لە پەراوێزی دووەمین ڤیستڤالی فیلمی سلێمانیدا ….

ئامانجی ئەم وتارە ئەوەیە بەتەنیشت لێکۆڵینەوەی زانستییەوە بۆ ئەم تراژیدیایە، هونەریش ڕۆڵی خۆی ببینێت و وەک تاوان و تراژیدیاکانی تری هاوشێوەکانی مرۆڤایەتی بۆ نمونە تاوانی هۆڵۆکۆست و جینۆسایدی ئەرمەنەکان بەراورد بکرێت و داهێنانی ئەدەبی و هونەری لەبارەیەوە بکرێت .
ئەگەر سینەماکار زۆریش رۆنەچیتە ناو مێژووەوەو تەنها لە سەر ئەو ستەمکاریانە بووەستێت، کە لە ناوەراستی هەشاتاکانی سەدەی رابووردووەوە دەرهەق بە کورد دەکرێن، ئەوا هەزاران چیرۆک دەبنە ئایدیاو خەونی کارکردنی، با تەنها هەڵوەستەیەک لە گازبارانی هەڵەبجەو ئەنفال بکەین، لەوکاتەوە هەتا ئێستا لەگەڵ مردنی هەرمرۆڤێکی ئەودەڤەرانەدا چیرۆکێکیش دەمرێت، کەچی زۆر بێباکین !
ئەگەر لە دوای ڕاپەرینەوە هەتا ئێستا کە شەنگالیشی هاتووەتە سەر چیرۆکەکانمان دۆکێومێنتکردبا، ئێستا خاوەنی خەرمانێکی گەورە لە چیرۆکی جەلادو قوربانی دەبووین، خاڵی جەوهەری ئەوەیە کە هەموویان زەلیل بوونمان ناگێڕنەوە،بەڵکو لەناویاندا قارەمانی گەورە هەن، نمونەیەک دەکەمە یارمەتیدەر ( ئێوارەی گازبارانی هەڵەبجە، خانەوادەی حاجی رەحمانی نارنجەڵە هەموویان بریندار بوون و تەنانەت بیناییان لەدەستدابوو،کەچی کە سوپای عێراق شکا سەربازێک بەناوی خالد عەبدولکەریم عەلوان چەکەکەی فرێداو وەک هەڵاتووی بەرەی جەنگ بە (خاتراللە خاتراللە ساعدونی) خۆی هاویشتە ماڵی حاجی ڕەحمان، ئەم پیاوە بەو پەری میهرەبانیەوە لەبری تۆڵە ئامێزی بۆکردەوەو دەستێک جلی کوردی پێداو وەک کوڕێکی خۆی لەگەڵ ماڵ ومنداڵەکەی خۆیدا بردی بۆکەمپی ئاوارەکانی ئێران، لەوێ کاتێک کەوتە بەر سوسەی سیخورەکان، حاجی ڕەحمان، گوتبووی (ئەم کوڕەم هەر بە سکماک بێ زمانەو ناتوانێ قسە بکات) چیرۆکەکە درێژەو لێرە دەیبڕینمەوە بەڵام دەمەوێ سەرنجی سینەماکاری کورد ڕابکێشم، چونکە ئەگەر بخوازێ دەتوانێ بەفریا بکەوێ و هەتا ( سەربازەکە) لە ژیانداماوەو وەک حاجی ڕەحمان دنیای بەجێنەهێشتووە، هەوێنی فیلمێکی جوان و بایەخدارە بۆ ئاشتی ولێبوردەیی.
لەهەمان کاتدا بەپێجەوانەی ئەو دیدە باوەشەوەیە کە هەمیشە کورد وەک زەلیل و قوربانی بێدەسەڵات دەخاتەڕوو، بە هیوام لە داهاتوودا بەشی فیلمسازی زانکۆی سلێمانی بتوانێ پێشەنگایەتی بکات و بەدیقەتەوە رەگەزەکانی ئازایەتی و خەونە جوانەکانی مرۆڤایەتی لەو تراژیدیایە)دا بدۆزێتەوەو ببێتە هەوێنی بەخشندەیی ومهیرەبانی،خۆزگە یەکەمین فیلمی ڤیستڤاڵ دەربارەی تاوانەکانی جینۆساید (هەلەبجە، ئەنفال، شەنگال) یان هەر یەکێک لەو تاوانانە دەبوو، ئەمەش نەک وەک ئەوەی بەدنیا بڵێین ئێمە ستەممان لێکراوە بەڵکو بەو هیوایەی لە ناو چیرۆکەکانی ئەم تاوانانەدا قارەمان بدۆزنەوەو ببێتە جێگەی سەرنجی سینەماکارانی کوردو ئەوانی دی.

تێبینی :
ئەم بابەتە لە لاپەرە ٦ی ژمارە ٥ی شارسینەما کەبڵاوکراوەیەکی رۆژانەی فیستیڤاڵە لە ریکەوتی ٢٠١٧/١٠/٥ بڵاوکراوەتەوە، بەڵام بەداخەوە بەهۆی گۆڕینی تایتڵەکەی هەڵەیەک رویداوە ئەوان لە بری “خۆزگەو هیوا” ئەم تایتڵەیان نوسیوە : (فریای بکەون تا حاجی ڕەحمان دنیای جێ نەهێشتووە) هەڵەکەش ئەوەیە، کە بەداخەوە حاجی رەحمان لە ساڵی ١٩٩٩ دا کۆچی دوایی کردووە، ئەو بریندارەی گازباران نەیکوشت بەڵام گەرماو ئاوی گەرمی ئۆردوگای زۆرەملێی گردەچاڵ کوشتی.

٣/١٠/٢٠١٧ سلێمانی

ناوی گەورە و شاری وێران!

ڤیستیڤاڵە سینەماییەکان لەسەر چەندین ئاست خزمەتی گەورە بە فیلم دەکەن و بەشێکی دانەبڕاوی فەزای سینەمایین. ڤیستیڤاڵ ئەشێت ببێت بە یەکەمین ڕووبەری بەرکەوتنی فیلم و بینەرەکانی، ئەشێت سەرەتایەک بێت بۆ کۆکردنەوەی سەرنج لەسەر فیلمەکان و دۆزینەوەی بازاڕ و گەورەکردنیان. ڤیستیڤاڵ ئەشێت هونەرمەندەکان لە یەکتر نزیک بکاتەوە، ئەشێت بۆ هەندێکیان بە تایبەت تازەکارەکان پاڵنەر و هاندەرێکی گەورەبێت. ڤیستیڤاڵ ئەشێت بزوێنەری ئابوری شار و وڵاتێک بێت. دواجار ڤیستیڤاڵ حوکمە. حکومێکی کاتی و جوزئیە بەسەر فیلمدا.

ڤیستیڤاڵەکانی فیلم ئەمڕۆ لە زۆر شار و وڵاتی دونیادا هەن، تەنانەت هەندێک شار زیاتر لە ڤیستیڤاڵێکی فیلمی هەیە. سازدانی ڤیستیڤاڵ سەرباری لایەنە پۆزەتیڤەکانی بە نیسبەت فیلمەوە، چەندین دیوی تاریک و زیان بەخشی هەیە. بۆ نموونە بوەتە وەسیەلەیەک بۆ حکومدان بەسەر باش و خراپی فیلمدا. بێگومان هەڵسەنگاندن و دیاریکردنی باش و خراپی فیلم پرۆسەیەکی ئاڵۆز و تەمومژاوییە. ئاسان نییە بزانین بۆچی سینەمای ئۆزۆ و بریسۆن لە پاش مەرگیانەوە دەست پێدەکەن؟ بۆچی فیلمەکانی گۆداری بیرمەند و فیلمسازی گەورەی فەرەنسی براوەی یەکەمی هیچ ڤیستیڤاڵێک نین؟ ناکرێت باوەڕ بە پێوەری ڤیستیڤاڵ بکەین وەکو داوەرێک بەسەر فیلمەوە.

جگە لەوەیش، زۆرجار ڤیستیڤاڵەکان دەست بەسەر بیرکردنەوەی دەرهێنەرەکاندا دەگرن و خەڵات دەدەنە ئەو جۆرە فیلمانەی کە مەبەستیانە، ئەمەیش وا دەکات فیلمەکان بە ئاڕاستەی پێوەرەکانی ئەو ڤیستیڤاڵانەدا بڕوات. وەکو هەندێک لە کوردستان لەم ساڵانەی دوایدا فیلم لەبارەی هەڵەبجە و داعش و فێندەمێنتاڵیزمی دینی و مەسەلە خوازراوەکانەوە دروست دەکەن بەبێ ئەوەی ڕۆژێك لە ژیانیاندا بەرکەوتنێکی واقیعی و فیکریان لەگەڵ ئەم بابەتانە هەبوبێت. لەگەڵ ئەمانەیشدا زۆرجار ڤیستیڤاڵەکان ئامانجی بزنس و بازرگانیکردن دەخەنە پێش زەرورەتی هونەریەوە. لەوانەیشە هەندێک ڤیستیڤاڵ وەکو ڤیستیڤاڵی نێودەوڵەتی فیلمی سلێمانی ڕەهەندی سیاسی و شەڕە زۆن و خەیاڵی بەرگری لە شاری ڕۆشنبیری سازاندبێتی.

بەبۆچوونی من ڤیستیڤاڵی فیلم ئەوکاتە مانای ڕاستەقینەی خۆی وەردەگرێت کە خۆکرد بێت. واتە ڕەوتی گەشە و بەرەوپێشچوونی کلتوری سینەما داوای بکات و بیخوازێت نەک وەسیەلە بێت بۆ ئامانجی تر! ئایا ئەم ڤیستیڤاڵە نێودەوڵەتیە لە هەلومەرج و قەیرانێکی ئاوادا چ زەرورەتێک دروستی کردووە؟ ئایا بەڕاستی کلتوری سینەمایی لە کوردستان گەیشتۆتە ئەو ئاستەی بۆنەی نێودەوڵەتی بخولقێنێت؟ ئایا ئەم هەڵایە چ خزمەتێکی فیعلی بە فەزای سینەمایی سلێمانی دەکات؟ ئایا مەعریفەی سینەماکار و نوسەر و ڕەخنەگری ئێمە لەو ئاستەدایە توانای خوێندنەوە و هەڵسەنگاندنی سینەمای لە ئاستی دونیادا هەبێت؟ مرۆڤ توشی ڕاچڵەکین ئەبێت کە بیر لە وەڵامی ئەم پرسیارانە دەکاتەوە. وەک چۆن هەموو کایەکانی تر ئیفلیج و پەککەوتەن و باند و گروپی مافیا ئەیبات بەڕێوە، کایەی سینەمایش لەوە بەدەر نییە.

ئەم شارە کە خاوەن ئەم پۆلە سینەماکار و هەڵسەنگێنەر و جوری فیلمەیە بۆچی چوار کتێبی باشمان لەبارەی سینەماوە نییە؟ بۆچی ڕەوتێک، گۆڤارێک، لانی کەم یانەیەکی سینەمایمان نییە؟ بۆچی ئەم پارە زەبەلاحە لە دروستکردنی هۆڵی سینەمادا سەرف ناکرێت؟ بۆچی ئەم سەرمایە ناخرێتە خزمەت دروستکردنی فیلمەوە؟ یان یارمەتی گروپێک گەنجی پێنادرێت کە دەیانەوێت فیلم دروست بکەن؟ وەڵامەکە ئاسانە؛ ئەوەی ئەمڕۆ حیزب و کۆمپانیاکانی حیزب ئەیانەوێت ئەم گوتار و بیرکردنەوە ڕیشەیی و بونیادیە نییە، ئەوان خۆیان بە کڵێشەکان و ئایکۆنەکان سەرقاڵدەکەن کە ئەچنە خزمەت ستراتیژی حیزبەوە.

ئەوانەی دوێنێ خەریکی دەرکردنی یاسابوون بۆ سینەما و ئەمڕۆ خەریکی کەسابەتی ڤیستیڤاڵن، خۆیان پێناسەی خۆیان دەکەن. ئەوان ناتوانن بیر لە بناغە و بنچینەکانی کلتوری سینەما بکەنەوە و هیچیان بۆ ئەو مەبەستە لەدەست نایەت. ئەوان بە بڕوانامەی قەبەوە توانای ئەوەیان نییە مێژووی فیلم و کاری سینەمایی ئەم ناوچەیە بخوێننەوە و تیۆریزەی بکەن. ئەوان ناتوانن کتێبێک، وتارێک تەنانەت ڕیڤیوێک دەربارەی فیلمێک بنوسن. ئەوان پاڵەوانی شاشەکان و بینەری فیلمی تەلەفیزیۆنەکانن، زۆربەیشیان دوور و نزیک ئاگاداری فیلم و سینەما نین. ئەوان پێیان وایە ڤیستیڤاڵ پنتی ناساندنی کورد و دۆزی کوردە بە دونیا کەچی پێگەیەکی ئەلیکترۆنی کۆپیکراویان داناوە و پێیان شەرمە زمانی کوردی بۆ ئەو پێگەیە و ژێرنووسی کوردی بۆ فیلمە پەخشکراوەکان زیاد بکەن! ئەگەر قەراربێت لە ئێستادا ڤیستیڤاڵێک هەبێت، ئەبێت ئەو ڤیستیڤاڵە لۆکاڵی بێت فیلمە نێوخۆییەکان هەڵسەنگێنێت، لەبری خەڵات بەخشین و پارە سەرفکردن لە بیانیەکاندا، یارمەتی دەرهێنەر و سینەماکارە لۆکاڵیەکان بدات و باربۆیان بکات.

حیزب هەر ناو و ناوەرۆك و هەر ئامانجێکی هەبێت ، چی دیکە نییە جگە لە هەمانەی دەماندنی فشە و درۆ و پاگەندە، ئامرازی هەڵخەڵەتاندنی خەڵک و چەواشەکردنیی جەماوەرەکەی و خەڵکانی دەرەوەشێتی .
تکایە تەماشای ئەم لینکەی خوارەوە بکەن و هەڵوێستی هەدەپە و قسە بێ سەروبەرەکانی زمانحاڵەکەی ‘ عوسمان بایەدەمیر ببینن’، لەسەر کۆچی دوایی تاڵەبانی . پێشتریش قسە و ڕاگەیاندنەکانی ‘ کەچەکە’ و ‘ پەیەدە’ شمان بینی، سەبارەت بە مردنی نەوشیروانیش و مردنی ئێاتای تاڵەبانی-ش.

من هەرگیز لە لەگەڵ جەنگدا نیم تەنانەت لە نێوانی ئەمەریکا و بریتانیاشا، چونکە دەزانم ئەوەی کە لە هەموو ڕوویەکەوە باجەکەی دەدات خەڵکە ئاساییەکەیە ، جا ئیدی من چؤن دەتوانم لە بەرەی خوازیاری شەڕ و بەیەکادانی وڵاتانی دراوسێ و نێو حیزبە کوردییەکانیش بم . بەڵام هەلوێست و قسە قۆڕەکان و بێ بنەماکانی ئەمانە دەگاتە ئاستی كڵاودانان لەسەرمان و هەڵخەڵەتاندنمان ئەو کاتەش کەس تەحەمولی ناکات. دیارە من ناڵێم با پەیەدە و پەکەکە و کەچەکە و ….. پەیامی پرسەنامە نەنێرن یا لە کۆچی دوایی نەوشیروان و جەلال تاڵەبانی و بەیانی بارزانی-دا بەشدار نەبن ، بەڵام کورد دەڵێێ هەموو شتێ بە خوێ و خوێش بە مانا. مرۆڤ دەکرێت دۆست و دووژمنی واقیعیانە ببینێ و هەڵسەنگێنێ ، نە زیادەڕەوی پێوە بکات و نە نوقمی ئەرزیشی بکات .

ئاخر هەر زۆر بە کورتی بۆچی دەبێت مام جەلال لە دڵی 40 ملیۆن کورددا بژی؟ بۆچی دەبێت سەرۆکی هەموو کورد بووبێت؟ ڕۆڵی گرنگی مام جەلال چی بوو؟!!!!! کام یەکڕیزی کوردی پاراستووە؟!! ئەو نەیتوانی یەکڕیزی یەکێتی نیشتمانی-ش بپارێزێت.
مام جەلال لە ڕؤژی بەرپرسبوونیوە لە پارتی دیمۆکراتی کوردستان کە دەگەڕێتەروە بۆ کۆتایی پەنجاکانی چەرخی پێشوو تا ڕؤژی 17/12/2012 کە لە گفت و کردار کەوت ، مێژوەکەی شاهیدی فاشیلبوونی خۆی و سیاسەتەکانی دەدات. من لێرەدا تەنها هەندێکیان ڕیز دەکەم :

• ڕۆڵی سەرەکی ئەو لە هەڵگیرسان و بەشدارییکردنی بزتوتنەوەیەك کە هەر لە سەرەتای دروستبونییەوە تا ئێستای بە زیانی کورد و قازانجی نەیاران ، تەواو بووە.
• جیابوونەوەی لە پارتی .
• پاڵدانی بە حکومەتی بەعسەوە .
• بەشداریکردنی لە دروستکردنی کۆمەڵەی مارکسی –لێنینی / کۆمەڵەی ڕەننجدەران، ڕؤڵی لەوێدا.
• دروستکردنی یەکێتی نیشتمانی.
• گەرموگوڕی و سیاسەتکردنی لەگەڵ حکومەتانی ئێران و سوریا و تورکیا بێ ئەوەی بتوانێت بەردێك بخاتە سەر بەردێك بۆ کوردانی ئەو بەشانە.
• دروستکردنی دەسەڵاتی کوردی بە هاوکاریی پارتی ، کە جگە لە نەگبەتی و نەبوونی و ناخۆشی چی تری بۆ کورد نەهێنا.
• شەڕە ناوخۆییەکانی نێوانی بزوتنەوەی کوردایەتی لەگەڵ حیزبی شیوعی و لایەنەکانی دیکە لە شاخ و دواتریش کە هاتنەوە شار.
• تەسلیمبوونی بە ئەمەریکا و وڵاتانی ڕۆژاوا لە ساڵی 2003 و بێ ئەوەی پێداگریی لەسەر لابەلاکردنەوەی کێشەی کەرکوك و ناوچە ناکۆکان، بکات.
• ئەو چەند ساڵەی کە سەرەكکۆمار بوو نەیتوانی قسەیەکی جددی لەتەك حکومەتی عێراق و بەرەکانی سونە و شیعە لە سەر کەرکوك و ناوچە ناکۆکان بکات و ڕێگای دا کە مادەی 140 وەکو خۆی بمێنێتەوە.
• کێشەکانی ناو ڕیزەکانی یەکێتی نیشتمانی لە سای ئەودا قوڵتر بووەوە ئەو بەرپرسی سەرەکی بوو، کە لەو بارەشدا تەنها خەڵکە ئاساییەکەی کوردستان زەرەری لێکرد.
• کە لە شاخ و لە شار بوون بە ئاگەداری ئەو بە سەدەها ژن بە بیانوی جیا جیاوە کوژران و بوونە قوربانی..
• بناخەی گەندەڵی و مەحسوبییەت و واسیتە و خێڵگەریی و تیرەگەریی وشێخگەریی و ناوچەگەریی دانا و دیوەخانانەی بۆ سەرانیان بڕییەوە.
• داڵدەی ئەنفالچیان و کیمیاباران و موستەشارەکانی هەموو دا، بەمەش دوو پەنجەی بۆ قوربانییەکانی دەستی ئەو تاوانبارانە ، بەرزکردەوە.
• کەرتە دەوڵەتیەکانی خزمەتگوزاریی بە ئاگەداری و ڕەزامەندی ئەو بەرەو فەرامۆشکردن ڕؤیشتن و کەرتی تایبەتی و کۆمپانیای دەرەکی و ناوخۆیی تایبەتی لە برەودا بوون . جگە لە کردەنەوەی دەیەها زانکۆ و پەیمانگای بێ کەڵکی ئەجنەبی.
• بەئاگەداریی و ڕەزامەندی ئەو هەرچی دەزگە سیخوڕییەکانی وڵاتانی دەرودراوسێ و زلوڵاتانی جیهانییە ، لەناو کۆمەڵی کوردستانا تەراتێن دەکەن، گەر هاووڵاتیانی کوردیش تیرۆر بکەن ، دەستخۆشییان لێدەکرێت و کراوە ، لەبری لێپێچینەوە.
• ژینگە و سروشتی کوردستان وێرانکرا بە بەدەرهێنانی نەوت و لێدانی بیرە نەوت و خستنە بازاڕ و سەرجادەی سەیارەیەکی یەکجار زۆری بێ شومار.
• ئازادی تاك ڕێكخراوە کۆمەڵایەتییەکان ڕؤژ بە ڕۆژ لە کەمبوونەوەدا بوون ، تا گەیشتە کوژارانی چالاکوانان و ڕؤژنامەنوسان.

http://rojnews.net/haber/20542/.html

کولتوری ستالینیانەی گێڕانی مەراسیم بۆ سەرکردە سیاسیەکان ، بەهۆی مەزنی شۆڕشی ئۆکتۆبەرەوە بۆتە مۆتەکەیەکی گەورەی جیهانی …. لێنین بە هیچ شێوەیەک ڕەزامەندی خۆی لەسەر مەراسیمی بۆرژوازیانەی مردن و ناشتنەکەی خۆی ڕەتکردۆتەوە ، دواتر کرۆپسکایا ویستی ئەم وەسیەتە جێبەجێ بکات بەڵام هەڕەشەی ستالین لە کڕۆپسکایاو هەر کەسێکی تر لە ناو بەڵشەفیکەکاندا ، لەلایەن ستالینەوە سەرکوتکرا ، ستالین لە پێناو دەرخستنی ڕۆڵی خۆیی و سەپاندنی هەژموونی خۆی لەم مەراسیمەداو جێگیرکردنی کولتووری پەرستنی سەرکردەی پیادەکرد.

ئەم مێژووە تەحریفکراوە تائێستاش ڕەواجی هەیە ، بۆ نمونە کۆریای باکوور چیان نەکرد بۆ کیم ئیل سۆنگ ؟! ….هتد .
بلیخانۆف لە کتێبی “ڕۆڵی فاکتەری مادی لە مێژوودا ” باس لە ئیحساس و عاتیفەی مرۆڤەکان ئەکات لە کۆمەڵگای سەرمایەداریدا یان لە کۆمەڵگای چینایەتدا ، نمونەی دوو دایک ئەهێنێتەوە کە کوڕەکانیان ئەمرن ، یەکێکیان ( ماشێنکای ) خاوەن دەسەڵاتە ، دووەمیان (ماشێنکای ) ژنە هەژاری ناو ماڵە .
بلیخانۆف ئیحساس و عاتیفەی ئەم دوو ژنە و ئەم دوو دایکە شی ئەکاتەوە کاتێک کوڕەکانیان ئەمرن .

شیوەنی ماشێنکای هەژاری ناو ماڵ بۆ کۆڕە مردووەکەی هەمووی بریتییە لە یادکردنەوەی ئەو یادگاریانەی کە بە کەساسی و کوڵۆڵی چاوەڕاوانی کوڕەکەی کردووە کە ئەگەڕێتەوە بۆ ماڵەوەو بژێوی خۆی و دایکی پەیداکردووەو دابینکردووە .
شیوەنی ماشێنکای خاوەن دەسەڵات بریتیە بووە لە یادکردنەوەی یادگاریە خۆشەکانی ئەم دایکە کاتێک کوڕەکەی مناڵبووە ئەویش لە هۆڵەکانی جەژنگێڕان و سەفاو خۆشیدابووە …

کرێکاران و زەحمەتکێشانی کوردستانیش بە ژن و پیاوەوە وە بە مردنی سکرتێری یەکێتی و سەرۆک کۆماری عێراق فرسەتێک دێتە بەردەستیان کە ناخی خۆیان بەتاڵبکەنەوەو خۆیان لە قوڕبگرن و بگرین و شیوەن بکەن بۆ ئەو ژیانەی کە تیایدا ئەژین ، بەڵام بە شێوەیەکی ڕوکەشیانە گریانە بۆ سەرۆک .
سازکردنی ئەم مەراسیمانە پێش هەموو شتێک زیادکردن و بەهێزکردنی دەسەڵاتی حیزبە قەومیە کوردیەکان و دەسەڵاتەکەیانە ، ئەم دەسەڵاتە لەوەدا بەرجەستە ئەبێتەوە چۆن کەسانێکی پارێزەرو بەرپرس و کاربەدەستانی ئەم دەسەڵاتە بۆرژوازیەن و نمایشی هێزی سەربازی و پۆلیسی خۆیان نیشانئەدەن.
لەلایەکی ترەوە تەنانەت مردنی سەرۆکەکان ئەبێ ببێتە هۆی بەهێزکردن و چەسپاندنی دەسەڵاتداریەتی بۆرژوازی لە کۆمەڵدا ، ئەوان ئەیانەوێت بەم پڕاکتیکە سیاسیانە جەماوەر بخەنە خەونێکی ناخۆشەوە کە ژیانی خۆیان لە بیر بەرنەوەو بەلایانەوە گرنگ نەبێت و خۆیانی بۆ گیانفیدا بکەن …!

ڕیفڕاندۆمێکی درۆزنانەی بۆرژوازی لە هەرێم بۆ لە بیربردنەوەی تەواوی نەهامەتی و قەیرانە ئابووری و سیاسیەکانی هەرێم بوو کە بەدرێژایی ۲٦ ساڵە خەڵکی بەدەستیەوە ئەناڵێنن .
قەیرانی شکستی ئەم گاڵتەجاڕیەی ڕیفڕاندۆم بە مەراسیمی نەخشە بۆکێشراوی مردنی جلال طالبانی لە بیر ئەم جەماوەرە ئەبرێتەوەو لە تەواوی شارو شارۆچکەکانی هەرێم چەندین بۆنەو موناسەبەی تەعزیەو شیوەنگێڕان سازئەکرێت .

ووتیان ئەم شیوەنە ئەبێ حەوت ڕۆژ بخایەنێت ، بەڵام پێ ئەچێت کە بەم زووانە تەواو نەبێت ، ڕەنگە حەو مانگ بێت ، یان حەوت ساڵ بێت ، یان ببێتە شیوەنێکی دائیمی کوردان کاتێک مەزارگا بۆ سەرۆکەکەیان دروست ئەکەن ، وببێتە شیوەنێکی تر لە جۆری شیوەنەکانی حسن و حسێن و علی کوڕی طالب کە سەدەها ساڵە کوژراون .

صابر . م

پاش ماندووبونێکی زۆر ؛ بەمزووانە بەرهەمی کتێبێکی جیاوازی شیعر دەکەوێتە بەردەستی خوێنەران، ئەو خوێنەرانەی بە دوای تازەگەریی و زمانێکی تردا دەگەڕێن تا لە شتەکان تێبگەین، هەوڵدانێکیشە بۆ رزگارکردنی شیعر لە بازنە داخراوەکان و تێکشکانی زمانی باوی شیعرو چەشەو دیدی چەقبەستووشە، تەنانەت ژیان و خۆ نووسینەوەیە بە پێنووسێکی جیاواز و لەبەرکردنی بەرگێکی نوێیە لە بازاڕی مەعریفە، رەنگە خوێنەری (نا بەرهەمهێن) بپرسێت بۆچی شیعری ئەمڕۆ خۆی لە خۆیدا هەیە تا شتێکی نوێمان پێشکەش بکات؟ ئەم جۆرە پرسیارانە هەمیشە لە لایەن ئەو مرۆڤانەوە کراون کە لە پەراوێزی ژیاندا خەوتوون.
لە هەمان کتێبدا و لە پێش ماڵئاواییدا وتەیەك نووسراوە، رەنگە بۆ وەڵامدانەوەی ئەو جۆرە کەسانە گونجاو بێت ئا لێرەدا ئاماژەی پێ بکەین-
ل١٣٢:-
” گەر بمانەوێت ئاست و چێژو مەیلی خوێنەرێكی سادە بە لای دەقێکی باشدا رام بێنین و ئاراستە بکەین، پێویستی بە کاری هەمەلایەن و جەوهەرییە.. دەبێت بونیاتنان و هەڵگێڕانەوەیەکی ڕیشەیی لە زۆربەی باکراوندەکانیدا بکەین، ئەمەش کارێکی زۆر گرانەو هەرگیز لە شەو رۆژێکدا وەدی نایەت.”
ماوە بڵێین ئەو کتێبە زۆر دەقی شیعریی لە خۆ نەگرتووە، چونکە پەند وەرگرتن لە چۆنایەتییە نەك چەندایەتی، بەڵام زۆر شتی تێدا گوتراوە، لێکۆڵینەوەکانی دەقەکانیش تەنیا جۆرێك خوێندنەوەن و دوا خویندنەوەش نین، چونکە هەمیشە دەقی کراوە هەڵبژاردن و راڤەو تێگەشتنەکان بۆ خودی خوێنەران جێ دەهێڵێت و ئازادیان دەکات بۆ گوتنی وتەی خۆیان.