوون، هەنگاوەکانیان وەک بازدانی (کەنخەر) وابوو، لەپڕێکا وەک فریشتە ون دەبوون.
ئاوێکم بەخۆمداکرد و لەپاش چەندین ساڵ لە غەریبی بۆ یەکەمینجار لەگەل مالەوە دانیشتم بە شادییەوە نانی بەیانی و چایی دەستی دایکم دەخواردەوە، لەپڕ سێ بارە لەدەرگە درا، برا بچووکەکەم وتی : کاکە دیسان پیرەمێردو کوڕەکەیەتی دەیانەوێت بتبینن.
هەناسەیەکی قووڵم هەلمژی، گوێم ڵێبوو دایکم وتی : ڕەبی خوایەگیان ئەم کوڕەم لە دەردوبەڵا بەدوورکەیت…
هەستام و چوومە دەرەوە و دەرگەی حەوشەم داخست و بە تووڕییەوە وتم : فەرموون..
مویەد وتی : داوای لێبوردن دەکەین ئەوڕۆ بێزارتمان کرد، بەلام ئەو سێ گەلایەی تۆ پێتدام یەکیان لا گوێچکی دڕاوە.
سەد دۆلارە دڕاوەکەی دایە دەستم، تەماشایەکیم کرد و وتم : برا ئەم سەد دۆلارە هی من نییە، کوڕەکەتان دۆلاری نوێی پێدام و دۆلاری کۆنیشم لەگەل خۆم نەهێناوە…
پیرەمێردەکە وتی : باشە ئێستا ئێمە چیبکەین؟

• نازانم چی دەکەن، بەلام سەد دەرسەد بە دڵنیاییەوە ئەم پارەیە هی من نەبووە، پاشان من لەبەرچاوی خۆتان ژماردم و دامە دەستتان؟
  هەستیانکرد من تووڕەمە و ئاگرم لێدەبارێت، بە خوێن ساردییەوە، وتیان باشە تەلەفۆن بۆ کوڕەکەمان دەکەین!
  بێ خواحافیزی دوورکەوتنەوە، منیش ئارەقی شین و مۆرمکردبوو گەڕامەوە باوەشی دایکم.
  ئینجا براکەم جانتای سەفەرییەکەی کردەوە و هەرچی دیاری جوان بوو بۆ خۆی هەلیگرت و کراسێکی شینی ئاسمانیم بەدیاری بۆ باوکم هێنابوو، ئەوەشی قووتدا و وتی : کاکە، باوکمان قەمیسی قاوەیی دەپۆشیێت، ئەم کراسەی تۆ هێناوتە (مارکەیە) و بۆ باوە نابێت!
  پارچەیەک قوماشی هیندی گووڵدار و قاوەیەکی کاڵ لەگەڵ فۆتەیەکی سپییم بۆ دایکم هێنابوو، براکەم وتی : کاکە تۆ وادەزانیت دایکمان کچی چواردە ساڵە، ئەم قوماشە بۆ ئەو نابێت، من خۆم لە بازاڕی (پیریێژنان) کراسی بۆ دەکرم!.
  لەم کاتە دایکم تووڕە بوو، وتی : ئەو قوماشە جوانە بدەرەوە دەست خۆم ، دیاری کوڕ خۆمە جوان و ناشیرین من لەناو بوخچەکەم هەڵیدەگرم!.
  لەم کاتە چواربارە، لەدەرگە درا. براکەم وتی ؛ مەترسە پیرەمێردەکە نییە، شوفێری تەکسییەکە.
  چوومە دەرەوە، شوفێری تەکسییەکە داوای لێبووردنی کرد وتی : ببوورە لەبەر ژاوەژاو لەبیرمچووبوو تەنەکە ڕۆن و فەردە شەکرو ئاوتەماتەکە لەناو سنووقی تەکسسیەکە داگرم.
  زۆر سوپاسیکردم.
• لەبیرت نەچێت بۆ ڕۆژی گەڕانەوەت بۆ فڕۆکەخانە زەنگم بۆ لێبدەیت!.
  ویستم وەلامی بەمەوە، هاتەوە یادم کە من کرێی تەکسسیەکشم نەداوە. بەلام لەم کاتە پیرەمیردە ڕەقیتەکەو مویەدی کوڕی لەبەردەم دەرگە قیت وەستان.
• خێربیت…ئەمجارە چییبووە؟
• هیج نەبووە، بەلام بیرمانکردەوە، کە تۆ دەتوانیت ئەم سەد دۆلارە دڕاوەمان بۆ بگۆریت؟
• نەخێر….
  پیرەمێردەکە وتی : کوڕی خۆم، بیستوومە لە خارج ئەگەر دۆلار دڕاو و کۆنیش بێت هەر معامەلەی پێدەکریت!
• بەڵی…بەلام ئەم سەد دۆلارە هی من نەبووە!.
  مویەد وتی : تۆ بۆمان بگۆڕەوە، لە کەنەدا بیدە دەستی کەریمی برام و سەد دۆلاری تازەی لێ وەرگرە!.
• نەخێر. ناتوانم.
  پیرەمێردەکە وتی : ئەی بۆ هەشت وەرەقەکە چی بکەین؟.
  _ پێتانم وت…خۆم تەلەفۆن بۆ کوڕەکەتان دەکەم.

مویەد بە تووڕەیی وتی : برا..تۆ وەک هەشت گەلاکەمان پینادەی، ئەم وەرەقەیە بگۆڕە.
تووڕەبوون گەیشتە نووکی لووتم ، بەڵام دانم بەخۆمگرت و وتم : کوانێ سەد دۆلارە دڕاوەکە.
پیرەمێردە رەق قیتەکە، لەبەڕکی سەد دۆلارەکەی دەرهێناو دایە دەستم. تووند سەددۆلارەکەم لەناو لەپی دەستم ڵوولدا و ویستم بیدڕێنم، بەلام لەناکاو بیرۆچکەیەکم بۆ هات و وتم : گوێبگرن…ئێوە نەتان هێشت دایک و باوکم سوپرایزکەم، ئێوە گەشتەکەتان ڵێمکرد بە قووزەڵقوڕت…جوان گوێبگرن، لە ڕاستیدا کەریمی کوڕتان ٢ سەد دۆلاری ناردبوو، نە ک سێ سەد، ئەم سەد دۆلارە دڕاوە من بە هەڵە بە ئێوەم داوە.
مویەد دەستی نایە بانشانم و دڵنەوایی دامەوە، لەم کاتە کابرای شوفێر ڕۆێشت و دایک و باوکم و هاوسێکان لە دەورمان کۆبوونەوە و گوێیان لە مشتمووڕی ئێمە دەگرت.
پیرەمێردە ڕەقیتەکە دەستی مویەدی کوڕی گرت و وتی : بڕۆ با بڕۆین…..

نەختۆکەکە دوور کەوتنەوە، لەپڕ مویەد گەڕایەوە و وتی : باشە برا… سەد دۆلارە دڕاوەکەمان بەرەوە، خۆم لەبازار بەنرخێکی کەمتر وردی دەکەمەوە.
_ نەخێر چاوتان پیناکەوێت، کەریمی برات تەنها دوو سەد دۆلاری ناردبوو.
دایکم وتی : بیدەرێ کوڕم…تا لە کۆڵمان ببنەوە.
پیرەمێردەکە وتی : سەد دۆلارەکەمان بدەرەوە ..

• نایدەمەوە…چیتان پێدەکرێت بیکەن…لێرەش دوور کەونەوە تا گازی پۆلیسم لێنەکردوون.
  باوکە و کوڕە لەبەرچاو ون بوون.
  بەداخەوە وەک گوویان کرد بە سوپرایزەکەم، ڕۆژەکەمشیان تاڵکرد!.
  برا بچووکەکەم وتی : بڕۆ ژوورەوە کاکە، هێشتا تۆ چت دیتیە ئەمە هێشتا ئێ ئێیە، لۆلۆش ماوە…
  گویم لێبوو، پیرەژنێکی هاوسێمان بە دایکمی وت : چاوت ڕۆشن، سێوەخان، کوڕت لەخارج گەڕایتەوە، ئاگات لێبێت گورگ وتواڵ نەیخوات.

بەهەربار بۆ ئێوارە، سەد دۆلارە گوێچک بڕاوەکەم خستە گیرفانم و بەگەل برا بچووکەم بەرەو بازاڕی دۆڵارفرۆشان ڕۆیشتین. لە ڕێگە لە مەکتەب (هەلەبجە) زەنگێکم بۆ کەریمی (کەنەدا) ڵێدا و لێمپرسی : بۆچی لەناو نامەکە نووسیووتە هەشت سەد دۆلار، کەچی تۆ سێ سەد دۆلارت بەمن داوە؟
وتی_ داوای لێبوردن دەکەم. ڕاستە من نووسییومە ٨، بەلام بەخوا ئەو کاتە هەر سێ وەرەقەم لە توانابوو…ئیتر لەبیرم چوو ٨ بسڕمەوە و بیکەم بە ٣…

• ئێ برا ئەو هەشتە بوە سەرێشە بۆ من.
  _ ئەگەر لەتواناتدایە… بۆیان بکە بە هەشت، کە گەڕاییتەوە من پێنج وەرەقەکەت دەدەمەوە!.
• نەخێر. ناتوانم…بۆچی من میلیۆنێرم… هەروەها ئەی من بەتۆم نەگووت خەبەر بە ماڵتان مەدە و بەکەس مەڵێ کە من دەگەڕێمەوە دەمەوێت دایک و باوکم سوپرایزکەم.
  _ ببورە، من بە مویەد برام وت، کە هەفتەیەکیتر سەردانیت بکات، من چووزنم ئەوان وادەکەن.
• وەلا برا هەمووی خەتای تۆیە… خواحافیز..
  _ نا..نا ڕاوەستە ئیشیێکی بچووکم پێتە، بیستوومە دۆلارێکی دڕاوت داوەتە باوکم، ئەگەر زەحمەت نەبێت بۆیان بگۆڕە!
• کورە بڕۆ هەی گەمژە… من چۆن شتی وادەکەم. من دۆلاری تازەم پێبوو، تۆش دۆلاری نوێت پیدام.
  _ ئاخر لەوانەیە… برا بچووکەکەت لەمالەوە دەستکاری دۆلارەکانتی کردبێت!.

لەم کاتە لە تووڕەییە گۆشی تەلەفۆنەکەم داخست و ئیتر تێگەیشتم ( کەر بچێتە بەغدا نابێت بە ئێستر).
گەیشتینە بازاری دۆلارفرۆشان، کابرایەکی سمێڵ زڵ لەسەر تەنەکەیەک دانیشتبوو مێزێکی لەبەردەمدا بوو پڕ لە دراوی جۆراوجۆری وڵاتان، دۆلاری دەگۆڕییەوە.
سەد دۆلارە دڕاوەکەم پێ نیشاندا و وتم : ئەم سەد دۆلارە گوێچک بڕاوە دەتوانیت ورد کەیتەوە.
پارەکەی لێوەرگرتم ئەم دیو ئەو دیوی پێکرد و وتی : ئەم سەد دۆلارە دڕاوە ماوەی شەش حەوت مانگە دێت و دەڕوا و معامەلەی پێوە دەکرێت. ئەوە تەنها یەک کەس هەیە بە نیوە قیمەت لێت وەردەگرێت، ناوی (مویەدە).

لەگەل برا بچووکەکەمان بەسەرسووڕمانەوە سەیری یەکترمانکرد و لە کابرای دۆلارفرۆشمان پرسی : ئێستا مویەد لەکوێ ببینین؟
_ مویەد شوێنی نییە، وەک جنۆکە وایە دیارنییە کەی دێت وکەی دەڕوا!.

سەد دۆلارەکەم ورد نەکردەوە و گەڕامە ماڵەوە، چەند هەفتەیەک بەسەر گەشتەکەم بەسەرچوو. ڕۆژێکیان پیرەمێردە ڕەق وقیتەکە و کوڕەکەی لەدەرگەی حەوشەیان داو براکەم وتی : خۆیانن.
من وتم نامەوێت بیانبینم.
لەپاش چەند خووڵەکێک براکەم وتی : دەڵین ئێمە ڕازین و داوای لێبوردندەکەین، با سەد دۆلارە دڕاەکەمان بداتەوە.
لە کەڵەڕەقیمدا و وتم : سوێنم خواردووە نایاندەمەوە، دەمەوێت ئەم سەد دۆلارە لە کوردستان دەرهێنمە دەرەوە!.
باوکم ئحمێکیرد و بە پێکەنینەوە وتی : کوڕی خۆم کوردایەتی بە دۆلارەوە مەکە، بەو دۆلارە دڕاە کێشەکە چارەسەر نابێت…مرۆڤ چاوی قایمە دوور نییە لەسەر دۆلار بکوژرێت…
_ باوکە گیان … حەزم پێیان نییە و نامەوێ چارەیان ببینم، پێیان بڵێن دوورکەونەوە!.

دۆلارە دڕاەکەم پێیان نەدا، بەلام شەوان وەک کێچێک چووبێتە لەشمەوە سەرتاپەی بەدەنم دەخوورا. ویژدانم ئازاری دەدام. بڕیارمدا چەند ڕۆژێک پێش گەڕانەوەم زەنگیان بۆ لێدەم دۆلارە گوێ پچڕاوەکەیان بدەمەوە.
لەپاش ماوەیەک کاتێ گیرفانم بەتاڵ بوو، ئیتر هەستمکرد ژیان ئاسایی بوەتەوە و شتەکان بوونەتە ڕۆتین و وەک جارانیش خزم و کەس ناهاتن بۆ پێشوازی و پەیوەندییەکان پێچەوانەیە، دەبێت من یەک بە یەک سەردانییان بکەم و کاتەکانم لەگەل برادەر خۆشەویستەکانم کەمترکەمەوە. لەناکاو خاڵۆ (مەجید) شوفێری تەکسییەکەم هاتەوە یاد کە کرێکەم پێنەداوە. لە برا بچووکەکەم پرسی : ئایا ئێوە کرێتان بە کابرای تەکسی بەخشی؟
_ نەخێر…بۆ ناشێت کرێت نەدابێت؟

• من نایەتەوە یادم کرێم پێدابێت!.
  برا بچووکەم وتی : کاکە… تۆ دەڵێی لە گوێی گا نووستووی، ئەگەر کرێت پێنەدابێت تا ئێستا سەدجار لە دەرگەی ماڵمانی دابوو!.
  _ برا …دونیا یەکجار وانییە، هێشتا مرۆڤی باش ماوە…
  براکەم پێکەنی و وتی : دە وەلایی ئەگەر کرێت پێینەدابێت، تا ئێستا داوای نەکردبێت ئەوە بە دڵنیاییەوە سەد دۆڵارێکی لێت دزیوە…
• وانییە، ئەی هەر ئەو نەبوو، زەخیرەکانی بۆمان گەڕاندەوە!.
  براکەم وتی : ئەها….کەواتە کە گەڕایەوە بۆ جاری دووەم، بۆچی داوای کرێکەی نەکرد؟ ها…بەخوا ئەو شتانەشی بۆیە گەڕاندەوە تا ئێمە موتمانەی پێبکەین و گومانی ڵێنەکەین!.
  هەستام لەناو بوخچەکەی (داکم)، پاسەپۆرتەکەم دەرهێناو ژمارەی کابرای تەکسیم دۆزییەوە، زەنگێکم لێدا : خاڵۆ مەجید، برا چۆنی؟ من سبەی کاتژمێر ٩ی بەیانی فڕینم هەیە و دەگەڕێمەوە…دەتوانیت بێیت بەدوام.
  _ بەسەرچاو….کاتژمێر شەشی بەیانی لەبەردەم دەرگەی ماڵتان دەبم!.
• بۆچی شەشی بەیانی؟
  _ مەگەر تۆ نازانیت، لەم ولاتە چی دەگووزەرێت، لەوانەبێت فڕۆکەکە بەجێت بهێڵێت.
• باشە ..دەتبینم…
  برا بچووکەکەم پێگووتم : من بە (ساڵاری) برادەرم گووتوە و بەڵێنم پێداوە کە تۆ بگەیەنینە فڕۆکەخانە!.
  _ ببورە…تازە بەڵێنمان بەم کابرایەدا!.

براکەم تووڕەبوو وتی : دە تۆ ئەو ژمارەیەم بدەرێ خۆم تەلەفۆنی بۆ دەکەم، دەزانم ئێوەی خارجی شەرمدەکەن.
_ نایدەم و قسەم کردوە بڕایەوە.

لەگەل سپێدە نانی بەیانییم لەگەل دایک و باوکم خوارد و لەپاش گریان و فرمێسک ڕژان لە یەکتر جوودا بووینەوە.
برا بچووکەکەم. لەباوەش گرت و وتم : ئاگات لە دایە و باوە بێت.
ئەویش چەند دڵۆپە فرمێسکی ڕشت و وتی : منیش تا فڕۆکەخانە لەگەڵت دێم.
_ نەخێر…بەڵام من دیناری عێراقییم پێ نەماوە، ئەگەر دەکرێت کڕێی دووسەری ئەم کابرا شوفێرەم بۆ بدەیت.
_ بەخوا کاکە…منیش پارەم لا نییە…خۆت لە ڕێگە بیست دۆلارییەکی بدەرێ!.

بەهەرحاڵ خۆم و شوفێری تەکسی شەستی و شەستی بەرەو فڕۆکەخانە کەوتینە ڕێ.

بۆ چەند خوولەکێک بێدەنگ بووبووم و خەیاڵ بردمییەوە، کەئەم خەلكە چەند خەراپ گۆراون. لەپڕ هاتەوە یادم، لەبیرمچوو زەنگ بۆ (مویەد) بکەم و سەد دۆڵارە دڕاوەکەی بۆ بگەڕێنمەوە. بە کابرای شوفێرم وت برا کاتمان هەیە لە شونێک دۆلار بگۆریینەوە، چونکە وابزانم کڕێی بەڕیزتانشم نەداوە.
شوفێرەکە کە هەرگیز ناویم لەبیرناچێتەوە خاڵۆ (مەجید)، بە بزەخەندەوە وەلامیدامەوە ؛ تۆ باسی چی دەکەیت…. تۆ ئێستا لەگەڵ پیاو دانیشتوویت، سوحبەتی دۆلارودینار مەهێنە گۆرێ!.
_ئاخر حەقی خۆتە کرێ وەرگریت…

• گوێی مەدەرێ…با بگەینە فڕۆکەخانە و بزانین چی دەبێت، خوا کەریمە!

زۆرجار مرۆڤ دڵی تەنگ دەبێت لەپڕێکا تووشی بە کەسێکی جوان دەکەوێت و بە ئاخاوتنیک خەمەکانی دەڕەوێتەوە، ئەم شوفێری تەکسییەش پیاوچاک و مەردانە دیاربوو، کاتێ بەتەنیشتییەوە دانیشتبووم هەستم بە بەختەوەری دەکرد.
خالۆ مەجید بە سوحبەتەوە وتی : دەتەوێت جارێکیتر گوێ لە (خاڵقی) بگریت. کە دەڵێت دەگەڕێمەوە بۆ ولاتەکەم.. دەگەڕێمەوە بۆ نیشتمانەکەم…
پێکەنیم و وتم : ژیانێکی سەیروسەمەرە، مرۆڤ بەدرێژایی تەمەن خەون و هیواکانی لەبەرچاوی خۆی دەبینێت دەبێت بە تەم.

لەڕیگە بەدەم ڵێخوڕینەوە مەجیدی شوفێر لێمیپرسی : ئەرێ ئەو پیرەمێردە ڕەقیتەیە لەگەل کوڕەکەی چییان ڵیت دەویست؟
سەد دۆڵارە گوێ پچڕاوەکەم لەسەر دەشبووڵکە داناو پیشانمدا و تەواوی بەسەرهاتەکەم بۆ گێڕایەوە.
خاڵۆ مەجید بەدەم پێکەنینەوە و وتی:
کاتێ مرۆڤ ڕووبەڕووی ئەم جۆرە بەشەرانە دەبێتەوە، دونیای لەبەرچاو دەکەوێت!

لە کۆتاییدا گەیشتینە گۆڕەپانە تۆزاوییەکەی فڕۆکەخانەکە. دەستمبرد لە باخەڵم پەنجا دۆلارییەکم دەرهێناو بە شوفێرەکەم وت : تکایە گوێبگرە..دەزانم تۆ پیاوەتی خۆت کرد. ئەم پارەیە وەک دیارییەک لە برای خۆت وەرگرە.
_ بەسەری تۆ وەریناگرم… من ئەوەندەم لێتدەوێت کە گەڕایتەوە خارج لەناو برادەرەکانت ئەم بەزم و ڕەزمەت گێڕایەوە، پێیانبێژیت دەنا هێشتا لە کوردستان یەک پیاو ماوە ئەویش مام مەجید شوفێری تەکسییەکەیە!.

مەجیدی شوفێرم لە ئامێزگرت و وتم : زۆر دڵتەنگم…بەم شێوەیە ئەو خەلکە دەبینم لەبەر تەماحی چاوچنۆک بوونە!.
_خەمی مەخۆ…برا دونیا چ نییە، کەس لەگەل خۆی چ نەبردییە گۆڕێ، بەلام تکات لێدەکەم ئیتر ئاگاداری خۆتبە ئێستا ئێمە لەسەردەمی بێ شەرمی بێ ڕێزییدا دەژین!

جانتاکەم دایە بانشانم، سواری پاسی فرۆکەخانەکە بووم و لە دەروازەوە بەگەل گەشتیارەکانیتر چووینە ژوور.
لەپاش پشکنین و لێپرسینەوەو دوو کاتژمێر چاوەڕووانی لە ترانزێت، بۆ کاتژمێر هەشت سواری فڕۆکە نەمساوییەکە بووم. بەتەنیشت پەنجەرەکەوە دانیشتم و کەوتمە داڵغەلێدان، هیواش هێواس فڕۆکە کەوتە جووڵە و چوو بە ئاسمان و باڵەکانی چەمانەوە بۆ ئەوەی بۆ دواجار قەراتی هەوڵێر ببنین و خواحافیزی لە نیشتیمان بکەین. تەماشایەکی سەرزەویم کرد لە دوورەوە خالۆ مەجیدم بینی لە گۆڕەپانی فڕۆکەخانەکە، چووبوە سەر بۆنیدی تەکسییەکەی دەستی ڕادەتەکاند و شتێکشی بەدەستەوە بوو، لاموابێت سەد دۆڵارە گوێچک دڕاوەکەبوو کە لەسەر دەشبووڵەکە لەبیرمچوو بوو، هەلیگرمەوە!.

کتێب: خەونەکانی کەژاڵ
بابەت: رۆمان
نووسینی جەلال قادر
لەبڵاوکراوەکانی خانەی کەلتور

بۆ خوێندنەوەی ئەم کتێبە کلیکی ئێرەبکەن..

ناوی كتێب: پشیلەکەی بریژێت!
بابەت: چیرۆك
نووسینی: جەلال قادر
دیزاین: هەرێم عوسمان
چاپ: چاپخانەی كارۆ
تیراژ: 500 دانە
نرخ: 3000 دینار
نۆبەتی چاپ: چاپی یەكەم
ساڵی چاپ: 2017

بۆ خوێندنەوەی ئەم کتێبە کلیکی ئێرەبکەن ….

سێ چوار خوشک و برا بووین، لەگەل دایک و باوکم لەیەک ژوور دەنووستین. هەرجارێک دایک و باوکم لەیەکتر زویربوونایە، شەوان دوور لەیەکتر دەنووستن، ئەمەش دەبوە هۆی ئەوەی جێگەی خەوتنمان تەنگتر بێت و بەتەنیشت یەکترەوە بنووین. سپێدە، کاتێ باوکم دەچوو بۆ سەرکار هەریەک لە من و خوشک وبراکانم پێشبڕکێمان دەکرد لە چوونە سەر جێگەکەی باوکم.
شەوان لە ژێر جێگەوە خەونم بەوەوە دەبینی ڕۆژێک لەڕۆژان بەتەنیا لەسەر دۆشەکێک ئاسوودە بنووم و پێم بەر پێی کەس نەکەوێت.
لە سەردەمی هەرزەکاریم بووم بە چایچی لە یەکێ لە چایخانەکانی ناو بازاڕی زێڕنگران. دوکان بە دوکان چاییم دەگێڕا بەسەر دوکانەکان، لەگەل زۆربەیان بووم بە ئاشنا، وەستاکەم خۆشیدەویستم و مانگی جارێک ڕۆژانەکەی بۆ زیات دەکردم.
بینای چایخانەکە زۆرکۆن بوو لە قایەوگەچ دروستکراوبوو، لەجیاتی کورسی سەکۆیەکی چوارگۆشەیی لەناوەڕواستی دوکانەکەدابوو، فەرشێکی ئێرانی بەسەردا پۆشرابوو، منیش مۆڵەتم لە وەستاکەم وەرگرتبوو شەوان لەوێ دەماوە، ئەگەرچی نەختۆکەک ساردبوو، بەڵام وەک پاشا لێی دەنووستم.
هەفتەی جارێک دەگەڕامەوە ماڵەوە، ڕۆژانەکەم دەدایە دەستی دایکم. دایکیشم چێشتێکی خۆشی بۆ ڵێدەنام. خوشک و براکانم زۆریان پێخۆشبوو کاتێ بە هەفتە ماڵم بەجێدەهێشت، چونکە جێگەی نووستنیان فراوانتر دەبوو.
بەیانیان پێشئەوەی وەستاکەم بێت، سەماوەرم گەرم دەکرد و تڵپە چایە کۆنەکانم فڕێدەدا و قۆریییەک چای بۆندارم ڵێدەنا.
لەبەرئەوەی سەردەمی جەنگ بوو، زۆربەی کات سەربازو ئەفسەرە پڵەدارەکان یەکەمین موشتەریم بوون.
ڕۆژیکیان ئەفسەرێک هات و دووسێ چایی گەرمی نۆشی و چاوێکی بەناو دوکانەکە گرداو بە تووڕەییەوە وتی : ئەوە بۆچی وێنەی سەرۆکتان هەڵنەواسیوە؟ جارێکیتر بێمەوە ئێرە، وێنەکەیتان هەڵنەواسیبێت دوکانەکەتان دادەخەم.
تا ئەوسا هەروامدەزانی تەنها مندالان لەیەکتر تووڕە دەبن، نەمدەزانی گەورەکانیش لە تووڕەبوون تۆقێنەرو شارەزان.
ئەفسەرەکە چایخانەکەی بەجێهێشت بەبێئەوەی پارەی چایەکانی بدات. ڕووداوەکەم بۆ وەستاکەم گێڕایەوە، خێرا چووە ناو بازاڕو وێنەیەکی سەرۆکی هێناو بەقەد دیوارەکە هەڵیواسی.
نزیکی دووساڵ لەو چایخانەکە شاگردبووم، زۆربەی دوکاندارەکانی ناوبازاڕ ببوونە دۆستم، بەخشیش و جەژنانە و دیارییان پێدەبەخشیم. منیش دیارییەکانم بۆ خوشک و برا بچکۆڵانەکانم دەبردەوە و شادمانیانم دەکرد.
تا ڕۆژێکیان وەستاکەم، تووند دەستی گرتم و وتی وەرە کوڕی خۆم با چەند ئامۆژگارییەکت بکەم :
تۆ ئێستا گەورە بوویتە و پێویستە بۆخۆت خێزانێکی جوان پێکبهێنیت. جا لەبەرئەوەی شاگردی و کرێکاریت لەوانەبێت زۆرکەس ئامادە نەبن ژنت پێبدەن. بەلام لەبەرئەوەی چەندین ساڵە لەلای من کاردەکەیت، دەزانم تۆ کوڕێکی دەستپاک و بە ڕەوشتی، هەربۆیە دەمەوێت پێتبڵێم کچێکی عازەبم هەیە ئەگەر یەکتر ببینن و ڕازیبوون، ئامادەم بتکەم بە زاوای خۆم.
پێشبینی ئەوەم نەدەکرد وەستاکەم لەپڕێکا سوپرایزم بکات، پاشان بیرمکردەوە ئەگەر ژن بهێنم لە کوێی دابنێم و لە کوێ بژێم؟
وتم : وەستا گیان…یەکەم من دەستکورتم، دووەم نە شوێنم هەیە و نە جێگەونە ڕێگە….جگە لە چایچیەتی هیچتر نازانم.

• گوێی مەدەرێ، من هاوکاریت دەکەم…خانووەیەکشت بۆ بە کرێ دەگرم.
  نەمدەزانی چی وەلامی وەستاکەم بدەمەوە، داواکاری وەستاکەم لە کوتوپڕێکا بوو، قوڕگی گرتبووم.
• کوڕی خۆم… لەدوا ڕۆژ هەردەبێت ژن بهێنیت و دابمەزرێت… هەروەها منیش کچەکەم عازەب بوەو خزمان دێن بۆ داخوازی، دەمەوێت ئەوە بزانیت کە باوک کچی خۆی زۆرخۆشدەوێت، ئەگەر بزانم تۆ کوڕێکی خەراپی هەرگیز ئەم پێشنیارەم نەدەکرد.
  بەردەوام بیرمدەکردەوە، ئەگەر ژن بهێنم دیسان دەبێت جێگەکەم لەگەل کەسێکیتر بەشبکەم. ببمە کرێچی و لەگەل منداڵەکانم لە ژوورێکی تەسکدا بخەوین. دەشترسام بڵێم نەخێر وەستا گیان من لێرە زۆر مورتاحم و بەتەنها دەنووم و نامەوێت ئەو ژیانە هەڵبژێرمەوە کە خوشک و براکانمی تیادا ئاسوودەنین.
• ئینجا کوڕی خۆم…بۆئەوەی خەڵکی نەڵێن زاواکەم شاگردە، ئامادەم چایخانەکەت بۆ بە جێبهێڵم، دڵنیام تۆ کوڕێکی کاسبی لە ئاییندە دەتوانیت خانووەیەکیش بکڕیت.
  هێشتا خەیاڵم لای ئەوەبوو، کە ئەم سەکۆیە خۆشەم لێدەسەنرێت و دەبێت ئێواران وەک کرێکارێكی ماندوو بگەڕێمەوە ماڵ، لە ئامێزی ژنێکدا بووم کە هێشتا نەمبینیوە و ببم بە باوکی دوو منداڵ ئەوانیش لە ژوورێکی ساردوسڕدا بە هەژاری بەخێوکەم و بیاندەمە دەست قەدەرەوە… لەهەمان کاتدا نەمدەوێرا بە وەستاکەم بلێم نەخێر، چونکە دەترسام ئیشەکەم لەدەست بدەم.
  لەبیرکردنەوەیەکی قووڵدا بووم. وامدەزانی دونیا ڕووخاوە بەسەرمدا.
  لەپڕێکا وەستاکەم وتی : وەرە کوڕی خۆم.. دەستی مامت ماچ کە، ئەوەندە لەماڵەوە ستایشی تۆم کردوە دڵنیام ئەوانیش ڕازین.
  وەک سەرخۆشێک هەڵسام دەستی وەستاکەم ماچکرد، چارەنووسی خۆم دایە دەستی کچێکەوە بەڵکو بتوانم لە ئامێزی گەرم ببمەوە!

:

هەرجارێک سەردانی شارەکەم بکردایە میوانداری (فەرەیدوونی) هاوڕێم دەکرد. ئەمساڵیش زەنگم بۆ لێداو ئاگادارمکردەوە کە چەند کاتژمێرێکتر دەگەمە ماڵی. پێیگووتم : سەرەتا هەوڵدە لە سەنتەری بازار، لەچایخانەکەی جاران، یەکتر ببینین پاشان دەگەڕێینەوە ماڵ.
لەگەل تاریک و لێلێ ئێوارە گەیشتمە بەردەم ئەو چایخانەیەی کە بەڵین بوو یەکتری تیا ببینین.
ڕاستی من لە دوورەوە ئەوم بینی شابنبەشانی برادەرێکیتری سەرقاڵی گفتووگۆکردن بوو، بەرەو ڕووی من دەهات.
بڕیارمدا هەر کە لێمنزیکبوەوە، هەڵسمە سەرپێ و باوەشی پیابکەم. کەچی، کاتێ گەیشتە بەردەم چایخانەکە، لەگەل هەردووو برادەرەکەی بەردەوام بوو لە قسەگێڕانەوە و ئاگای لەمن نەمابوو. زۆرم لا سەیربوو کە هێشتا بە لاچاوێک تەماشای نەکردم!
کاتێ لە گفتوگۆکردن بوونەوە لەگەل هاوڕێکەی تەماشایەکی ناو چایخانەکەیان کرد. منیش بەدەست ئیشارەتم پێدان و هەڵسامە سەرپێ.
فەرەیدوون منی ناساند بە هەردوو هاوڕێکەی کە لەگەلیاندا بوو. لەپاش یەکترناسین و هەواڵپرسی، فەرەیدوون وتی ؛ با پیاسەیەکی ناو بازاڕیش بکەین.
چەند هەنگاوێکمان بڕی، لەبەر پاڵپەستۆی گەشتیار و قەرەباڵخی بازاڕ، وردەوردە فەرەیدوون کەوتەوە تەنیشت برادەرەکەی و دەستیان بە گفتوگۆکردن کردەوە. من و برادەری دووەمی فەرەیدوون کە ناوی (ئیحسان) بوو، تازە یەکترمان ناسیبوو، بەشەرمەوە لەگەل یەکتر دەدواین.
جانتاکەم هێشتا بەسەرشانەوە بوو، لەپڕێکا هەستمکرد کە بەدووی ڕابووردوویەکی دوور کەوتووم. ئێستا فەرەیدوون لە جیهانێكیتردا دەژێت. تەمەنی منداڵی و یادگاری خۆشی نێوان من و ئەو خەریکە کاڵ دەبێتەوە و بەسەردەچێت، ڕۆژگار گۆڕاوە، من دەبێت بیر لەئاییندە بکەمەوە و بۆ باقی تەمەن لەگەڵ خۆمدا ببمە هاوڕێ و ژیانێکی بەختەوەر هەڵبژێرم.
لەپڕێکا ئیحسان خەیاڵی پساندم و لێیپرسیم : لە مێژە فەرەیدوون دەناسیت؟
دەموسیت بڵێم بەلێ لە منداڵییەوە یەکتر دەناسین، بەلام هەر زوو پەشیمان بوومەوە و وتم : هەشت نۆ ساڵێک دەبێت.
بۆ ماوەیەک بە بێدەنگی ڕێگامان بڕی. لە فەرەیدوونی هاوڕێم تەواو دوور کەوتینەوە.
دەستێکم نایە سەرشان ئیحسان و پێمگووت : بەوە دەچێت فەرەیدوون زۆر سەرقاڵ بێت.
_ ئەمشەو پلانمان هەبوو دانیشتنێک سازکەین…بەلام فەرەیدوون لەبەر خاتری تۆ نەیتوانی بەشداربێت.
دڵم گووشرا و هەستمکرد، لەکاتێکی خەراپدا سەردانیم کردووە.
بە ئاسپایی بە ئیحسانم وت : ڕاستی.. منیش ئەمشەو برادەرێکی تایبەتم هەیە دەبێت بیبینم!
_ ئەی بۆچی زووتر بە فەرەیدوونت نەگووت؟
_ ئاخر لەوساتەوەی یەکترمان بینیوە، ئەو مۆڵەتی نەداوە قسەیەکی لەگەلدا بکەم.

لەگەڵ ئیحسان لەسەر شۆستەکە ڕاوەستاین و چاوەڕێی ئەوانمان کرد.
جانتاکەی سەرشانم لە ڕاستەوە گواستەوە بۆ شانی چەپم و وتم : ئیحسان گیان، من بەجێتان دەهێڵم، ئەگەر بتوانیت پەیامەکەم بگەیەنیت بە فەرەیدوون.

• کەمێک سەبر بگرە ئێستا خۆی دێت و پییبڵێ.
• نا..باوەڕکە واباشترە من بڕۆم، چونکە لەوانەیە فەرەیدوون بە ڕۆیشتنم دڵتەنگ بێت..بەڵام لەبیرت نەچێت کە پێیبڵێیت یەک دوو ڕۆژتر دەگەڕێمەوە و شەوێکیش میوانداری دەکەمەوە.
  بەدەم قسەکردنەوە، هەنگاوەکانم خێڕاتر هەڵبڕی، هەستمدەکرد هەرچەند دوورتر دەکەومەوە دڵتەنگییەکەم کەمتر دەبێت. هەر بۆیە خێرا دەستم لە تەکسییەک هەڵبڕی و بە شوفێڕەکەم وت : بمگەیەنە هوتێڵێکی خۆش.

دونیا تاریک ببوو، لەبەردەم هوتێڵێک دابەزیم کە چرا ڕەنگاوڕەنگەکانی بۆ گەشتیارەکان ڕازاندبوەوە.
لە پرسگەکە خانمێکی جوان پێشوازی لێکردم و لێیپرسیم : بۆ چەند شەو دەمێنییتەوە؟
سەرەتا ویستم بڵێم هەر ئەمشەو و سبەینێ لەگەل گزنگی بەیان ئەم شارە بەجێدێڵم. بەڵام خانمەکە وتی : ئەگەر دوو شەو بمێنیتەوە، هەرزانترت لەسەردەکەوێت.

• دوو شەو…
  خانمەکە ناسنامەکەی لێوەرگرتم و ناوونووسی کردم و بە ڕووخۆشییەوە دووبارە لێیپرسیم : دەلێی خەلکی ئەم شارە نیت؟
• ناوونیشانەکەم لە ناسنامەکەم نووسراوە.
• بەڵێ…بەهەر حاڵ…فەرموو ئەمە کلیلی ژووری ژمارە (٦٧) و دوو سبەی سەعات دەونیو دەبێت ژوورەکەت چۆڵکەیت و کلیڵەکەش لەسەر ئەم مێزە دابنێت.
• بەسەرچاو … دوو ڕۆژتر دەتبینمەوە.
• نەخێر… من تەنها ئەمشەو کاردەکەم، سبەینێ نۆبەی مێردەکەمە.
  ناسنامەکەم کردە گیرفانم و لێمپرسی : دوو شەو چەند دەکات.
• شەوی پەنجا دۆڵاری ئەمریکی…
  بە سەرسووڕمانەوە وتم : خوشکە خۆمن لە ئەمریکاوە نەهاتووم…من دینارم پێیە.
  _ باشە بەسەرچاو… حیسابەکەت دەکاتە ١٢٥ هەزار دینار، ئەمەش وەسڵەکەت.
  پارەکەم پێدا و بەرەو ژوورەکەم بەڕێ کەوتم.
  هیڵاک و ماندوو، لەسەر قەرەوێڵەی ژووری ٦٧ ڕاکشام، ژوورێکی پاک و خاوێن بوو. درزی پەنجەرەکە کرابۆوە هەوایەکی فێنک دەهاتە ژوور. بیرمکردەوە کە سەرەتا دوشێک بگرم، بەڵام هەرزوو لەترسی ئەوەی نەکا خەوم بڕەوێتەوە پەشیمان بوومەوە.
  سەرم نایە سەرسەرین و خەوم لێکەوت، لاموابێت ئەمە یەکەمینجار بوو لەژیانم سەربنێمە سەرسەرین و وەک بەرخ بخەوم و لەگەڵ ڕووناکی بەرەبەیان بێدار ببمەوە.
  بەیانی زوو، ئاوێکم بەخۆمدا کرد و بە موجەفەکە قژم وشککردەوە. خۆم ئامادەکرد بچمە دەرەوە و چێشتخانەیەکی خۆش بدۆزمەوە نانی بەیانی تیا بخۆم.
  جانتاکەم لە ژەوورەکەم جێهێشت و بە ئاسپایی لە نەردبانەکان هاتمە خوارەوە. بە خەیاڵمداهات کە لە پرسگەکە ببپرسم کە چ چێشتخانەیەک لەم نزیکانە قەیماخ و هەنگوین دەفرۆشن.
  نزیک بە پرسگەکە بوومەوە، لە پڕێکا سەروو گوێڵاکێکی توورشاوی کارمەندێکم بینی لە شیرینی خەودا پرخەی دەهات. جوانتر لێی وردبوومەوە، یەکسەر ناسیمەوە کە ئەمە (ئیحسانی) برادەری فەرەیدوونە، کە دوێنێ ئێوارە پێکەوە پیاسەمان دەکرد.
  بە نیگەرانییەوە گەڕامەوە ژوورەکەم جانتاکەم دایە بانشانم، لەسەرخۆ لە پرسگەکە نزیک بوومەوە بە ئاسپایی کلیڵەکەم لەسەر مێزەکە دانا.
  لەناکاو زەنگی تەلەفۆنی هوتێڵەکە بەرزبوەوە. ئیحسانم بینی بەچاوی خەواڵوو دەستی برد بۆ تەڵەفۆنەکە و وەڵآمیدایەوە.
  کاتێ لە دەرگەی هوتێڵەکە هاتمە دەرەوە بۆ دواجار ئاوڕێکم دایەوە، بیینیم ئیحسان کلیڵەکەی بەدەستەوەیەو تەماشام دەکات.
  منیش بۆ داوجار جانتاکەمدایە سەرشان و خۆم بۆ سەفەرێکی دوور ئامادەکرد!

(پاییزی ٢٠٢٠)

سەرەتا با پێتان بڵێم : ماوەیەک لە ڕەستورانێک گارسۆن بووم. هەر میوانێکی چاوچنۆک و پیسکەمان هەبوایە، تایەی ئۆتۆمبیەلەکەیمان پەنچەر دەکرد و بەتاکسییەک دەمان ناردەوە ماڵ
شەوێکیان لە ڕەستورانەکەمان کۆمەڵێ خێزان ئاهەنگیان دەگێڕا، لەپاش هەڵپەڕكێ و سەماکردن و خواردنەوە. پشوویاندا، کاتژمێری ١٠ی شەو بوو. جۆرەها خواردنمان بۆیان ئامادەکردبوو، ئێمەی گارسۆن بەبان سینیەوە خواردنەکانمان دابەشی سەر مێزەکان دەکرد. لەسەر مێزێکیان سێ خێزان پێکەوە دانیشتبوون. کاتێ من سینیەکەم بەسەر شانم داگرت و یەک یەک قاپەکانم دایە دەستی گەنجێکی سووسلی برۆ باریک، بەو مەبەستەی هاوکاریم بکات و بیدات بەدەستی میوانەکانی تەنیشتی. کەچی ئەو گەنجە ئەگەرچی تەمەنی سی ساڵ دەبوو، بێ شەرمانە قاپەکانی لەبەردەم خۆی و هاوسەر و مندالەکانی دانا.
بۆ جاری دووەم کە گەڕامەوە چەند قاپێکی پڕ لە شڵەی گۆشت و برنجم هێنا، بینیم ئەو گەنجە چاوچنۆکە دەستی بەنانخواردن کردوە، بێئەوەی چاوەڕووانی میوانەکانیتری سەر مێزەکەی بکات. لەبەرئەوەی مێزەکە کەوتبوە گۆشەی بندیوارێک دەبوایە دووبارە داوا لەو گەنجە بکەم قاپەکانم لێ وەرگرێت و ڕەوانەی میوانکایتری بکات، ئەگەرچی ئەو سەرگەرمی نانخواردن بوو، میوانەکانیتریش تەماشایان دەکرد و قێزیان لێدەبوەوە، قاپێکم دایە دەستی تا ڕەوانەی برادەرانی سەرمێزەکەی بکات. قاپەکەی لێوەرگرتم و سەیرێکی کرد و بە نابەدڵییەوە دایە دەستی میوانەکانی تەنیشتی. قاپیی دووەم و سێییەمشی ڕەوانە کرد. بەلام دوا قاپ کە پڕ لە گۆشت بوو، لەبەردەم خۆی دایناو سەرێکی هەڵبڕی پێیگووتم : برا نانت لەبیرچووە.
خەریک بوو سینیەکە بدەم بەسەریا بەلام ناکرا .
وەجبەی سێیەم گەڕامەوە ئەمجارە داوام لە یەکێ لە میوانەکان کرد کە هەستێتە سەرپێ و خواردنەکانم لێوەرگرێت. یەکێ لە میوانەکان لەمەبەستم تێگەیشت و خێرا هەڵساو وتی : دەستت خۆشبێت، منداڵەکانم خەریک بوو لەبرسا بمرن
پێشئەوەی پشتیان لێبکەم و بگەڕێمەوە مەتبەخەکە، گەنجەکە لچکی پەشمینەکەمی گرت، وتی : نانەکەت لەبیرچوو
گەڕامەوە سەبەتەیەک نانی گەرمم بۆ سەر مێزەکەیان هێنا. هەرکە نانەکەم دانا، گەنجەکە یەک دوو قاپی بە بەتاڵی دامێ و وتی : زەحمەت نەبێت ئێمە تێرمان نەخواردووە، دەتوانیت قاپێکیتر لەو بریانییە خۆشەمان بۆ بهێنیت
گەڕامەوە مەتبەخ و بە وەستاکەم وت: چاوچنۆکێك داوای قاپێک بریانیتر دەکات
وەستاکەم لە کۆدی قسەکانم تێدەگەیشت و وتی : گۆشتی چەوری بەرێ، بەلکو ئێ ئەمشەو جەڵتە لێیبدات
لەپاش ئەوەی میوانەکان لەخواردن بوونەوە ، سەرمێزەکانمان پاککردەوە، گەنجەکە زەردەخەنەیەکی بۆکردم و وتی : ئەرێ کێک و چایەکە کەی دێت؟
وەلامیم نەدایەوە. بەردەمیانم پاکردەوە، گەڕامەوە مەتبەخ بە چێشت لێنەرەکەم وت : دەچم جگەرەیەک دەکێشم
ئەویش پێکەنی وتی : دیسان بەزمەکەیە
چوومە دەرەوە، هەوایەکی خۆشی هەبوو، جگەرەیەکم داگیرساند و سەرێكی ئاسمانم کرد ئەستێرەکان شین بوون، یەکەمینجارم بوو ئەستێرە بەشینی ببینم
لەناکاو گەنجە چاوچنۆکەکە لەدەرگەی ڕەستورانەکە هاتە دەرەوە، هەرکە چاوی بە من کەوت بەرەو ڕووم هاتوو وتی : منیش هاتوم جگەرەیەک بکێشم. جگەرەیەکی لە گیرفانی دەرهێناو وتی : ئەو جگەرەیەی دەستم بەرێ
وتم : بۆچی چەرخت پێنیە؟
پێکەنی بەزۆر جگەرەکەی لەدەستم دەرهێنا
جگەرەکەی دایگرساند و وتی : چێشتەکەتان زۆرخۆشبوو، یەک داواکاریم هەیە
وتم : فەرموو
زەحمەت نەبێت چاوێکت لێمان بێت با لەتە کێکەکەی ئێمە بچووک نەبێت –
بەسەرچاو…
لە کۆتایی ئاهەنگەکە من و چێشتلێنەرەکە چووینە دەرەوە و میوانەکەنمان بەڕێ خست. بەلام لەڕستیدا چاومان لەو گەنجە چاچنۆکە گڕ دەدا، دەمانویست بزانین کام ئۆتۆمبیل لێدەخووڕێ
گەنجەکە لەگەل هاوسەر و منداڵەکانی هاتنە دەرەوە، بەرەو ناو ماشێنەکەیان ڕۆیشتن. کە ئۆتۆمبیلێکی تویتای لەکساس بوو. چووم بۆ لایی وپێمگوت:چێشتکی زۆر ماوە ئەگەر حەزدەکەیت برۆ مەتبەخ چێشتلێنەرەکە چەند قاپێکی سەفەریت دەداتێ
خێرا خۆی کرد بە ڕەستوورانەکەیا
منیش چوومە پشت ئۆتۆمبیەلەکەی چەند بزمارێکم لە هەردوو تایەی دواوەی چەقاند. بەم شێوەیە سزامان داو، بە تاکسییەک ڕەوانەی ماڵەوەمان کرد.

بیری ئەو ڕێبوارانە دەکەم کە بەیەک ڕستەی سەرنجڕاکێش، هەست و سۆزمیان سڕ دەکرد. بۆ
نموونە :
جارێکیان خانمێکی نازدار موسافرم بوو، بەم شێوەیە وەڵامی موبایلەکەی دایەوە :
جا بە من چی، مرد؟ ئەگەر منی خۆشبویستایە هەرگیز نەدەمرد.
(موبایەلەکەی داخست)
ویستم لێی بپرسم کێ مردووە؟ بەلام لەبەرئەوەی وتەکەی وەک دێرە شیعرێک وابوو. بۆ ماوەیەک
بێدەنگ بووم.
لەپاش چەند خولەکێک بینیم چەند دڵۆپە فرمێسکیک لە چاوەکانی دێتە خوار.
——————-
موسافرێکیترم : خانمێکی ڕەشپۆش بوو، هەرکە دانیشت، ئاوڕێکم لێدایەوە تا لێی بپرسم بۆکوێ
دەچێت؟
بە قوڕگی پڕ لە گریانەوە وتی : ئەرێ کاکی شوفێر، لە ڕەش ڕەشتر هەیە بیپۆشم؟
سەرەتا نەمزانی مەبەستی چییە، بەلام هەستمکرد لەژێر ئەم ڕەشپۆشیا خەمێکی قورس خۆی حەشارداوە.
پێمگووت : گوێی مەدەرێ…شەو تا تاریکتربێت ئەستێرەی درەوشاوەتر دەبێت.
(بزەخەندەیەک کەوتە سەر لێوی…دڵی خۆشکردم)
پێشئەوەی دابەزێت، بە نووکی پەنجەی دەستی، پەرچەمی ڕەشی لەسەر رووخساری لابرد وتی : وا
ئەستێرەک لە ئاسمانەوە بەربوە خوارەوە!
—————————–
یادگارییەکترم لەگەل خانمێکی بەتەمەن بوو، لە کورسیەکەی پشتەوە بە بێدەنگی دانیشتبوو. لە ئاوێنەکەوە
تەماشایەکیم کرد، چرچ وڵۆچی گەردن و ناوچەوانی بە ئاشکرا دیاربوو. بۆیەی ڕەشی لە پرچی دابوو.
زەنگی موبایلەکەی لێیدا. بە تووڕەییەوە وەلامی دایەوە :
تۆ مووی سەرمت سپی کرد.
( یەکسەرموبایەلەکەی داخست )
ئینجا تەماشایەکی منی کرد و بە زەردەخەنەیەکەوە وتی :
لەداخی ئەو پرچم بۆیە کردوە تا لەبیری خۆمی بەرمەوە.
———————
بەم شێوەیە بیری موسافرەکانم دەکەم

ئەگەر ئێستا مرۆڤێکی چاخی بەردین زیندوو بێتەوە، ئارەزوو دەکات دووبارە بگەڕیتەوە بۆ ناو ئەشکەوتەکان، لەو تاریکییە بژێتەوە. ئێوەش(ئێستا) لەم سەردەمی پەتایە، خۆزگە بە ڕابووردوو دەخوازن، دەتانەوێت دووبارە لەو دۆزەخە بژێنەوە. چونکە خەمەکانی ڕابووردووتان لەبیرچوەتەوە، لەبیرتان چوەتەوە کە بە هیواو ئاواتی دوا ڕۆژێکی پرشنگدار بوونە.
مرۆڤ تا دوا هەناسەکانی ژیانی، وەک کراسێکی تەڕ بە قەد تەنافێکەوە،چاوەڕوانی تیشکی خۆر دەکات، وشک بێتەوە، هەرکە وشکیش بوەوە با دەیبات. ژیانمان دووبارەیە و حکایەتەکان کۆتاییان نایەت. کەچی ئارەزوودەکەین دەست بە ژیانەوە بگرین، چونکە هەستدەکەین شتێک ماوە بتوانێت دڵمان خۆشکات، شتێک ماوە بمان بەستێتەوە. ژیان زنجیرێکە دەست و پێی بەستووین، بوووینەتە کۆیڵە، خەون بە ئازادی و خۆشەویستییەوە دەبینین.
بەهەربار، ئەوەی من مەبەستمە بیڵێم : ژیان حکایەتە، بە ڕۆژ دەینووسینەوە، بەشەویش حەزدەکەین، بەدیار ئاگردانێەکەوە، بیخوێنینەوە. من تاقە ئارەزووم ئەوەیە، هەر وەک کتێبی (هەزارو یەک شەوە) ڕۆژی حکایەتێک بگێڕمەوە، مەگەر نەمانگووت شتێک هەیە دەمان بەستێتەوە؟
فەرموون ئێوە و حکایەتی ئەمڕۆ: ژیان شیریینە
چای دەمی کێشا، دوو دانە نانی تیریم تەڕ کرد، ماست و پەنیر و ژێر پیاڵەیەک پڕ لە هەنگوینم لەسەر مێزەکە دانا. چاوەڕوانی هاوسەرەکەم بووم، بە زەردەخەنەوە بەیانی باشم لەگەلدا بکات.
هاوسەرەکەم بە پرچی ئاڵۆسکاوی و رووخساری مۆنەوە، بە بێدەنگی هات و لەسەر کورسییەکە دانیشت. لێمپرسی : چیبوە، خەونی ناخۆشت بینیوە؟
وەلامی نەدامەوە.
_ کەسێک، تووڕەی کردوویت، بۆچی وا گرژوو مۆنیت؟
ناچار دوو پیاڵە چاییم تێکرد و بەبێدەنگی دانیشتم.
لەپاش چەند خووڵەکێک هاوسەرەکەم بە دڵتەنگییەوە کەوتە دووان: دەزانیت بۆ تووڕەم؟
( وەلامیم نەدایەوە)
لەوە تووڕەم جارێکیتر، کەس و کارم نەبینمەوە، نەتوانم سەردانی شارەکەم بکەم و دایکم لە ئامێز بگرمەوە. باشە ئێمـە چیبکەین،ئەم ڤایرۆسە لە کوێوە هات؟ ئەگەر ئەم پەتایە درێژە بکێشیت و ڕیگەوبان، ئاسمان بگیریت و فڕۆکەخانەکان داخرێت. ئێمە چیبکەین… ها …پێم ناڵییت بۆ دەبێت چارەنووسمان وابێت؟ بۆ دەبێت هەرچەند ساڵ جارێک ئاوات بە شتێکی نوێوە بخوازین؟ بۆ قسە ناکەیت؟ بۆ وەلامم نادەیتەوە؟
( من بەردەوام بووم لە بێدەنگی، لەتە نانێکم بەدەستەوە گرت و چایی خۆم دەخواردەوە)
کاتێ هاوسەرەکەم هەرچی تووڕەیی هەیبوو هەڵیڕشت.
بە ئاسپایی وەلامیمدایەوە : بەیانی باش ئەزیزم، جوان گوێم لێبگرە، ئەم ژیانە حکایەتە و خۆزگە بە ڕابووردوو مەخوازە، خۆت بدە بەر خۆرو جەستەت برۆنزی بکە، ئیسقانت پتەو بکە. هەوڵدە بۆ ئەمڕۆ بژی، دڵنیابە سبەینێ حیکایەتێکیترە.
هاوسەرەکەم، بە سەڕسووڕمانەوە، لێمی پرسی : مەبەستت چییە؟ حیکایەتی چی؟
_ تۆ ئارام بگرە، کە شەو داهات بۆتی دەگێڕمەوە!.
لەتە نانەکەی ناودەستم بە ماست کرد و کەوچکە چایێ هەنگووینم بەسەریا کرد و خستمە ناو دەمی هاوسەرەکەم. ئەویش پاش ئەوەی فڕی لە چاییەکەیدا، چاوی لە چاوم بڕی و بە بزەخەندەیەکەوە، وتی : ژیان چەند شیریینە!.

لەترسی پەتای کرۆنا، هەر موسافرێک هەلگرم، ئەلکحولی دیتۆل بەدەستی دادەکەم.
ئەم بەیانییە، ژن و مێردێکی گەنج، بەترسەوە لە کورسی پشتەوەی تەکسیەکەم دانیشتیبوون، دەمامکیان بەستابوو. داوایان لێکردم بیانگەنمە شەقامی پزیشکان.
موسافرەکەم، بە نووکی پەنجەی دەمامکەکەی لەسەر دەمی لابرد، سمێلی درێژی کە دەمی داپۆشیبوو وەدەرکەوت و وتی : کاکی شوفێر، ناترسیت لە پەتای کرۆنا؟

• بەڵی دەترسێم، بەلام ناکرێت لەمالەوە دانیشم و واز لە کاسبی بهێنم.
  ژنەکە برۆی باریکی هەڵتەکاند و بە پەنجەی باریکی دەمامکەکەی سەردەمی وەک پەردەی سینەما لابرد، بەڕیزێک دندانی مروارییەوە، کەوتە ئاخافتن : خاڵۆ، دوا دەنگ و باسی ڤایرۆسی کرۆنا چییە؟ ئایە تا ئێستا هیچ چارەسەرێکیان دۆزیوەتەوە؟
• نەخێر، دەبێت چاوەڕووان بین.
  پیاوەکە وتی : من بزانم دەستی خۆیانی تیایە، دەیانەوێت ئەم سەرزەمیینە بکەن بە دۆزەخ!.
• خۆیان کێن؟
• ئەوانەی چەک دەفرۆشن و جەنگ هەڵدەگیرسێنن، ئەوانەی ژینگەیان پیس کردوە.
  بە ئارامی و لەسەرخۆ وەلامیمدایەوە؛ تۆ ڕاستدەکەیت. بەلام بە بڕوای تۆ، ئێمە دەبێت چی بکەین؟
  ژنەکە وتی : دەبێت خۆمان بپارێزین.
  بۆ ساتێک بێدەنگی کەوتە نێوانمانەوە. پاشان لێیانم پرسی : ئەی خێرە، ئێوە دەچن بۆ سەردانی پزیشک؟
  خانمەکە پێکەنی. پیاوەکە سەرێکی هێنایە پێش و چرپاندی : هاوسەرەکەم دووگیانەیە.
  پاشئەوەی پیرۆزباییم لێیانکرد، وتم: ئومێدەوارم، تا ئەو کۆرپەیە دێتە دنیاوە، پەتای کرۆناش تەواوبێت!.
  ژنەکە بە شادییەوە وتی : دەڵین، ئەو ڤایرۆسە منداڵی بچووک ناکوژێت، تەنیا کار لە پیاوی بەتەمەن دەکات!.
  ئەم وتەیە دڵتەنگی کردم. بەلام، بێدەنگ بووم تا هەردووکیان دابەزین و بەجێیانهێشتم.
  لە ڕێگە، سەرڵێشێوانە بیرم لە تەمەنی خۆمکردەوە، لەخۆم پرسی : ئایە منیش ئینسانێکی بەتەمەنم؟ نەخێر، باوەڕناکەم، ئاخر مرۆڤی بەتەمەن واتە سەرووی شەست و حەفتا ساڵ. من تازە پێمناوەتە پەنجا ساڵی، نا باوەڕناکەم، من لەنەوەی نوێم.
  بەم شێوەیە لەبەرخۆمەوە قسەمدەکرد، لەپڕ دام لە قاقای پێکەنین، چاوم پڕبوو لە ئاو.
  بە ڵەپی دەستم فرمێسکی سەر ڕوومەتم سڕییەوە. لەناکاو هەستمکرد پڵەی گەرمای لەشم بەرزبوەتەوە، عارەقی شین و مۆرمکرد، یەک دووجار کۆخیم. سێ بارە کۆخیمەوە تا بزانم دەنگی کۆخەکەم، وشکە یا تەڕە، چەندینجارتر کۆخێم، بەلام دڵنیا نەبووم و بۆم ڕووننەبوەوە. نەمزانی چیبکەم، ناچار بە نیگەرانییەوە دڵنەوایی خۆمدایەوە : نا، نا، نابێت بترسێم، چونکە ڕاستە بەتەمەنم و گەورەم، بەلام بە عەقڵ هێشتا منداڵم!.

سەرەتا پێیان گووتم نەخۆشە و زوو بگەرە فریای. بەلام دەمزانی درۆم لەگەل دەکەن، هەستمکردبوو ئەو کەسەی خۆشمویست و بەشێک بوو لەژیانم بەجێیهێشتم.
هەرچەندە لەسەرکارەکەم، تا نەخۆشخانە چارەگە ڕێگەیەک دەبوو، بەلام خۆزگەم دەخواست، ڕێگاکە دوورودرێژتربێت و نەبڕێتەوە. مێشکم خەریکبوو بتەقێت، دڵم خەبەری دابوو، ئەو دیارییە جوانەی خوا پێیبەخشیم، ئێستا لێی وەرگرتمەوە.
نزیک بە دەرگەی نەخۆشخانەکە کەوتم، یەک دوو برادەر باوەشیان پێماکرد و گووتیان: لەژێر نەشتەرگەرییە و کاتژمێرێکیتر دەیهێننە دەرەوە.
برادەرێکم تووند دەستی گووشیم و بەدووی خەتێکی شین کەوتین. لەدەست گووشین و بێدەنگی برادەرەکانم تێگەیشتم جگەرگۆشەکەم ماڵئاوایی لێکردووم.
بەرچاوم تاریک بوو،نەختۆکەک هەست و هۆشم لای خۆم مابوو. بیرم لەوەدەکردەوە، ئیتر دەبێت بەشێوەیەکیتر بژێم، پارچەیەک لە لەشم جوودا بوەتەوە و بە جەرگ سوووتاویی سەردەنێمەوە.
سواری دەستگیرێکیان کردم، خێرا گەیاندمیانە سەر قەلەوێرەیەک. پەرستارێک دەرزیەکی لێدام.
کەمێک هاتمەوە هۆش خۆم. هاوسەرەکەم بەدیارسەرمەوە دانیشتبوو، بەخووڕ دەگریا.
لێمپرسی : چیبووە، ڕاستیەکەم پێبڵێ…

• ڕۆیشت بە یەکجارییییییییییی…
  لەبەر گریان، نەیتوانی قسەی تەواوکات، باوەشی پێماکرد. دەستێکم بەسەریدا هێنا. گوێم لەهەنسکی گریانی گرت. ئاگر لەجەرگی بەربووبوو.
• ژنەکە…هیچ چارێکمان نییە، دەبێت ڕاست بیینەوە، ئەگەر بەدرۆش بێت، دووبارە بژێینەوە.
• تووبڵێی بتوانین…
• من و تۆ، یەکەم کەس نین جەرگمان دەسووتێت، هەڵسە بابڕۆین تەرمەکەی ببینین، سەروماچێکی بکەین،لەباوەشی بگرین و وابزانین سەفەردەکات بۆ شوێنیکی دوور و نایبینینەوە.
• نا …من ناتوانم، تەرمی جەرگەکەم ببینم. تۆ بڕۆ بیبینە و لەجیاتی منیش ماچی بکە.
• پێکەوە دەچین….لەبیرت نەچێت ئێمەش مردنێکمان لەپێشە.

لەگەل میوانەکان بەرەو ژووری ماتەمینی چووین. تەرمی جەرگەکەم لەسەر قەلەوێرەیەک دانرابوو.
خۆم و هاوسەرەکەم سەرییمان هەلدایەوە رووخساریمان ماچکرد. زۆر سوپاسی ئەو خۆشەویستیەمانکرد کە بە ئێمەی بەخشی بوو.
هاوسەرەکەم یەک دووجار تەرمەکەی کردە باوەش و بەمیوانەکانی گووت : سەیرکەن بە مردوویەتیش هەر جوانە.
لەگەل مامۆستای ئایینی نزامان لەسەرخوێند. چەند پەرستارێک هاتن و تەرمەکەیان بردە دەرەوە.
خۆم و هاوسەرەکەم باوەشمان بەیەکتردا کرد. میوانەکانش ئێمەیان لەئامێزگرت.
داوام لە میوانەکانکرد گەردنی ئازادکەن، چیتر نایبینینەوە.
لەنەخۆشخانەکە هاتینە دەرەوە، من و هاوسەرەکەم لەپشتی ئۆتۆمبیڵی برادەرێک دانیشتبووین. شوفێرەکە گووتی : دەچین بۆ ماڵی ئێمە و پرسەش لەوێ دادەنیین.
گووتم : نەخێر…

• نابێت بگەڕێنەوە بۆ ماڵی خۆتان، چونکە هێشتا ماڵەکەتان بۆنی جگەرگۆشەکەتانی لێدێت.
• کێ دەلێت، جارێکیتر دەگەڕێینەوە بۆ ماڵ.
• ئەی بۆ کوێ دەچن؟
  هەناسەیەکی پڕ لەخەمم هەڵکێشا و هاوسەرەکەم تووند لەباوەش گرت، هەستم بە خرمەی ناو هەناوی دەکرد. گووتم : تکایە …لێخووڕە…بۆ شوێنێکی دوور کەس نەمانبینێتەوە.
  فرمێسک بەچاوەکانی شوفێرەکە هاتە خوار و گووتی : خۆزگە هیچ دایک و باوکێک، مەرگی منداڵەکانیان نەدەبینی تا ئەو ڕۆژەی دەمرن.
  سەیرێکی دەرەوەم کرد و سەرم هەڵبڕی، بینیم ئاسمان زەرد هەڵگەڕاوە، باڵندەیەکش وەک خۆر دەسووتا و دەفڕی.

لە هەورازەكەی كۆڕنیش سەردەكەوتم، موسافرێك دەستی بەرزكردەوە. تەكسییەكەم هێواش كردەوە . موسافرەكەم خێرا دەرگەی پشتەوەی كردەوە و لەسەر كورسییەكە لێی ڕاكشا.

• بۆ كوێ …؟
• تۆ جارێ لێخووڕە، پاشان پێتدەڵێم……
  سەیرێكی رووخسارییم كرد، سەروگوێڵاكیم بەدڵ نەبوو، هەر بە شێت دەچوو.
  مرۆڤێكی تەمەن شەست ساڵ، درێژ و باریك و ڕەقیتە. پێدەچوو ڕدێنی تازە تاشی بێت، چونكە سێ چوار شوخت بە ڕوومەتییەوە بوون.
  لەپڕ هاتەوە یادم، كە ئەمە (ڕەزە شێتە) شوفێرەكانی بێزار كردوە. وەك دەڵێن، هەركە سواری تەكسی بوو، ئیتر بەتۆپزیش دانابەزێت.
  چ ڕۆژێكی شوومە تووشمان بە تووشی موسافرێك بووە، كەڵە ڕەق و شەڕانی و شێت.
  لەدڵی خۆمدا وتم: هەڕچۆنێك بێت، دەبێت هەوڵدەم بە قسەی خۆش لە شوێنێكدا قەناعەتی پێ بهێنم و دایبەزێنم.
  لە گەڕەكی (شۆراو) تێپەڕین بەرەو بازگەكە. پێمگووت: ڕەزە گیان…خەریكە لەشار دەردەچین، تكایە پێمبڵێ بۆكوێ دەتەوێت بچیت؟
• من حەز بەوبەر ناكەم، خێرا بگەڕێوە ناوشار.
  ناچار پێچم دایەوە. دووبارە بەرەو كۆڕنیش، لە پردەكەی خاسە پەڕییمەوە و دووبارە لەشار دوورکەوتمەوە.
• ڕەزە گیان … تكایە ماشێنەكەم بەنزینی تێ نەماوە، ئەوە گەیشتینە بازگەكەی (قەرە هەنجیر) پێمبڵێ بۆ كوێ دەچیت؟
• نا نا.. من حەز بەوبەرش ناكەم. .. بگەڕێوە!.
• ئەگەر بتگەڕێنمەوە ناوشار بەڵێنم پێدەدەیت دابەزیت؟
• نەخێر…من حەز بەم شارەش ناكەم!.
  -حەز بەوبەرو ئەمبەر ناكەیت ، حەز بە ئێرە ناكەیت، ئەی حەز بەچی دەکەیت؟!
• من حەزدەکەم هەرچی زووە بمرم.
• بۆ حەزدەكەیت ئاوا زوو بمریت؟
• ئاخر، من ئێرەم تاقی كردۆتەوە هیچ خۆش نییە.
• ڕەزە گیان، بۆ سەفەرناكەیت بۆ ئەوروپا ؟
• ئەوێشم تاقیكردۆتەوە. هیچ خۆش نییە. ڕاستی من حەزدەکەم بمرم و بچم بۆ ئەوسەر دونیا.
  _ بەڵام، تا ئێستا كەس لەوسەر دونیا نەگەڕاوەتەوە، چۆنچۆنی دڵنیابین كە ئەوێ هەیە ؟
• گرنگ نییە هەیە یان نییە ، گرنگ ئەوەیە من دەزانم ڵێرە خۆشترە !.
• بە چ بەڵگەیەك؟
• لەبەرئەوەی ئەوێ دایک و باوکمی ڵێیە!
  بەم وتەیەی حەپەسام، تا چەند خووڵەکێک سەرسام و بێدەنگ بووم. بیرم لە چارەسەرێک دەکردەوە.
  لەئاوێنەکەوە سەیری ڕەزەم کرد، خەواڵووبوو. گوێم لە دەنگی بوو، لەبەرخۆیەوە دەیگووت: ئای کە بێزار و ماندووم.
  دەستم برد، لەناو دەشبووڵی ئۆتۆمبیڵەکە، یەک دوو کتێبم دەرهێناو دامە دەستی و گووتم : ڕەزەگیان…بۆئەوەی بێزار نەبیت لەژیان، خوێندنەوە باشترین دەرمانە بۆ تۆ.
  کتێبەکانی لەدەستم وەرگرت و تەماشایەکی بەرگەکەی کرد و وتی : خێرا ماشێنەکە ڕاگرە و دەمەوێت ئەم کتێبانە بخوێنمەوە.

لەدڵی خۆیدا وتی :
تا مرۆڤ بەیانییان بە سەرمای زستان لەخەو ڕانەپڕێت و نەچێت بۆ کرێکاری، قەدری پارەداری و ژیانی خۆشگووزەرانی و گەرمای هاوین نازانێت.
لەگەل بەرەبەیان خۆی لەناو قاپووتە خاکییەکەی پێچایەوە و بە ئاسپایی لەدەرگەی ماڵ هاتە دەر.
بەم بەری بەیانییە جگە لە کرێکاروخەلکی کاسبکار و نەداران کەسیتری نەدەبینی. خواپێداوەکان درەنگتر لەخەو هەڵدەستن و قەیماخ وپەنیروڵۆڕ و هەنگوین و نانی چەور دەخۆن. لەم کاتەخۆزگەی بەو هاوڕێیانەی دەخواست کە زوو ئەم مەمڵەکەتەیان بەجێ هێشت و ڕزگاریان بوو لەدەست ئەم دەسەلات و سیاسیانە، کە هەر ڕۆژەی بە بیانوویەک میلەت بەشەڕ دەدەن.
بەدەم ڕێگەوە، ئەو ڕۆژانەی هاتەوە یاد، باوکی لەگەل مەلا بانگدان لەخەو هەڵدەستاو بەرەو مەیدانی کرێکاران دەکەوتە ڕێ. ئەویش لەژێر جێگەوە بیری لەوە دەکردەوە: ئاخۆ باوکم دەبێت چی بخوات و چۆن چۆنی پارەمان بۆ پەیدا بکات؟. کەچی ئێستا خۆی لەسەر هەمان شەقام ڕێدەکات و بیر لە رابووردوو دەکاتەوە، کاتێ باوک و باپیری لە سەر زەمینە هەمیشە ڕاکە ڕاکەیان بوە بەدوای تیکەیەک نانێکەوە و بە کۆیڵایەتی ژیاون.
لەچایخانەکەی سەرجادەکەی (رەحیم ئاوا) لەگەل کرێکارەکان دانیشت و داوای چایی و ماستی لە چایچییەکە کرد. وردە وردە ژمارەی خەلکی بێکار زێتر دەبوو، زۆربەشیان هەروەک ئەو چایی و ماست و نانی گەرمیان دەخوارد. هەرچەندە لەتوانایدا بوو قەیماخ و هەنگوین یان نۆکاو بکڕێت و بیخوات، بەلام ئەم لەمنداڵییەوە وا ڕاهاتبوو ئەگەر بۆ ژەمی بەیانیان ماست و چای نەخوات ڕۆژەکەی لێ تێکدەچێت. سەردەمانێک لەبەر هەژاری لەگەڵ خوشک براکانی سێ جەمە ماست و چایان دەخوارد، دێتە یادی جارێکیان ماستتەکە بەشیانی ناکرد، دایکی بڕێک ئاوی تێکرد و وتی : بخۆن تا سکتان دەتەقێت.
لەچایخانەکە پیرەمێردێکی قات لەبەر و شیک، زەڕبینێکی بەدەستەوەبوو. بەتەنیشتییەوە دانیشت و بزەخەندەیەکی کرد، لێیپرسی : دەتەوێت ناو لەپی دەستت بخوێنمەوە؟
سەیرێکی ناو لەپی دەستی خۆی کرد و وتی : پەنجا ساڵە ئەم دەستانەم ماندوون، ئێستا دەبێت تۆ چی تیا بخوێنیتەوە.
_ من دەتوانم ئاییندەت بخوێنمەوە.
+لەم ولاتە ئاییندەمان روون و ئاشکرایە.
پیرەمێردە فاڵچییەکە تووند دەستی چەپی گرت و خێرا ڕووانیە ناو لەپی و وتی : تۆ گەشتێکی دوورت لە پێشە!.
بەم وتەیەی سەری سوووڕما و ئارەزوویکرد، فاڵچییەکە ئاییندەی بخوێنێتەوە، خێرا لێیپرسی : چەندم لێدەسێنیت ؟
_ هەرچەند لەتواناتدایە، یان پارەی ژەمێک خواردنم بەرێ!.
بە چایچییەکەی وت : ژەمێ خواردن لەسەر حیسابی من بەم مێوانە بدە.
لەم کاتە کرێکارێک بە کۆخە کۆخ ، هەموو گیان دەڵەرزی، مێردمنداڵێکی دە ساڵانێکی لەگەلدابوو بەرانبەری دانیشتن و داوای ماست و چایان لە چایچیەکە کرد.
منداڵەکە کراسێکی شڕی لەبەردابوو، باوکەکە کە بەردەوام دەڵەرزی چاکەتێکی کۆنی پۆشیبوو، دیاربوو لە یەک دوو شوێن بە دوورمان دوورابوەوە. باوکەکە جەمانییەکەی دایە بانشانی و بە کوڕەکەی وت : چای کەم ڕەنگ بخۆ گەرم دەبییتەوە.
ئەویش هێشتاپاروەکەی بەدەمەوە بوو، لە باوکەکەی پرسی : نەخۆشییت؟
_ بەڵێ…سەرمام بوە…

• بۆ کوێ دەچیت؟
  _ بۆ کرێکاری، ئیشێک هەیە دەبێت تەواوی بکەم. ئەم کوڕە بچکۆلەنەم یارمەتیم دەدات.
• هەنگوین بخؤ گەرم دەبیتەوە.

هەرچەندە لە وتەکەی پەشیمان بوەوە، بەلام تازە قسە لەزار دەرچوو و ناگەڕێتەوە.
باوکە و کوڕە لەسەرخۆ نانی گەرمیان لەباوەش داناو پڕ بەدڵ تیکەیان لە ماستەکە دەدا و دەیانخوارد.
کابرای فاڵچی بەدەم نانخواردنەوە ڵێیپرسی : ئێستا ئامادەیت، ناو لەپی دەستت بخوێنمەوە.
ئەمش زەردەخەنەیەکی بۆ کرد و وتی : کاسبییەکەی تۆ خەراپ نییە، بەلام لەم ولاتە ناو لەپی دەستەکان وەک یەک وایە. ئەگەر ئاسمان گڕ بگرێت، ئێمە لێرە خوێن دەڕێژین.
_ مەبەستت چییە، چۆن دەبێت یەک چارەنووسمان هەبێت؟ تکایە دەستم بەرێ تا بیخوێنمەوە.
فاڵچییەکە بەزۆر دەستی ڕاکێشا و زەڕەبینەکەی لەچاوکرد و کەوتە خوێندندنەوەی.
ئەوش چاوی لە مێردمنداڵەکە بوو، کە خێرا لەتە نانەکەی دەخستە ناو ماستەکەو قوومی لە چایەکە دەدا.
لەهەمان کات گوێی لە فاڵچییەکە بوو پێیگووت : ببوورە ‌هێڵەکانی ناو لەپی دەستت گرژوخاوبوونەتەوە، ناتوانم بیانخوێنمەوە!.

زستانی ٢٠٢٠

ئارتەر (جۆکەر) لە پزیشکە دەروونیەکەی دەپرسێ : ئایە دونیا شێتانەیە یاخود من تێکچوومە؟

تات فیلیپ دەرهێنەروسیناریستی فیلمی (جۆکەر) لەجیاتی پەنابردن بۆ شەڕوپێکدادان، زێتر بایەخ بە بەسەرهات و ژیانی دەروونی تاڵی کاراکتەرەکە دەدات، هەرچەندە فیلمەکە پڕە لە تووندوتیژی، لی تەماشاکردنی کاراکتەرێکی خەمۆکاوی، بینەر تووشی گۆشەگیری دەکات.

ئەگەر کەسێک ولاتی ئەمریکای نەدیبێت و تەماشای ئەم فیلمە بکات( لەوانەیە) وابزانێت زۆربەی گرتە و دیمەنەکان دروستکراون و خەیاڵین، کەچی لە حەقیقەتدا ئەمریکا ولاتێکی سەرمایەدار و بازرگانی جیهانە و چینێکی هەژار تێیدا دەژێت. بۆ نموونە : ئەو کۆلانانەی جۆکەر پێیدا ڕادەکات و دەوری تیا دەبینێت، پڕە لە زبڵ و خاشاک، ڕاستین و شوێنی هەژار نشینین. لەگەل هەر گرتەیەک دیمەنی بینا بەرزەکان و کۆلانە وێرانەکان دەبینین، کە ئەمەش دەرهێنەر جیاوازییە چینایەتیەکەمان پیشان دەدات. هەروەها زانیاریمان دەداتێ کە ڕووداوەکان لە کوێ ڕوودەدەن.
ڕووداوی فیلمەکە دەمانگەڕێنێتەوە بۆ سالانی هەشتاکان، دەبینین (جۆکەر) لافیتەیەکی بەدەستەوەیە و ریکلام بۆ بازاڕێک دەکات، کەچی لەناکاو چەند چەتوونێک دێن و لافیتەکەی لێدەفڕێنن. لە ئەمریکا نەک پیاو بگرە ژنش لەسەر شەقامەکان دەبینیدرێن لافیتەیان بەدەستەوەیەو ریکلام بۆ دوکاندارو بازرگانەکان دەکەن. بەلام ئەوەی جێگەی داخە ئەو کەسەی جۆکەر کاری بۆ دەکرت، سزای جۆکەر دەدات لەسەر ونبوونی لافیتەکە، بە بڕینی بڕێک پارە لە مووچەکەی. هەر لەسەر کارش کاراکەتەرێکی شەڕانگیز دەمانچەیەک دەدات بە جۆکەر، بۆ ئەوەی لەدوا ڕۆژ تووشی کێشە ببێت. لەدواجار جۆکەر لەماڵەکەی خۆی بە (مەقەست)ئەو کاراکتەرە دەکوژێت.

لەگرتەی (یەکەم و کۆتایی) جۆکەر لەبەردەم پزیشکێکی دەروونی دەبینین، ئەوەش بەو مانایەی کە سیستەمی ئەمریکا مرۆی هەژاری تووشی نەخۆشی دەروونی کردووە و نە ئامادەیە چارەسەریان بکات و نە دەرمانشیان پێ ڕەوا دەبینێت بیانداتێت.

دیمەنەکانی ناو واگۆنی قیتارەکان : کاتێ جۆکەر دەیەوێت بزەخەندەیەک بکاتە سەر لێوی منداڵێک کەچی دایکی منداڵەکە تووڕە دەبێت. لێرەدا تێدەگەین کە پەیوەندییەکان لەناو تاکی کۆمەلگە بەرەو کزبوون و لەناو چوون دەچێت. هەروەها هەر لەناو قیتارەکە سێ ئەکتەری دەوڵەمەندی (گاتام) شەڕ بە ئافرەتێک دەفرۆشن و پاشان تێر وپڕ لە (جۆکەر) دەدەن. جۆکەر تووڕە دەبێت هەرسێکیان بە( دەمانچە )دەکوژێت و هەڵدێ.
لەبەرئەوەی ئەو سێ کاراکتەرە لە چینی دەولەمەندەکان دەبن، خەلکی هەژارنشین ئەم کردەوەیەی (جۆکەریان) پێخۆشدەبێت، لەپاش ئەم ڕووداوە خۆشەویستی جۆکەر وەک قارەمانێک دەچێتە دڵی جەماوەرەوە. هەر بۆیە ماسکی جۆکەر پۆشین دەبێتە سیمبوڵ.
لە سیناریۆکە جۆکەر پاڵەوانی فیلمەکەیە، بەلام ئایە کێن ئەوانەی ڕکابەر و ناحەزی جۆکەرن؟ پێدەچیت جگە لە چینی سەرمایەدار، کۆمەلگەش بەشێکبن لەو تاوانانەی ئەنجامدەدرێن. بەلام(باتمان ) وەک منداڵێکی ناسک و نازداری خیزانێکی بورژوازی دەبینرێت، کە چاوەڕوان دەکرێت لە ئاییندا لە فلمێکیتر ڕووبەرووی جۆکەر ببێتەوە.
بەهەربار لەسەر ئەم کوشتن و تاوانانە، لە چاوپێکەوتنێکی تەلەفزیۆنیدا، (رۆبەرتە نیرۆ) لە جۆکەر دەپرسێ: ئایە تۆ کەسێکی سیاسیت؟
جۆکەر : نەخێر…من کەسێکم ژیان بە کۆمیدیا دەزانم…

لە گرتەی چاوپێکەوتنەکانی لە گەل (رۆبەرتە نیرۆ) : سەرەتا ئارەزووی تەماشاکردنی بەرنامەکانی دەکات (talk Show)، بەلام کاتێک دەچێتە ستدیۆ و لە شاشەی تەلەفزیۆن دەردەکەوێت، هەستدەکات (رۆبەرتە نیرۆش) گەمە بە هەست و سۆزی دەکات و دەیڕووخێنێت. دەگاتە ئەو ئەنجامەی کە ئەو کەسانەی خۆشمان دەوێن و سەرسووڕمانین پێیان، زۆرجار شایەنی ئەوە نین ڕێزیان لێبگیرێت. فیشەکێک بەناوچاوەوانی (ڕۆبەرتەوە) دەنێت.
هەروەها لە باکگراوندی گرتەی فیلمەکە، گوێبیستی شووتی ئۆتۆمبیلەکانی پۆلیس دەبین، ئەم جۆرە دەنگ و هاژانە لەناو شاری (نیویۆرک) ئاساییەو لەهەر خووڵەکێک چەندینجار ئەم دەنگانە هەن.

لەگرتەیەکدا جۆکەر لە ژوورەکەی بەسەر سیسەمەکەی پاڵکەوتووە، ڕۆژنامەیەکش لەسەر زەوییەکە دانراوە، لە مانشێتەکەی بە گەورەیی نووسراوە:(بزووتنەوەی نوێ، دەوڵەمەندەکان بکوژن)…… هەڵبەتە دیکۆری ژووروو هەڵبژاردنی وێنە و پێداویستی ناو ماڵ و دانانی ئەو ڕۆژنامەیە، بی ئەنقەست نین.
کاتێ ئەم فیلمە پەخشکرا ، چەند شارێک خۆپیشاندانیان کرد کە نمایشەکە ڕاگرن، چونکە فیلمێکی تووندتیژەو کاریگەری دەروونی لەسەر تەماشاچی درووستدەکات.

لی من کاتێ چووم بۆ سینەما و فیڵمەکەم بینی، لەکاتی نمایش چەند بینەرێکی هەرزەکارو خێزانێک دەرچوونە دەرەوە. ئەو زانیارییانەی من بەرگوێم کەوت ئەوە بوو، کە گەنجەکان تاقەتی گوێ ڕاگرتنی چیرۆک و بەسەرهاتی جۆکەریان نەبووە، بەلکو چاوەڕووان بوونە ئەم فیڵمە پڕ لە ئەکشن و شەڕوشۆڵ بێت لەگەل (باتمان). هەڵبەت هەندێک بۆ چوونیتر هەیە کە تەماشاچی بەرگەی هەڵس و کەوت و کردەوەکانی جۆکەر ناگرێت.
لەکۆتاییدا دەتوانین بلێین ئەم فیلمە کە بەسەرهاتی کۆمەلگەی ئەمریکی و کێبڕکێی شەڕو خێر پیشان دەدات، فیلمێکە کە دەوێت پێمان بڵێت لە دونیای سەرمایەداری چیمان بەسەردا هاتووە؟!.
فیلمێکی سەرکەوتووە و شایانی ئۆسکاریشی هەیە.

————————————————————————————–

-تێبینی: لەسالانی پەنجاکان وەک کاریکاتۆرێکی پۆلیسی نووسراوەتەوە.
-سەرچاوە: فیلمی جۆکەر، لە دەرهێنان و نووسینی ( Todd Philipتات فیلپ)
(Joaquin phoenix رۆلی جۆکەر ( خاکوین فۆنێکس

ئەمڕۆ خێزانێکی جوان داوایان لێکردم بیانگەیەنمە شاری هەولێر. ئافرەتەکە کۆرپەیەکی بەچەشنی پەپوولە لەباوەش کردبوو، کیژۆڵەیەکی بچکۆلانەش کە تەمەنی چوار پێنچ سالێک دەبوو، تووند دەستی باوکی گرتبوو. باوکەکە بە تەنیشتمەوە دانیشت، دایکەکەش لەگەل مندالەکان لەکورسیەکەی پشتەوە.
پێشئەوەی بگەیینە بازگە و مەفرەقەی (دارامان)، بینیم دایکەکە لەچکەکەی سەری داکەند و چاوی کیژووڵە وردیلەکەی داپۆشی. وتی : بۆ خۆت بخەوە تا دەگەینە ناو شاری هەولێر.
لەبازگەی سەربازە عێراقییەکان بێ لێپرسینەوە و لەسەرخۆ بەسەر تاسە و نێوان دوو (هامەر) کە ئالای ڕەشیان پێوە هەڵواسرابوو تێپەڕین.
دونیا فێنک و خۆش بوو، چەند ڕۆژێک بوو باران بە خووڕ باریبوو. بە موسافرەکەم وت : هەرچەندە پاییزە، لی لەپاش ئەم باران باریینە ئەو دەشت و دەرە دیمەنێکی جوانی هەیە.
موسافرەکەم بزەخەنەیەکی کرد و وتی : هێشتا زووە، پەلەی نەداوە.
پێشئەوەی بگەینە شارۆچکەی پردێ، یەک دوو بازگەی ترمان بڕی.
دایکەکە لەپشتەوە وتی : ئاخۆ کەی ڕۆژێک دێت لەدەستی ئەم بازگە و چەکدارانە ڕزگارمان دەبێت؟.
باوکەکە بە پێکەنینەوە وەلامی دایەوە: هێشتا زووە پەلەی نەداوە.
منیش خەندەیەکم بۆکرد و وتم : ئەها ئێستا تێگەیشتم، کەواتە هێشتا سێو پێنەگەیووە.
نزیک پردەکەی پردێ بووینەوە وتم: زۆرمان نەماوە. دەگەینە دوا بازگە ، بەلام تووخوودا بۆچی چاوی ئەو کچە بچکۆلانە ناکەنەوە تا شارۆچکەی پردێ و دیمەنی دەرەوە ببینێت؟
باوکەکە : لێیگەڕێ ئەوهای پێخۆشترە
لە ئاوێنەکەوە سەیرێکی کیژؤلەکەم کرد. پێی لەسەر چۆکی دایکی دانابوو، دایکشی یاری بە پەنجە وردیلەکانی دەکرد. كیژۆلەکەش لەشوێن خۆی دەبزوا، یان وەک ئەوەی ترسێک لە لەشیابێت دەڵەرزی
نزیک بە دەروازەی شاری هەولێر بووینەوە، پێشمەرگە، یەک یەک ناسنامەی لە موسافرەکان دەسەند و خێرا خەلکیان بەڕێ دەخست. کە نۆبەی ئێمە هات، پێشمەرگەیەک دەمانچەیەکی بەلا قنگەوە بەستبوو، لەپاش سلاوکردن پرسی لە کوێوە بۆ کوێ؟
لە کەرکووک بۆ هەولێر.
سەیرێکی ژن و مندالەکەی پشتەوەی کرد و پرسی : بۆچی چاوی ئەو منداڵەتان بەستووە.
دایکەکە خێرا وەلامیدایەوە: چاوی ژان دەکات.
دەتوانم، چاوی بیبینم. منیش کەمێک تووڕە بووم وتم : برا خۆ تۆ پزیشک نیت پێشمەرگەکە گەنجێکی باریکەلانە و گەنم ڕەنگبوو، لەپڕ رووخساری سوور هەڵگەڕاو و بە پێکەنینەوە وتی : کاکی شوفێر، زەحمەت نەبێت دابەزەو ئەو سنووقەی پشتەوەمان بۆ بکەوە. دابەزیم و سنوقەکەم کردەوە، کەچی پێشمەرگەکە هەر لەشوێن خۆی وەستابوو، نەهات سەیری ناو سنووقەکە بکات! پێمگووت : فەرموو… پێویست ناکات، ئێستا دەتوانیت بڕۆیت.
ئەی سنوقەت بۆ پێمکردەوە؟.
خەندەیەکی کرد و وتی : یەک بە یەک..
منیش پێکەنیم و وتم : هەی لەدینت بەم.
لەبازگەکە دەرچووین، باوکەکە وتی : پێشمەرگەکە تۆڵەی خۆی کردەوە.
دایکەکە لەچکەکەی لەچاوی کیژۆڵەکە کردەوە وتی : هەستە کچم بازگە تەواو بوو، چیتر چەکدار نابینیت
دایکەکە بە لەچکەکە سەری خۆی داپۆشی و پرچی کچەکەی بەشانەیەک داهێنا
لە باوکەکەم پرسی : ئەو کیژۆلەیە لە چەکدار دەترسێت؟
-بەلێ…هەر شوێنێک چەکداری لێبێت، دەترسێت و نایەوێت بیان بینێت.
گەیشتینە ناوباژێری هەولێر و نزیک بە قەیسەری، باوکەکە کرێکەی پێدام و خێرا دەرگەکەی پشتەوەی کردەوە ویەک یەک زارۆکەکانی لە هاوسەرەکەی وەردەگرت. پێشئەوەی دایکەکە دابەزێت، سرتەیەکی کردە بن گوێم : ببورە کچەکەم لەترسا (میزیی) بەسەر کوشنەکەتدا کردوە

جەلال قادر

ئەم بەیانییە لە ( حەسیرەكە) دایكێك وكوڕێكی هەرزەكار داوایان لێكردم بیانگەیەنمە گەڕەكی (رەحیم ئاوا).
لە كوڕە هەرزەكارەكەم پرسی: ببورە ئێوە لە رەحیم ئاوا دادەنیشن؟
_ نەخێر..ئێمە خەلكی (سلێمانین).
هەركە ناوی شاری سلێمانی هێنا بروسكە بەر دڵم كەوت.
لە ئاوێنەكەوە سەیرێكی دایكەكەم كرد چاوەكانی فرمێسكی لێ دەباری…یەكسەر ناسیمەوە (سەیران ) بوو…ئەو كچەی هەر كە چاو بچووقێنم ڕووخساری دەبینم… دلم كەوتە لێدان و برینم كولایەوە
كوڕە هەرزەكارەكە سەرگەرمی تێكست كردن بوو…من و سەیرانش ناو ناوە تێكستی چاوی یەكترمان دەخوێندەوە:-
ئاخ بۆ ئەو ڕۆژە خۆشانە چ زوو تێپەڕین ..كە هەر شەو یەكترمان لەباوەش دەكرد و بە گریانەوە لەیەكتر دادەبڕاین…ئاخ چەند خۆش ناوی دەبردم و هاواری دەكرد : (بەختیار بەخەكەم خۆشمدەوێی ).
لەبیرمە ئەو ڕۆژەی گواستیانەوە بە كول بۆی دەگریام. بۆ یەكەمینجار كۆپڵە شعرێك لەناخمدا هەڵقولی:
لەپاش تۆ
دەتوانم بە هەموو كۆلانەكانی شار بسوڕێمەوە
لەشەقامەكان پیاسە بكەم
بە بەردەم ماڵتان سەدان جار
هاتووچۆ بكەم
بەلام من بە بێ تۆ تەنیام
كەسش ناتوانێت وەك تۆ
بە عەشقەوە ناوم بهێنێت و
هاواركات:، (بەختیار بەخەكە) خۆشمدەوێت.
نزیك بە گەڕەكی رەحیم ئاوا بووینەوە…سەیران لە پشتەوە بە هێواشی وتی: كاكی شوفێر بۆ وا بێدەنگی كەمێك باسی كەركووكت نەكردین؟
بە دڵتەنگییەوە و وەلامیم دایەوە : بەخێربێن بۆ ئەم شارە داماوە. كەركووك وەك ئەوە وایە عاشقێك لە مە عشوقەكەی دابڕابێت!.
كوڕە هەرزەكارەكە قسەكەی پێ بڕیم : من هەموو جار كەدێم بۆ سەردانی ئەم شارە دڵتەنگ دەبم.
سەیران : لە پشتەوە سەری هێنایە پێش و وتی : بە پێچەوانەوە من هەر كە دەگەینە (قەرە هەنجیر و چیمەن ) دڵم دەگەشێتەوە..
كەمێك بێدەنگ بووین وەك ئەو بێدەنگیەی نێوان دوو دڵبەر!.
نزیك بە بازاڕی رەحیم ئاوا كەوتینەوە…سەیران دەمی خستە بن گوێم بە دەنگ و ئاوازی ڕۆژگاری عەشقەوە ، بە ناسكی وتی : بەختیار بەخەكەم كوڕە شیریینەكەم با ئێمە لێرە دابەزین..
بە ناو هێنانی (بەختیار ) ئاگری لە جەرگم بەردا….ئاخ عەشق چ دەردێكە.
خێرا ماشێنەكەم ڕاگرت و لەكوڕە هەرزەكارەكەم پرسی: تۆش ناوت بەختیارە؟
_ بەلێ….
پێشئەوەی دابەزن. سەیران دەستی درێژ كرد و وتی: فەرموو كاكی شوفێر ئەمەش كرێكەت ..
ئاگام لە خۆم نەمابوو دەستم بۆ پان كردەوە .. ئەویش شەیتانانە وەك سەردەمی هەرزەكاریمان بە دەستی خاڵی تووند دەستی گووشیم.
ئەو دەستە خاڵییەی كە پڕ لە عەشق بوو!.

(پێشكەش بە تۆ)
ئەم بەیانییە لەسەر جادەكەی (رەحیم ئاوا) ڕاوەستابووم چاوەڕووانی نەفەرم دەكرد. لە دوورەوە خانمێكی قژ كورتم بینی، قاپووتێكی خاكی پۆشیبوو ، ملپێچیێكی سپی بەسەر سنگییەوە شۆڕ كردبوەوە..هەر كە نزیكم كەوت ناسیمەوە….دەستی بە پێكەنین كرد و وتی دەتوانی بمگەیەنیتە (لای مەحكەمە).
لە كورسییەكەی پشتەوە دانیشت و لەناو جانتاكەی بڕێك فایلی دەركرد و بەقەلەم جافێك چەند یادداشتێكی نووسی بە بزەی پێكەنین وتی:
ماوەیەكە تەنز لەسەر عەشق و دڵداری نانووسیت؟

• كەواتە بە تەنزەكانم دەمناسیتەوە؟
• خۆت لە گێلی مەدەو بەسە ئیتر …دەمەوێت چیرۆكێكت بۆ بخوێنمەوە بیكەیت بە بابەتی هەفتەی داهاتووت.
  فەرموو…….. –
  بەرگی فایلێكی هەڵدایەوە وتی: هەبوو نەبوو بە كچ و كوڕێك یەكتریان زۆر خۆشدەویست
• بەلێ……
  ….. + بەلێ چی…چیرۆكەكە هەر ئەوەندە بوو ، بۆ خۆت تەواوی كە
  كەمێك بیرم كردەوە: زۆر باشە…هەبوو نەبوو بە كچێك وكوڕێك یەكتریان زۆر خۆشدەویست…بەداخەوە بۆ یەكتر نەبوون….
• دوایی بوون بە برادر…..
• بوون بە برادەر…بوون بە برادەر …ئا ئینجا سەیریان كرد برادەرییەكە زۆر خۆشترە لە خۆشەویستی یەكە!.
  . چونكە خۆشەویستی یەكە پڕ بوو لە گریان و چاوەڕووانی +
• كەواتە هەبوو نە بوو بە كچ و كوڕێك یەكتریان زۆر خۆشدەویست، بۆ یەكتر نەبوون، دوایی بوون بە دوو برادەری جوان…..
• كچەكە بوو بە محامی و كوڕەكەش بوو بە شوفێری تاكسی.
  هەردووكمان دامان لە قاقای پێكەنین وهەتا گەیشتینە ناو بازاڕ لەخۆشیا دەستم لە سووكان بەرداو لە ترافیك سوورش نەدەوەستام!.

Taxi stories مامۆستا و قوتابی :
دونیا زۆرگەرم بوو تەبریدی تاكسیەكەم داگیرساندبوو. نزیك بە فلكەی (تەپەی مەلا عبدللا) مامۆستاێیكی دێریینم بینی لەسەرخۆ ڕێێ دەكرد و كەمێكش بەلای چەپ دەشەڵی

• فەرموو مامۆستا گیان. … سەركەوە
  (چەند ناخۆش بوو بۆ من مامۆستاكەم بەو پیرییە ببینم)
  مامۆستاكەم گۆچانەكەی دەستی لەنێو قاچی داناو بەتەنیشتمەوە دانیشت، هەناسەیەیكی قوولی هەلمژی و وتی: كوڕی خۆم وادیارە دەمناسیت؟
• بەلێ مامۆستا بەڕێزتان شەش ساڵ وانەت پێداووم
  . + ڕاستدەكەیت …زۆرجار كۆنە قوتابییەكانم دەبینم و سلاوم لێدەكەن و نایانناسمەوە
• كێشە نییە مامۆستا …گرنگ ئەوەیە ئیمە تۆ بناسیینەوە…چونكە ئەگەر تۆ نەبوویتایە ئێستا من كەسێكی نەخوێنەوار دەردەچووم……
• ئەی تۆ كوڕی شیرینم.. خوێندنت تەواو كرد؟
• نەخێر مامۆستا …جەنگی عێراق و ئێران و بەردەوام شەڕ و سەربازی و برسییەتی مۆلەتی نەدا بە ژیانم خوێندن تەواوكەم.
  +كوڕی خۆم گوێی مەدەرێ…گرنگ ئەوەیە تۆ ئێستا وەك مەرد ئیش دەكەیت و موحتاجی كەس نیت.
  ئاهێكم هەلكێشا و وتم. : مامۆستا گیان…ئەو شتانەی لە ئێوەوە فێر بووین. دایك و باوكشم نەیاندەوانی فێرمان كەن…ئێمە كۆمەلێك مندالی هەژار بووین ئێوەش خەمخۆری ئێمە بوون…بەلام چیبكەین جەنگ هەموومانی پەرتەوازە كرد.
  لەم كاتە هەستم كرد مامۆستاكەم باوێشك دەدات و خەوی دێ.
• مامۆستا گیان …ئەگەر دەتەوێت بنوویت بنوو…مەترسە من مالتان پێ دەزانم
• نەخێر كەمێك ماندووم.
• بنوو مامۆستا گیان بنوو..حەقتە ماندوو بیت..سی سال زێترە بە دڵ و بە گیان وانە دەلێتەوە…تۆ نەوەیەكی زێڕینت بە بەرهەم هێنا …تۆ دەرگەی ژیانت بۆ كردینەوە… دوژمنش ژیانی لێكردیینە دۆزەخ!.
  مامۆستا كەم پێی لێڕاكێشاو بە ئاسپایی وتی : ناو ماشێنەكەت چەند فێنك و خۆشە
  پرخەی هات و خەوی لێكەوت.
  تەبریدەكەم ساردتر كرد و مۆسیقا یەكی ئارامم داگیرساند و بەرەو مالی مامۆستاكەم لەسەرخۆ كەوتمە ڕێ.

لە فڕۆکەخانەی شارەکەم موسافیرێکم هەلگرت. پیاوێکی بەساڵە چوو و قەلاو خرپن بوو. سمێل ئەستوور و لچ پان بوو. یەکسەر وتی : من تازە لەبەغداوە هاتووم و زمانی ئینگلیزی نازانم!.
منیش بەخێرهاتنێکی گەرمم کرد و وتم : قەیچییەکە… دەتوانی بە زمانی عەرەبی بدوێین!.
بە شێوازی قسەکردنم وتی : تۆ کوردی کەرکووکی؟
_ چۆن دەزانیت؟
+ ماوەیەک لە کەرکووک پۆلیس بووم. پاشان نەقلی بەغدا کرام، بووم بە بەڕێوبەری یەکێ لە بنکەکان….
بە پێکەنینەوە وتم : ئێ ئەبو ئیسماعیل…هەوالی بەغدا چییە؟
+ بەغدا زبالەیە…من لەسەردەمی سەدام پۆلیس بووم ، ئێستا خانە نشین کراوم.
لەم کاتە گەیشتینە نزیک بە ترافیکێکی سوور.کوڕوکچیک دەستیان لەناو دەستی یەکتربوو لەشەقامەکە پەڕینەوە، کە گەیشتینە تەک ماشێنکەم باوەشیان بەیەکتر کرد کەوتنە ماچکردن لەبەر لێومژین و ماچکردن بالانسیان نەماو خۆیان بە ماشێنەکمەوە گرتەوە، پاشان خەندەیەکیان کرد و دوورکەوتنەوە.
موسافرەکەم وتی : وەللا.. کەلتوری ئەمانە تەواوە، کوڕوکچیان ئازادن لە دڵداری کردن.
_ وادیارە تۆ بەرگی عەشایریت فڕێداوە.
دای لەقاقای پێکەنین و وتی : لەسەر وشەی عەشایر ڕووداوێکت بۆ دەگێرمەوە.
_ زۆر سوپاس….چونکە منیش جگە لە کاری تاکسی، چیرۆکش دەنووسمەوە.
+ چیرۆکی وەک چی؟
_ چیرۆکی پۆلیسی!.
+ یەک هەفتە لەگەلم بە (هەزارویەک شەوەت ) بۆ دەگێرمەوە. بەلام با سەرەتا ئەم بەسەرهاتەت بۆ بگێڕمەوە:
( ڕۆژێکی هاوینی گەرمی بەغدا، لەبنکەکەم دانیشتبووم. بێزارببووم لە کێشەی ئەو خەلکە، بەتایبەت خەلکی عەشایر کە لەسەر ڕووداوی هیچ و پووچ و بێ مانا دەبوایە دەستیگیریاین بکەین. پێش نیوەڕۆ ژنێکی باڵا بەرز وئەسمەریان هێنایە ئۆفیسەکەم، بۆ شکات کردن لە خزم و کەسی مێردەکەی. ئەو ژنە لەجوانیا پیاوی حیزدەکرد. ئارەق بەنێو درزی مەمکی دەهاتە خوار، بەگریانەوە پییگووتم : فریام کەوە…كچەکەم دڵی بە گەنجێکی هاوسێمانەوە بوو. هەفتەی ڕابووردوو کچەکەماین مارە کرد و شیرینیمان خوارد.لەبەر قسەوقسەلۆک بڕیاریارماندا ئەم هەینییە کچەکەم بگوازرێتەوە. بەلام خزم و کەسی مێردەکەم کە دەکاتە ئامۆزای کچەکەم، هەڕەشەیان کردووە و دەلێن شایی یەکە تێکدەدەین.
منیش وتم : تۆ ناوی ئەو عەشایریانەم بۆ بنووسە کە دەیانەوێت شایی کە تێک بدەن. ئیتر خەمت نەبێت.
ژنەکە لەخۆشیا وتی : سوپاس بۆ خوا لەدواجار کەسێک پەیدابوو گوێم بۆ ڕاگرێ. ئەم هەموو کێشەیە خەتای مێردە گەوادەکەمە، کە پشتی ئێمە ناگرێت و بە عەشایری بیردەکاتەوە.
ژنەکە ناوی ئەو خێزانانەی نووسی کە دەیانەوێت ئاژاوە بنێنەوە.
منیش چووم دەستم نایە سەرشانی ووتم : ئیتر دڵ لە دڵ مەدە ئێوە زەماوەندی خۆتان بکەن… من شەوێک پێشتر هەموویان زیندان دەکەم. مەفرەزەیەک پۆلیسیش پاسەوانی زەماوەندەکە دەکەن. بەلام لەبیرتان نەچێت خزمەتی پۆلیسەکانم بکەن.
+ بەسەر چاو..گەورەم …
ئینجا بە توانجەوە وتم : بەلام من وتۆش لەشەوی زەماوەندی کچەکەت پێکەوە دەبین.
ژنەکە دیاربوو حەزی لێبوو…یەکسەر هەلسایە سەرپێ ووتی : تۆ لەو کێشەیە ڕزگارم کە. چیتدەوێ لەخزمەتدام.
لە ژەوورەکەم چەند جارێک ماچمکرد و پاشان پێمگووت : ئێستا دەتوانی برۆیت و لە شەوی زەماوەند دەتبینم!.
شەوێک پێش زەماوەند هەرچی گەنج و پیاوی ئاژاوە گێرعەشایر هەبوو زیندانیانم کرد. خۆشم وەک عومدە لەناو شایی یەکە لەگەل مەفرەزەکەم دەسووڕامەوە.
شەو کە بووک گواسترایەوە. باوکی بووکە هاتە لام و پاڕایەوە کە خزم و کەسەکانی بەردەم. فەرمانم بە پۆلیسەکانکرد کە ئەویش بەرن بۆ زیندانی.
ئەو ئێوارەیە پۆلیسەکانم تێرکرد. خۆشم لەگەل دایکی بووکە تا نیوە شەو ڕامانبوارد.

بۆ سبەی زیندانی یەکانم لە حەوشەی بنکەکەم لەبەر خۆرەتاو بە برسیەتی ڕیز کردو لەبەرچاویان قەیماخ و چاییم دەخوارد. فەرمانشم دابوو هەریەکێک فزە لەدەمی بێت شووڵاق دەخوات.
کاتژمێری دەی بەیانی دایکی بووکە هات و لێمپاڕایەوە وتی : گەورەم من دەبمە کەفیل ئەم هەموو خزمەم تکایە ئازادیان کە.
ئەم بیرۆچکەیە تەکبیری هەردووکمان بوو کە لەژێرجێگە پلانمان بۆ دانابوو.
بەو شێوەیە هەموویان کاغەزیان ئیمزاکرد کە چیتر تەداخوولی ژیانی بووک و زاوا نەکەن).

کاتێ موسافرەکەم لە گێڕانەوەی چیرۆکەکەی بوەوە..دەستی نایە بانشانم وتی : ئێستا تێگەیشتی لە مەبەستم؟
منیش هەلوەستەیەکم کرد وتم : نەوەلا …ئەوەنە خۆش چیرۆکەکەت گێڕایەوە لەبیرم چوەوە.
دای لە قاقای پێکەنین و وتی : بەخوا تۆش عەشایری… مەبەستم ئەوەیە ئەگەر ئەو عەشیرەتە عەشایر نەبوونایە دایکی بووکەش بە گاین ناچوو!.

ئەو ڕووداوەی هەرگیز لەبیرم ناچێتەوە وهەردەبوو ڕۆژێک بێت و بیگێڕمەوە. بەتایبەتی لەپاش ئەو هەموو ڕووداوە ناخۆشانەی بەچاوی خۆمان دەیبینین!.
چەندین ساڵ پێش لە یەکێ لە کەناڵە تەلەفزیۆنەکانی شارەکەم وەک کارمەندێک کارم دەکرد. کەناڵە تەلەفیزیۆنەکەی ئێمە نازناوی دەرکردبوو بە کەناڵی گۆرانی وهەڵپەڕکێ. هەندێک لە میدیاکان توانجیان لێدەداین و دەیانووت : ترسنۆکن و ناوێرن ڕووداوەکان بگێڕنەوە.
ڕۆژێکیان بەڕێوبەری کەناڵێکیتر پێیووتم : ئێوە لە گوێی گایە نووستوون، ئاگاتان لەم هەموو ڕووداوە نەماوە لە جیهان یان لەم شارە دەگووزەرێ…یان ناوێرن باسی کەن؟
بە پێکەنینەوە وەلامیم دایەوە: یەکەم ستایلی کەنالەکەمان وایە…دووەم ئەو سەگوەڕینەمان بۆ ئێوە جێهێشتووە!.

_ باشە…خۆ دەکرێت بەرنامەی کۆمەلایەتی پێشکەش کەن، بۆ نموونە کێشەی خێزان…هەر هیچ نەبێت پەیامنێرێکتان بنێرنە بەردەم دادگا دەیان کێشەیە هەیە دەتوانن ڕیپۆرتاژی بۆ بکەن.
ئامۆژگارییەکانی ئەو برادەرەم بەدڵ بوو. لەپاش ئەوەی لەگەل بەڕێوبەری کەناڵەکەم قسەمکرد. ئەویش ڕەزامەندی نیشاندا.
لەگەل قرچەی گەرمای هاوین سەری خۆم هەلگرت وچووم بۆ بینایەکەی دادگاو باجەکەم بە دادوەر پیشاندا و وپێمووت بۆچی هاتووم.
دادوەر وتی : کەناڵەکەی ئێوە زۆرجوانە و بەرنامەکەتان مەگۆڕن…بەلام ئەگەر هەر حەزدەکەن ڕیپۆرتاژێک ئامادە بکەن فەرموو دانیشە بە تەنیشتمەوە گوێ لە کەیسەکان بگرە. کام کەیست بەدڵ بوو. پرسێک بە خاوەنەکەی دەکەین ئەگەر ڕازیبوون دەتوانن کارەکەتان ئەنجام بدەن.
دانیشتم و چای بە دوای چاییم دەخواردەوە. لەهەر دەقەیەک چەندین فایل دەهاتن و دەچوون. ناو ناوەش تەلەفۆن دەکرا لەم بەرپرس و لەو بەرپرس.
بە کورتی و پەتی، لەناکاو پیرەمێردێک هاتە ژوورەوە. ئارەقەی لەشی ڕۆژە ڕێیەک دەڕویشت و ماند و شەکەت دیاربوو. هەر کە سەیرت بکردایە بەزەییت پیا دەهاتەوە دەتگووت ئاخۆ چی لێ قەومابێت.
دادوەر بەڕێزەوە فەرمووی : خاڵە گیان ئەمرکە؟!..

پیرەمێرد : ڕۆڵەکەم…من باوکی ( ی) هاتووم بەڵكو لە زیندان بە کەفالتش بێت بەریدەیت!.
هەرکە ناوی (ی) هێنا…جەنابی دادوەر وەک فیشەکە شێتە چوو بە ئاسمان و بە پاسەوانەکەی بەردەم دەرگەی وت : کەسیتر نەنێریتە ژوور.
دادوەر ڕووی لە پیرەمێردەکە کرد ووتی : مامە گیان من ڕێزت دەگرم. بەلام توخوودا توو ویژدانت لەسەردەمی تۆ تا ئەم سالانی دوایش. ئەگەر یەکێک منداڵی یان خزمێکی قووندەر بوایە چییان لێدەکرد؟
پیرەمێردەکە لەشەرما خۆی لەناو قەنافەکەوە بچووکتر کردەوە.

دادوەرەکە بەردەوامبوو لە قسەکردن : وەنەزانی کەیسیترمان نەبووە لەسەر نێربازی. بەلام کوڕەکەی تۆ بەرپرس بووە لەناو ئاسایش، دەستی هەبوە لەگەل باندی حەب فرۆشتن. باندەکەش کردەوەکانی کوڕەکەتیان بە دەنگ و ڕەنگ تۆمارکردوە…
پیرەمێردەکە وتی : قوربان…من نەهاتووم گوێ بگرم لە خوێڕییەتی کوڕەکەم. لەبەرئەوە هاتووم چونکە کوڕەکەم ژن ومنداڵی هەیە بەلکو بتوانیت کەیسەکەی بگۆڕیت وئابروومان نەچێت و سزاکەشی کەمتر کەیتەوە.
دادوەر: مامەگیان…کوڕەکەی دووجار تاوانبارە…ئەو کە کارمەندی ئاسایشە دەبوایە ئاسایشی نیشتیمان و هاوڵاتی بپارێزێت. کەچی ئەو دەستی لەگەل دزوجەردە و قاچاخچی تێکەڵ کرد…
پیرەمێردەکە هەڵسایە سەرپێ و وتی : بەخوا کوڕم تۆش حاکمێکی کەڵە ڕەقی…

دادوەرەکە هاتەوە سەر کورسییەکەی و کەمێک ئارام بوەو بە پیرەمێردەکەی وت : ببورە مام حاجی….بەلام ئێستاش نازانم چۆن ڕووت هات داوای واستە بکەیت؟
مام حاجی سەیرێکی منی کرد و وتی : ڕۆلەکەم… جەرگ شیریینە!.
لەژوورەکە چووە دەرەوە.

دادوەر ڕووی لەمن کرد ووتی : دەتەوێت ڕیپۆرتاژێک بۆ ئەم کەیسە بکەن؟
ئارەقی شین ومۆرمکردبوو. هەڵسامە سەرپێ و سوپاسی دادوەرم کرد وتم : جەنابی دادوەر…وا باشترە بەرنامەی کەناڵەکەمان نەگۆڕین و بەردەوامبین لە پەخشی گۆرانی و مۆسیقا.

ئەو سای گەنج بووم لە کۆتایی ساڵی هەشتاکان. بوون بە ئەکتەر و چوونە سەر تەختی شانۆ خەونی من و برادەرێکی شیرینم بوو.
دەرهێنەرێکم ناسی لەدەڤەری سلێمانی هەرچەندە زۆربەی کات سەرخۆش بوو، بەلام کەسێكی ناوداربوو. چەندین جار داوام لێکرد هەرچۆنێک بێت دەورێکم بداتێ و تاقیم بکاتەوە.
دەرهێنەرەکە بەمەرجێ رازیبوو دەورم بداتێ کە پارەی مەشروب خواردنەوە و گەعدەی بۆ سازکەم. پێمووت : برادەرکەم لە بنەماڵەیەکی زەنگینە… دەورێکش بدە بەو تا بتوانین داواکارییەکەت جێبەجێ بکەین.
دەقی شانۆگەرییەکی نووسیبوو بەناونیشانی لە (سێدارەدان).
من دەوری جەللادەکەم دەبینی، برادەرکەشم زیندانییەک بوو کە دەبوو لە کاتی لە سێدارەدان ڕازی دڵی خۆی بەیان کات. لە پاش چەندین پرۆڤە، ڕۆژی نمایش دیاریکرا. من و برادەرەکەم لە دەورەکەی خۆمان زۆر لە خۆبایی بووبووین و لە خۆشیا نەماندەزانی چیبکەین!.

کاتێ چووینە سەر تەختەی شانۆ…هەموو شت ئامادەکرابوو. جەماوەرێک زۆر هاتبوون و بە تامەزرۆییەوە چاوەڕوانی نواندنمان بوون. دەرهێنەرەکەشمان لە پشتی پەردەوە عارەقی دەخواردەوە هانیدەداین کە لە دەقەکە دەرنەچین و نمایشێکی جوان بکەین.
لەسەر تەختەی شانۆ: پەتی سێدارەم بەست بە مڵی برادەرەکەمەوە و پێمووت : دوا وەسیەتت چییە بۆ ژیان؟
_ من قسەیەکم نییە بۆ ژیان…
+ چۆن دەبێت قسەت نەبێت، جەماوەر چاوەڕێی تۆ دەکەن و دەیانەوێت بزانن دوا هەستی مرۆڤ چییە پێش مەرگ!.
_ دەمەوێت جگەرەیەک بکێشم. هەرکە دوا قومم لە جگەرەکەدا تۆ کورسییەکە لەژێر پێم لابەرە و کۆتایی بەژیانم بهێنە.
جگەریەکم بۆ زیندانییەکە داگیرساند و دامە دەستی. لەپاش ئەوەی چەند قوومێکی لە جگەرەکەدا.
وتی : ژیان وەک جگەرەیە کێشان وایە هەر قوومێک و دوانی خۆشە پاشان دەبێت فڕیی بدەی.
کورسییەکەم لەژێرپێی لابرد. برادەرەکەم پێی کەوتە لەرزین و چاوی سوورهەلگەڕا و خنکا.
کاتێ دەستم بۆ سەر دڵی برد، هەستمکرد بەڕاستی مردووە. خێرا چوومە پشتی پەردە و هاوارمکردە سەر دەرەهێنەرەکە و پێمووت ؛ ئەوە تۆ چییتکردووە ئەو ئەکتەرەمان بەڕاستی کوشت.

دەرهێنەرەکە دەستی گرتم و لەگەل خۆیدا هێنامییە سەر تەختەی شانۆ.
پێکەوە پەتەکەمان لە مڵی برادەرکەم کردەوە، تەرمەکەی کەوتە خوارەوە.
دەرهێنەرەکە کە هێشتا بۆنی عارەق لە دەمی دەهات و مەستی بەری نەدابوو، حەبلەکەی کردە مڵمەوە و پێووتم : سەرکەوە سەر ئەو کورسییە و خۆت تاقی بکەرەوە.
هەرچەندە من دەمزانی کە ئەم دیمەنە لە دەقەکە نەبوو. بەلام لەبەرئەوەی برادەکەم مردبوو، سەرملێشێوا بوو ئاگام لە ڕەفتارم نەمابوو.
کە چوومە سەر کورسییەکە. دەرهێنەرەکە لێیپرسیم : لە دواساتەکانی ژیانت دەتەوێت چی بلێت؟
کەمێک بیرمکردەوە و وتم : دەمەوێت بڵیم کە هەمیشە ڕاستییەکان شاراوەن!.

لەم کاتە جەماوەر کەوتنە چەپڵە لێدان. دەرهێنەرەکە کورسییەکەی ژێرپێیمی ڕاکێشا. مڵم بە پەتەکەوە گیربوو دەمویست هاوارکەم و بڵێم کورە خنکام. دەنگم دەرناچوو بەلام گوێم لەگەل چەپڵەی جەماوەر دەزرینگایەوە.
لە دوا پەڵقاژێی ژیانم : تێگەشتم کە لەسەرەتاوە نەدەبوو ئەو دەورە ببینم!.

لەسەر خۆ تاکسی یەکەم لێدەخووڕی… لەبەردەم پارکێک ژن و مێردێکی پیروپەککەوتەم بینی ، لەسەر کورسییەک دانیشتبوون و بە شادییەوە سەیری کۆمەڵی منداڵیان دەکرد کە لەناو پارکەکە جۆلانێ یان دەکرد!.
لەدلێ خۆم وتم: لە کۆتاییدا دەبێت ژیان بە سادەیی وەرگرین…بۆچی دڵی یەکتر بشکێنین.
لەم خەیاڵەدا بووم. ژن و مێردێکیتر کە تەمەنیان نزیک پەنجا ساڵێک دەبوو. دەستیان بۆ بەرزکردمەوە.
کاتێ ماشێنەکەم وەستان…پیاوەکە بەتەنیشتمەوە دانیشت. ژنەکەش لە دواوە دانیشت.
پێم بە بەنزین ناو وتم : بۆ کوێ؟
پیاوەکە وتی : شەقامی پێنج لە گلیب!.
ژنەکە وتی : وا باشترە من دابەزم.
پیاوەکە ئاوڕێکی دواوەی دا و وتی : چیبوە دیسان؟
_ چیبووە…تۆ لەمن دەپرسیت…بۆ لە پێشەوە دانشتووی؟ بۆ نەهاتی بە تەنیشتمەوە دانیشی.
+ بمبوورە…حەزدەکەیەت تاکسییەکە ڕادەگرم و دێمە دواوە.
_ نەخێر نامەوێت بێیتە تەنیشتم دانیشت…دەبوایە یەکەمینجار ئەو کارەت بکردایە…نازانم بۆ پیاوان درەنگ بیردەکەنەوە.
لەسەر جادەی یەکەم کە تێپەڕین کچێکی شۆخ و جوانمان بینی لەگەل سەگەکەی ڕێی دەکرد.
لەناکاو ژنەکە دەستی خستە سەرشانی مێردەکەی و وتی : ئەوە چاوت ژانی نەکرد…ژنت نەبینیوە؟
+ من سەیری سەگەکەم کرد..
_ بەلێ …بەڵێ…..چەند جوانش قایش و کەمەرت بەستووە…ئەی بۆ بە منت نەوت قایش ببەستم.
+ خۆ تۆ منداڵ نیت تا پێت بلێم خۆت ببەستیتەوە.
_ تۆ هەمیشە بیر لەخۆت دەکەیتەوە…لەنان خواردن وگەڕان و سەیران..
+ ئێستا تۆ چیت لەمن دەوێت؟
_ من چیم لەتۆ دەوێت؟ تۆ خۆت چیت لەمن دەوێت…هەرکات دەلێم ئەوە مەکە دەیکەی…
لەم کاتە هەستمکرد شەڕو دەمەقالێ کەیان بێ مانایە و خەریکە گەرمتر دەبێت. بۆ هێور کردنەوەیان، وتم : ژیان ئەوە ناهێنیت دڵ یەکتر بشکێنن…
موسافرەکەی تەنیشتم بە تووڕەییەوە ڕووی دەمی لەمن کرد و وتی : تۆ بۆت نییە قسە بکەیت!.
پێکەنیم و وتم : بە خوا ئەمەش لەوەیتر کەرترە…
کە گەیشتمە بەردەم ماڵیان کرێیەکەیان داو خێرا دابەزین و لە ئاوێنەی ماشێنەکەوە بینیم ژنەکە چەند هەنگاوێک لەپێش پیاوەکەوە ڕێی دەکرد و بۆڵە بۆلی بوو.
ئەم دوو مەسافرەم بێزاریان کردم..لە داخە بەرەو جادەی (کۆلینەید ) بەدەم کەناڵەکەوە ڕۆیشتم… تا سەیری دیمەنی جوانی پارک و جۆگەلە وڕووبار بکەم.
لەپشتی زانکۆی ( کارڵتۆن) کچ و کوڕێکی لاوی جوان دەست لەناودەست …هێمایان بۆ کردم..چراخی چوارییەکەم داگیرساند و ڕاوەستام. هەردووکیان لەپشتەوە دانیشتن.
لەناو پارچە کاغەزێک ناونیشانی موتێڵێکی لەسەر بوو دایانە دەستم.
لەپاشان کەوتنە ماچکردنی یەکتر و گاڵتە وگەپ و پێکەنین.
ئینجا کچەکە خۆی هەڵدایە باوەشی کوڕەکە، کوڕەکەش دەستی بە قژیا دەهێناو ناو ناوە ماچی دەکرد.
خۆشحاڵ بوو بەم دوو موسافرە جوانەم، بەلام لەخۆشم دەپرسی : ئەگەر لەوە زیاتر لەیەکتر بئاڵێن بەپێی یاسا بۆم هەیە ڕێگەیەن لێبگرم.
لەم خەیاڵە بووم…گوێم لە هەناسەکانیان بوو…ئاوڕمدایەوە بینیم گەنجەکە بەسەر کچەکەوەیە.
لەترسی ئەوەی مۆڵەتی شوفێرییەکەم لەدەست نەدەم…جوانترین سێرڤسی پێشکەش کەم..پێم بە بەنزین ناو…تا گەیشتمە بەردەم موتێڵەکە ئاوڕی دوای خۆم نەدایەوە!.

A Taxi Driver’s Series (8)

—————————
لەبەردەم پارکی تاکسییەکانی هوتێڵێک چاوەڕوانی موسافرێکم دەکرد. زۆرم برسی بوو. ئارەزووی خواردنی سەلاتێکی بە هەنارم دەکرد. بیرم لەوەش دەکردەوە کە لەژیاندا ئاواتم بوو ببم بە چێشتلێنەر. ڕەستورانێکم هەبێت خۆشترین خواردنی تیا بفرۆشم. بە بۆچووونی من چێشتلێنانش هونەرە.
مرۆڤ ئەگەر ببێت بە پزیشک یان ئەندازیار یان سەرۆک لەدواجار حەز بەچێشتی خۆشدەکات.
بەلام لەبەرئەوەی رەستورانش کارێکی ئاسان نییە، هەردەم ترساوم خۆم لەم بزنسە بدەم.
موسافرەکەم دەرگەی کردەوە وناوی خۆی پێوتم. منیش فەرمووم لێکرد.
لە کورسییەکەی تەنیشتمەوە دانیشت. وتی : ڕۆژێکی خۆشە.
+ هەموو ڕۆژەکان خۆشن ئەگەر مرۆڤ دڵی خۆشبێت.
ئەو ناونیشانەی ئەو بۆی دەچوو هۆڵی کۆنفراسی حزبەکان بوو.
+ ئەمڕۆ کونفراسی حزبی هەیە؟
_ نەخێر…فاڵ گرتنەوەمان هەیە..
+ فاڵ دەگریتەوە..
_ بەلێ من ناو لەپی دەست دەخوێنمەوە.
دەستی ڕاستم بۆ درێژکرد و وتم فەرموو…
لەناو جانتاکەی زەڕەبینێکی دەرکرد و لایتێکی لەناو دەستم داو کەوتە خوێندنەوەی:
_ سەرەتا تۆ زۆر برسییتە…
+ بەچی دەزانیت؟
_ کە مرۆڤ برسی بێت پێستەی دەستی دەگۆڕێت، لەبەرەئەوەی پێویستی بە ڤیتامیناکان دەبێت…دواجار تۆ کەسێکی ماندووی بە ناچاری کاری تاکسی دەکەیت…بە بڕوای من تۆ دەبوو لە چێشتخانەیەک کار بکەیت….بەلام هەرگیز ئەم کارەت ئەنجام نەداوە لەبەرئەوەی چێشت لێنان و کابانیت وەک پیشەیەک هەڵنەبژاردوە. هەروات زانیوە ئەگەر ببیت بە مامۆستا باشترە لەوەی ببیت بە کابان…تۆ لە ژیانتا پێچاوپێچ و سەرلێشێوانە ژیاویت..
سەرم سووڕمابوو ئەم موسافرە چۆن دەتوانێت مێشکم بخوێنێتەوە. لێم پرسی : بەڵگەت چییە؟
_ خەتەکانی ناو دەستت خوار و پچڕپچڕن…بەلام ناتوانم هەموو نهێنییەکانی خوێندنەوەی دەستتت بۆ بدرکێنم. کەچی دەتوانم پێت بلێم لە خؤشەویستیا فەشەڵت هێناوە…لە ڕووی کۆمەلایەتیا لە پەیوەندییەکان دەترسێیت.
+ ئەوەی تۆ دەیلێیت هەمووی ڕاستە…ئایە دەتوانیت ئاییندەش بخوێنیتەوە.
زەڕەبینەکەی خستە گیرفانی چاکەتەکەی… بۆ ساتێك بێدەنگ بوو… لەبەردەم بەنزیخانەیەک تێپەڕین.
من سەیری گێچی بەنزینەکەم کرد…لە نیوە کەمتر بوو. لە دڵی خۆم وتم : ئێواران هەرزانتر دەبێت…تانکییەکەم پڕ دەکەم.
موسافرە فاڵچییەکە ئاوڕێکی لێمدایەوە و وتی : چاوەڕوانی ئێوارە نرخی بەنزین هەرزانتربێت؟
شۆکی کردم.
+ تۆ شێتم دەکەیت…چۆن ئەم هەموو زانیارییەت کۆکردۆتەوە کە مێشكی مرۆڤ بخوێنیتەوە؟
_ بەو شێوەیە قورس نییە…چاوم لێبوو، کاتێ بەنزیخانەکەت بینی، سەیری نرخی بەنزینت کرد…
تا گەیشتینە بەردەم هۆڵی کۆنفراسەکە بێدەنگ بووم. پاشان ئەم بێدەنگییەم شکاند و لێمپرسی :
ئایە دەچیت ناو لەپی بەرپرسەکان دەخوێنیتەوە؟
_ نەخێر…دەچم ڕاپۆرتی ناو لەپی دەستی تۆ بەوان دەدەم.
+ بۆ چی ناو لەپی دەستی من ئەوەندە گرنگە..
_ ئێوارە سەیری هەوالەکان بکە بزانە کاندیدەکان باسی چیدەکەن…بۆ ئەوەی تۆ بچیت دەنگیان بۆ بدەیت.
هەرچەندە من حەز بە دەنگدان و هەڵبژاردن ناکەم چونکە دەزانم بە گۆڕانی حزبێک هیچ لە بەرنامە و سیستەمی دەوڵەت ناگۆڕدرێت. بەلام لەبەرئەوەی ئەم موسافرەم وەک سحرباز بوو ناچار ئێوارە لە تەلەفزیۆنەوە گوێم بۆ هەواڵەکان گرت.
لە چاوپێکەوتنێکا یەکێ لە کاندیدەکان دەیگووت : پێویستە ..نرخی بەنزین داگرین…شوفێری تاکسییەکان شەوڕۆژ کاردەکەن بەشێکی زۆری ڕۆژانەکەیان بۆ بەنزین دەچێت. ئەگەر بەنزین هەرزان بێت شوفێرەکان دەتوانن کاژمێری کار کەمتر کەنەوە و کرێ موسافیرەکانش هەرزانتربێت.
شەو پێشئەوەی بنووم بیرم لەوە دکردەوە کە ئەمجارەیان بچم بۆ دەنگدان…بەلكو ئەمجارەیان کاندیدە نوێکان بتوانن خۆشگوزەرانمان بکەن و بەنزینش هەرزان کەن.

ئەڵقەی یەکەم: دەرگەی دۆزەخ!.

لە ساڵی (٢٠٠٠) شوفێری تاکسی بووم، (سامان)م وەک موسافرێک گەیاندە فڕۆکەخانەی ستۆکهۆلم. سامان لاوێکی رووخۆش وبەختەوەر دیاربوو.
سامان وتی : لە پاش چاوەڕوانی و پارە سەرفکردنێکی زۆر ئەمڕۆ هاوسەرەکەم دەگاتە فڕۆکەخانە.
پێکەوە چاوەڕووان بووین کەچی فڕۆکەی دەزگیرانەکەی لە سکرینی فڕۆکە خانەکە تۆمار نەکرابوو.
لە پرسگەکەمان پرسی : وتیان ئەو خەتە بەیانی زوو گەیشتووە!.
سامان خێرا تەلەفۆنی بۆ ماڵی خوشکی دەزگیرانەکەی کرد. وتیان بەڵی گەیشتووە وا لە ماڵ ئێمە دانیشتووە.
هەرچەندە (سامان) سەری سووڕمابوو. لی من یەکسەر هەستمکرد فێلیان لێکردووە وئەم ئەم برادەرە دەرگەی دۆزەخی لێکرایەوە!.
لە ڕێگە پێمووت : برا…ئەم ماستە موویەکی تیایە. دانبەخۆتا بگرە و جوان گوێ لەوان بگرە. پاشان تا پێتدەکرێت لەم وڵاتە خۆت لە کێشەی ژن مەدە.
وتی : من نازانم تۆ باسی چیدەکەیت. من هیچ کێشەیەکم نییە و هیچش لەخۆم شک نابەم. بەس تێناگەم ئەم ژنە بۆ بێڕیزی لەگەل کردووم؟!.
-برا تۆ دەلێی لە گوێی گایە نووستووی، جار هەیە کە ژن کە دەگاتە ئێرە هەر لە مەتارەوە لە پیاوەکەی جوودا دەبێتەوە.
+ باوەڕناکەم چونکە هیچ خەراپەیەکم لەگەل نەکردووە.
بە پێکلەنینەوە وەلامیمدایەوە : وەلا تۆ یەک چاکەت لەگەل کردوە پاداشتێکی جوانشت دەداتەوە.
+ چییە پێمان ڕادەبوێریت؟
بێدەنگ بووم تا گەیشتینە بەردەم ماڵی (سەیران) خانم کە دەکاتە خوشکی (سۆزان) دەزگیرانی سامان.
زەنگی لێدا سەیران هاتە دەرەوە و وتی : ببورە (سۆزەی) خوشکم جارێ ماندووە و نووستوە ، حەزدەکات سبەینێ بتبینێ.
+ ئەوە تۆ باسی چیدەکەیت..سۆزە هاوسەری منە و خۆشمدەوێ دەمەوێت بیبینم.
-سامان گیان…من حەقم بەسەر پەیوندی ئێوەوە نییە. لی سۆزەی خوشکم دەیگووت کات خۆی لەکوردستان ئەزێتت داوە!.
+ بۆچی ئەو لەکوردستان هێشتوویەتی پەنجەم بەر پەنجەی کەوێت؟
-من نازانم ئەوە پەیوەندی بە خۆتانەوە هەیە.
+ تۆ هەمووشت دەزانیت و هەموو شتت لەژێر سەر تۆیە. هەر تۆ نەبووی ئەو خوشکەت پێناساندم. باشترە ڕاستییەکەم پێ بلێیت؟
-خۆت تووڕي مەکە تا خەبەری پۆلیسم لێنەداویت.

لەم کاتە کە بینیم سامان تووڕەیە خێرا پیلیم ڕاکێشا و خستمە ناو ماشێنەکەم. پێگووت : دان بەخۆتا بگرە…بەزاتی خوا تەڵەیان بپۆ داناوی!.
+ ئاخر من هیچ لەخۆم شک نابەم، تەڵەی چی؟ سۆزە تا دوێنێ دەیگووت بە ساقە وبم…
-برا با ئێـە لێرە دوورکەیینەوە…سبەی لەگەڵ خۆی قسە بکە و هەمووشت ڕووندەبێتەوە.
+ بۆچی من دەتوانم تا سبەی خۆم چاوەڕوانبم…ئێستا خەریکە شەق بەرم.
لەگەڵ سامان بەناو گەڕەکەکانی شۆڕبووینەوە تا گەیشتینە گەڕەکی (ئێنخیدا) کە ماڵی سامانی لێبوو.
کاتێ گەیشتینە بەردەم دەرگە وتی ؛ بەخوا بەتەنیا جێم ناهێڵی دێیتە ژوور.
-ناتوانم دەبێت کاسبی بکەم.
+ کاسبی چی…من ناتوانم بەتەنیا هەناسە بدەم. دەزانم ڕۆژانەکەت قەرزارم، بەلام بە زیاوە پارەت دەدەمێ، لەگەڵم بە تا تەلەفۆنێک دەکەم.
سامان پڕ قوڕگی لەگریان بوو!.
دەستم خستە سەرشانی و وتم : خۆراگر بە براکەم..بەتەنیا جێت ناهێڵم…خۆزگەش هەموو کێشەیەک بە پارە چارەسەر دەکرا.

ئەڵقەی دووەم : درۆ کردن!.

لە ماڵی (سامان) کتریم کردە سەر ئاگر تا چایەک بخۆیینەوە. بەلام سامان ئۆقرەی بەخۆی نەدەگرت و بەردەوام لە هەیوانەکە هات وچۆیبوو!.
وتی : با زەنگێکیتر بکەم بۆ (سۆزە) بەڵکو وەلامیدایەوە!.
-ئەلوو…سەیران خان سۆزە بێدارە؟
+ بەلێ…وا خۆی دەشوات، تەڵەفۆنت بۆ دەکاتەوە. بەلام تۆ چیتر تەلەفۆن مەکە بۆ ماڵم. هەرچیت هەیە لەگەڵ سۆزە بیبڕێنەوە. (تەڵەفۆنەکە داخرا)
-ئای لەم بێ ئابروە خۆ تەڵەفۆنەکەی لەسەر داخستم.
+ مەبەستت چییە…
-ئاخری خێربێت…
هەستمکرد وردە وردە سامان تووشی نەخۆشی دەروونی دەبێت. لەبەرخۆیەوە ورتەی دەهات و منیش هیچ تێنەدەگەیشتم.
لەپاشئەوەی چایەکە دەمی کێشا زەنگی موبایڵەکەی سامان لێیدا. خێرا وەلامیدایەوە : ئەلوو…
-سامان من سۆزەم…دەمەوێت پێتبلێم کە حەزناکەم ژیان لەگەل تۆ بەسەر بەرم!.
+ باشە…خۆ بەزۆر نابێت..بەس پێمبلێ لەبەرچی؟
-خۆت باش دەزانیت؟
+ من نازانم باسی چی دەکەیت، ناشزانم بۆچی ئاوا لەپڕێکا گۆڕاوییت و منت قۆڵ کرد وکاتی رەحلەکەشت بەهەڵە پێدام.
-من پێم باشە بەخۆشی لەیەکتر جوودا بینەوە. لەمڕۆ بەدواوە نە من تۆ دەناسم و نە تۆش من دەناسیت.
+ سۆزە…دەتۆ ڕاوەستە، بەس پێمبلێ چیبوە؟
-هیچ هەروا بە هەوەس…دەتەوێت بەزۆر بمکەیت بە هاوسەرت؟
+ باشە…ئەی هاوار ئێـمە بە کوردی قسە دەکەین. یەک هۆم پێ بلێ تا منیش بە خۆما بچمەوە.
-بەخوا ئێوەی پیاو درەنگ تێدەگەن!.
+ باشە، ئێستا من درەنگ تێدەگەم بەلام پێمبلێ لەسەرچی؟
-ماوەیەکیتر نامەی جیابوونەوە دەگاتە دەستت، ئیمزای بکە بێ سەرێشە.
+ جیابوونەوە پێویستی بە نامە نییە، کە تۆ منت نەوێت بەزۆر نابێت.
-باشە سامان نەکەی چیتر تەلەفۆن بکەیت خۆم پەیوەندیت پێوە دەکەم.
+ دەتۆ ڕاوەستە پێت نەوتم لەسەرچی وازم لێدێنی؟
-لەبەرئەوەی من و تۆ دوو دونیای جیاوازمان هەیە.
(تەلەفۆن داخرا)
سامان ئارەقی شین و مۆری کردبوو. وتی : وەرە خوات بمێنێ…تا دوێنێ بەدەنگی ناسک و نازدار قسەی لەگەل دەکردم. کەچی ئێستا دەنگیشی گۆڕیوە.
-ناوی خوا بهێنە و هێور بەرەوە، هێواش هێواش وا کێشەکەمان بۆ ڕوونتر دەبێتەوە.
+ هێواش هێواش بۆم ڕووندەبێتەوە کە ئەمانە چ دەعبایەکن، چۆن کلاویان کردە سەرم. لەماوەی بیست و چوار سەعات چوونەتە پێستەی شەیتانەوە.
-چایەکەت بخۆرەوە برا…
پێکەوە چاییمان خواردەوە. چایەکەی سامان گەرم بوو ئاگاشی لەخۆی نەبوو لەناکاو فڕێکی لێداو هاواری لێ هەڵسا.
+ ماڵێکت بۆ پێتنەووتم گەرمە، هەر تۆ ماوییت بمان سووتێنیت.
دەلێم : تۆ بە بەتەنیا لەم خانووە دەژیت؟
+ بەلێ..
-ئەی چۆن کرێ خانووت پێدەدرێت؟
+ ئەمە خانووی خۆمە.
-ببورە سامان گیان…ئیش چیدەکەیت؟
+ من هەموو کارەم.
-ئەویش کێشەیەکیتر…
+ مەبەستت چییە؟
-ئەگەر ماڵی سۆزە بزانن خاوەن خانوویت، نیوەیت لێدەسێنن.
+ نا برا ناتوانن…ئەو یەک ڕۆژ لەگەڵم نەژیاوە بە چ حەقێک نیوەی بەردەکەوێت؟
-لەم ژیانە باسی حەق مەکە. بەلام بیرم لەشتێ کردەوە.
+ خێر…
-دەمەوێت نامەیەک بۆ وەزیر سوید بنووسم، یاسایەکی نوێ دەرکەن سەبارەت بەم کارەساتەی تۆ و پەنابەرانیتر.
+ لەم ولاتە تا یاسایەک دەردەکەن شەیتان شەق دەبات. من سبەینێ تەڵەفۆن بۆ دایک و باوکی سۆزە دەکەم.
-تووبڵێی ئەوان ئاگاداری هەمووشت نەبن.
+ خەسووم نازانم، بەلام باوکی سۆزە پیاوێکی مەردە.
بە پێکەنینەوە وتم : خەسووی چی؟ خۆ پەنجەت بەر پەنجەی سۆزە نەکەوتووە.
ئاخێکی هەڵکێشا و وتی: ڕاسدەکەیت… هەرچەندە سۆزە دەیگووت سقەم بە خارجییەکان نییە، کەچی خۆی قۆڵبڕوبێ وەفا دەرچوو. هەروەها دەیگووت کاتێ گەیشتینە سوید ئاهەنگێکی خۆش سازدەکەین و پێکەوە دەخەوین.
دام لە قاقای پێکەنین.
وتی : بەچی پێدەکەنی؟
وتم : بمبوورە، لاموابێت دەبێت ئەمشەو لەگەل من بخەویت!.
هەردووکمان دامان لە قاقای پێکەنین.

(scenario 3)ئەڵقەی سێیەم : سامان زیندانی دەکرێت.

ئەو شەوە نازانم (سامان) خەوت یان نە؟ لی من خەوێکی خۆشمکرد. بۆ بەیانی زوو هەستام دوشم گردت، حەمامەکە پاک وخاوێن بوو، پێدەچووسامان هەموو شتێکی بۆ (سۆزە) ئامادەکردبوو. خاوڵی نوێ وشامپۆی بۆندار، وتم ماڵی نەخۆر بۆ چەکمەسۆر!.
سامان لەخەو هەڵسا و وتی: بە خاوڵییە نوێیەکان خۆت وشککردەوە؟
-بەڵێ.
پاشان لەگەڵ سامان چووین بۆ کافتریایەک نانی بەیانیمان خوارد. لەهەمان کات سامان زەنگی بۆ شاری سلێمانی لێداو لەگەڵ دایکی سۆزە کەوتە ئاخافتن!.
-دیارە کچەکەم تۆی ناوێت بۆیە چووەتە لای خوشکی.
سامان هەستیکرد دایکی سۆزەش بەشدارە لەم پلانە، خێرا داوایکرد کە لەگەڵ باوکی سۆزە قسە بکات!.
+ خاڵە فەرەج…بەڵکو بتوانیت و هەوڵێک بدەی ئەم کێشەیەم بۆ چارەسەر بکەیت؟
-کوڕی خۆم..دەزانم منداڵەکانم خەدرێکی گەورەیان لە تۆ کردووە، بەلام بەزاتی خوا من هیچم لەدەست نایە وکەس گوێ لە قسەم ناگرێت!.
+ ئاخر خاڵۆ…چ ویژدانێک قەبووڵ دەکات، ئەو هەموو زێڕەم بۆ کڕی و دەە سێجارش سەفەرم کردوە، پارەم لە معامەلە خەرج کردوە. تو ویژدانت خۆت قەبووڵ دەکەیت وات بەسەر بهێنن.
-هەرچی تۆ دەیلێی ڕاستە…حەق بە تۆیە، لی من لەم دوورەوە هیچم لەدەست نایەت، حاشا ئەوانە منداڵی من نین.
خەتی تەڵەفۆنەکە بچڕا!.
سامان وتی : بەخوا برا باوکی سۆزەش وەک من داماوە، گیری خواردوە بەدەست منداڵەکانییەوە.
وتم ؛ سامان گیان وا باشترە ناوی خوای لێ بهێنی و دەست بە کارکردن بکەیتەوە.
+دەستم ئیش ناگرێت.
-وەرە لەگەڵم دەچینە شوقەکەم و سەیرێکی حەمامەکەم بکە بزانە دەتوانی زەوییەکەی کاشی کەیت؟
بە سواری تاکسییەکەم بەرەو ماڵم بەڕی کەوتین. لەڕێگە بەتەنیشت کەناڵ و ڕووبارەکان لەسەرخۆ لێمدەووڕی تا سامان لەگەڵ ئەو دیمەنە جوانانە سۆزەی لەبیرچێتەوە. کەچی ئاخێکی هەڵکێشا و وتی : جاران ستۆکهۆڵم چەند جوان بوو!.
وتم : جاران عاشق بوویت هەموو شت جوان بوو، ئێستا کە زامارییت هەموو شت لەلات زشتە!.
+ لەبەین خۆمان کاکی شوفێر تۆ زۆردەزانیت….
-بەڵێ..جاران دەیانگووت فلان کەس زۆرزانە و فێڵبازە و بز بە شەیتان دەکات، کەچی ئێستا شەیتان لە دەستیان ڕاسەکات!.
+ من کەسم نییە پەنای بۆ بەرم، تەنیا دوعا دەکەم خوا تۆڵەم کاتەوە.
(KARMA-سامان گیان…تۆ وشەی (کارما ) بەزمانی سویدی دەزانیت مانای چییە؟ (
+ نەخێر…
-ڕۆژێک دێت خوا تۆڵەت دەکاتەوە ئەوە مانای وشەی کارمایە!.

گەیشتینە بەردەم ماڵم. چووینە ژوور و حەمامەکەم بە سامان پیشاندا.
وتی : ئەمە هیچ نییە کاری ڕۆژێکە و پێویستە پەردەی حەمامەکەشت بگۆڕی!.
-بەسەرچاو وەستا…
+ پێکەوە دەچینە فابریک یان ئایکییە، شتەکان دەکڕین. بەلام سامان گیان من وامزانی بەڕێزتان خێزاندارییت؟
-خێزاندار بووم…هاوسەرەکەم لێمجوودا بوەوە.
+ لەسەرچی؟
-حەزم چوە ژنێکی پۆڵەندی تا ماوەیەک پێکەوە بووین…ئەویش جێیهێشتم.
+ دەکەواتە تۆش لەمن نەگبەتتری؟
-نەخێر…من ئێستا بڕوام بە هاوسەرگیری نەماوە!.
+ لەبەرچی/
بە پێکەنینەوە وەلامیمدایەوە : ڕاستی ئێمەی پیاو چاو زۆردەگێڕین..من بۆخۆم وام…بۆ نموونە هاوسەری یەکەمم زۆر خۆشدەویست و وامدەزانی کەس لەو جوانتر نییە. کەچی دوای ئەوەی خواستم بینیم دەیان ژنیتر لەو جوانترو ناسکتر هەیە. لەو ڕۆژەوەی دڵم چوە ئەو ژنە پۆڵەندییە، تێگەیشتم کە ژیان تێر بوونی نییە و ژن و پیاو دوو مرۆڤی جوودان!.
+ بەڵی زۆر جیاوازین…دەبێت ئێمە ڕاوچی باش بین!.

ئێوارە کە سامانم گەڕاندەوە ماڵی..بینیمان سەیارەی پۆلیس لەبەردەرگەی وەستاوە.
لە پۆلیسەکان چووینە پێش. پۆلیسێک ڕووی دەمی لە سامان کرد ووتی : تۆ سامان حەمە کەریمیت؟
+ بەڵێ..
-ئێمە مۆڵەتی گرتنی تۆمان پێیە…هەردوو دەستت بخەرە پشتت تا کەڵەپچەت کەین!.
+ پێویست ناکات کەڵەپچەم کەن خۆم لەگەڵتانە دێم.
منیش لە پۆلیسەکان چوومە پێش و وتم : دەتوانم بزانم چی ڕوویداوە؟
پۆلیسێکیان وتی : سامان هەڕەشەی لە ژنێک کردوە!.
سامانیان برد…نەبدەزانی چیبکەم. ناچار بەرەو ماڵی سەیران و سۆزان چووم بەڵكو لێیان بپاڕێمەوە، لەگەڵم بێن بۆ بنکەی پۆلیس و سامان ئازاد کەن.
کاتێک گەیشتمە بەردەم ماڵ سەیران خان…گوێم لە هەنیسکی گریان بوو.
زەنگم لێدا. سەیران دەرگەی کردەوە…چاوی سوور هەڵگەڕابوو…یەک دوو ژنیترش لە پشتییەوە خەمبار وەستابوون.
وتم : چی ڕوویداوە؟
+ تۆ کێیت؟ بۆ ناتناسم!.
-من لای سامانەوە هاتووم…پۆلیس گرتوویەتی.
+ چاوی دەرەها ئەو باوک مان کوشت!.
-بۆ باوکت چی بەسەرهاتووە؟
+ ئەم لەگەل سامان قسەیکردوە، پاشان لە خەفەتا جەڵتە لێیداوە…ئەگەر سامان تەڵەفۆنی نەکردایە باوکم عەیبی نەبوو.
وتم : لاحولا وەلاقوەتە ئیلا بیلا…بە ئاسپایی کشامە دواوە!.

ئەڵقەی چوارەم : سامان لەزیندان ئازاد دەبێت، لی سۆزە زەنگی لێدا.

لەبەرئەوەی بەزەییم بە سامان دەهاتەوە، ناچار بۆ ڕۆژی دوایی چووم بۆ لای پارێزەرێک بەڵکو بتوانێت یارەمتیمان بدا.
پارێزەرەکە ناوی (هاوارتسن) بوو. زۆر بەجوانی گوێی لێڕاگرتم. پاشان وتی یەک دووڕۆژتر سامان ئازاد دەکەم.
پاش دوو ڕۆژ چاوەڕوانی زەنگم بۆ پارێزەرەکە لێدا… وتی کەیسەکەی زۆر خەراپە، بەلام سبەی سەعات دەی بەیانی وەرە بۆلام، خۆم بە کەفاڵەت دەری دەکەم.
بۆ سبەی پێکەوە چووین بۆ سەنتەری پۆلیس… سامان یان هێنایە دەرەوە چەند فۆڕمێکیان پێ ئیمزاکرد.
پارێزەرەکە بە سامانی وت : هەفتەی داهاتوو وەرە بۆلام…مانگی داهاتووش ڕۆژی دادگایی کردنتە.
کە چووینە دەرەوە سامان بە گریانەوە باوەشی پێماکرد و وتی : نازانم چۆن پاداشتی چاکەی تۆ بدەمەوە!.
لەناو ماشێنەکەم لە (سامان)م پرسی : بۆ کوێ بچین؟ بۆ ماڵی من یان تۆ!.
–؛ لێخووڕە بۆ جێشتخانەیەکی خۆمانە، با تێر نان و کەباب بخۆم.
+زۆر برسیتە…
-نەخێر…تا ئێستا نەمزانیبوو زیندانی ئەوەندە ناخۆشە…ئێستا بیری هەموو شەقامەکانی ستۆکهۆلم و دارودرەختەکانی دەکەم.
+کەواتە تۆبەت کرد لە ژن هێنان؟
-تۆبە ئەگەر ڕۆژێکش بیرکەومەوە لە ژن….ڕاستی من سەیری ئافرەتم دەکرد لەچاوو دڵی دایکمەوە…قەد باوەڕم ناکرد ڕۆژێک ژن پێمەوە بدات!.
+بەلێ.. هەردەلێن پیاو دڕندەیە کەچی ژنش هەیە پیاو دەکات بە فڕفڕۆک.
-ئەمانە زۆرخەراپ بۆیان تێگووشیوم…وتیانە گوایە من هەڕەشەم لەباوکیان کردووە بۆیە لەترسا جەڵتە لێیداوە مردووە…منیان وەک پیاوکوژێک بە پۆلیس ناساندووە…پاش ئەوەی لێکۆلەوەرەکە گوێی لە داستانەکەی من گرت. وتی هیچ مەترسە ئەمە کەیسێکی خێزانییە. بەلام دەبێت بەپێی یاسا بەدواچوون بکەین!.
+جار هەیە ئێمە ئەم سویدیانە بە گەمژە دەزانین…کەچی زیرەکن.
-وەلا برا گەمژەبوون…بەلام وا هێواش هێواش سەر ڕەش بەقەولی خیان فێریان دەکەن.
لەگەڵ سامان چووینە رەستوورانێکی ئیرانی تێر قورمە سەبزی و برنج و کەبابمان خوارد. لەکات چای خواردن سامان وتی : تۆ بەڕاستی پیاوییت…کە منت هێنا بۆ رەستورانی ئێرانی!.
+مەبەستت چییە؟
-کە لەناو زیندان بووم دەمگووت دەوەرە کوردبیت و هاوشاری خۆت و نمەکی ماڵی یەکتر بکەیت ئینجا نمەک حەرام دەرچیت…بیرم لەوە دەکردەوە کە چیتر لەگەڵ کوردی خۆمان تێکەڵ نەبم، بەلام کە تۆ پارێزەرت بۆ گرتم و پشتت گرتووم…پەشیمان دەبمەوە لە بڕیارەکانم.
+گوێی مەدەرێ…سوار تانەکەوێت نابێت بەسوار!.
سامان بە پێکەنینەوە وتی : ئاخر من سواری هیچ نەبووم تا بکەوم.
ئەو بڕیارانەی پۆلیس بۆ سامانی دەرکردبوو: کە نابێت پێنچ سەد مەتر لەماڵی سۆزە نزیک کەوێتەوە. نابێت ڕاستەوخۆ و ناڕاستەوخۆ پەیوەندی بە سۆزان و سەیرانەوە بکات.
سامان وتی : من تۆبەم کردووە…بەلام بەڕاستی خەم لە مردنی باوکی سۆزان دەخۆم…ئاخر بۆ کەسە باشەکان دەبێت بمرن.
+جار هەیە باوک ودایک باشن لی منداڵ نەعلەتی دەردەچن…جارش هەیە لە ئەنجامی پەروەردەی خەراپ خێزان دەشێوێ.
بەرەو ماڵی سامان بەڕێ کەوتین..لە ڕێگە سامان داوای لێکردم کە ژمارەی بانکیم بدەم پیی تا پارەم بۆ بکاتە سەر ئەکاوەنتەکەم.
وتم : قسەی قۆڕ..
-ئەی تۆ نەتووت ئەگەر هەر کێشەیەک بە پارە حەڵ بێت خۆشە…
بەتەنیشت سپاربانک تێپەڕین…سوێنی خوارد ووتی : ماشێنەکە هەڵدەگەڕێنم ڕاویگرە…چیتر بۆ من پارە مانای نەماوە.
هەرچەندە منیش لە دڵەوە حەزمدەکرد شتێک وەرگرم …بەلام شەرممدەکرد.
ئینجا سامان بە پێکەنینەوە وتی : ئێ برا خۆ هێشتا ئیشم پێت ماوە.
+سامان تۆ دەست بکە بەگیرفانت من تا لای پەتەکە لەگەلتام.
سامان چووە ناو سپاربانک و پارەی کاشی بۆ ڕاکێشام.
کە گەیشتینە لای ماڵیان وتم ئیتر دەبێت بە جێت بهێلم.
وتی : ئارەزووی خۆتە…بەس تووخوودا ئێوارە بگەڕێوە لام چایەک دەخۆیینەوە.
+سامان گیان..ماڵی تۆ دوورە و خۆت دەزانی ئەم ماشێنە بەنزین زۆر دەخوات.
خێرا سویچی سەیارەکەی لێسەندم و وتی : بابچیبن بۆ بەنزینخانە.
تانکی سەیارەکەم لەسەر زەرد بوو…دوبارە لەدڵەوە حەزمکرد پڕی کاتەوە.
هەرچەند بەدرۆ خۆم وانیشاندا کە نابێت…لە پاشان حیزانە بۆی خشام و چووین بەرەو بەنزیخانە.
لەپاش ئەم ڕووداوو سیناریۆیەی بەسەر سامان هات…پێکەوە بووین بە باشترین برادە.
سامان هەر لە حیسابی خۆی حەمامەکەی بۆ کاشی کردم وپەردەی شووشەیی جوانی لە ئاکییە بۆ دانا!.
سەر شاوەرەکەشی گۆڕی کە ئاوی بەجوانی دابەش دەکرد. کە منداڵەکانم لە هەفتەی دوەم لای من دەمانەوە لە خۆشیا ڕۆژی یەک دووجار خۆیان دەشوری…کەچی جاران دەیانووت : باوکمان پیسە!.
چەند ڕۆژێک پێش دادگایی کردنی سامان….سۆزە زەنگی لێدابوو بە سامانی وتبوو: ئیمە دەمانەوێت لەگەل بەختیاری برادەرت قسە بکەین!.
سامان بەمنی وت : بڕۆ بیان بیینە، بەلکو خێری پێوە بێت.
+سامان گیان. خێر لەم خێزانە نابینیت…باشترە دادگا بڕیار بدات.
-نا..ئەمجارە سۆزە زۆر بەنەرمی قسەیکرد و ڕێزی گرتم.
+هەی گەمژە ئەوە مەکری ژنانە و پلانێکیان بەدەستەوەیە.
-تۆ بڕۆ چونکە تۆ زیرەکیت و لەتۆ نابانەوە…من بەرگەی زیندانی ناگرم!.
ژمارەی تەلەفۆنەکەم لە سامان وەرگرت و پەیوەندییم بە سۆزەوە کرد. وتی : سبەینێ لە لە مۆڵی شیستە دەتبینین!.

ئەڵقەی پێنجەم : خاوە وەرگر!.

لە ناو مۆڵەکەی (شیستە) چاوم کەوت بە (سەیران و مێردەکەی و سۆزان). لە قاوەخانەیەک دانیشتین. هەرچەندە سەیران و سۆزان ڕەشیان پۆشی بوو لی دوو خوشکی ناسک و جوان بوون. سووراوی لێویان قاوەیەکی کاڵ، برۆ درێژ و ناوقەد باریک بوون. هەرگیز بەوە نەدەچوون کە پرسەیان هەبووبێت.
مێردەکەی سەیرانش خۆی پێناساندم وتی : من ناوم (ڕزگارە). ئێوە قسەی خۆتان بکەن پاشان منیش دەمەوێت پێکەوە دوو قسە بکەین!.
ڕزگار جێیهێشتین، لام سەیربوو کە ئەم ئەفەنییە بە چاکەت و پانترۆنی گرانبایی دەڕوا بەڕێوە دەلێی کوڕە وەزیرە کەچی تا ئێستا کێشەی سامان و سۆزەشی چارەسەر نەکردووە.
سەیران ڕووی دەمی لەمن کرد و برۆی هەڵتەکاند و وتی : کاک بەختیار لە کەیەوە سامان دەناسیت؟
-لەمێژە دەیناسم و حەزدەکەم هەرچی زووە چی لە دڵتانە بیدرکێنن!.
سەیران : وەک خۆت ئاگاداری چەند ڕۆژێکیتر سامان دادگایی دەکرێت، لەوەبێت سزای تووندش بدرێت….وتمان بۆ ئەوەی سزاکەی کەم کەینەوە و لێیخۆشبین.
-جا ئێوە گەر بتوانن هاوکاری سامان کەن…ئەوە لەمهرەبانی خۆتانە!.
+بەلێ…بەلام ئێمە لەبڕی ئەم پیاوەتییە پارەمان دەوێت.
-ئەگەر پارەتان بوێت…ئیتر پیاوەتی چی!.
سەیران ڕووی لە سۆزان کرد و وتی:سۆزە بۆ خۆت قسە ناکەیت؟ هەموو شتە خەراپەکان بە من مەکە…فەرموو چ ڕاسپاردەیەکت هەیە بە کاک بەختیار بلێ!.
سۆزە درزی مەمکی داپۆشی و بەشەرمەوە وتی : کاک بەختیار ئێمە چیت پێدەلیین تۆ ئەوە بگەیەنە بە سامان…ئێمە لەبڕی خوێنی باوکمان پارەمان دەوێت…بەو پارەیەش دایک و (دانا)ی برامی پێدەردەکەین. چونکە ئێستا ئەوان کەس نییە بە خێویان کات. ئەم هەموو کارەساتە سامان بەسەر ئێمەی هێناوە!.
وتم : لەسەرخۆ…ئێوە هەموو شتتان تێکەڵ کردووە…ئەگەر مۆڵەت بدەن منیش قسەیەک بکەم!.
سەیران چنگاڵی لە کێکەکەی سەر مێزەکە گیر کردوو وتی : بەس باسی ئاشت بوونەوە و لێخۆشبوون نەکەی…ئێمە نامانەوێت ئەو سەروجۆڵاکەی سامان جارێکیتر ببینینەوە.
-گوێبگرن ئێوە بایی ئەوەنەتان تیا نەهێسشتووەتەوە کە ئاتان کەمەوە. بەلام وەک من دەیبینم ئێوە دوو خوشکی جوان ومهرەبانن. کەچی سەرتان لێشێواوە. نازانم کێ هانتان دەدات وپالنتان بۆ دادەنێ…بەلام ئێوە هەڵە دەکەن. من بە تەمەن لە هەردووکتان گەورەترم، دوجار ژنم هێناوە ومنداڵشم هەیە.
سۆزان وتی : ئێمەش منداڵ نین دەزانین چیماندەوێت لە ژیان.
وتم : سۆزان تۆ لەمنداڵ منداڵتری…تۆ لەژیانە شەقت لە بەختی خۆتدا، سامان ماڵەکەی بۆت ڕازاندبوەوە. خاوڵی نوێ ومەتبەخی جوان و دەیان سوپرایزیتر… بەلام تازە هەرچی بلێم کات بەفیڕۆ دانە…لە کۆتاییدا یەک ئامۆژگارییم هەیە بۆ تۆ سۆزان…بڕۆ کەمێک بەدوای ژیانی خۆت کەوە. تۆ گەنجی هاتووی بۆ سوید خۆت فێری زمانەکە بکە و خوێندن بێت یان ئیشێک بدۆزەرەوە…ئەگەر لەم لاتە بەدوای کێشەی خێزان بکەویت دوا دەکەوییت، کاتێ بێدار دەبییتەوە نیوەی عومرت بەزا ڕۆیشتووە. وابزانم سەیران خان باش لە مەبەستم دەگات.
سەیران : تۆ هاتووی ئامۆژاگاریمان بکەیت یان ڕاسپاردەکەمان بگەیەنیت.
-من ڕاسپاردەکەتان دەگەیەنم…بەلام دووشت بزانن یەکەمیان لە کۆتاییدا ئێوە دەدۆڕێن، دوەمش واز لە سامان بهێن با ئەو بەدبەختەش ژیانی خۆی بکات!.
لەم کاتە ڕزگار قاوەیەکی بەدەستەوە بوو هاتە سەر مێز و وتی : سەیران ئێوە قسەی خۆتانکرد؟
+بەلێ…
-زۆرباشە…دە هەڵسن بڕۆن پیاسەی خۆتان بکەن، منیش دوو قسە لەگەڵ کاک بەختیار دەکەم!.
کە سەیران و سۆزان بە کراسی ڕەش هەستانە سەرپێ هەرچی موشتەری هەیە لەو قاوەخانەیە دەیانڕووانییە جوانی ئەو دوو خوشکە.
ڕزگار وتی : کاک بەختیار خۆت باش دەزانیت شەڕی ئەم دونیایە هەمووی لەسەر پارەیە.
-بەلێ…
+زۆرچاکە، کەواتە من درێژەی پێنادەم…من ئاگادارم سامان خاوەنی ڤیلایە، بەلام سەیران و سۆزان نازانن، ئەگەر دوو دەفتەر پارە نەدات بەمن ئەوە سۆزانی لێ ئاگادار دەکەمەوە. ئەو کات دادگا فیفتی فیفتی بەشی دەکات چونکە ژن و مێردن.
-وەلا کاک ڕزگار پێت ناخۆش نەبێت، من کە قیافەی جەنابتم بینی بەم قات و ڕباتەوە وامزانی تۆ دەتوانی کێشەکان چارەسەر کەیت، کەچی تۆ لەوان خەراپتر دەرچووی.
+ئەی ئێستا نەمانووت شەڕی دونیا لەسەر پارەیە. من نە تۆ دەناسم و نەسامان. هەقشم بەسەر کێشەی سۆزەوە نییە.
-ئەی تۆ ئەندامێک نییت لەم خێزانە..تۆ زاوایان نیت؟
+کاک بەختیار تۆ مەحامی سامانیت؟ (وما علی الرسولی الا بلاغ)..کەواتە لەسەر تۆیە ڕاسپاردەکە بگەیەنیت.
-تۆ ئەم عەرەبیە جوانە دەزانییت ئەی بۆچی ویژدانت بەکار ناهێنیت.
لەم کاتە ڕزگارتووڕە بوو، هەستایە سەرپێ و وتی : من قسەی خۆمکرد…تا دوو ڕۆژتر وەلام نەبوو ئەوە پارێزەرەکەی سۆزە ئاگادار دەکەیینەوە لەسەروەت و سامانی برات.
پاشان ڕزگارسەری هێنایە پێش و دەمی خستە بنگوێچکم و بە ئاسپایی وتی : لەبیرت نەچێت دەتوانم تۆش بخەمە زیندانەوە. چونکە بە پێی یاسا نابوو ناڕاستەخۆ پەیوەندی بکەن بە سەیرانی هاوسەرم و سۆزانەوە.
ڕزگار وەک شەقاوە کۆنەکانی بەغدا باڵ کراوە بەناو مۆڵەکەوە شۆڕبوەوە.
لەسەر کورسییەکە دانیشتمەوە…گارسۆنەکە هاتە لامەوە وتی: وەسڵەکەت بۆ بهێنم؟!.
لە دڵ خۆمەوە وتم ئای لەم خێزانە چەند سەیرن پارەی قاوەکەشیان بە مندا!.

بۆ ئێوارە سەردانی سامانم کرد، بە وردی هەمووشتم بۆ گێڕایەوە.
ئەویش سەرێکی باداو وتی : بەخوا لەسێدارەشم بەن. یەک کرۆن نادەم. چونکە ئەمانە چاچنۆکن و تێر نابن.
وتم : ئەی ئەم ڕزگارە کێیە تۆ دەیناسی؟
-بەلێ…بۆ نەگبەتی دەیناسم…ئەو ڕزگارە ڕۆژێک منی بینی بەجڵ وبەرگی ئیشەوە لەناو بازاڕ. بێشەرم هاتە لام و وتی: تۆ کوردیت؟ وتم بەلێ.
وتی : کەس ناناسیت کرێکاری بوێت.
بەزەییم پێ هاتەوە هەفتەیەک بردم بۆ سەرکار…بەلام هەر کەناسیم و زانیم ناخی پیسە لێی دوورکەوتمەوە. چەند جارێک زەنگی بۆ لێدام، والامیم نەدایەوە…لە دواجار لەناو (ئایکییە) بینیم لەگەڵ سەیرانی خێزانی…دەستی گرتم و وتی : وەرە دانیشە خەبەرێکی خۆشم پێیە.
ئەو کاتە بوو وێنەی سۆزانیان نیشاندام. کە رووخساری بە سەیران دەچوو، دەتووت دوو سێون کراونەتە دوو لەتەوە. منیش هەستی سێکسیم بزواو ڕازیبووم کە بگەڕێمەوە (سلێمانی) و سۆزان ببینم وبیخوازم.
+تازە کار لەکار ترازاوە…پێمبلێ چیبکەین؟
-باشترین شت ئەوەیە پەیوەندی بە پارێزەرکەمەوە بکەین و ئەم زانیاریەشی بدەینێ!.
بە پێکەنینەوە وتم : وابڕوا منیش پێویستم بە پارێزەرێک دەبێت.
-تۆ بۆچی؟
+ئەوە نییە کاک ڕزگار هەڕەشەی کردووە ئەگەر خاوەی نەدەینێ بمانکاتە زیندانەوە.
سامان بە ئاسپایی وتی : ئەو ئاگری بن کایە!.
-سامان گیان…هەستدەکەم ئەم (ڕزگارەم) لە شوێنێک بینوە!..

ئەڵقەی شەشەم: (بڕیاری دادگا)

لە هۆڵی دادگای (تنگسرایت) چاوەڕوان بووین ژووری دادوەر بکرێتەوە بچینە ژوور. (سەیران وسۆزان)ش لە هۆڵەکە دانیشتبوون، ئافرەتێکی سوورەی رووخسار هێڵکە قەتێ وپرچ لوولیان لەگەڵدابوو. بە منداڵی بەو پرچ لوولمان دەگووت: سەرسەبەتە!.
ئەوەی جێی سەرسووڕمان بوو (ڕزگار) مێردی سەیران نەهاتبوو. ڕەنگبێ لەسەر کاربێت!.

هەرچەند دوو دڵ بووم لە سلاو کردنێک، بەلام پێم لەجەرگم ناو هەستامە سەرپێ و چۆنی باشییەکمکرد!.
سەیران وتی : ئەگەر دادگا سزای تووندی بەسەر (سامان)دا ئوباڵی لە مڵ خۆی!.
ژنە سوورەکە وتی : تۆ کاک بەختیاری؟
-خۆشحاڵم..
+تۆش خزمی سەیران خانمیت؟
-خزم نین، بەلام ناسیاوین.
هەستمکرد ئەم ژنە سوورە پەیامێكی پێیە بۆم!.
دەرگەی دادوەر کرایەوە. ژوورێکی ساردوسڕ بوو. مێزێکی بازنەیی وکورسی بەدەوریا ڕازاوابوەوە!.
بە ژووری کۆڕ وکۆبوونەوە دەچوو. چونکە پۆلیسی لێنەبوو. وەک لای خۆمان ترس نەچووبوە جەستەمانەوە.
ژنە کارمەندێکی سویدی لەپشتی مێزەکە دانیشتبوو سەرگەرمی نووسینەوە بوو بەرانبەر شاسەی کۆمپیتەرەکەی!.
سەیران و سۆزان دووبارە جڵی ڕەشیان پۆشیبوو.لی ئەمجارە سەرپؤشیان کردبوو، وەک ئەوەی بۆ پرسە هاتبن!.
هەردوو پارێزەرەکە، نە ئەوەی ئێمە نە ئەوەی سۆزان دیار نەبوون.
دەرگەی پشتی کارمەند کرایەوە هەردوو پارێزەرەکە وەک دوو هاوڕێ فایڵ بەدەست هاتنە ڕیز و دانیشتن!.
پاشان ژنە کارمەندەکە وتی: داداگا کرایەوە!.
هەموو هەڵساینە سەرپێ. جەنابی دادوەر بە خەندەیەک کە نیشانەی سلاو بوو لە هەمان دەرگەی پارێزەرەکان هاتە ژوورو ڕووبەروومان دانیشت.
هەستمکرد دادوەرو پارێزەرەکان لە کۆبوونەوەی سێ قووڵی بوونە و بڕیاری خۆیان داوە.
کە ناوی سامان خوێندرایە…سامان هەستایە سەرپێ.
پاشان ناوی سۆزانش خوێنرایەوە.
لەم کات دوو لاوی جوان باڵا بەرزی سویدی هاتنە ژوور و لە گؤشەیەک دانیشتن. لە دەفەرێکدا سەرگەرمی یاداشت نووسینەوە بوون.
من وامزانی ڕۆژنامە نووسن، لی پاشان بۆ ڕوونبوەوە کە دوو قوتابی بەشی یاسان هاتوون پراکتیک بکەن!.
بە کورتییەکەی دادوەر سزای بەسەر (سامان) دەرکرد. کە پێکهاتبوو لە خزمەت کردن لە کۆمیونیتیەک بۆ ماوەی مانگێک!.
ئێمە و سۆزان و سەیرانش سەرسووڕمان بووین بەم بڕیارە.
دادوەر فەرمانی بە ژنە کارمەندەکە کرد کە کەیسی داهاتوو بانگ بکات!.
ئێمە چووینە دەرەوە. سەیران و سۆزانش بە تووڕەییەوە لەچکیان فڕیدا و دوورکەوتنەوە.
پارێزەرەکە بانگی سامان ی کرد و وتی : وەرە بەدوام هەندێک فۆرم هەیە دەبێت ئیمزای بکەیت!.
منیش بەغاردان بەدوای سۆزان و سەیران کەوتم. لەدەرەوە لای پارکی ئۆتۆمبیڵەکان بانگیانم کرد و وتم : دەمەوێت لەگەڵتان بدوێم!.
سەیران : فەرموو…کاک بەختیار..
-حەزدەکەم لەمڕۆ بەدواوە بەردێک بنێنە سەر ئەم کێشەیە و هەرکەس لە ماڵ خۆی!.

سەیران و سۆزان هیچ وەلامێکیان پێنەبوو. بەلام سوورە ژن بە ڕووخۆشیەوە وتی : من تازە لە سلێمانی گەڕاومەتەوە…گەزۆم هێناوە…چەند دانەیەکت بەدیاری دەدەمێ!.
سەیران لچی هەڵهێناو لێمدوور کەوتەوە.
سوورە ژن بەپەڵە خۆی گەیاندە لای ماشێنەکە وچەند دانە گەزۆی سپی کە هێشتا ئاردەکەی وەک تۆز لێ بەردەبوەوە، بەرەو ڕووم هات.
بە خەندەیەکی جوان کە دەتگووت هیچ شتێ ڕووینەداوە. فەرمووی لێکردم و وتی : ببورە کە لەناو لەپی دەستم بۆم هێناوییت!.
بە پێکەنینەوە وەلامیم دایەوە: تۆ شیرینیت بۆ هێناوم…هیوادارم بتوانیت هاوکاری سەیران و سۆزان بکەیت کە بیر لەژیانی خۆیان بکەنەوە.
-ڕاستی من ئەمڕۆکە ناسیانم، چونکە دایکیان لە سلێمانی گەزۆی بۆ ڕەوانە کردوون. مژدەی داخوازی (سۆزان)شم پێیە.
+داخوازی چی، هێشتا ئەو بە ڕەسمی تەلاق نەدراوە!.
-کێشە نییە، دەتوانێت چاوەڕوان بێت…هەر ئێستا لەناو ماشێنەکە مزگێنی دەدەمێ!.
+باوەڕ ناکەم ئێستا کاتێکی باشبێت!.
-بە پێچەوانەوە…دایکی وێنەی زاوای بۆ ناردووە گەنجێکی سحراوییە. هەر کە وێنەکە ببینێ…سامان لەبیردەکات!.

-خوا بکەم وابێت، بەلام من یەک تکام هەیە…خۆت لەو (ڕزگارە) بەدوور بگرە، کە دەکاتە مێردی سەیران.
سوورە ژن هێواش هێواش لێمدوورکەوەتەوە…منیش لەپشتەوە لێمدەڕووانی، لە دڵی خۆم وتم ئەگەر ئاووڕێکم لێبداتەوە مانای وایە حەزی لێمە!.
پێشئەوەی دەرگەی ماشێنەکەی سەیران خان بکاتەوە…ئاوڕیدایەوە و چاوەکانی بوون بە دووربین و نزیکی کردمەوە سەرێکی باداو ولچی لێقرتانم و وەک ئەوەی بلێت خەمی هیچت نەبێت!.
دڵشاد بووم، گەڕامە ژوورەوە. سامانم بینی لەگەڵ پارێزەرەکەی ڕاوەستابوون. چووم بەلایانەوە. دوای سوپاسگووزاری بە پارێزەرەکەم وت : چۆن دەبێت هەر ژنێک بگاتە سوید و لە مێردەکەی جیابێتەوە و ئێوەش ئیقامەی بەنێ!.
وتی : پیاوانش ئەم کارە دەکەن. بەلام ئێستا لە دادگای باڵا خەریکی داڕشتنی یاسایەکی نوێین. کە هەرکەس هاوسەرگیری بکات دەبێت بە لایەنی کەم ساڵێک پێکەوە بژین ئەگەر نا هاوسەرگیرییەکە هەڵدەوەشێتەوە. ئیقامەکەش نادرێت….
لەگەڵ سامان چووینە دەرەوە…
ناوشار پڕبوو لە ڕێبوار…کەسش ئاگای لەم جەنگەی نێوان (سامان و سۆزان) نەبوو. هەرکەس سەرگەرمی کێشەی خۆیبوو!.
لەقاوەخانەیەک سەروقاوەیەکمان کڕی و بەسواری ماشێنەکەم بەرەو ماڵی سامان، کەوتیینە ڕێ!.

لەڕێگە سامان وتی : ئەرێ لەبیرم چوو ئەوە بۆ دەستت بە ئاردە و سپییە؟
دەستم خستە گیرفانم وتم : بخۆ گەزۆی سلێمانی بخۆ!.
-ئەمەت لەکوێ بوو…
+سوورە ژنەکە دایمێ..
-من ساڵێک زیاترە ماڵی سۆزان دەناسم…هەرگیز ئەم خزمەیانم نەبینیوە!.
+ژنێکی ڕووخۆشە و بەلێنیداوە کە کۆتایی بەم کێشەیە بهێنێ!.
-ئەمە تۆ کەی قسەت لەگەڵ کرد؟
+قسەم لەگەڵی نەکردووە، لی بەچاو ئیشارەتی دامێ!.
-بەختیار گیان… تۆ زۆردەزانیت و کەم دەردەخەیت!.

کاتێ گەیشتینە بەردەم ماڵ سامان..هەرچەند سامان هەوڵیدا دابەزم و میوانبم…وتم ئەمجارەیان نایەمە ژوور، ئیتر بەسە سەریەشەی تۆ و سۆزان تەواوبوو.
دەستی گرتم و وتی : ڕاستی دیارییەکم بۆ داناوییت دەبێت بێیتە ژوور.
ناچار و بە حەزو شەرمەوە لە ماشێنەکەم دابەزییم و چووین بەرەو دەرگەی ماڵ سامان.
هەر کە دەرگەکەمان بینی شکاوە یەکسەر هەستمانکرد شتێک ڕوویداوە.
بە ئاسپایی چووینە ژوور…ماڵەکەیان گسگ دابوو.
سامان سەیرێکی کردم و وتی : خۆزگە ئەمڕۆ دز نەدەهاتە ماڵم…چونکە دیارییەکەی تۆشیان بردووە.
-دیاری چی …خۆ تۆ ماڵەکەت دزراوە…ئایە پارەی کاشت هەبوو لەـاڵەوە.
+نەخێر…بەلام هەستدەکەم ئەوەی ئەم دزییەی کردووە، زانیوویەتی من لەـماڵ نابم.
-حەتمەن…پلانی بۆ داڕشتووە. ماڵەکەشت بە پیکابێک بارکراوە.
+چیبکەین…
-دەست لەهیچ مەدە…زەنگی پۆلیس بکە و بابێن ڕاپۆرتی خۆیان بنووسن.

لەچاوەڕووانی پۆلیس بووین.
سامان وتی : بەختیار گیان…هەرچەندە دزییم لێکراوە، بەلام هەر هەست بۆ خۆشییەک دەکەم کە ئەمڕۆ ئازاد کرام و لە کۆمینیەتیەک خزمەت بکەم.
-ڕاستدەکەیت …مانگێک چییە…کات خێرایە…
+ئەوەش دڵخۆشی کردم کە ڕزگار مێردی سەیران نەهاتبوو بۆ دادگا!.

-دەزانیت من ئێستاش هەستدەکەم ئەو ڕزگارەم لە شوێنێک بینوە!.

+ منیش هەستدەکەم ئەم ماڵەم بۆنی ئەو ڕزگارەی لێدێت….ئەها بەسەری تۆ بۆنی دەکەم..
بە پێکەنینەوە وتم : بۆ تۆ لە ڕەگەزی سەگیت؟
سامان بە بۆنکردن ژوور ژوور گەڕا…منیش خەریک بوو بدەم لە قاقای پێکەنین.
وتی : گاڵتەت پێ نێت…ئەو ڕزگارە کە لەگەل من کاری دەکرد بۆنێکی پیس و تایبەتی لێدەهات…هێستا بۆنەکەی لە ماڵەکەمدا ماوە!.
هەستێکم ڕاگرت…وتم : تۆ ڕاستدەکەیت..هەندێک لە پێست ڕەشە ئەفریکیەکانش بۆنیان دێت…کەواتە ئەمڕۆکە ڕزگار لە جیاتی بێتە دادگا هاتووە بۆ ماڵی تۆ؟
-ئەی چۆن ئەمە بە پۆلیس بلێین؟
+ئاسانە بە پۆلیس بلێ من لە ڕەگەزی سەگم و بۆنی ئەو کەسە دەکەم.
-ئەگەر باوەڕش نەکەن هەردەیلێم…
لە کۆتاییدا وتم : سامان گیان ….من نازانم ئەم دزییە ڕزگار کردوویەتی یان نە؟ بەلام ئەو ڕزگارەم لەشوێنێک بینیوە!.

ئەڵقەی حەوتەم: بۆن کردن!.

ماشینی پۆلیس گەیشتە بەردەم دەرگە. بۆ چەند چرکەیەک پۆلیسەکە لەناو ماشێنەکەی سەرگەرمی داتەکەی بوو. ئینجا بە دەفتەروقەڵەمێک هاتە ژوور و وتی : خۆ دەستان لە هیچ شتێ نەداوە؟
-نەخێر…
پۆلیسەکە مەتبەخ و ژوورەکەی پشکنی و سەیری دەرگە شکاوەکەی کرد و وتی : چییان لێت دزیوە؟
سامان وتی : هەموو شت…تەڵەفزیۆن و ڤیدیۆ و لاپتاب و کامیراو تاخم چەقۆ و بڕێک وێنەی سیرامیک…لەگەڵ دیارییەکی گرانبایی کە دوێنێ بۆ ئەم برادەرەم کڕی بوو بیکەم بە سوپرایز!.
+دیارییەکە چیبوو؟
-لاپتابێکی نوێ لەناو باکسەیبوو!.
+پسووڵەکەیت ماوە!.
-نەخێر، چونکە پسووڵەکەییم لەسەر باکسەکە دانابوو. بەلام لە کۆنتۆکەم نیشان دەدا کە لە (سیبە) پارە دەرکراوە!.

پۆلیسەکە چاوێکی بە پشتی خانووەکە گێڕا…پاشان چووە دەرەوە. لە کۆلان هەندێک سووڕایەوە.
چاوی بڕییە سەر کۆلانەکە کامیرایەک بەسەر باڵا خانەیەک هەڵواسرابوو.
پۆلیسکە چووە ناو ماشێنەکەی و پەیجەری بۆ سەنتەر کرد.
گەڕایەوە لامان و وتی : هیچ پێویستیەک دەوێ؟ گومانت لەکەس هەیە.
سامان وتی : شتێک دەلێم بەلام ئەمە جۆک( ) نییە…کەسێک هەیە کات خۆی چەند ڕۆژێک لەگەلم کاری کردووە وماڵم پێدەزانێت. پاشان بووەتە ناسیاوم بۆنی لەش و پێستەی ئەو دەکەم!.
-کەواتە تۆ هەستی بۆنت بە هێزە؟
+بەڵێ…ئەو کەسە ناوی ڕزگارە…ماڵی نزیک بە مۆلی شیستەیە…من و ئەم برادەرەم ئەمڕۆکە لە دادگا بووین…گومان لەودەکەم و ئەو بە کات و شوێنم دەزانێت بەلام هیچ بەڵگەیەکم نییە.
-لە داتەکەم ناوی تۆم دەرهێناوە و زانیاریم هەیە، بەلام ئەم بۆنەی تۆ بەڵگە نییە کە بتوانین لێکۆڵینەوە لە ڕزگار بکەین!.
لەناکاو دوو پۆلیسی ترش پەیدا بوون. پاش ئاخافتن لەگەڵ یەکتر.
بە سامانی برادەرمیان وت سبەی وەرە بۆ سەنتەری پۆلیس لە (ئینخێدە ).

منیش بە سامانم وت ؛ دەبێت بڕۆم…ئەگەر دەشتەوێت بێیت بۆ ماڵم سەرچاو.

-نەخێر…لەمەو دوا تۆ ئەزێت نادەم…بەلام خەم لە دیارییەکەی تۆ دەخۆم.
بە پێکەنینەوە وتم : کوڕی باش پارەکەت بدایە بەخۆم باشتر نەبوو.
سامان پێکەنی و وتی : من تا مردن قەرزاری تۆم.
-دەباشە قەرز کۆن دەبێت، بەلام لەبیر ناکرێت…

ماڵی سامانم بەجێهێشت. لەسەر کۆلانەکە بینیم پۆلیسەکان چوونە ناو باڵە خانەکەوە. بۆمدەرکەوت کە دەیانەوێت سەیری کامیرا بکەن تا بزانن بە چ ماشێنێک ماڵەکەی سامان بار کراوە!.

داتەی ماشێنەکەم داگیرسان بە نیازی کاری تاکسی. کەچی لەناکاو سوورە ژن هاتە خەیاڵم. دەستم برد بۆ گیرفانم هێشتا یەک دانە گەزۆی تیا مابوو. وتم ئەمشەو لەماڵ دەیخۆم.

شەو درەنگ زەنگی تەڵەفۆنەکەم لێیدا. وەلامم دایەوە. دەنگێک وتی : دەمناسیتەوە؟
+بەخوا برا من کۆڵەوارم دەنگ ناناسمەوە…بەلام دەنگی تۆ غەریب نییە!.
-من ڕزگارم…مێردی سەیران..
+بەلێ فەرموو…
-دەتوانم بەیانی زوو بتبینم!.
+بەسەرچاو کاتژێر چەند باشە؟
-حەوتی بەیانی زوو…
+خێر…بۆ وازوو..
-زۆر گرنگە..تکایە بتبینم…
+بەسەرچاو…ناکرێت ئێستا بە تەڵەفۆن پێملێیت!.
-نا ناکرێت…
+ باشە دەتبینم…

ئەم دەنگەی ڕزگار لە گوێچکم دەزرینگایەوە…دڵنیا بووم ئەم ڕزگارەم لە شوێنێک بینیوە و دەنگەکەی غەریب نەبوو!.
زڕ خەوبووم…کەچی دووبارە زەنگێکیتر بۆ هات…خۆشبەختانە ئەم جارەیان سوورە ژن بوو!.

ئەڵقەی هەشتەم : ڕزگار دەکەوێتە زیندانەوە!.

لە کافتریاکی نزیک بە تونێڵ بانەیەک لەگەڵ ڕزگارم بینی. ڕزگار پەشۆکا و ناڵەبار دیاربوو!.
بە ترسێکەوە وتی : هەواڵی کاک سامان چییە؟
-ئەویش باشە…بەلام تووخوا سەرم مەیەشێنە چی بووە و پێم بلێ!.
+ئاخر نازانم چۆن پێتبلێم…
-تۆ دەتوانیت هەمووشت بلێیت بێ شەرمیت..
+ تکا دەکەم کاک بەختیار ڕق و کیینە لەدڵت دەرکە تا بتوانم لەگەڵت بدوێم!.
-سەرچاو گەرموو…
+ دەکرێت تۆ دوا دەنگ وباسی (سامان)م پێ بلێیت؟
-هەتیو خۆ ئێمە ژن ومێرد نیین…دوا دەنگ و باسی خۆشت دەیزانی کە دوێنێ دادگا بڕیاری چیدا..

(لەم کاتە هەستمکرد کە مەبەستی ماڵ دزیینەکەیە)
+ من دوێنێ لای مەغریب پۆلیس تەڵەفۆنی بۆ کردم و دەیانەوێت ئەمڕۆکە کاتژمێر نۆ بمبینن!.
-نەیانووت…بۆچی دەیانەوێت بتبینن؟
+ بەلێ دەیانەوێت بزانن من لە کاتی دادگایی کردنی (سامان) لە کوێ بوومە!.
-زۆرباشە…دوایی..
+ دوایی چی…من تووزانم بلێم لە کوێ بوومە!..
-ڕزگار تۆ شێت بوویتە یان شێتم دەکەیت….دەبینم هەموو گیانت دەڵەرزێ چی هەیە وەک هێڵکە پاکی کە بیکە دەستم…شێروگورگم بۆ مەهێنەوە چونکە خۆت دەزانیت من متمانەت پێت نییە و دەترسم داوای پارەیترمان لێ بکەیت..

+ بەختیار گوڵەکەم پێویستیم بە یارمەتیتە…ئابرووم چووە!.
-چیبووە بڵێ..یارمەتیت دەدەم..
+زۆرباشە…من من من ئەزموونم هەیە لەگەڵ پۆلیس وئەوشتانە…پۆلیس و حکوومەت کەروێشک بە عەرەبانە دەگرن…دوێنێ من هەڵەیەکم کردووە.
(ئیتر دڵنیا بووم کە ڕزگار دزەکەیە)
-هەڵەی چی…
+ کاک بەختیار…هەستدەکەم تۆ بە هەمووشت دەزانیت… چونکە چاوەکانت دەخوێنمەوە؟
-چییت خوێندەوە؟!
+ هەموو شت…
-کاک ڕزگار من لەوساوەی تۆم بینیوە گومانم لا دروست بووە کە ڵەشوێنێک جارێک لە جاران یەکترمان بینیوە؟!
+باوەڕ ناکەم…بەلام با بێینە سەر کێشەکەی من چونکە کاتم زۆر بەدەستەوە نییە.
-بیلێ…
+ خۆتدەزانی مرۆڤ هەڵە دەکات….ڕووداوەکەی دوێنێ من بوومە…
-کام ڕووداو؟
+ ئەوەی ماڵی کاک سامان!.
(هەستێکم ڕاگرت و تاوێک بێدەنگ بووم…نەمویست چیتر خۆم لە گێڵی بدەم)

-دەزانم باسی چیدەکەیت…من چیم پێدەکرێت، ڕەنگبێ پۆلیس شوێن پێی تۆی دۆزیبێتەوە!.

+بەلێ…دڵنیام..پۆلیس لەسەرخۆ کار دەکەن….بەلام لە پۆلیس گەڕێ…من دەمەوێت پەیوەندی بە کاک سامان بکەیت کە ئامادەم هەموو شتەکانی بۆ بگەڕێنمەوە بە زیادەوە، ئەگەر لای پۆلیسش کەشف بووم ڵە کەیسەکەم خۆشبێت…چونکە خۆتدەزانیت (سەیرانی) خێزانم بەمە بزانێت لێم جیادەبێتەوە.
بە بزەی پێکەنین وەڵامیمدایەوە : کاک ڕزگار ماشالا بەڕێزتان پێویستی بە ئامۆژگاری من نییە…خۆت چاکدەزانیت ئەگەر خۆت بدەیت بەدەست پۆلیس و ڕاستییەکان بدرکێنی و هاوکارییان بکەیت، دادگا سزا کەمتر دەکاتەوە. بۆ مەسەڵەی (سەیران)خانمی هاوسەرت تووبڵێی تا ئێستا تۆی نەناسیبێت و نەزانێت چەند موو بە قوونتەوەیە!..

+ بەڕاستی کاک بەختیار تۆ قسەت زۆر ڕەقە، لەجیاتی ئەوەی ئێستا من کەوتوومەتە نا وکێشەوە و هاوارم بۆ هێناوییت کە هاوکارییم کەییت لەم غەرییبیە، کەچی پێمڕادەبوێریت!.
-کاک ڕزگار..تۆ وشەی (کارما) دەزانیت مانای چییە بە زامی سوێدی؟
+ هەرچەند باشدەزانم مانی چییە، بەلام باوەڕم پیی نییە!.

دەمویست بدەم لە قاقای پێکەنین، بەڵام نەدەکرا لەناو کافتریاک هاوارکەم و بڵێم خەڵکینە فریام کەون…
بەئاسپایی لە بن گوێی چرپاندم : لەبیرتە…یان بەبیرت بهێنمەوە…کە نابێت ناڕاستەخۆ پەیوەندی بە دزەوە بکەیت…چونکە بەپێی یاسا ناڕاستەخۆ دیدار وگفتوگۆ لەگەڵ تۆ تاوانە!.
+ قسەی قۆڕ…من لەتۆم ڕادەبینی هاوکارییم کەیت…
-باشتریین کردارو هاوکارییم ئەوەیە کە بچییتە لای پۆلیس دان بەتاوانەکەتە بنێیت، لەبیرت نەچێت کامیرایەکش لەسەر باڵەخانەکەی سەر کۆلانەکەی ماڵی سامان هەبوو!.
+ئەوە بەڕاستە…من زانیم پۆلیس بەڵگەیەکیان بەدەستەوەیە….تووخوودا…تووسەری منداڵکانت با ئەم ڕووداوە کەس پیینەزانێت و هاوکارییم کە…لە کۆتاییدا هەموومان کوردین..

-هەستە بابڕۆین و خۆت بدە بەدەستەوە…بەلام ئایە شتەکان ماوە، چونکە دیارییەکی منی تیابوو.
+ نازانم …من.. لەگەڵ کابرایەکی (ئەڵبانی) دزییەکەم کردووە…تا دوێنێ شتەکان لەناو (ڤانەکەی) بوو!.

ڕزگارم گەیاندە بەردەم سەنتەری پۆلیس و بەجێم هێشت…گەڕامەوە ماڵ کە خۆم بشۆم …چونکە نیوەڕۆ ژووانم لەگەڵ (سوورە ژن) هەبوو لەسەر شەقامی (کینگس گاتان). بەلام لەبەرئەوەی زۆر مانوو بووم…وتم کەروێشکە خەوێک دەکەم پاشان خۆم دەڕازێنمەوە بۆ ژووانەکەم.

خەو بردمییە تا دوای نیوەڕۆ ( سامان ) زەنگی لێدا و وتی : ئەوە تۆ لە کوێی…ئەم بەیانییە لای پۆلیس بووم…هەواڵی خۆشم پێیە.
وتم: دەزانم..
+چی دەزانییت؟
-دزەکەیان گرتووە…
+ دزی چی…باسی چیدەکەیت؟ خەوتووی…کەی بتبینم؟
-کاتژمێر چەندە؟
+لەدەوری یەکی نیوەڕۆ..
-چیی…بەڕاستە…من ژووانم هەبوو، بەزاتی خوا لەدەستمچوو ئابرووشم چوو..
+ ئەوە چییە خەونت بینیوە؟ بەختیار گیان من وادەچم بۆ تونێڵ بانە و تا نزیک ماڵتان دێم…

سامان بەرەو ماڵم دەهات…
منیش بەدوای ژمارە تەلەفۆنەکەی (سوورە ژن) دەگەڕام تا زەنگی بۆ لێدەم و داوای لێبووردنی لێبکەم!.

ئەڵقەی هەشتەم:

زەنگم بۆ ( سوورە ژن ) لێدا وەلامی نەبوو!.
پاشئەوەی دوشم گرت و تراشمکرد، سامان گەیشتە ماڵم.
سامان وتی : سبەی دەبێت بچم بۆ شارەوانی تا بزانم بۆ کوێ دەمنێرن!.
-مەبەستت بۆ سزای دادگاکەیە…زۆربەی کات دەتاننێرن بۆ پاککردنەوەی پارک و شەقامەکانی شار…ئەی چیتکرد لەگەڵ پۆلیس؟
+ پۆلیسەکان ئەوەنددەی پەرۆشی لێکۆلینەوەی لووتم بوون…هیچ هەواڵێکیان پێنەدام بۆ ماڵەکەم!.
-لووت …هەتیوو ئەوە تۆ باسی چیدەکەیت؟
+ ئەی من بە تۆم نەگووت…لە بۆنکردن بەهێزم و بۆنی لەشی ڕزگار دەکەم.
-شەنست هەیە، (سەیران) خانم گوێی لەم وتەیەت بێت، گومانی لەلا دروست دەبوو..
+ کاتی شۆخیکردن نییە…با پێت بلێم پۆلیسەکان بەداوای لێبووردن و ڕێزەوە تاقییانکردمەوە!.
-بەچی تاقییانکردییەوە؟
+بە سوخمەی ژنێک!.
-کورە هەتیوو..فشە فش مەکە..
+ دەزانم..باوەڕناکەیت…پۆلیسێکی ژن لەوێ بوو هەرکە گوێی لە کەیسەکەم بوو، بە پێکەنینەوە دەستی خستە نێو کراسەکەیی و سوخمەکەی داکەند و وتی : تووڕە نابیت…ئەم سوخمەیە باشترین تاقیکردنەوەیە. بۆنی سوخمەکەم کرد. بۆنی پێستی کچێکی عازەبی لێدەهات…هەستمکرد ئەم ژنە هەرگیز منداڵی نەبووە..

-باشە ئەوە تۆ ئەو هەموو ئەفسانەیە لە کوێ فێربوویتە؟
+ لەبیرتە پێمووتی من هەموو کارەم. باوەڕکە خوا ئەم بەهرەیەی پێشکەش کردووم….پاشان سوخمەکەیان لە ژووری جڵ گۆڕینی پۆلیسەکان شاردەوە…منیش هەر بە بۆن دۆزییمەوە. هەر هەموو پۆلیسەکان چەپلەیان بۆ لێدام…وتیان : تۆ لەگەڵ سەگ ژیاوییت؟
-باوەڕناکەم…
+ ئارەزووی خۆتە…با پێت بڵێم، لووتی مرۆڤش هەروەک گوێچک و زمان وایە..پێویستە بەکار بهێنرێت…ئایە تۆ تا ئێستا ناتوانیت بۆنی سێو و پرتەقاڵ لە یەکتر جیاکەیتەوە؟
-هەموو کەس هەندێک بۆن هەیە لەیەکتری جیادەکاتەوە…وەک بۆنی ماسی،سیروپیاز..
+ باشە قەد لەخۆت پرسیوە بۆدەتوانی ئەو بۆنانە لەیەک جیاکەیتەوە، چونکە لەمنداڵییەوە فێرکراوییت…بووەتە کارێکی سرووشتی.
-مەبەستت چییە؟

+ مەبەستم ئەوەیە کە منداڵی فێری هەستەکان دەبین، لەگەڵ ڕۆژگارهەندێک لەو هەستانە پشت گوێ دەخەین هەر بۆیە ئەو هەستە لەدەست دەدەین…وەک بۆن یان بیستن…هەست ناکەیت نابینایەک هەستەکانی بەهێزترە لە چاو ساخێک؟
-ئافەرین…دکتۆر سامان…تۆ ڕاستدەکەیت…منیش ئەگەر ئەوە هەستەی تۆم هەبوایە، ئێستا ئەو (ڕزگارەم) دەناسییەوە!.
+ ئەرێ ڕزگار دەنگی نییە…ئەو سەگبابە داوای خاوەی لێدەکردم.
هەتا پێمکرا دام لە قاقای پێکەنین و خۆم پێڕانەدەگیرا….سامان وتی : بەچی پێدەکەنی؟

لەپێکەنینا چاوم ئاویکردبوو. بە سامانم وت : ئەمجارەیان نۆبەی تۆیە کە خاوە وەرگریت!.
+ مەبەستت چییە و چی ڕوویداوە؟

هەموو شتم بۆ سامان گێڕایەوە…سامانش کەوتە سەما کردن و پێکەنین.
+باشە ، بەختیار ئێستا ئێمە چێبکەین…پەیوەندی بە پۆلیسەوە بکەین؟
-شێت بوویتە خەلکی لەدەست پۆلیس ڕادەکا…سەبرت هەبێت..

+ دەبا ئەوەشت پێ بڵێم…بەلام لای کەس نەیدرکێنی…دوای ئەوەی سزای مانگەکەم لە کۆمیونیتی تەواو کرد…پۆلیس داوایان لێکردووم ئیش لەگەڵیاندا کار بکەم.
– دەبیتە موتەرجم؟
+ ئیشی بۆنکردن…دەبمە سەگی پۆلیسی..

دووبارە هەردووکمان پێکەنین ….و وتم : ڕادەبوێریت؟
+ نەخێر بەڕاستمە…بەلام پێمووتن بیری لێدەکەمەوە.
-ئاسانترین ئیشە، بۆ خۆت هەر بۆنی سوخمە و مەمان بکە!.

لەم کاتە زەنگی تەڵەفۆنەکەم لێیدا…خێرا وەڵامم دایەوە. سوورە گوڵ بوو. هەر کە داوای لێبووردنم لێکرد…ئەویش وتی : بە قسەکانت هەستدەکەم کەسێکی ڕاستگۆت…با ئێوارە یەکتر ببینین.
وتم : من میوانم هەیە…کاک سامان لە ماڵمە.
+ جا کاک سامان هاوشارییمە، ئەویش لەگەڵ خۆت بهێنە.
-بۆ کوێ بیهێنم؟
+ چێشتم لێناوە…هەردووکتان وەرن.
-نا ئەزێتت نادەین..
+ وادیارە گەزۆکان کاریگەری نەبووە..

بە پێکەنیەوە وتم ؛ ئەو گەزۆیانە لەبیرناچنەوە.

لای ئێوارە( من و سامان ) بە دوو قۆڵی بەرەو ماڵی سوورە ژن یان سوورە گوڵ بەڕێکەوتین.
پێشئەوەی بگەینە بەردەم شوقەکەی ماڵی سوورە گوڵ…سامان وتی : هەستدەکەم ئەم ژنە بۆت لێدراوە…با من نەیەمە ژوور…بەڵکو تۆ چالاکی خۆت بکەیت.

-پێشم کەوە…ژن درەنگ خۆیان دەدەن بەدەستەوە…هەرکە (تەڵەکە) گرتی ئیتر ماڵی دەبن.
+ ئاخر ئەو گەزۆ هێنان و بردنە شتێکی تیایە!.
-تێیدایە…
لەگەڵ سامان بە پەیژەکان سەردەکەوتین…سامان یەک دووجار هەڵوێستەیەکی کرد و بۆنی هەڵمژی و وتی : دۆڵمەی لێناوە.
سوورە گوڵ دەرگەی کردەوە…وەک جاران دەم بەخەندە و ڕووخساری خۆشەوە بەخێرهاتنی کردین. شووقەیەکی بچکۆڵانەی هەبوو..هەرچەندە پەنجەرەکانی کردبوەوە…بەلام بۆنی دۆڵمە شێتی کردبووین.
پاش بەخێرهاتن لێمانی پرسی : حەزدەکەن سەرەتا نان بخوێین یان چای بخوێینەوە.
وتمان : بە ئارەزووی خۆت…
گوڵە سوور چووە مەتبەخەکەوە…سامان وتی : بیخوازە شازی ژنە.
بە بزەی پێکەنین و شەرمێکەوە هەستامە سەرپێی و وتم : گوڵێ یارمەتیت ناوێت؟

+ بەلێ، کاک بەختیار پێویستیم پێت دەبێت…ئەگەر بتوانیت مەنجەڵێک پڕ لە دۆڵمە هەڵڕێژییە سەر سینیەک؟
-بەلێ دەتوانم…
+ دەکەواتە من و تۆ کێشەمان نابێت…

ئیتر پێکەنین بوو بەگریان…دڵ کەوتە لێدان.

ئەڵقەی نۆیەم : بەرەو سوید!.

لەگەڵ چایی خواردنەوە (سوورە گوڵ) بۆی گێڕایینەوە:
مێردی پوورم لەسەر شەقامی بەختیاری دوکانی چەرەزات فرۆشی هەیە، گەزۆیەکی تایبەتی هەیە کە پوورم دروستیدەکات. بەلام تا ئێستا ئێمەش نهێنی ئەو تامە خۆشەی نازانین، بێ فڕت وفێڵە.
دایکی سۆزان و سەیرانشم لەوێ ناسی. هەر کە زانی من دەگەڕێمەوە بۆ (سوید)…فرمێسکی ڕشت و وتی : بەساقەی ئەو خاڵە جوانانەی سەر ڕوومەتت بم…کیسەیەک گەزۆ بۆ کچەکانم بەرە لەگەڵ خۆت.
هەر لەوێش وێنەی ئەو لاوە جوانەی نیشانمدا کە بۆ سوزانی کچی ڕێکخستبوو!.
لەم کاتە (سامان) سەریسووڕمابوو، پرسی : مەبەستت سۆزانی منە؟
دەستی (سامان)م تووند گووشی و وتم : ئەو چۆڵەگەیەی ناو دەستت هی تۆیە…ئەوانەی سەر درەختەکە دەدەن ڵەفڕین.

سوورەگوڵ وتی : ببورە کاک سامان، ڕاستی من وامزانی کاک بەختیار هەموو شتی بۆ باسکردووی…ئاگاداری سۆزان داخوازی هاتووە.
سامان بە پێکەنینەوە : جا ئەو هێشتا لە سەر کاغەز هاوسەرمە…نە من دەتوانم ژن بهێنم نە ئەو دەتوانێت شوو بکات، تا کاغەزی جیابوونەوە نەگاتە دەستمان.
-سامان گیان…ئێستا ئەگەر (سۆزە) شوو بکات تۆ ئیرەیی پێ دەبەیت؟
+ نەخێر..وەها لەبەرچاوم کەوتووە نامەوێت بیشی بینمەوە…بەڵام خەم لەوە دەخۆم کە بە پارەی من گەیشتە خارج و بەگژ منیشدا چوەتەوە.
سوورەگوڵ بە پێکەنینەوە وتی : ئەگەر زاوا هاتە سوید، پێیبلێ کە چەندە قەرزارتە.
منیش وتم : سامان…ئەگەر ژن ومێڕد جیابوونەوە. ژنەکە شووبکاتەوە ئیتر کێشەکە تەواودەبێت!.

گوڵەسوور وتی : ئەی ئەگەر پیاوەکە ژن بهێنێت؟
-ژنی یەکەم بەدوای پلانێک دەگەڕێت کە تۆڵەی خۆی کاتەوە.
گوڵە سووور: ئای کە وانییە…من مێردەکەم حەزی چووە ژنێکیتر…سەرەتا زۆر پێمناخۆش بوو، ژیانم بووبوو بە دۆزەخ. کەچی لەپاش چەند مانگێک هەستم بە ئازادی خۆم کرد و مێردەکەم لەبیر خۆم بردەوە..
سامان وتی : ئەی تۆ کاک بەختیار. کە ژنەکەت لێت جیابوەوە و شوویکردەوە. هەستت بەچیکرد؟
-هاوسەرەکەم حەقی خۆیی بوو لێم جیابێتەوە، چونکە من ڕاستگۆ نەبووم لەگەڵی…بەلام لەو ڕۆژەوەی شووی کردووە نامەوێت نە خۆی نە مێردەکەی ببینم!.
+ بۆچی…
-واهەستدەکەم..خانووەیەکم هەبوەو و کرێچییەک داگیری کردووە.
لەم کاتە سوورەگوڵ وتی : واز لەقسەی زڵ بهێنن، لەم گەزۆیە بخۆن و خەفەت مەخۆن.
سەروگەزێکمان لە گەزۆکە دا.
سوورەگوڵ : سامان گیان کەس نازانێت خێر لە چییە؟ تۆ دوعا بکە سۆزە شوو بکات.
سامان : من حەقم بەسەرییەوە نەماوە!.
-دەزانم…با پێت بڵێم…دایکی (سۆزان) زۆرزانە…پلانی داناوە خانووەکەیان بفرۆشن..خۆیی (دانا)ی کوڕی و (سۆران)ی زاوایان بە قاچاغ بێن بۆ سوید!.
سامان : ئەگەر باوکی سۆزە بمایە هەرگیز قەبووڵی نەدەکرد ئەو خانووە بفرۆشن.
سوورەگول : تەنیا ئەو خانووە نییە، پارچە زەوییەکی تریان هەیە لەپشت (معمل شەکرەکە) ئەویش دەفرۆشن.
سامان : هەرچی دەفرۆشن کێشەی من نییە، بەلام یەک تکام هەیە کە تۆ هاتوو چۆیان دەکەیت با (دانا) نەهێنن بۆ سوید. چونکە من دانا باش دەناسم بەرگەی غەریبی ئەم ژیانە ساردوسڕەی سوید ناگرێت.
سوورەگوڵ : ئیتر بڕیاریان داوە…لاموابێت قسەکەی تۆ ڕاستە…سەیران بەدرۆ و دەڵەسە (دانا)ی برای ڕازی کردوە.

منیش بە تەنزەوە وتم : واز لە دانا بهێنن…ئەم کاک (سۆرانە) دووشەشی بۆ دەرچووە.
سامان : ئەمەیە کە دەلێن کێ کردی و کێ خواردی..
هەموو بەپێکنینەوە وتمان : مام حاجی (باوکی سۆزان) کردی و زاوا خواردی!.
سامان : ئێستا هاتە یادم…(دانا) دەیگووت هەموو سویدم لەسەر تاپۆ کەن ناچم، چونکە ئەو (ڕزگار)ی زاوامانی لێێە.
وتم : زۆر ڕقی لە ڕزگار بوە…نەتزانی لەبەرچی؟
سوورەگوڵ قسەکەی پێبڕییم و وتی : دەزانیت ئەم کاک ( ڕزگارە) کەرکووکییە…من لە سەیران خانم پرسی کە چۆنچۆنی یەکتریان ناسیوە؟ وتی لەکەرکوک!.
منیش بە سەرسووڕمانەوە وتم : کەرکووکی…دەڵێم لە شوێنێک بینیوومە!.
سامان : لە کوێ بینیووتە؟
-خەریکە بێتەوە یادم…لێمگەڕێن با بیرکەمەوە!.
گوڵەسوور وتی : تۆ ڤیتامین (ب ١٢) کەمە …پێویستە بچییتە لای پزیشک.

بە پێکەنیینەوە وتم : ئەی گەزۆکان تۆ ڤیتامین (ب١٢) تیا نییە؟
سامان وتی : بەختیار گیان…تکایە بیرکەرەوە منیش دەمەوێت بزانم ئەم ڕزگارە کێیە؟!
سوورەگوڵ وتی : سەیران خان، دەیگووت (ڕزگار) زمانی عەرەبی و تورکی فارسی فووڵە!.
لەم کاتە هاتەوەیە یادم کە لە (هەیئەی کەرکووك) زیندانی بووم ئەم ڕزگارە موتەرجم بوو!.
بە هاوار و ناڵیینەوە ئاگام لەخۆم نەمابوو وتم : بەلێ ئەمە موتەرجمی دائیرەی ئەمنی کەرکووک بوو…
+موتەرجمی چی ؟ بۆ تۆ زمانی عەرەبی نازانیت؟
سوورەگوڵ : کاک بەختیار ئەم تۆ زیندانیش کراوییت!.
وتم : بەڵێ زیندانی کراووم…لەدوای ڕاپەڕیینەوە زۆربەی گەنجانی سڵێمانی بەزمانی عەرەبی باش تێناگەن…من لە زیندانی فێری ئەو زمانە بووم.
سامان وتی : دەکەواتە ئەم ڕزگارە دەستی لەگەڵ موخابەرات هەبووە!.
وتم : بەڵێ…ئێستا هاتەوە یادم..ئەم ڕزگارە چاومانی دەبەست ئینجا چاوپێکەوتنی لەگەل دەکردین. بەلام دەنگەکەی ئێستا لەنێو گوێچکما دەزرینگێتەوە.
سامان وتی : ئەم ئیشانە تەنیا لەو کوڕە دەوەشێتەوە.
سوورەگوڵ : زۆر هەوڵمدا بە سەیرانی دەرخەم کە چۆن شووی پێکردووە؟ کەچی وەلامی ڕاستی نادامەوە.

لەم کاتە (سەیران) زەنگی بۆ سورە گوڵ لێدا و وتی : مێردەکەم (ڕزگار) لەزیندانە و نەگەڕاوەتەوە…دەتوانیت بێیت بۆلام پێویستیم بە یارمەتیتە.
سوورە گوڵ : لەسەرچی زیندانی کراوە؟
-لەسەر دزی…
+ جا ئەوە مێردی من بێت…تەلاقی دەدەم.
-ئاخر من منداڵم لەگەڵی هەیە ناتوانم..
+ دەباشە پێمبلێ من چیم پێدەکرێت…؟
-تۆ زۆرشتت پێدەکرێت بە تەڵەفۆن ناکرێت پێت بڵێم…یا وەرە بۆلام یان دێم بۆلات.
-دە تۆ پێمبلێ چی بە من دەکرێت؟
+ تۆ کاک بەختیاروسامان دەناسیت؟
-بەلێ…
+ دە ئیشکەمان لای کاک بەختیارە..
-جا ئێوە پێش من بەختیار دەناسن، بۆ خۆتان ناچن بۆلای؟
– گوڵە سوور…ئەی تۆ نەبووی گەزۆت دا بەو (بەختیارە) چاو حیزە.

هەموومان دامان لەپێکەنین.

ئەڵقەی دەیەم : ماڵی سەیران و سۆزان!.

دوای ئەوەی دایکی سەیران و سۆزان لەگەڵ (دانا و سۆران) بە قاچاغ گەیشتنە سوید…هەموویان لەماڵی سەیران کۆ بووبوونەوە.
سەیران زۆر دڵخۆشبوو…بەتایبەت کە (سۆران)ی زاوایانی بینی حەپەسا بوو لەجوانی ئەو کوڕە قۆزو سەرخڕە ، زوو دەچووە لای سۆزان و دەیگووت : ئەمە چییە، ئەم کوڕە ناسکە دەلێی پەپووڵەیە.
سۆزان بە پێکەنینەوە وەلامیدەدایەوە ؛ لە دایکت بپرسە، بەوە دەچێت کون بە کون شاری سڵێمانی گەڕابێت…تا ئەم شازادەیەی بۆ پەیدا کردووم.
-سۆزە …تا کچی تر لێیان نەفڕانوویت مارە بڕیینە کە بکە..
+ بەس من خەمی (دانا)ی برامە. لەو ڕۆژەوەی هاتووەتە سوید یەک وتە لەدەمی نەهاتووەتە دەر.
-خەمت نەبێت بچێت بۆ خوێندنی زمانی سویدی چاوی دەکرێتەوە.
+ باوەڕناکەم…من لەگەڵ دان ژیاوم ئەو دڵی بە سلێمانی و برادەرەکانی دەکرێتەوە.
-تۆ پەڵە مەکە…با زمان فێربێت و بچێتە دیسکۆ کوردستانش لەبیرداکات.

دایکی سەیران هاتە ژوور و بە سەیرانی وت: وەرە کچێ قسەم پێتە.
پێکەوە چوونە باڵکۆنەکە…دایکی سەیران وتی : سەیران هەندێک ئامۆژگارییت دەکەم…جوان گوێم لێبگرە.
سەیران : فەرموو دایکە گیان.
دایک : ئێمە …بە تایبەت من، هەستدەکەم زۆر لە (سۆران) نزیک دەبیتەوە وشۆخی و دەستبازی لەگەڵ دەکەیت…من دەزانم هیچ شتێ ڕووینەداوە. دانا و سۆزەش هەستیان پێکردووە، ئەوان لەوەبێت شەرم بکەن پێتبڵێن.
سەیران : سۆران لەوەتەی هاتووە دڵخۆشە و قسە دەکات، کەچی دانای برام خەمبار و بێدەنگ، سۆزەش نەخۆیی جوان دەکات و نەڕوو دەدات بە سۆران…ئێ خۆ دەبێت تا کارەکە ئەنجامدەدەین سۆران دڵخۆشکەین.
دایک : سەیران ..من تۆ دەناسم پێویست ناکات هیچم بۆ ڕوونکەیتەوە.
سەیران : مەبەستت چییە؟
دایک : دەستمان پێکرد…ئەوەی لەتۆ دەمەوێت کە لەگەل سۆران دەستبازی مەکە…
سەیران : دایکە ئێرە سویدە، ئاساییە…من وەک برادەرێک شۆخی لەگەڵ کەم. خۆ لە کوردستان کچ ناوێرێت بەخێرهاتنی میوانش بکات.
دایک : لەوە گەڕێ…ئەی کات خۆی من وباوکت چەند پێمان وتی لە ڕزگار دوور کەوە…بەس بۆ ئەوەی کاری پاسەپۆرتە عێراقییەکەت بۆ جێبەجێ بکات بە دووی کەوتی.
سەیران بە تووڕەییەوە : دایکە گیان تووخوودا ئەگەر کای کۆن بە با بکەیت؟
دایک : قسەکەم پێ مەبڕە با تەواوی کەم…..من دەڵێم ئێستا کە ڕزگار لە زیندانە و لەسەر دزی گیراوە… هەڵێکت ڕەخساوە لێی جوودا بیتەوە.
سەیران : تۆ شێت بوویتە. چۆن دایک بە کچی خۆی دەلێت لە مێردەکەی جیابێتەوە.
دایک : کچی کەر…دیسان گەمژە بوویتەوە…ئاخر چۆندەکرێت لەگەل دز بخەویتەوە.
سەیران : ئەوە ژیانی خۆمە پەیوەندی بە ئێوەوە نییە…

دایک : زۆرباشە بەس قسەیەک دەکەم هەڵمەچۆ…خۆتدەزانی (دانا) حەزی بە چارەی ڕزگار نییە…ئەو ڕۆژەی ڕزگار ئازاد بکرێت…ئیتر ئێمە بۆ خۆمان دوور لەتۆ دەژین.
سەیران بە پێکەنینەوە وتی : دایکە ئێرە سویدە …کچ و دایک و برا هەرکەس بۆ خۆی دەژێت و شووقەی تایبەتی خۆی دەدەنێ…تۆ سەبرت هەبێت….سەبارەت بە (دانا) برام…من چیبکەم ئەو کوڕە لەگەل تۆش تا ئێستا وشە لە دەمی دەر نەهاتووە.
دایک : با ئەو ڕۆژە قسەیەکیکرد ، وتی : دایکە ئەو کاک (سامان)ە زۆر کوڕی باشبوو…

سەیران : ئەی چۆن ..هەمووجار کە سامان دەگەڕایەوە سلێمانی پێکەوە (ئۆزۆ)یان دەخواردەوە، بەلام کە ڕزگار مێردم دەگەڕایەوە دانا خۆی دەشاردەوە..
دایک : وسکت بە کچێ خۆت و ڕزگار بە قوربان (دانا) بن..بەخوا دانا شتێکی لێبێت من شێت دەبم.
سەیران : دایکە ئێمەش دانامان خۆشدەوێت، بەس ئەو زیا لەحەد سۆزدارە بۆ شاری سلێمانی و برادەرکانی…
دایک : سەیران…من قسەی خۆمکرد…وەک وتم کەمێک لەبەرچاو ئێمە زۆر شۆخیبازی مەکە لەگەڵ سۆران.

شەو درەنگ (دانا و سۆران وسۆزان) بە مەستی گەڕانەوە ماڵ…دایکی دانا دڵگران بوو. وتی : کوڕم جارێکیتر زووتر وەرنەوە.
سەیران وتی : دایکە گەنجن…تازە هاتوون..با کەمێک دونیا ببینن.
شەو هەرکەس لەژوورێک نووستن…تەنیا (سۆران) نەبێت کە جێگە خەوەکەی لە ژووری دانیشتن بوو.

بەیانی زوو سەیران لەخەو هەڵسا و چووە مەتبەخەکە ئاو بخواتەوە…لەشی سۆرانی بینی…یەک دووجار بەجوانی سەیریکرد…هەستیکرد ئەم لەشە تازە مووی جوانی دەرکردوە هەرگیز جارێکیتر ناتوانێت بیبینێتەوە…هەر لەمەتبەخەکەوە دەیڕووانی…تۆزێک لێی نزیکتر بوەوە.
جوانی سۆران ئاگری تێبەردابوو..لەدڵ خۆی وتی : ڕەنگبێ سەرخۆشبێت ئاگای لەخۆی نەبێت.
سەیران خۆی خزاندە بن جێ و لەگەڵیا جووت بوو.

سۆران وەک ئەوەی خەونێک ببینێ پێلووی چاوەکانی بە ئاستەم بزواند، قژی سەیران بەرچاوی تاریک کردبوو. لەدڵی خۆی وتی : لەوەبێت (سۆزە)بێت لە گەڵیا درێژبووبێت…لەخۆشیا خۆی ماتکرد….سەیرانش دەیزانی (سۆران ) بێدارە…بەهەوەسی خۆی دەستبازیکرد.

لەناکاوە (دانا) بەچاوی خەوەوە هاتە هەیوانەکە و هەمووشتێکی بە چاوی خۆی بینی.
خێرا چووە مەتبەخەکە و چەقۆیەکی هێناو بە هاوارکردنەوە هێڕشی کردە سەریان!.

ئەڵقەی کۆتایی : خواردنی گەزۆی سلێمانی!.

سوورگوڵ داوای لێکردم پێکەوە بچین بۆ ماڵ (سەیران). پێمووت : من لەگەڵت دێم تا بەردەم ماڵیان بەلام نایەمە ژوور!.
-زۆرچاکە…هەر پێمخۆشە تۆم لەگەلدا بێت.
+ دە خێراکە یەک سەعاتە خەریکی خۆتی…
-ئەم سەروقژ سەبەتەیەم بۆ جوان ناکرێت.
-تۆ بەو ستایڵەوە جوانیت..
+ زۆرباشە کە تۆ ستایلی منت بەدڵ بێت کەواتە کێشەمان نابێت.

لەگەڵ سوورگوڵ بەسواری تاکسییەکەم گەیشتینە نزیک ماڵی (سەیران). بەدەروی ماڵی تێپێکی زەرد و هێمای ئاگاداری لەلایەن پۆلیسەوە دانرابوو. هەستمانکرد شتێک ڕوویداوە.
خۆمان کرد بەژوورا، بینیمان تەنیا (سۆزان) لە ماڵەوەیە و خەریکی ناو ماڵ سڕینەوەیە.
هەرکە سۆزە سوورگوڵی بینی بە شین وگریانەوە باوەشی پێیاکرد!.

سوورگوڵ پرسی : سۆزە چی ڕوویداوە بەوەدەچێت پۆلیس لێرە بووبێت.
سۆزە : دادە سوور خەراپ لێمان قەوماوە…لە دوێنێ شەوەوە پۆلیس لێرەبوونە و خەریکی لێکۆلیینەوەن…
پاشان سۆزان بە هەنسکی پڕ لەگریان ڕووداوەکەی دوێنێ شەوی گێڕایەوە:
کاتێ دانای برام (سەیران وسۆران ) دەبینێت جووتبوونە، بەچەقۆ شاڵاویان بۆ دەبات. لەگەل هاوارکردنەکە سۆران ڕادەپەڕێت زۆربەی چەقۆکان بەر (سەیران) دەکەوێت. سۆران خێرا ڕادەکاتە دەرەوە. کە یەک چەقۆ بەر قۆڵی کەوتبوو.
ئێمەش لەگەڵ هاواری دانا هەڵساین بینیمان دانا بە چەپ و ڕاست لەسەیران دەدات. من خێرا دەستی دانای برام گرت و وتم : بەسە خوشکەکەت کوشت.
لەم هات و هەرایە هاوسێکان گوێیان لەدەنگمان بوو، پۆلیسیان ئاگادارکردبوەوە. دایکشم هەر کە چەقۆی بەدەستی دانا بینی لە هۆش خۆی چوو.
ئێستا دایکم لەگەڵ سەیران لە نەخۆشخانەن.
سوورگوڵ : ئەی سۆران؟
-سۆران…کەمێک پێش ئێستا تەلەفۆنی بۆ کردم ، سوێند و قورئان دەخوات دەڵێت وامزانییوە تۆ بوویتە خۆت خزاندووەتە بن جێ….بەلام من تێر جوێنم پێدا و وتم نامەوێت بتبینمەوە.

ئێمە کە سەیری ماڵەکەمان کرد هێشتا شتەکان پەرش و بڵاو بوون. قەترە خوێنی سەیران بە دیوار و سۆفەکانەوە ڕژابوو. سوورگوڵ خێرا پەڕۆکی تەڕکردو خەریکی سڕینەوەی بوو. لەم کاتە سۆران لەبەردەم دەرگە ڕاوەستابوو، دەستی چەپی بە ڵەفاف پێچرابوو. وتی : بۆم هەیە بێمە ژوور؟
سۆزان قیژاندی : بۆ دەرەوە.
من چووم دەستی (سۆران)م گرت و وتم : وەرە دانیشە، بزانم لەکوێ بوویت؟

سۆران : بەیانی زوو لە سەنتەری پۆلیس بووم، لێکۆلینەوەیان لەگەڵ کردم منیش ڕاستی ڕووداوەکەم بۆیان گێڕایەوە. پاشان ئازادیان کردم و کاغەزێکیان پێمدا کە بچم بۆ ئوردوگا…بەلام هەرچەند دەکەم دڵم نایەت سۆزان بەم شێوەیە بەجێ بهێڵـم…بەتایبەت زۆر خەفەت لە (دانا) دەخۆم.

وتم : تازە شتەکە ڕوویدا.
سوورگوڵ : شتی چی ئەمە کارەساتە…دوا ڕۆژی داناش فەوتا.

لە پڕ منداڵەکانی سەیران هاتە یادم…وتم : سۆزان ئەی کوا دوو کچەکەی سەیران خان؟
-پۆلیس لەگەل خۆیان بردیان…وتیان مادام باوکی زیندانییە و دایکی لە نەخۆشخانەیە باشترە بیبەن بۆ شوێنێکی گونجاو.
سوورگوڵ : زۆرباشیان کرد…ماڵە سویدییەک ئەو منداڵانە بەخێو کەن زۆر باشترە..
دەستی (سۆرانم) گرت و لەگەڵ خۆم بردمە دەرەوە. لێمپرسی : دەمەوێت ڕاستی ڕووداوەکەم بۆ بگڕێتەوە!.
سۆران : هەروەک وتم ..چاوم بەخەوەوە بوو نەمتوانی ڕووخساری سەیران و سۆزان لەیەکتر جیا بکەمەوە….(سۆزانش) ئاگادارە کە شەوی پێشووتر من و( دانا ) زۆرمان خواردبوەوە.
ئیتر بەداخەوە کە لە کاکە دانا قەوما…چونکە بە درێژایی ئەم سەفەرە من ودانا بووبووینە دوو هاوڕێی جوان.

پاشان چوومە ژوور و لەگەل سۆزان قسەمکرد : سۆزان …تۆ دەزانیت کە تۆو سەیران لەیەکتر دەچن و دەڵێی دووانەن، هەربۆیە سۆران بەچاوی خەوەوە نەیتوانیوە شێوەیتان جووداکاتەوە. دڵنیام سۆران تۆی خۆشدەوێی نایەوێت بەجێت بهێلێ، پۆلیس ڕەوانەی ئوردوگای کردووە بەلام لەبەرخاتر تۆ ناڕووات.
سۆزان : کاک بەختیار…منیش هەستم بە خۆشەویستی سۆران کردووە، بەلام چۆن بتوانم لەگەلیا بژێم کاتێ دانای برام لەزیندان بێت و خوشک و دایکم لە نەخۆشخانەبن.
-سۆزە….سەبرت هەبێت هەموو کات لەکاتی جەنگ ڕووداوەکان گەرمن…بەلام پاش جەنگ بریینەکان ساڕێژ دەبنەوە.
سوورگوڵ خەریکی ناوماڵ سڕینەوە بوو.
نازانم بۆچی بەدڵێکی خۆشەوە وتی : بەختیارقووتی گەزۆم دۆزیوەتەوە کە دایکی (دانا) لەگەل خۆی هێناویەتی.
منیش وتم : ئێستا کەی کاتی گەزۆیە…
+ بەخوا گەمژەی…ئەم گەزۆیانە ناوازەن!.

سۆران لەبەردەم دەرگەوە وتی : من دەڕۆم وابزانم چیتر جێگەم لەناوئەم خێزانە نابێتەوە.
-بۆ کوێ؟
+ بۆ ئوردوگا…
سۆران ڕۆیشت…
سۆزان وتی : تووخودا لەگەڵم وەرن بۆ نەخۆشخانە سەرێک لەدایکم دەدەم.
دەرچوووینە دەرەوە . سوورگوڵ کیسەیەکی گەورەی بەدەستەوە بوو. لێمپرسی : ئەوە چییە، کیسەی زبڵە؟
+ زبڵی چی…گەزۆکانە..
-دەگ پێنەگەی…خەڵکی وا ماڵی کاوڵ بووە، تۆش لە بەزمی خۆت ناکەویت.
+ باوابێت…

پێشئەوەی سواری ماشێنەکەم بین…ماشێنێکی پۆلیس لە چەشنی ڤاڵڤۆ پێشی گرتین و وپرسیاری کرد : کێ لە ئێوە کەس وکاری (دانا) یە…
من وتم : ئێمە هەموومان کەس و کارین، بەلام ئەو کچە خوشکیەتی.
بە ئاسپایی قۆلی گرتم و وتی : هەوالێکی ناخۆشم پێیە…
-چی بووە؟
پۆلیسەکە وتی : دەتوانم بەتەنیا بەتۆ بڵێم بەمەرجی تۆش بەشێوەیەکی گونجاو بەزمانی لای خۆتان بەو کچەش ڕاگەیەنن.
-فەرموو چیبوە؟
پۆلیس : دانا…ئەو کوڕە گەنجە..خۆکوژی کردووە.
(سەیرێکی ئاسمانم کرد…یەک باڵندەم بینی بە ئاسمانەوە دەفڕی.)
پۆلیس : هەفتەی داهاتوو دەتوانن تەرمەکەی وەرگرنەوە.
گەڕامەوە ناو ماشێنەکەم، نازانم بۆچی دام لەپڕمەی گریان…سۆزان هاواریکرد : چی بووە؟ گوێم لەناوی دانای برام بوو؟
سوورگوڵ : بەختیارگیان قسەبکە چی ڕوویداوە؟ من دەزانم ئەو کوڕە بەرگەی زیندان ناگرێت.
-دانا …خۆی کووشتووە.
سوورگوڵ باوەشی بە سۆزان کرد کە لە دوای ماشێنەکەمەوە دانیشتبوون.
لەسەرخۆ بەرەو نەخۆشخانە بەڕێکەوتین.

گەیشتینە ناو نەخۆشخانە. سۆزان پڕ لەقوڕگ گریان باوەشی بە دایکی کرد. دایکی سۆزان وەک گوڵێک سیس بوو، ڕوخساری بەپیرەژنێکی حەفتا ساڵان دەچوو. وەک شێت ورتەی لەدەم دەهاتە دەر.

من و سوور گوڵ بەزۆر توانیمان سۆزان لە ئامێزی دایکی جوودا کەینەوە.
دایکی سۆزان چاوی دەگێڕا و دەیگووت : چی ڕوویداوە، کوانێ دانای کوڕم؟
ئێمە نەماندەزانی چۆن وەلامیدەینەوە، کەچی لەناکاو سۆزان دای لەپڕمەی گریان و قیژاندی : دایکە گیان (دانا)شمان لەدەستچوو.
دایکی سۆزانش وەک ئەوەی دڵی خەبەری دابێت لەسەر قەڵەوێرەکەی جەستەی لەرزی و کەوتە خوارەوە.
پەنجەمان بە دوگمەی سوورنا، تا خێرا پزیشک وپەرەستارەکان بگەنە فریای.
بەلام بەداخەوە کاتێك گەیشتن دڵی لە لێدان کەوتبوو.

دوای ئەو ڕووداوە بۆ چەند شەوێک (سۆزان) لە ماڵی سوورگوڵ مایەوە.
پاشان بڕیارییدا ئەویش بچێت بۆ ئوردوگا و لە سفرەو دەست بەژیانێکی نوێ بکاتەوە.

ئێوارەکیان سوورگوڵ داواتی کردم و وتی : بەختیار گیان…لەپاش ئەم هەموو ناخۆشییە و ماندووبوونە . من و تۆش پێویستیمان بە دانیشتنێکی خۆش هەیە.
وتم : مەبەستت چییە؟
+ دەمەوێت ئەمشەو داوەتی ماڵی خۆمت کەم…پێکێ ڤۆدگا بخوێنەوە.
بە پێکەنینەوە وتم : چییە…بەدەردی (سۆرانم) دەبەیت.

شەوێکی رۆمانسیم لەگەڵ سورگول بردە سەر…لەپآش ماندوو بوون ومەستی، جگەرەیەکم داگیرساند.
سوورگول هاتە تەنیشتمەوە وتی : ئێستاش کاتی (گەزۆ) خواردنە.
خێرا چوو قووتیە گەزۆی ماڵی دایکی سەیرانی هێنا و وتی : بمبوورە…کە ئەم گەزۆیانەم بەبێ پرس لەماڵی سەیران لەگەل خۆم هێنام. خۆت دەزانی سلێمانی تەنیا گەزۆکەی خۆشە!.

هەردووکمان پێکەنین و قوتییە گەزۆکەمان هەڵپچڕاند…سەرمان سووڕما و چاومان زەقبوەوە کاتێ لەجیاتی( گەزۆ) شەدە دۆلارمان بینی.
سوورگوڵ وتی : لەوەبێت ئەمە پارەی خانوو و زەوییەکە بێت دایکی سەیران لە سلێمانییەوە لەگەل خۆی هێنابیێت!.
وتم : چەند قووتی بوو؟
+ دوو..
خێرا ئەوەی ترشمان هەڵپچڕی…پڕ بوو لە دۆلاری ئەمریکی.
وتم : چ شەنسێکمان هەیە…بەلام بەداخەوە ئەمشەو لەجیاتی گەزۆ دەبێت دۆلار بخۆین.
سوورگوڵ لەخۆشیا وەک منداڵ خۆی هەڵدایە باوەشم و وتی : من بخۆ…گەزۆی ئەسڵی شاری سلێمانی!.

The End کۆتایی

ئەندازیارێکی زەنگین هەبوو، بەیانیان زوو بە خۆیی و ئاخر مۆدێلی (مرسدیس) دەهاتە گەڕەکەکەمان و کرێکارێکی هەڵدەگرت و دەچوون بۆ سەرکار. بەلام کرێکارەکە کە باوکی دوو منداڵ بوو ژنێکی شۆخ و شەنگی هەبوو کە لەگەڵ مانگ شەڕی دەکرد!.
بۆ پشووی نیوەڕۆ ونانخواردن ئاغای ئەندازیار بە تەنیا دەگەڕایەوە ماڵی کرێکارەکە و ژەمێ خۆشی لەو مانگی هەنگویینە دەخوارد. من و برادەرەکانم، پۆلێک منداڵی چەتوونی گەڕەگ بووین هەستمان بە هەمووشت کردبوو.
ڕۆژێکیان لەگەڵ (جووتەی) برادەرم وتمان ماشێنەکەی بشکێنین، دواجار جووتە وتی : ئەی بۆ نەچین جووتە پێلاوە گرانبەهاکەی بدزین وبیفرۆشینەوە و بە پارەکەی بچینە سینەما و فەلالش بخۆین!.
بۆ نیوەڕۆ کەمینمان دانا، کابرای ئەندازیار هات. جارجار لە کونی دەرگەوە سەیری ناو حەوشەمان دەکرد. دیاربوو خانم ئاوی لە حەمام گەرمدەکرد. ئێمەش چاوەڕووان بووین تا خۆیانکرد بە حەمامەکەوە.
لەپاش دڵنیابوون بەسەر دەرگەی حەوشە بازماندا وچووینە هەیوانەکە، جووتێ پێلاوی چەرمی ئیتاڵی و قەمیس و پانترۆنێکی جوانمان بینی. من جووتە پێلاوەکەم هەلگرت و (جووتەی) برادەرشم کراسەکانی خستە ژێر باخەڵی… لە حەمامەکە نزیک بووینەوە گوێمان لە ئاخ و ئۆفی خانمی ماڵ بوو، کە تا ئێستاش ئەو دەنگە ناسکە لەگوێم دەزرنگێتەوە.
کراس و پێلاوەکانمان هەڵدا ئەودیو دەرگە ودوبارە بە ئاسپایی بە دەرگەکە سەرکەوتین و لەگەڕەک دوور کەوتینەوە. تا قەدەرێک خۆم و برادەرکەم پێکەنین بەری نەداین، جووتە لە منی دەپرسی : گوێت لە ئاخ وئۆفە بوو؟
منیش بە پێکەنینەوە دەمووت : ئۆی ئۆی…….
بەهەربار جووتە پێلاوە قاوەییە جوانەکە بەدەستمەوە بوو، بڕیاربوو بچین بۆ مەزاتخانە و بیفرۆشین!.
هەر لەسەر بازاڕەکەی (رەحیماوە) ڕێبوارێک دەستی گرتم و وتی : بچکۆڵ ئەو پێلاوە نافرۆشیت؟
وتم : بەلێ..دەیبەن بۆ مەزاتخانە دەیفرۆشین!
؛- ئەم پێلاوە جوانانەتان لە کوێ بوو؟
من دەمم تەتەلەی کرد، باشبوو جووتە فریام کەوت و خێرا وەلامیدایەوە: جڵ وبەرگی خاڵمانە.. مانگێک دەبێت مردووە و خالؤژنم پێیداوین بۆی بفرۆشین!.
کابرای ڕێبوار پێلاوەکانی تاقیکردەوە پڕ بە پێی بوو. خێرا دەستیکرد بە گیرفانیا و روبعە دینارێکی داینێ.
منیش رەتمکردەوە و وتم : بۆ دەزانی ئێمە منداڵین؟
ئەمجا کردییە ئەک دینار…خێرا پارەکەمان وەرگرت وسواری کۆستەرەکان بووین بۆ ناو بازاڕ!
ئەو ئێوارە چووینە سینەما و فەلافلشمان خوارد کەچی هێشتا بڕێک پارەیترمان لە گیرفان مابوو!.
لەپاش هەفتیەیەک چاودێری ماڵە کرێکارەکە و هاتووچۆی کابرای ئەندازیارمانکرد…بەلام پێدەچوو ئەندازیارەکە بە سواری تاکسی نزیک گەڕەک بێت و پاشان بە دزە دزە خۆیدەکرد بە ماڵی مانگەشەوەوە!.
ڕۆژی هەینی بوو دونیا گەرمبوو تازە لە سینەما دەگەڕایینەوە بەرەو ماڵ. جووتەی برادەرم وتی : بۆ نەچیینە ناو مزگەوت خۆمان فێنک کەینەوە؟
؛- ئاخر من نوێژکردن نازانم!
؛ کورە منیش نایزانم…دەچین لە ڕیز دەوەستین و گەورەکان چییانکرد ئێمەش لاساییان دەکەینەوە!.
خۆمانکرد بەژوورا، لەناو مزگەوت جگە لەمن و جووتە یەک منداڵیتری لێ نەبوو. تەنانەت ئەو سەردەمانە گەنجان نوێژیان ناکرد و مزگەوت شوێنی پیر و پیاوە بەساڵە چووەکان بوو!.
پاش ڕووخسار شۆرین لە پشتی چەند ئەفەنییەک ڕیزمانبەست!.
هەر ئەوەندەمان زانی کابرای ئەندازیارش هاتە پێشمانەوە وناوی خوای لێهێنا.
کاتێ ئێمە لاسایی ئەوانمان دەکردەوە، ئاغای ئەندازیار بە وردی سەیری کابرای تەنیشتی دەکرد!.
لامان سەیربوو، کاتێک ئێمەش سەیری کابرای نوێژکەرمانکرد خێرا بە جووتەم وت: کورە ڕاکە ئەوە جڵ وبەرگی کابرای ئەندازیاری لەبەردایەوە!.
جووتە تووند دەستیگرتم و وتی : ڕاوەستە کوڕی خوا با بزانین فیلمەکە چی بەسەردێ!.
ئاغای ئەندازیار دەستی خستە سەرشان کابراو وتی : ئەرێ برا زەحمەت نەبێت پێم ناڵێیت ئەو جڵ وبەرگەت لەکوێ پەیدا کردووە؟
کابرای نوێژکەر بەسەرسووڕمانەوە ئاوڕێکی ئەملاوئەولای خۆیدایەوە، نەیدەزانی چۆن وەلامیداتەوە. ئینجا سەیرێکی پشتەوەی خۆیکرد وئێمەی بینی وچاوی زەقبوەوە!.
خۆم و جووتەی برادەرم لەترسا پێمان لەسەرپێ دانابوو بۆ ڕاکردن. کەچی کابرای نوێژکەر پێکەنی و وتی : لە مەزاتخانە!.
ئێمەش لە خۆشیا خێرا دەرچووینە دەرەوە!.
(هاوینی ٢٠١٨)

A Play (Inheritance)

{قەرەوێڵەیەک لە گۆشەی تەختەی شانۆ. گۆزەیەک لەسەر مێزێک دانراوە،کورسیەک لەنێوان مێزەکە و پەنجەرەیەکدایە }
ئەکتەرەکان ( نووسەر. پیاوکوژ)

نووسەر: باشە براکەم خۆتدەزانی تازە لەفڕۆکەخانە دابەزیوم و ماندووم. هەروەک جاران یەک دووشەو لەباخەکەم پشوو دەدەم.(هەلوێستەیەک).
سبەینێ یەکتر دەبینین… بەلێ ئەمجارە سەفەرەکەم بۆ یەک مانگ دەبێت و زۆرتر یەکتر دەبینین.
ئەمجارەیان بەبەردێک دوو چۆلەکە دەکوژم. یەک میراتەکەم وەردەگرم، دوو کتێبەکەم چاپدەکەم.
ئای غەریبی چەند ناخۆشە. مرۆڤ تا نەگەڕێتەوە نیشتمان نازانێت چ گەنجینەیەکی جێهێشتووە.
(پێکێ ویسکی و جگەرەکێشان. کردنەوەی لاپتابەکەی)
هەرچەندە هاوڕێکانم وتیان با کتێبەکە لە حیسابی دەزگاکان چاپکەین، لێ من قەبووڵم نەکرد.
لە خارجەوە هاتووم و پارەم هەیە و بۆ خۆم چاپی دەکەم.
ئای کە ماندووم؛ دەترسم ئێستا دوشبگرم و خەوم بڕەوێتەوە، وا چاکترە سبەینێ خۆم بشۆم، پاشان قەیماخ و کولێرەی گەرم بکڕم و بچمە ماڵی برام.
(بەدەم خەواڵووەوە…لەسەر قەرەوێڵەکەی ڕادەکشێ؛ گوێی لە خشپە خشپێک دەبێت. گۆزەکە لەسەر مێزەکە هەڵدەگرێ. دزێک بە دەمانچەوە دێتە ژوورەوە. گۆزەکە دەداتە پشتی سەری و بەریدەداتەوە)

تاریکی

{ دزەکە بە کورسسیەکەوە بەستراوەتەوە }
نووسەر- گیرفانی دزەکە دەپشکنێ و ناسنامەکەی دەخوێنێتەوە.

نووسەر : ئەمەیە نەگبەتی، لەگەڵ یەکەم ڕۆژی گەڕانەوەم دزێک پێشوازییم لێدەکات.
سەیرکەن گەنجیشە؛ وادیارە لەبەر بێکاری و برسیەتی دزی دەکات. نا باوەڕ ناکەم ئەوەی دزی لە خوێنیا نەبێت ناتوانێت دزی بکات.
باشە چۆن ئەم شوێنەی دۆزیەوە؟ چۆن زانیویەتی من لێرەم؟
(هەلوێستەیەک)
(دزەکە بە ئاگا دێتەوە)
دز: ئەوە بۆ بەستراومەتەوە؟؟
نووسەر: پێدەکەنێ…
دز: باشترە تەلەفۆن بۆ پۆلیس بکەیت.
نووسەر : چەند بێ منەتە؛ تەلەفۆن ناکەم، دەمەوێت بزانم تۆ کێیت و چۆن ئێرەت دۆزیوەتەوە؟ هاتووی دزی لەمن بکەیت.
دز: برسیم بوو…
نووسەر: ئەی ئەم دەمانچەیە بۆ لەگیرفانتایە؟
دز : لەترسی ژیانی خۆم.
نووسەر: ڕاستییەکەی بڵێ!
دز : بەڵێ هاتووم بۆ دزی…پێویستم بەپارەیە.
نووسەر: پارەی ژەمێک خواردن یان زۆرتر؟
دز : زۆرتر، دەمەوێت دەرچم لەم وڵاتە.
نووسەر: منیش بەسەفەر گەڕاومەتەوە ئەم وڵاتە! (سەرسووڕمان).
دز: گەر پام لە خارج گیربێت، هەرگیز ناگەڕێمەوە ئەم کاولبووە.
نووسەر: بێزارییت؟؟
دز : ئەم دزیەش هۆیەکە لە بێزاربوونم.
نووسەر : پێمبڵێ تۆ من دەناسیت؟
دز : نەخێر…
نووسەر : ئەی چۆن هاتووی بۆ ئەم باخە؟
(بێدەنگی)
ڕاستم پێبڵێ یارمەتیت دەدەم، ئەگینا، پێشئەوەی بتدەم بەدەست پۆلیس دارکارییەکی باشتدەکەم.
(نووسەر تووڕەیە)
ئەمە یەکەمینجارە دزی دەکەیت؟
دز: بەمنداڵی هەندێک وردە دزیم کردووە، بەڵام لەم تەمەنە یەکەمینجارە…ئەگەر لێم خۆشبیت بەڵێن دەدەم ، هەرگیز ئەم کارە دووبارە نەکەمەوە.
نووسەر: تۆبەی گوورگ مەرگە؛ باوەڕناکەم.
دز: بەچی باوەڕدەکەی؟ تا سوێندت بۆ بخۆم.
نووسەر: دەمەوێت بزانم تۆ کێیت و لە کوێ دەژیت؟
دز: ناوێرم پێتبڵێم لەگەڕەک ئابڕووم دەچێت.
نووسەر: ئەگەر لە ئابڕووت بترسیتایە دزیت نەدەکرد.
دز: من دز نیم؛ ئەگەر لەبەر خارج نەبوایە هەرگیز بیرم لەم کارە نەدەکردەوە..
نووسەر: لەبەر خارج ئامادەی پیاو بکوژی؟
دز : ناچارم…زانکۆم تەواو کردووە و لە هیچ شوێنێک دەنەمەزراووم…دەبێت ڕەشوە بدەم ..لە نیوەی مووچەکەم خۆشبم. ئینجا دامدەمەزرێنن.
نووسەر: ئنجا کەست نەدۆزیەوە منی نەگبەت نەبێت؟باوەڕکە دوو سەد دۆلار لە گیرفانمایە…بەس من گوومانم هەیە کە تۆ من دەناسیت و بە تایبەت هاتووی بۆ کوشتنم.
دز: تۆ ناناسم..بۆ تۆ ئەوەندە بەناوبانگیت؟
نووسەر : من نووسەرم، ئەگەر ناونیشانی کتێبەکانمت پێتبڵێم دەمناسیتەوە.
دز: من کتێب ناخوێنمەوە
دز: ( پێکەنین) نووسەروڕۆشنبیرەکان دزی دەرەجە یەکن…
نووسەر: سەرم سووڕماوە نازانم چی لەتۆ بکەم؟!
دز: لەم سەردەمەش بەس ناوی گۆرانی بێژەکان دەزانم.
نووسەر: تۆ قوتابی زانکۆ بوویت و یەک کتێبی ئەدەبیت نەخوێندۆتەوە؟
دز: نەخێر؛ لەم مەملەکەتە جەنگ بەدوای جەنگە بەردەوامە، بێ هیوادەژین…چیمان لە کتێب خوێندنەوە داوە.
نووسەر : ئەم قسە زلانە دەزانیت…واباشترە خۆتم پێ بناسێنیت؟
دز : من برسی و تینوومە، قوومێ ئاوم بەرێ، دواجار بۆ خۆت چی بڕیاردەدەی بیدە. دەمدەی بەدەست پۆلیس یان ئازادم دەکەی…
نووسەر: ئازادت ناکەم..
دز : بیستوومە نووسەرەکان مهرەبانن.ئەوەنییە گەڕاویتەتەوە بۆ نیشتمان ودڵت پێمان دەسووتێ.
نووسەر: نیشتیمان….
دز: ئەی بۆچی گەڕاویتەتەوە؟ بۆ ژنهێنان…
نووسەر: نەخێر؛ ڕۆمانێکم نووسیوەتەوە دەمەوێ چاپی کەم.
دز: قسەیەکت پێبڵێم پێتناخۆش نابێت؟
نووسەر: فەرموو..
دز: تووخوا پارەی ئەو چاپە بدەیت بەمن باشترنییە؟ لەم وڵاتە کەس کتێب ناخوێنێتەوە.
نووسەر: نا وانییە..تۆ ناخوێنیتەوە…خەڵکێک هەن دەخوێننەوە.
دز: دەپێمبڵێ چیرۆکەکەت باسی چیدەکات؟
نووسەر: باسی دزێکی وەک تۆ دەکات.
دز : ئنجا من نایخوێنمەوە…(بەپێکەنینەوە).
نووسەر: گالتەم پێدەکەی؟
دز: نەخێر گاڵتە ناکەم؛ چونکە لەم وڵاتە ئەوەندەمان دز هەیە هەتا خوا دەڵێت بەس. ڕۆژانە لەبەرچاومان دزی دەکەن…ناوێرین فزەبکەین.
نووسەر: تۆش دزێکی سیاسیت.
دز : نا ئەمە شتێکی ئاشکرایە، جاران دیکتاتۆرێک هەبوو دەیکوشتین. ئێستا سەدان مافیا هەیە بەخەفەت دەمانکوژن.
نووسەر: ئەم قسە زلانە دەزانی و دزیش دەکەیت؟
دز : پێموتی ..من دزی دەکەم تا لەم وڵاتە رزگارم بێت.
نووسەر: هەی گەمژە، نابێت دزی بکەیت..نازانم، چیتلێبکەم.
دز: ئازادم کە…
نووسەر: بەس ؛ باسی ئازادی مەکە.
دز : ئازادم کە، بەڵێن بێت هەرچی کتێبت چاپکردووە دەیخوێنمەوە.
نووسەر: مەیکڕە، بیدزە.
دز: نا نا، باوی کتێب دزین نەماوە. ئێستا سەردەمی ئاودیوکردنە.
نووسەر: دیسان ڕادەبوێری؟
دز : نەخێر، بەس بەڕێزتان ئەوەندە بەناوبانگن..لەم نیشتیمانە ماڵێک نەبوو میوانداریت بکەن. لەم باخە نەبێت؟
نووسەر: نامەوێت کەس ئەزیەت دەم.
دز : دەڵێن ئەم خارجیانە سپۆرتن…(پێکەنین)
نووسەر: بەسە زمان درێژی.
دز: ئەی باشە ماڵی برا و خوشک، دایک ..باوک کەسێک نەبوو….؟
نووسەر: دایک و باوکم ئێوە خۆش، یەک براو خوشکێکم هەیە.
دز: خوا لێکتان نەکات. منیش یەک برا و خوشکێکم هەیە.
نووسەر: ئۆی لەو درۆیە.
دز؛ هەقتە باوەڕنەکەی، من لەگەڕەکی ئیسکان دەژیم هەموو کەس دەمناسێت.
نووسەر: ئەی لەگەڕەکی شۆڕجە کەس دەناسیت؟
دز: شۆڕجە؟ (بیرکردنەوە)
نووسەر: براکەم لە ناو بازاڕ دوکانی دەڵاڵی هەیە.
دز: دەڵاڵ..خانووبەرە..
نووسەر: کەس دەناسیت لەناوبازار نزیک ئەحمەئاغا؟
دز: ها..نازانم..تۆ برات هەیە لەناو بازار..دەڵاڵی پاسکیل و سەیارە و خانووبەرە زۆرن.
نووسەر: (قوومێک ئاودەدات بە دزەکە)
دزەکە: وتت میرات وەردەگریت؟
نووسەر: بۆ حەزدەکەی بزانیت؛ نزیکی بیست سی دەفتەرە لەنێوان من و خوشک و براکەم بەشی دەکەین.
دز: ئەگەر سی دەفتەربێت..تۆ نزیک سیانزە دەفتەرت بەردەکەوێت، ئیتر قەپاتی بۆخۆت، خوشکەکەشت کەمتری بەردەکەوێت.
نووسەر: وانییە؛ من داوام لەبراکەم کرد کە بە یەیەکسانی بەشیکەین، بەڵام خوشکەکەم ڕازی نەبوو، وتی من لە شەریعەتی ئیسلام لانادەم.
دز: دونیا پڕ لە تەماحە، بەس مێشکی خوشکەکەتیان باش شۆریوەتەوە، ژن نیوە ئینسانە!.
نووسەر: تۆش ئەگەر بەپێی ئیسلام بێت دەبێت قۆڵت ببڕمەوە.
دز: لەخوا بەزیاد بێت نووسەرەکان کاری واناکەن.
نووسەر: واز لە قسەی زل ناهێنیت.
دز: دڵنیام ئازادم دەکەیت.
نووسەر: نەخێر دەتدەمە دەست پۆلیس…تا بە سزای خۆت بگەیت.
دز: بۆ خۆت باشترە ئازادم کەیت!.
نووسەر: (رووی دەمانچەکەی لێدەکات) مەبەستت چییە؟
دز: چی دەکەیت؟ دەزانی دەمانچەکە فیشەکی تیا نییە!.
نووسەر: (تاقیدەکاتەوە)…کەواتە تۆ نەتویستووە من بکوژی؟
دز: خوا دەزانێت!.
نووسەر: ڕاستیم پێبڵێ!.
دز : ویستم بتترسێنم و پارەکەت بەرم.
نووسەر: ( قاچ و دەستی دزەکە دەکاتەوە) تۆ دزێكی بەڕەحمی!.
دز: خوا دەزانێت!
نووسەر: بڕۆ دەرەوە..نامەوێت بتناسم.
[ لەناکاو دزەکە چەقۆیەک لە ملی نووسەرەکە گیردەکات]
نووسەر: دەتەوێت بمکوژی؟ بۆ دوو سەد دۆلار؟!
دز: (پێکەنین) دوو دەفتەر نەک دووسەد دۆلار.
نووسەر: دوو دەفتەر… با میراتەکە وەرگرم.
دز: بەخوا نووسەرێکی گەمژەی؛ من بەدیار تۆ دانیشم تا میراتەکەت وەردەگری..تۆ وادەزانی ئەوەی نەخوێنێتەوە گەمژەیە.
نووسەر: ئاخر من تێناگەم بۆ دەبێت من بکوژیت..دڵنیام حزبێک لایەئەنێک تۆیان ناردووە بۆ کوشتنم…بەرمدە من کەسێکی نیشتیمان پەروەرم.
دز: (پێکەنین) نیشتیمان بۆ ئەوکەسانەیە کە سەفتەی دەکەن…پێمووتی من لە دەست ئەم نیشتیمانە ڕادەکەم و بێزارم..تۆ هێشتا نازانیت لەناخی مرۆڤەکان چیدەگووزەرێت؟!.
نووسەر: چی دەگووزەرێ…دەتەوێت تاوانێک بکەیت لەبەرئەوەی بێزاریت.. دەتەوێت مرۆڤێک بکوژی بۆ ئەوەی بگەیت بە ئەوروپا.
دز: تۆ تێناگەیت…(چەقۆکە تووندتر دەکات).
نووسەر: تێمگەیەنە…کێشەکەت چیە..پارەیە..هەموو سەروەتی خۆمت دەدەمێ!.
دز: نەخێر…کێشەکە براکەتە.
نووسەر: برا….
دز: بەڵێ. براکەت منی ناردووە تا بتکوژم.
نووسەر: (سەرلێشێواو) باوەڕناکەم.
دز: ڕاستیەکەی من نەمزانی ئەوەی منی ناردووە براکەت بووە…تا خۆت پێناساندم و وتت برام هەیە دەڵاڵە لە ناو بازاڕ..پاشان ڕەنگتان بەیەکتر دەچێیت.
نووسەر: دەتۆ بەرمدە…شێتم مەکە…وێنەی براکەم لەناو موبایلەکەم هەیە و پێت پیشاندەدەم…ئەگەر خۆی بوو، خۆم بۆت ڕادەکشێم و بمکووژە.
(دزەکە ئازادی دەکات و سەیری وێنەی ناو موبایلەکە دەکەن)
دز: خۆیەتی و مەکتەبەکەشی ناوی (برایەتی)یە..
نووسەر: باوەڕ ناکەم..بۆ دەبێت بمکووژێ؟!
دز: دەڵێم لە گوێی گایا نووستووی..
نووسەر: خۆزگە، بمردمایە بەڵام ئەم کردەوەیەم لە خێزانەکەمان نەدیبایە…تۆ دڵنیایت، براکەم تۆی ناردووە.
دز: بەڵێ (شەماڵ)ی برات منی ناردوە، و وتی: کەسێک هەیە کات خۆی پارەی خواردووم، لە فڵانە باخە و بڕۆ بیکوژە دوو دەفتەرت دەدەمێ. ئیتر سەرم مەیەشێنە…منیش بەرگەی ئەم ڕووداوە ناگرم، برا برا بکوژێ!!
( دز ڕادەکاتە دەرەوە).
نووسەر: وەرە بۆ کوێ دەرۆی ..من بەرگەی ئەم ڕووداوە ناگرم…نا نامەڕۆ بەتەنیا جێم مەهێڵە…هەموو شتەکان با وەک جارانی لێبێتەوە…بگەڕێوە توانای ژیانم نەماوە.

——————–
تێبینی:
بۆ نمایشکردنی ئەم دەقە شانۆییە، تکایە پەیوەندی بە نووسەرەوە بکەن.

.دەمەوێت پالەوانیەتی ئەو خانمە بگێڕمەوە كە ژیانی من و پێنج سەد گەشتیاری ڕزگاركرد
.پارساڵ بڕیارمدا پشوویەك وەرگرم و بۆ هەفتەیەك بە كەشتی گەشتێكی تایبەت بكەم
لەوساتەی پێم نایە ناو كەشتیەكە خانمێكی قەشەنگ بە ناز و عیشوەوە بە تەنیشتمەوە ڕێیدەكرد
.سلاو یكم لێكرد، بە بزەی پێكەنین وەلامی دامەوە
وتم كەش و هەوایەكی خۆشی هەیە؟
! بەلێ.. كەشتیەكەش تا بلێی جوانە –
.. تۆ جوانترت كردووە +
..پێكەنی و وتی : دوایی دەتبینمەوە
لەکاتێکدا كاپتنی كەشتیەكە پێشوازی لێدەكردین، هەركە چاوی بەو خانمە كەوت بزەی پێكەنینی هاویشت و بە خێرهاتنێكی تایبەتی كرد، هەتا خانمەكە لەبەرچاو ون بوو سەیری دەكرد و ئاگای لە موسافرەكانیتر نەما
(لەدڵ خۆم وتم كاپتنی چاو حیز)
لە پاش چەند سەعاتێك كەشتیەكە كەناری دەریای بەجێ هێشت و گەشتیارەكان یەك لە دوای یەك بەرەو كافتریاو شوێنەكانیتر پەخش بوون. منیش چاوم دەگێڕا ئەو خانمە بدۆزمەوە ، لە پڕ بینیم لەگەل كاپتنەكە ڕاوەستاوە و قسەدەکەن ، بەلام خانمەكە دلخۆش دیار نەبوو، زوو لە كاپتنەكە دوور كەوتەوە بەرەو كافیترایەكە ڕۆیشت. منیش لێی نزیك كەوتمەوە و وتم : كاتت هەیە قاوەیەك بخوێینەوە؟
با بمێنێ بۆ کاتێكیتر –
بۆ ڕۆژی دوایی خانمەكەم بینی لەگەل كاپتن لە ڕەستورانت دانیشتوون و جەوێكی خۆشیان هەیە
ئیتر دەستم لەو خانمە شۆری و بڕیارمدا كاتەكانم بە فیڕۆ نەدەم . ئەگەر چی بینینی ئەو دیمەنە دڵتەنگی کردبووم
بۆ ئێوارە دەستمكرد بە خواردنەوە و خۆم مەست كرد
!.پیرەمێردێك هاتە لامەوە وتی : پەڵە مەكە ئەمشەو باڕەكە پڕ دەبێت لە خانمی جوان
!.وتم : قولابم پێ نییە
.. تۆڕ هەلدە –
شەو درەنگ چەند خانمێك دیار كەوتن. بەلام جوانانیان شایانی ئەوە نەبوو خۆت بۆیان ماندوو كەیت
…پیرەمێردەكە هاتەوە لام و وتی : دەی بتبینم
وتم: جارێ سەبر بگرە بەلكو بەرخی ناسكتر دەركەوون
!وتی : هەشت بێت لە مشت بێت نەك نۆ بێت و نەبێت
بۆ شەوی داهاتوو كابتنم بینی لەگەل خانمەكە سەمای دەكرد ، پیرەمێردەكەش لەگەل پیرەژنێک یەكتریان ماچ دەكرد
تا دوای نیوە شەو مامەوە
كاپتن قۆڵی خانمی گرتوو بردی. پیرەمێردەكەش لەبەردەمم تێپەڕی دەستی لەناودەستی پیرێژن بوو بە پێكەنینەوە وتی : هە ركات ماسی لەناو ئاو دەركەیت هەر تازەیە

كۆتایی بە گەشتەكەم هات و كەشتی ڕوو لە كەنار مڵی نا
لە كاتی دابەزیین دووبارە تووشم بە تووشی ئەو خانمە
بوەوە
پێمووت : كاتێكی خۆشبوو؟
هیوادارم بۆ تۆش خۆشتر بووبێت –
وتم : ئەگەر لەگەل تۆ بوومایە خۆشتر دەبوو
پێكەنی و وتی : بۆ كوێ دەچیت ؟
بەرەو ناو شار +
زۆرباشە پێكەوە دەڕۆیین –
پێكەوە سواری پاس بووین
لەڕێگە دەستی خستە نێو دەستم وتی : دڵ خۆت تەنگ مەكە ، دەمەوێت نهێنییەكت لە لا بدركێنم
فەرموو –
ئەو كاپتنەت بینی هەمیشە بەدوامەوە بوو؟ +
..بەڵێ كاپتنە چاو حیزەكە –
پێكەنی وتی : بەزۆر داوای لێكردم پەیوەندی لەگەل ببەستم، منیش رەفزمکرد، هەر كە گەیشتینە ناوەڕاستی دەریاكە هەڕەشەی لێكردم و وتی ئەگەر لەگەلم نەخەوییت كەشتیەكە نقووم دەکەم بەسەرجەم گەشتیارەكانەوە
منیش لەبەرخاتر ئەو هەموو ژن و منداڵ و چاوەكانی تۆ ناچار لەگەڵ كاپتن مامەوە
لە خۆشەویستیا تووند خانمەکەم لەباوەش گرت و وتم: كەواتە ئێمە قەرزاری تۆین
!.بەزەردەخەنە جوانەکەی وەلامی دامەوە : گوێی مەدەرێ منیش کاتێکی خۆشم هەبوو

(بیرۆچکەکەی لە تەنزێکەوە وەرمگرتووە)

برادەرێكی منداڵیم هەبوو ناوی شەماڵ بوو. من و شەماڵ سەرسەری و چەقۆ وەشێنی (رەحیماوە) بووین. كەس نەیدەوێرا شان لە شانمان بدات. بەداخەوە زۆری نەبرد ماڵی شەماڵ باری كرد بۆ سلێمانی!
هەر كە خەڵكی ڕەحیماوە زانیان من بە تەنیام، گەلە كۆمەیان لێكردم و تێریان تێهەڵدام.
لەپاش چەند ساڵێك ڕۆژێكیان دایكم وتی دەچین بۆ سلێمانی و سەردانی ماڵی (شەماڵ )دەكەین.
لەخۆشیا خەریك بوو باڵ بگرم.
لەژیانمدا حەزم لە سێ شتی شاری سلێمانییە: گەزۆكەی، شەربەتی مێووژ و كچەكانیان كە كاتێك دەڵێن بە ساقەو بم.
سەردانی ماڵی (شەماڵ)ی برادەرمان كرد. دامربۆكسێكم بەدیاری پێشكەش بە (شەماڵ) كرد، وتی هەتیو ئەوە چییە پێت؟
دەچین كوڕانی گەڕەكی پێدەترسێنین.
بیشارەوە… ئەم شارە شەقاوەی وای تیایە دوو چەقۆش تەرح دەدەن.
ئینجا شەماڵ وتی: با بچین بۆ گەڕان.
وتم: من حەزم لە گەزۆ و شەربەتی مێووژە.
لەگەڵ شەماڵ چووین بۆ ناو شار…گەزۆ و شەربەتی مێووژمان خوارد.
ئەوەی سەرنجی ڕاكێشام شەماڵی برادەرم لە هەركتێبخانە و ڕۆژنامەفرۆشێك، قەدەرێك ڕادەوەستا و مانشێتەكانی دەخوێندەوە . لەبیرمە نامیلكە بچكۆلانەكەی (عەبدوڵا پەشێوی) دەخوێندەوە وتی: ئەگەر پارەم هەبوایە ئەم كتێبەم دەكڕی.
منیش كتێبەكەم گرتە دەست و خوێندمەوە(شەو نییە خەونتان پێوە نەبینم)!
گەڕایینەوە ماڵ. ئێوارە كە تاریك داهات. شەماڵ دەفتەرێكی دووسەد لاپەڕەیی دەركرد. وتی: ئەمە هەمووی شعری خۆمە و نووسیومەتەوە.
ئینجا هەستم كرد شەماڵ گۆڕاوە و بووە بە شاعر
لێمپرسی: چۆن دەبێت بەشاعر؟
وتی: دەبێت عاشق بیت.
لە فكری خۆم وتم جا كێ عاشقی من دەبێت لەو (ڕەحیماوە) یە هەموو دەمناسن، كە پیس و پۆخڵم!
شەماڵ دەستیكرد بە شیعر خوێندنەوە منیش تەقەی سەرم دەهات.
لێمپرسی: باشە تۆ عاشقی كێ بوویتە؟ كچێكی گەڕەكە شەو دەیبینین.
وتم: ئەرێ ئەو كچە بە تۆ دەڵێت بە ساقەو بم؟
هەر كە بمبینێ وادەڵێت.
ئینجا وتم: شەماڵ گیان… دیارییە كم بۆت هەیە دەتدەمێ بەس تووخوا لێم تووڕە نەبیت؟
فەرموو…
لەژێر قەمیسەكەمەوە كتێبەكەی (پەشێو)م خستە بەردەمی.
بەسەرسووڕمانەوە پرسی: هەتیو ئەمەت لەكوێ بوو؟
لە كتێبخانەكە دزیم… بۆ تۆ…
ئای كە ڕەفیقی چاكیت… لێ جارێكیتر نەكەی لەم شارە دزی بكەیت، چونكە خەڵكی. ئێرە لە تۆ زۆڵترن.
دوای ئەوەی شەماڵ چەند كۆپلە شیعرێكی بۆم خوێندەوە، دنیا تاریك ببوو. وتی: (بەخە)گیان هەستە بابڕۆین دەنكەكەمت پێ بناسێنم.
لەپاش ئەوەی چەند كووچەیەكمان بڕی لەژێر دارەتوویەك وەستاین و چاوەڕوان بووین!
لەپڕ كچێك كە دەتگووت مانگە، لەدرەختەكە نزیك كەوتەوە.
بە دەنگێكی ناسك وتی: (شەماڵ) گیان. بەساوقەوبم …ئەوە خۆتی؟
بەڵێ…ئەمەش ڕەفیقەكەمە كە بۆم باس كردی.
دوای چۆنی چاكی كە من زمانم تێك ئاڵا بوو، ئەوانش پێمپێدەكەنین.
شەماڵ دەفتەرە شعرەكەی دەرهێنا و چەند كۆپلە شعرێكی خوێندەوە، ئینجا دەفتەرەكەی دایە دەستم و وتی: بڕۆ …سەر كۆڵان و چاوەڕووانم كە.
دووركەوتمەوە و بڕیارمدا هەر كە بگەڕێمەوە ڕەحیماوە یەكسەر عاشق بم و شیعر بنووسم!
كە (شەماڵ)ی برادەرم گەڕایەوە لام. وتی هەتیو دەنكەكەم جوانبوو ؟
وتم: خواوبێت، ئەگەر ئەمە دەنكی من بێت یەك دیوان شیعری بۆ دەنووسم!
ئەو شەوە لە سلێمانی خەوم زڕا …دەمگووت تۆبڵێی منیش بتوانم عاشق بم و شیعر بنووسمەوە؟!
كە گەڕاینەوە بۆ كەركووك، لەماوەیەكی كەمدا خوو و ڕەوشتم گۆڕا، هەرچەندە عاشق نەبووم، بەڵام توانیم ببم بە بەناوبانگترین شاعیری گەڕەكی ( ڕەحیماوە)
چونكە دەفتەر شیعرەكەی (شەماڵ)ی برادەرم دزی بوو!

١ی نیسانی ٢٠١٨