ئەمشەو وەها مەست بووم، کە مەستانە بگریم
لێمگەڕێ، با شەوێ لە گۆشەی مەیخانە بگریم

بۆیە مەستانە هاتووم بۆ مەیخانە ئەمشەو
تا بۆ قەهقەهەی جام و پەیمانە بگریم

ئەفسانەی دڵ پڕ لە چیرۆکی ڕەنج و ژانە
لێمگەڕێ، بۆ ئەم چیرۆکە، بۆ ئەفسانە بگریم

ئەی ئەقڵ، تۆ بە ئاشقی دێوانە پێبکەنی
منیش بۆ هەر ئاقڵ و فەرزانە بگریم

کۆرپەی دڵم، دیسانەوە هەر تۆی دەوێ
لێمگەڕێ، بۆ ئەم کۆرپەیە با هەتیوانە بگریم

ئەمشەو بۆچی وا لە نیشتمانی خۆم غەریبم
دەمەوێ، ئەمشەو لەم شارەدا غەریبانە بگریم

ئەو باڵندە جوانەی من، باڵیان بەست، لێمگەڕێ
با شەوانە بۆ پەڕئەفشانی پەروانە بگریم!

وەرگێڕانی لە فارسییەوە:شەهلا نوری

کاتێک شەو،
سەرمای پاییز لە باوەش دەگرێت
دڵۆپە نەرمەکانی شەونم،
لەسەر ڕووی ساردی بەردەکان و گەڵای نوقمی خەون،
دەبنە بلووری فێنک بۆ ملوانکەی گەردنی شەو…

ئەم فرمێسکانە،
نە لە ناخی ماتی ڕووەکەوە دەڕژێن،
نە بارانن،
نە هەنسکی کپی چەم…

ئەم دڵۆپانە،
دیارییەکی پاکی ئاسمانن
بۆ سەر سینەی گەڵا ژاکاوەکان،
بۆ ئاونگی شیلەی لێوی یار.

شەهلا نوری

یادەکانی عومری ڕابردوو
لەبەر چاوم نیشتووە،
لە ئاسمانی لاجوەردیدا
ئاگری ئاهم بڵێسەی گرتووە.

ئەی خوای بێبەشان،
تاقەتم بدە، تاقەتم بدە!
قیبلەگای ئێمەی غەریبان،
تاقەتم بدە، تاقەتم بدە!

ساغەرم شکا، ئەی ساقی،
لە دەست چووم، ئەی ساقی!

لەناو تۆفاندا،
لەسەر شەپۆلی خەم، ئەوە منم
لە کەشتییەکی شکاودا منم،
ئەی کەشتیوانی جیهان!

تا ناوی من تۆمار کرا،
مۆری خەم لەسەر چارەنووسی ئادەم درا.

تۆ بە تینوێتی منت کوشت
لەنێو سەرابی ناکامیدا،
ئەی بەڵای بێ‌سەرئەنجام!

لێوم بە جامی نەگەیشتووە،
دەکێشم بە کۆڵ لە حەسرەت، باری مەستی و بەدناوی.

باسی چی بکەم؟
سکاڵا لە کێ بکەم؟
کە خۆم بە دەستی خۆم،
ئاگرم لە دڵی نیگەرانم بەرداوە…

ساغەرم شکا، ئەی ساقی،
لە دەست چووم، ئەی ساقی!

خۆزگە دڵم لە کۆت و زنجیری عەشقت بەند بووایە
هەناسەم لە هەناسەی گەرمی تەنت تێر بووایە

خۆزگە قاسدێک خەبەرێکی لە تۆوە بهێنایە،
تا خەونی شەوزەدەی دڵم گەش و ڕوونتر بووایە

دەنکێ لە تۆوی عەشقی تۆم لەنێو دڵدا چاندووە
خۆزگە بە دەستی نازی تۆ ئەم تۆوە بەردار بووایە

خەندەت وەک بەهارە و لێوت قەند و نەباتە
لە کەنارت مەحاڵ بوو هەر کەسێ پیر بووایە

لە پێش لەشکری چاوانت کڕنووش بردووم، ونم،
کوا سوپایەک لەم مەیدانە خۆڕاگر بووایە؟

ناوی تۆم بە دڵ برد،کەچی ڕووی خۆت لە من لادا،
عەشقی خەیاڵیم دەبوو ئاوا بریندار بووایە؟

فاڵم لە نێو فنجانە، دڵم لە لەپی دەستدایە،
شەو و ڕۆژ چاوەڕوانم، ئاخۆ چی تەقدیر بووایە؟

شەو ئەو گێسووەی نییە کە لە تۆدایە
باوەشی گوڵ ئەو عەترەی نییە کە لە تۆدایە

نێرگس کە بە ناز، دڵ له ڕەندان دەڕفێنێ
ئەو چاوە پڕ لە ڕازەی نییە کە لە تۆدایە

نیلوفەری پاراو، کە زوڵفی بڵاو کرد،
ئەو خەرمەنی پرچەی نییە کە لە تۆدایە

پەپوولە کە هەر دەمێ لە گوڵێک ماچێ دەدزێ،
ئەو خووە دڵبازەی نییە کە لە تۆدایە

جگە لە دڵی جان‌سەختی “ڕەهی” قەت لە تۆ نەڕەنجا
کەس تاقەتی ئەو ڕەفتار و نازەی نییە کە لە تۆدایە!

وا دیسان نەوای شێتی دەژەنی ئەی تار، ئەمشەو؟
ڕازێکت پێ دەڵێم و لە پەردەدا بیخە حەشار ئەمشەو

ئەو ڕەنجەی لە تاری زوڵفی یار کێشام شەو و ڕۆژ
موو بە موو لای تۆ بەیان دەکەم بە زار ئەمشەو

عەشق، کە هاوسایەی دیوار بە دیواری شێتییە،
حوسنی ڕووی خۆی نواندووە لە دەر و دیوار ئەمشەو.

ڕوو بۆ هەر لایەک دەکەم نەخشی جەماڵی یار دیارە،
خۆزگە ماچێکى دەدامێ لە نێو سەد ڕوخسار ئەمشەو

لە ئاسماندا بۆنی دڵێکی سووتاو دێت، ئاخۆ
کێ بوو دیسان گرفتار لە ئەڵقەی زوڵفی یار ئەمشەو؟

ناڵە و زاری بێهوودە مەکە ئەی دڵی بیمار،
تۆ لەگەڵ شەم بووی بە هاودڵ و هاوکار ئەمشەو

ئەی شەم، گەلێ شەو تا سەحەر، لە کەنارت بووین بێدار
خۆزگە وەک پەروانە دەسووتاین بە یەکجار ئەمشەو

ئەمە ئاگرە نەک گوتن، عیماد! بەس بێ باسی دڵ
دەنا دەسووتێنێ قەڵەمت، دەفتەری ئەشعار ئەمشەو

وەرگێڕانی لە فارسییەوە: شەهلا نوری
شاعیر: عیماد خۆڕاسانی
غەزەل: نەوای شێتی

لێم مەگرە ئەی یار، ئەگەر وا بە زار بگریم
لێم گەڕێ با بگریم، هەر بگریم و هەر بگریم!

لێم گەڕێ وەک مەلی گرفتار با بناڵێنم
وەک ساوای نەزار، مات و بیمار بگریم

مەی نۆشینی من بۆ بەزمی سەفا نییە، خودایە
سەودایەکە، بێ تانەی ئەغیار، دڵ بریندار بگریم

تەنیا بۆ خۆم نییە سەرمەستیی شەوانەم
بۆ حاڵی گشت خەڵکی هۆشیار بە هاوار بگریم

بۆ هەر کەسێ لە داوی مەینەتدا بوو ئەسیر
بۆ شا و گەدا، پیر و لاو، بێ‌قەرار بگریم

بۆ لالەی تازە پشکوتووی داوێنی دەشتان،
بۆ خونچەی نەپشکوتووی گوڵزار بگریم

بۆ بێ‌عەهد و وەفای دونیا، بۆ حاڵی هەرکەسێ ئێستا
کە لێوی ناوەتە سەر لێوی ئاڵی دڵدار، بگریم

ئەم کاسە سەرانە سبەی دەبنە خۆڵ و خاکی ڕێ
لێم گەڕێ با ئەمشەو بە چرپەی سۆزی تار بگریم

جێی خۆیەتی، عیماد! هەتا ڕۆژی مەحشەر
بۆ سەرنخوونیی بەختی خۆم، پڕ بە زار بگریم!

غەزەلێک لە شاکارەکانی شاعیر: عیماد خۆراسانی
وەرگێڕانی لە فارسییەوە: شەهلا نوری

لە سایەی دیداری
مانگدا، ڕۆحی
دەریا
دەگەشێتەوە، بە
لافاوی شەپۆل
هەڵدەچێت و
بێئارامیی
سەوداسەری
دەچرپێنێت.

کاتێک مانگ
هەڵدێت، دەریا
دەبێتە ڕاپەڕینی
ئەوینێکی شین، و
باخەڵی کەنار
کڕنۆشی بۆ
دەبات.

کە مانگیش ئاوا
دەبێت، دەریا
دەبێتە کشانەوەی
خەم و
هەناسەیەکی
شێتگیر، ڕوو لە
کۆچێکی تاریک
دەکات،
کۆچێک…
کە لە ناخی
شەپۆلەوە دەست
پێدەکات و لە
ئامێزی بێدەنگی و
سۆزی کەناردا
کۆتایی دێت.

شەهلا نوری

کاتێک با،
بە مشتێک لمەوە
لە جەستەی کێوەکان دەدات،
تۆڵەیان لێ ناکاتەوە
تەنیا دەیەوێت
بڵێت، ڕووبەر درۆیەکە و
کات دروستی کردووە!
ئەم تاشینە بەردەوامە،
سەلمێنەری کاتیبوونی
هەبوونە
ئێمە هەموو بەردین،
ڕۆژانە پارچەیەکمان
لێ دەبێتەوە
بەردەکانیش…
چیتر خۆیان ناناسنەوە

شیعری شەهلا نوری

لالەم دی و ڕووی گەشی جوانی تۆم هاتەوە یاد،
شوعلەم دی و نازی سەرکێشیی تۆم هاتەوە یاد

سەوسەن و گوڵ ئاسمانی کۆڕیان دەڕازاندەوە،
ڕوو و زوڵفی مەجلیس‌ئارای نازی تۆم هاتەوە یاد

شەم لە باوەشی شەماڵا بڵێسەی لێ دەلەرزی،
لەرزینی بسکی عەنبەرسای سەر ڕوومەتی تۆم هاتەوە یاد

لە باخا پەپوولەیەک هات نەنیشت، هەڵفڕی و چوو بێباک،
تۆرانی بێهۆ و یاخیبوونی تۆم هاتەوە یاد

مامزی سەرمەست هەڵات، ڕایکرد و ڕووی کردە کۆسار،
خۆدزینەوەی دڵبەرانەی پڕ تابی تۆم هاتەوە یاد

جۆگەیەک لە بن سەرووێ زاری و گریانی بوو،
ئاهـ و ناڵەی گریانم لەبەر پێی تۆم هاتەوە یاد

شار پڕ بوو لە هەرای دێوانەیەک، ئەی ڕەهی!
دێوانەیی سەر و دڵی سەودای تۆم هاتەوە یاد

لە نێوان دوو جەمسەری دژواردا،
سەما لەگەڵ باهۆزی بوون دەکەم،
لە نێو خەیاڵێکدا کە تێیدا سێبەرەکان دەلاوێنمەوە،
و لە ڕاستییەک کە لێی دەترسم
دەترسم ڕاستی، ئەو بتە بشکێنێت کە پەرستوومە،
دەترسم “تۆ”یەک ببینم…
کە لە “تۆ”ی ناو خەیاڵم نەچێت
بەڵام ئیتر ئامادەم،
ئامادەم پەنجەرەی خەیاڵ دابخەم و
باوەش بۆ تەوژمی ساردی ڕاستی بگرمەوە
با تاڵیی ڕاستی لە شیرینیی خەیاڵ پیرۆزتر بێت،
من نامەوێت لە ناو تەمومژدا ون ببم،
با لە ناو جەوهەری ڕاستیدا هەبم
دەی خەیاڵ… کڕنۆشی ماڵئاوایی!
ئەی ڕاستییە تاڵەکە…
سڵاو!

شیعری شەهلا نوری

ئەم غەزەلە ڕەنگدانەوەی سەردەمی زیندانی و دوورخرانەوەی شاعیرە.

من ناڵێم لێرە لەم قەفەسە ئازادم کەن
قەفەسم بەرنە نێو باخ و دڵم شاد کەن

ڕادەبرێ فەسڵی گوڵ، ئەی هاودەمان دەخیلی خودا
لە باخێ دانیشن و یادی منیش یاد کەن

عەندەلیبان مژدە بێ، گوڵی سوور هاتەوە نێو چەمەن
بۆ شاباشی قەدومی، هەموو چریکە و فەریاد کەن

یادی ئەم مەلە گرفتارە بکەن ئەی مەلان
کاتێ تەماشای گوڵ و گوڵزار و شەمشاد کەن

هەر کەسێ مەلێکی دیلی هەبوو لەنێو قەفەسا
بۆ باخی بەرن و بە یادی من ئازاد کەن

هێلانەی منی بێچارە گەر سووتا، با بسووتێ
بیری وێرانبوونی ماڵی سەییاد کەن

شەم گەر بە بایەک خامۆش بوو مەگرن عەجەب
یادی هەناسەی پەروانەی بەباداچوو شاد کەن

بێستوون لە ڕێمانە، نەکا لای فەرهاد
ناوی شیرین بەرن، دڵەی زاری ناشاد کەن

زوڵم و زۆرداری عومری لاوان کورت دەکەن
ئەی گەورەکانی وەتەن، شیوەن و داد کەن

گەر بە زوڵمی ئێوە ماڵی مێروویەک وێران بوو
مەحاڵە ماڵی خۆتان ئێدی ئاوا و ئاباد کەن

کونجی تاریکی زیندان گەر پشکێ بەهاری بەرکەوت
شوکرانەی ئازادی و دیاریی خوداداد کەن

ئەگەر
گیانی شەهلا نەما…
ڕۆحم
بێدەنگ
دەچێتە ناو خاک،
بە نەمام و گیا
دەبێتەوە بە ژیانێکی تر…
دەریا
ناوم دەهێنێت
و هەور
بەسەرمدا دەبارێ…
تۆ—
ئەی یاری قارەمان—
لە نێوان ئاسمان و یادگاریدا
دەمێنیتەوە…
و من
هێشتا
لە ناو خاکدا
بە شوێنتدا دەگەڕێم…

شیعری شەهلا نوری

ئێوارەیەکی چۆڵ…
بووم بە گەردەلوولی سەما و
بە دەوری خۆمدا دەخولامەوە،
گەردوون وەک سێبەرێک،
لەگەڵ هەر لەرینەوەیەکی جەستەمدا دەجووڵا
هەستەکانم ببوون بە گڕ و سۆز،
هەندێکیان وەک هەڵۆ بەرەو ئاسمان هەڵدەفڕین و
هەندێکی تریش لای من…
دەبوون بە ئاوازی جەستەم بۆ ڕازی هەنسک و سەمایەکی بێدەنگ!
تەنم دەلەرایەوە،
قەدی ماندووم دەچەمایەوە
لەگەڵ سۆزی ئەو برینانەی
لە ناخمدا دەتلانەوە…
لە پشت پەنجەرەکەمەوە، کۆترێکی ڕێبوار ڕاوەستا،
ئەو بێدەنگ لێی دەڕوانیم و تێدەگەیشت…
دەیزانی ئەمە سەمای شادی نییە،
خولانەوەی ڕۆحێکی ماندووە
لە جەستەیەکی سەربڕاودا،
سەمای سەرەمەرگی کۆترێکی بێ‌ئاسمانە!

شیعری شەهلا نوری

گوناهم چی بوو، وا شەیدای نیگای خومارت بووم
وا وێڵ و وێران، مات و حەیرانی ڕێگات بووم

گوناهم چی بوو لە فەنای بێ‌دەنگی و تەنیایی
زاهیدی گۆشەی میحرابی لێوانت بووم

ئاخر ئەی ئەستێرەی گەشی داوێنی ئاسمان
گوناهم چی بوو کە نێوزڕانی زەمانت بووم

هاتی و بێ‌پەروا لەسەر گڵێمی
دڵم نیشتی
منیش بە نازی ڕووی شەنگت فیدای دڵی نازت بووم

ئەی ئەوەی بە جۆش و تینی جوانی خۆتەوە مەستی،
پیاڵەیەک بنۆشە ساقی مەستی شەڕابت بووم

هاتی و تاوێ نیشتی، وەکوو تۆفان ڕۆیشتی
هیچ تەماشات نەکرد کە هێندە نیگەرانت بووم

ڕۆیشتی و بێ‌ئاگا بووی لە دڵی شێت و زارم
نەتڕوانی چەندە کز و پەشێو و پەرێشانت بووم

ئەی کە لە حاڵی دڵی شەیدا ئاوا بێ‌خەبەری
بە خەبەر بە، منی پەرێشان، هەر چاو لە ڕێگات بووم

وەرگێڕانی لە فارسییەوە شەهلا نوری
شاعیر گمنام
غەزەل گوناهم چی بوو

ئەمڕۆ چەندە جوان و شۆخ و شەنگ و دڵ ئارا بووی
ونبووی دڵی ئێمە بووی، وەک مانگی شەو پەیدا بووی

شمشادێکی لاو، نیلۆفەرێ تەڕ و گەشی باخ
تەواو جۆش و خرۆش و شەوقی تەمەننا بووی

سێحری بەیان و نەشئەی مەی و عەتری گوڵ؟ نا..
شتێکی تر، تۆ لەوان زۆر خۆشتر و بێ‌هاوتا بووی

بەو دەنگە بەسۆزە و بە کەراسی سوور و ئاڵ
بۆ دەردی دڵ و ساڕێژی برینم، دەوا بووی

بەو نیگا گەرمە و بەو دوو چاوە مەست و ڕەشانە
مەیخانەی سەد شەیدای وەک منی ڕیسوا بووی

خەیامت بۆ دەخوێندم، غافڵ لەوەی کە خۆت
لە لوتفی شیعر و غەزەل، حافز و مەلا بووی

هەمیشە ڕووی تۆ قیبلەی ڕاز و نیگای من بوو
ئەمڕۆ سەروویەک و سەد باخی تەماشا بووی

گوتم، دڵ دەپارێزم لەو چاوە بازانە بەڵام بێ سوود
بۆ تاڵانی دڵم، وەک کاروانێ ڕەها بووی
سەراپای بوونت داوی ڕاوکردنی دڵ بوو،
هەرچەندە بە ڕاز و ڕوخسار هەر خەریکی حاشا بووی

ئەوەی بۆم نووسیوی بەسە، یان دیسان بڵێمەوە؟
کە تۆ شیعر و گوڵ و هەرا و غەوغا بووی

سەرەتا ڕێگری دڵ بووی و دواتر بە شێت و مەستی
بۆ دەردی دڵان، هەم حەکیم و زانا بووی

ئەی مانگ. گەر مەرامت لە بردنی دڵی ڕەندان نەبوو!
ئەی بۆچی ئەمڕۆ ئاوا بێوێنە و دڵڕەبا بووی؟

وەک شیعری “عیماد” لە خەمی تەنیایی و بێبەشی
بۆ جەرگی سووتاوم هەم سەفا و هەم جەفا بووی

وەرگێڕانی لە فارسییەوە شەهلا نوری
شاعیر عیماد خۆراسانی
غەزەل ئەمڕۆ

دڵم ئاڵۆزە، مایەی نازە هێشتا
مەلی باڵسووتاو، لە چنگی بازە هێشتا
گیان گەیشتە سەر لێو، بە لێوی یار نەگەیشت
دڵ وەڕەز بوو، ئەو هەر خەریکی نازە هێشتا
گەرچی لە خۆم بێگانە بووم و، شێتی عیشق
یار عاشق کوژ و بێگانەنەوازە هێشتا
بووم بە خۆڵ و ئاوی نەکرد بە بڵێسەی دڵم
بێخەبەر لە حەسرەتی خاوەن نیازە هێشتا
گەرچی هەر ساتێ فرمێسکی چاوم بە دادم دەگات
دڵی شەیدام لە نێو سۆز و گدازە هێشتا
شار خەوتووە، من و پەروانە و شەم بێدار
چیرۆکی ئێمە و دوو سێ دێوانە نوقمی ڕازە هێشتا
گەرچی ڕۆیشتی، حەسرەتی ڕووت لە دڵ نەڕۆیشت
دەرگای ئەم ماڵە بە هیوای تۆ وازە هێشتا
ئەمە چ سەودایەکە “عیماد” لە سەردایە؟
ئەمە چ سۆزێکە لە پەردەی سازە هێشتا؟

وەرگێڕانی لە فارسییەوە شەهلا نوری
غەزەلی بێگانەنەواز
شاعیر عیماد خۆراسانی

دەمێک بوو…
بەفرێکی وا نەباریبوو،
بەردەرگای لێ نەگرتبووم.
بەفرێکی تازە، بەسەر گەرمیی بوونمدا وا دەبارێ؛
گاهێ بەفرەکە نەرم و ڕوونە،
مشتێکم لێ هەڵگرت و
چێژم کرد بە لێوم!
گاهێ شەختەیە…
گاهێک منداڵان شەڕەبەفریانە و
لێم دەوەشێنن،
دەڵێن: دوورکەوە!
پەیکەری بەفر دیسانەوە مەخوڵقێنە،
بەرگی خۆتی لەبەر مەکە و
لێوی بە لێوت سوور مەکە!
گەمەی ئێمەش مەشێوێنە،
ئێوە بەرگەی تەزووی سەرما و بەفر ناگرن

شیعری شەهلا نوری

بە بەهاران باوەڕ بکە

پەنجەرەکان بکەرەوە…
وا نەسیم
جەژنی لەدایکبوونی هەڵاڵان
دەگێڕێت،
بەهاریش
لەسەر هەر چڵێک،
لە کەناری هەر گەڵایەک
مۆمێکی هەڵکردووە!
پەڕەسێلکەکان
گەڕانەوە دەچریکێنن
بۆ سەوزەڵانی،
کۆڵان پڕ بووە
لە چریکە و دیلانێ،
درەختی گێلاس
بۆ دیاریی جەژنی هەڵاڵان
گوڵی لە ئامێز گرتووە

پەنجەرەکان بکەرەوە
ئەی یار
لە بیرت دێ؟
کە تینوێتی کێوی زەوی سووتاند
گەڵاکان ژاکان،
لە ناخی خاکدا چی کرد!
لە بیرت دێ؟
لە تاریکیی شەوە درێژەکاندا
تەزووی سەرما
چی بە ڕەز کرد ؟
لە بیرت دێ؟
نیوەشەو
بە سەرو و سینەی
گوڵە سپییەکاندا،
بای تووڕە چی کرد؟
لە بیرت دێ؟

ئێستا
باوەڕ بە موعجیزەی
باران بکە،
دڵاوایی..
لە چاوی چەمەنزاردا ببینە و
میهرەبانی لە ڕووحی نەسیمدا؛
کە لەم کۆڵانە تەنگەدا
بەو دەستە بەتاڵەوە
جەژنی لەدایکبوونی هەڵاڵان
دەگێڕێت

خاک بێدار بووەوە
تۆ بۆچ بووی بە بەرد؟
تۆ بۆچ وا دڵتەنگ بوویت؟
پەنجەرەکان بکەرەوە
بە بەهاران باوەڕ بکە

ئەی سەبا بە تۆ چییان گۆت کە وا
خامۆش بووی
چ شەرابێکیان بە تۆ دا کە وا بێهۆش بووی

تۆ پەرستگای ئاگرینی عیشق و سۆز بووی
چ ڕوویدا کە وەک خۆڵەمێش خامۆش بووی

بە چ دەستێ ژەنیت ئەو سازە ، سۆزی شەوانە
کە خۆت لە نەرمە نەغمەی بێخود و بێهۆش بووی

تۆ دەنگی سەدان ئاواز بوویت ، دڵان سەراپا گوێ
چ ژنەفتی کە وا بێدەنگ وە گۆش بووی

گەرچی لە نێو خەڵقا وەفا نیە
بەڵام ،گوڵم
باوەڕ مەکە کە تۆ چوویت و فەرامۆش بووی

نازی دەکرد بە کراسی ناسکت لەش و لاری تۆ
نازەنینم چ بوو کەوا کفن پۆش بووی

شەمعی شەوانی تاریک بوویت و لێوخەندەی ژنان
لەگەڵ شنەی بەرەبەیان هاودەم و باوەش بووی

دەڵێی شەو حۆری بەهشتی بۆ باڵینت هاتووە
کە تۆ شەیدای زوڵف و بناگۆشی ئەو بووی

ئەی ئارامگا کە سەبا خەوتووە لەژێر سەنگت
بە چ گەنجینەی نهێنییەوە کەوا
سەرپۆش بووی

شەهریارا ! چزەی تینوێتیم لە جگەرمی هەڵقرچاند
بۆچ وا دوور لە چاووی پڕنۆش بووی

غەزەلی ژمارە ١٣٣
لەگەڵ ڕۆحی سەبا
شاعیر محەمەد حوسێن (شەهریار)
وەرگێڕانی لە فارسییەوە شەهلا نوری

وە سەفایە
خار پێدەخەنێ لە باخی بەهار
وە گوڵی مێخەک ھەناسەی چیمەن و
گوڵی ھەنار
خار لە دەووری مێخەک
وەک ڕۆمانێکە مێخەک بەرێک ڕەش
لە شێداریا نەرم و نیانی
لەتەک دارزیا ھەردووک دەئاڵێن

مێخک سەرسامە بە بۆ و بەرامی
دەھۆنرێمەوە بۆ ڕەنگ و جوانی
نەخۆش سوودمەندە دەبمە دەرمانی

خار دەلاوێنی
گوڵی بۆ وجوان
بزمار وەرگری تیژڕەوی بانی
کە تۆ لە سەفای
من تیژی بزمار ڕوو، بەرەو ناو شانی

مێخەک دێتە جواو
وە کەلوپەلی پەشت وە بەنی خوریت
بۆ ماوەیەکیش بۆنم هەڵدەگریت

خار ئێژێ
تۆ وشک دەکرێیت وە چەشنی جۆراو جۆر
دەهاڕێیت سەر تا خوار هەر وە ژێر خۆر

مێخەک ھات وتی
بومەسیاقەت
دەکرێمە چێشت ،و شرینی و شەرەبەت کەڵکم زۆر ئەوێ
شەوانەی حەسرەت
ھێشتا ھەر خونچەم لێدەکرێمەوە
گەڵا سەوزم و
درەختی گەرمیان
خشڵ و پۆشاکی ژنی شێخان

شەهلا نوری

نازەنین هات و لە دەرگای دڵی دام و، چوو
پەردەی خەڵوەتی خەمخانەمی هەڵدایەوە و، چوو

کونجی تەنیایی مە، بە خەیاڵی شاد کرد
خەوی خورشیدی خستە چاوی یەڵدا و، چوو

دەردی بێ عیشقیمانی دی و نیگەران بوو
ئاگری ئارەزووی لە گیانی بە ئارام بەردا و، چوو

خەرمەنی سووتاوی من، کوا بە کاری ئەو دەهات
کە وەک برووسکە هات و لە باغی وشک و سەوزمانی دا و، چوو

چوو و، بیری لە تۆفانی دیدەم نەکرد
چ دڵێکی هەبوو خودایە کە لە دەریای دا و، چوو

ئاخۆ بیرێ لە دێوانەیی خۆی دەکاتەوە؟
ئەو کە زنجیری لە پای دڵی شەیدا بەست و، چوو

(سایە) ئەو چاوە ڕەشە چی دەگوت بە تۆ کە دوێ
ئەقڵ هاواری کرد و، بەرە و سارا چوو.

غەزەلی خەون و خەیاڵ
امیر هوشنگ ابتهاج (سایە)
وەرگێڕانی لە فارسییەوە شەهلا نوری

ئەی بای سەحەری
ئارامگای یار لەکوێیە؟
مەنزڵی ئەو مانگە عاشق کوژه عەییارە لە کوێیە؟
شەو تاریکە و
وادی ئەیمەن ڕێگەمە
ئاگری توور کوا ، وادەی دیدار لەکوێیە؟
هەر کەسێک هاتە دونیاوە
نەخشی وێرانی هەیە
لە خەرابات بپرسە
کە هوشیار لەکوێیە؟
ئەو کەسە ئەهلی موژدەیە
بە ئاماژە دزانێ ،
ڕاز زۆرە و مەحرەمی نەهێنی لەکوێیە؟
هەر چڵی موویەکم بۆ داوت هەزاران کارە
ئێمە لە کوێین و
مەلامەتگەری بێکار لەکوێیە؟
دووبارە بپرسە لە
زوڵفی گرێگرێ
کە ئەم دڵی غەمزەدە ، سەرگەشتە و گرفتارە لەکوێیە؟
ئەقڵ دێوانە بوو
ئەو زنجیرەی مشکینە کوا؟
دڵ تۆراوە ، گۆشەی گرتوە
ئەبرۆی دڵدار لەکوێیە؟
ساقی و موتریب و مەی
هەموو ئامادەن
بەڵام ژین بێ یار جێگر نابێ یار لەکوێیە؟
حافز بە بای خەزان لەنێو باخی ڕۆژگار مەرنجێ
بیرێ ماقووڵ بفەرموو
گوڵێ بێ خار لەکوێیە ؟

غەزەلی ژمارە ١٩
لە دیوانی حافزی شیرازی
وەرگێڕانی لەفارسییەوە شەهلا نوری

ڕۆژی مەرگم….
هەر کەسێ کەشیوەنی کرد لەدەورووبەرم
دوری بکەنەوە
هەمویان مەست و وێران مەی ئەنگور بکەن
کرێی مردو شۆرەکەم با تێر لە مەی نۆشین بێت
مەست مەست و بار پەرێشان بێت
ڕێ مەدەن بۆ مەزارم بێت واعیز
پیری مەیخانە با بخوێنێت غەزەلێکی حافز
لە جێ تەڵقین لەسەرووی سەرمدا دەف لێبدەن
فریشتەم با سەما بکا
جوملەی خەڵکی چەپڵە لێبدەن
ڕۆژی مەرگم ….
لە میانی سینەم درزێک بترازێنن
لە نێو دڵمدا تەنها
یەک لقی دار بڕوێنن
لەسەر گۆڕم
بنووسن وەفادار ڕۆیی!
ئەو هەناو سوتاووە
ماندوە ،
لەم دارە
ڕۆی

شیعری وحشی بافقی
وەرگێڕانی لە فارسییەوە شەهلا نوری

لە ئەسرینی شەوم پرسی..
.ئەوە ڕووناکی کێیە
لەبەر دیدەم
دێ و دەڕوا و
جەزبی دڵ دەکا…
هەوڵم دەدا
چاویلکەکەم خاوێن بکەم ،
سڕیمەوە و لەچاوم کرد ،
خۆم بینی
کە تیشکی ماهی تابانە لە تەک تاریکی دڵ دەسڕم
بەر چاو لێڵ بوو !
نەردی خەیاڵ
بوو بەچەندین
سەبەتەی دەستم لێ گوم ڕەنگ بوو
میوەکان زەردە دەهاتن ،
لالەی خامۆش ئاڵۆز.. شێواو
نەخشی گزەنگ، پەرش و بڵاو …
لەئامێزدا سێبەرێکی
مردوو و زیندوو
دەهات و ون دەبوو
گۆڵ و گەڵای ناو گۆڵدانان
دەخەنێنن
زۆر بەکەیف هەڵدەپەڕین
بڕ باوەڕم
کە نازی نیگاری یارە
بەزمی هەستی لەبەر چاودا
تروکە تروکی نێو ساباتە…
وا دووبارە
لێو بەخەندان ،
شەکرە ئەفشانەی زیبا ڕوو ،
زوو لەبەر چاوو ڕەت ڕەت دەبوو
لەو لێوارە
نەرم نەرم ڕادەژەنرێ
لەسەر درزی ئاوێنەی
خاک ڕەشی بێ ئەسەر
دیسانەوە
بەلەنگ و لوار
دەهات ، دەچوو
بڵیسەی سەوز و مناجاتی ئیشق
لەچاوی زمڕووت
وردە وردە دەبرد
تا تەرزی چاوی
سەوز و
درەخشانەوەی باخی بوو
بە گەوهەری شەو چرا پازارە

شەهلا نوری

لە خودام دەوێت
کە بە دڵخواز بمرم
یانێ کە تۆ ببینم و
دواتر بمرم
وەک شەونمی پاک لە گوڵزاری سروشت
بێ ئاگا بە
وجوود هاتم و
بێ ئاگا بمرم
ئەی ئێشق..
لە گیانی من و دڵی ماندوم چیت دەوێ
لێم گەڕێ
با بە زەخمی ترسناک بمرم
لە دۆڵی تەمەن پڕ لە پێچ و
لە خەم
گومڕام بەسەر برد و
گۆمڕا بمرم
شەمعم من و
ڕوی تۆ ئومێدی سەحەری منە
مەهێڵە
بێ دیدەنی ئەوەڵ سەحەر بمرم
دەیگوت: (سەفا)
هەربوو و جاویدانیت منم من!
تا ئەو ڕۆژەی کە بە ئارەزووی تۆ
ئەی مانگ دەمرم

وەرگێڕانی لەفارسییەوە شەهلا نوری
شیعری : نواب صفا

لەعەرەبیەوە د.شریف بقنە
لەنوسینی
تشارلز_بوكوفسكي

ماڵەکەی تەنیشتم دڵتەنگم دەکا…
هەردوو هاوسەرەکە زوو لە خەو هەڵدەستن
و دەچنە سەر کار
ئێواران زوو دێنەوە مال..
کوڕ و کچێکیان هەیە
کاتژمێر نۆى
شەوە چراکان ماڵەکە دەکوژێنەوە
ڕۆژی دوایی
هەردوو هاوسەرەکە زوو لە خەو هەڵدەستن
و دەچنەوە سەر کار
لە سەرەتای ئێوارەدا دێنەوە
کاتژمێر نۆی شەوە
چراکان دەکوژێنەوە
ماڵەکەی تەنیشتم دڵتەنگم دەکا…
خەڵکی ئەوێ باشن،
خۆشم دەوێن
بەڵام هەست دەکەم دەخنکێن
و ناتوانم یارمەتیان بدەم
ئەوان لە ژیاندا دەمێننەوە
ئەوان بێ ماڵ و حاڵ نین
بەڵام نرخەکەی ترسناکە
کاتێک لە ڕۆژدا
سەیری ماڵەکە دەکەم،
ماڵەکەش سەیری من دەکات،
و دەگری
بەڵێ دەگری
هەستی پێدەکەم

یەکەم گەڵای گوڵەکەی لێ کردەوە وتی: تۆ منت خۆشدەوێت.
دووەمیانی دەرهێنا.
وتی
تۆ منت خۆش ناوێت.
سێیەم و چوارەمی لێکردوە و…
گەڵاکانی تەواو کرد،
پاشان گوڵە بچووکەکە بە تووڕەییەوە
کەوتە خوارەوە.
گوڵ گریا و
هەستی بە سەرما کرد
لەکاتێکدا
رووت بوەووە
وتی
تۆ منت خۆش
ناوێت

وەرگێڕانی شەهلا نوری
لەنوسینی عزالدين الماعزي ” المغرب”.

سەرچاوە:

چ ئاوازێکە
بێ نۆتە ڕوو لە دەرگای ژەنگاوی
سینە وێرانم دەکا
زەمزەمەی سەبام لێ نەوی دەکا
بەنەرم و ناسک پەروازە دەدەن
لەخۆڕا بە لەرەی ژێی کەمان
ڕوحم یاری دەکا
لە گوڵاڵە سوورەی دەشتی دڵمدا هەڵاژیان ئاوازی نێرگزی چاومەستی شیعرم
شەمزان
لەسەر شۆستەی وەهم،
بەیانە
بە خڕخاشەی دڵم
ئاوازی ئاواتەکانم دەکڕۆشن…
مینا کتێبی بەرگ جوانە،
چاو ڕاکێشە، گورج دەفرۆشا…
بەردی ڕۆشەن تەنگی گۆی چەم
جەم بکەن
گۆزە بشکێنن ، ئاو بڕژێنن .
دارێ تووم بتەکێنن
مەزەی شۆخیم، لالەزارم بۆچ دەوەرێن
یادەوەریم بقرتێنن
بیرۆكەم ماندوو مەکەن !
لەسەر یادەوەرییەکانم
ڕامەکشێن
شتێک هەیە ماندووم دەکات
لایە لایەی خەمکانم
نوێ دەکاتەوە
بێزارم دەکا
لەم هەوار بۆ ئەو هەوار
لەم گرد بۆ ئەو چاڵم دەبا
شتێک هەیە ئازارم
دەدەات
شتیک هەیە

شەهلا نوری

هێدیبە…..
سەفەرمەکە
ئاواتمان هێشتان لەژێر گرێی جادوو ڕاخراون
نە لە ئایین و نە لە زانستدا باون
لە دڵەڕاوکێن
لە ڕاوەڕاون
پێکەوە لە تەک خەونمان داپۆشراون ، زیندە بەچاڵ فڕێدراون
لەسەر تاوانباری کات
بڕێکیان لەژێرخۆڵن
ئەنفال کراون
ئێمە هێشتان
باخی عیشق و خۆشەویستیمان خۆشدەوێت،
هیوامان زۆر و باڵندەکان
دەنگەشەی ئاهەنگمان بۆ بنێرن ،
فالانتاین بگێڕین و
سەمای مەستانە ببەستن
ڕۆژی بەیان شادبکەین و
باخچەی دڵان تەڕتەڕ دەکەین
هێدی بە…
وەک گۆرانی کۆن
لەسەردەمی ئەمێستاکە خۆشم دەوێی
تۆی کۆتری دەوری حەڕەم
دوور لە ئاپۆرا
تەنها تەوافی تۆم دەوێ
هێدی بە….
تۆ ئۆغر بکەیت
شیعر و پەخشان
وڕک دەگرن !
دەفتەری شیعرم دەشێوێ
قەڵەم
دەشکێ ،
فەرهەنگ دەدڕێ
وەک کۆرپەڵەیەکی ساوا
خۆ دەدوێنن
ئۆقرە ناگرن ،
یەخە بەرنادەن ناسرەون
دڵ داگیر دەکەن
دێن و دەچەن
جێی تۆ دەگرن

شەهلا نوری

زەمان و دەورێ ھات وەداخەوە
ئیشق حەرام وی وە دەم ئاخەوە
زنازنا بی لادێکەی سەرچەم
وەبان تەپۆڵکە و گرد و شاخەوە
لەنتەران لەریان وەقەد دارەوە
سەربەستە سەوزەی وە قسناخەوە
دڵان دل وەبەرد، ڕووبار وە هاژە
کەنیشک و لاوێ وەزام ئاخەوە
شەیداو لێرەوار لەناو بێستانێ
وەکەیف و سەفا دەم وەزاخەوە
گیریان،فەلاقەن بە شەرمی ئشقێ
شەو ھەتا بەیان بە قاڵاخەوە
خزمێل و ھاوسێل وە مەراقەوە
خڕبین لە دەرێ.. وەبان شاخەوە
مەڕو ماڵات کەوتنە غارەوە.
مەرگیان لە پاڵ چەپەچاخەوە
دڵسۆز و دڵدار مەستی گرینن
زەلیل دەستێکن وە قەڵتاخەوە
ناوکی خەرمان چی پێ نەکریا
بە وەعز و شەوکەت باڵا باخەوە
نە دانا و بیرمەند هەداریان ھەویی
بەو بەرزە ھزری لای دەماغەوە
قڕەی لادێکە ، مات ومەلویل بی ..
شێتێ پەیا بی، پاک لە ناخەوە
وەسینە ساف و جوان و خاسەوە
پێم بێژن قەومێل ئیشقێ ساغەوە
گۆناه و خراو نەویی
کە هیچ گا
بۆ وە پەنتان کرد وەناو باخەوە

شەهلا نوری
ئەم دەقە،ئیحاکەی لە درامای غوربەتەوە وەرگیراوە

گۆڵی گۆشەتەنگ
چەرخی سووڕی ئاو
چوارچێوەی ئاوی کەناری فێنک
مەودای پیادە
ڕێگای دوور و تەنگ
دوو ڕوحی شەنگۆڵ.
پێوەند ئێسک سووک
قیبلەی هەرزەکار بەتۆ ئاوەدان
جریوەی مەل و
بەهاری باڵندە
هاوین مراوی شاد بوون لە ڕۆخێ ،
ئاوبازی نێوت
نھا بەسەرت دا دەڕۆین
وەک، بەفرە یەخی
بۆ گەمەی، سکی وخڵیسکانی
بێ کەتن و قسوور
لەو خوازەی ڕۆژێک بە دواییدا بگەیت
پەڕینەوەیەک !
خۆ دانەدەستی هیچی ھیچ مراز
دوا شەپۆلەتە خۆڵ لووشی دەدا!
لە خوار ھەتا ژوور
کۆتایی زەوییە
کۆتاییت بێ
بەخەیاڵەکان
بە ئاشنابوون و
بە خۆت‌ و ھیواکان

شەهلا نوری

ساڵێک تێپەڕی و
ڕەنگی ئاواتەکان کاڵ بونەوە
هەموو شتێک باشە..
زستان لە هەمان کاتدا دەگەڕێتەوە،
پایز چاوەڕێی نۆرەی خۆی دەکات، تیکدانی کاتژمێر،
دیوار…..
بارانبارین،
سیماکانی پەشیمانی
ڕێزلێنانی نەبوونی
سارد و سڕی ئەو !
بەهار و چاو نێرگزی شەهلا..
یەکدەنگی ئامادەبوون…
یادەوەرییەکان دەنوسمەوە و دەیانخەمە ناو توورەکەی گۆڵداری سورمەدارەوە
دەیدەم بە گالیسکەی تەمەن
بە بارهەڵگر
با بێن و کۆنە فرۆشەکانیش
بیفرۆشنەوە…
هەمو شتێک بوو بە شکست
هەموو شتێک لە شوێنی خۆیدایە…
بەڵام ئەو بێ ئاگا
خورشید هەمان خورشیدە ، ڕێگا هەمان ڕێگایە ، زەمین هەمان زەمین…
خۆزگە لە بیابانێکی خۆرگیران دەبووین ،
من و ئەو
لەژێر سیبەری دارێک
یاری خۆشەویستیمان دەكرد
سێ بەردی
بێ ئاگایمان کۆ دەکردەوە
دەماندایە دەستی دەڵاڵێکەوە

شەهلا نوری

کۆتری فرووزی کەناری چەمەن
باڵی گرتەوە
یاخی لە جێی بەرز
ئاخۆ بۆکام لا ئۆغر کردووە
بۆ کۆڵانێ تەنگ، یاخود دەریای مەنگ
وێڵ و شەیدای کامە داستانە!
ونبووی تارمایی ڕەشپۆشی کامە نازەنین
کام سوتووی سوتاوی ئەستوون ئامێزە
بە چ دارێکا خۆێ هەڵواسیوە
لەسەر تەلاری سەرای کام خێو دەنیشێ و
سەرخەو دەشکێنێ
لەکام ئاوی گڵ ئالودەی غەرقە
بئ مایە نییە ئەم باڵگرتنه!
شەیدای خورشيدى ئافاقه
يان
تەرزه تەمەنایەکە
کۆترێکی بەستەزمانە
لەبازنەی بۆشاییدا
گرفتارە و دەخوڵێتەوە
ئیدی ئاوێتەی کەنار نیت!
ھەڵنانیشی لە ئەم ناوە
تادەگاتە لای ئەو لاوە
بشی ئەو دارەیش بن سست بێ
دیسانەوە ، باڵ نەگرێ
وەک هەرەسی کێو داڕووخێ
هەر دەکەوێ
لەم جیهانە خەڵەتاوە

شەهلا نوری

ئێرەییم دێ
بە کزە بای سارد و ڕچیوی ئێواران
کە بەچوار دەورت دەسووڕێ
بەو شەقام و توولە رێیەی
بە سەریدا ڕێ دەکەی و دەمتاسێنێ
ئێرەییم دێ
پەشاڵەکەی دەوری ملت
لە ئامێزی خۆیت دەنێ
بەو ھەموو گوڵ و گەڵایە
لە سەر ڕێگات کڕنووش بردوون
بۆنی گوڵاوی تۆ دەمژن
بەھار ھات و ئاسمان ساماڵ
بەھاتنی شکۆفەی یار
چەم فێنک و سەوز سەوزە
زیباترین نامەی ئیشق
وئەوینێ سوور
مینا پاکیی ئاوی حەوزە

بەخۆم دەوت
شاعیرەکان بۆ وەرزی پایز زیزن
ئەم پایزە
لە ناو گەڵاسیسە وەریوەکانی سەر زەوی
خۆم دیتەوە
ئێوارەیەکی ساردوسڕی
بە خۆم دەوت بۆ بۆنی پایزیان لا ئاڵە
کە بۆنی پایزم کرد هاتە گژمە
هەمیشە دەمپرسی
بۆ دەڵێن مەوسمی گژە پایز
دیتم پشکۆ
ڕەنگم زەرد زەرد
وەکوو خلیسکی سەر زەوی وەرز
وتم بۆ دەڵێن وەرزی زەبوون و بێ کەیفی
سەرکزی خۆم دۆزیەوە
لە سیهەم گژی کزەبای ئەم ساڵییشدا
وتم بۆ خەزان بوو بەنازناوی ڕەمزی پایز
ووتیان ئەو بەرگ دڕانە
دیاری تۆیە هەر مانگ هەشتەمین ساڵی پایز

شەهلا نوری

خۆر لای تۆ
هەمیشە بڵند و ڕاست
دەرپەڕیو بوو کەلووی چوارەمی ئاسمان!
تاوانی هاوین بوو ،
هەڵەی فەلەک بوو
چەپەوانە و سوڕانەوە‌ی زەوی بوو
یان گەلەکۆمە و گفتوگۆ،
گردبوونەوەی کۆمەڵە ئەستێرە وێڵەکان بوو
لە جەستەمان
شێرپەنجە ئاوی سەری هەڵدا

شەهلا نوری

بێ تۆ
ئه م شاره وڕک ده گرێت لێم بێ تۆ
له هه ر کونجێکی تەنهایی غه یری عه کسی غه می من و تۆ نابینێت بێ تۆ
خۆڵ بارانی شیعره تا لێو لێواری شار بێ تۆ
نیلوفەرەکان مانیان گرتوه سه رخۆشی عه تری خۆشی سه ردارن
سه ردار تۆ
ئاسمان ئەشکی گەرمی ڕژیوه و بەحری استغفاری گرتوه بێ تۆ
شەوانه بەرگی بریقەداری کردووه دەڵێت قەت لەبەری ناکەم بێ تۆ
وادی پڕ له عیشق و له جنونه گەڵا وەرینه بێ تۆ
قصه ى عیشقی ئەم شاره شێواوه و من درێژه بێ تۆ

شه هلا نوری

کەیلی دڵم مەیلداری یارە ئەمشەو
مەی فرۆشان بێنەوە ئەمشارە ئەمشەو
لە غوربەتی ئیشقی یارا دەناڵێنم
ئاشق ون و بێگانە نەوارە ئەمشەو
نیگا و ھەستم ئەربابی ژوان نیازە
خەتای بیرە ئامێز بێ سەردارە ئەمشەو
دڵی شەمع و پەروانە بەزمیان دیوە
بێ تۆ خوا پەرستیش حەرامدارە ئەمشەو
ھەر لە کڵێسە و مزگەوت و لە بتخانە
دوور لەھانای ئەم دڵە بێدارە ئەمشەو
گریانی شەو خەندە و قریوەی مەستانە
کەعبە و بتخانە بۆ من وەک ژارە ئەمشەو
وەسڵی دووری وەکو چەرخ و فەلەک بینیم
دڵی تەنگم لەدەوری دەوارە ئەمشەو
نە عەقڵ و دڵ نە ھەستم زانی تۆ لە کوێی
پەردەی دڵی شەھلا لە سەردارە ئەمشەو

شه هلا نوری