دیمانە لەگەڵ زارا ئەحمەد جاف سەبارەت بە ئەدەبی مناڵان … ئ: ڕۆستەم خامۆش
زارا ئهحمەد جاف:
ئەدەبیاتی منداڵان بريتییە لە ھەموو ئەو بابەتانەی وەک:
شیعر و چیرۆکی شانۆیی و ئۆپەرێت, کە تایبەتن بە منداڵان، ئەدەبیاتی منداڵان وەکو لقێک لە نێو ئەدەبی کوردیيدا مێژوویەكی زۆرکۆنی نیە.
بۆ گرنگیدان به ئهدهبیات و هونهر و پهروهردهی منداڵان، وه ئـاوڕدانـهوه له كهسایهتیهكانی ئهو بوارانه، به پێویستمان زانی ئهم دیمانهیه لهگهڵ نووسهر و شاعیری بواری ئهدهبیاتی منداڵان خاتوو “زارا ئهحمهد جاف” سـاز بكهیـن.
دیمانه: ڕۆستهم خامۆش- ههولێر
- لەکەیەوە ئاشنای ئەدەبیاتی منداڵان بووی؟
- لە سەرەتادا بۆ گەورانم دەنووسی، لە چالاکییەکانی قوتابخانەو دواتر لە کۆڕی شیعريی و چالاکییەکانی نێو پەیمانگادا بەشداریم دەکرد، مامۆستا بووم بەشێوەی کاتيی لە قوتابخانەی بنەڕەتی گوازرامەوە بۆ نێو باخچەی منداڵان، لەوێ بینیم ھەر شیعرە کۆنەکانیان بۆمنداڵان دەکرد بەگۆرانيی و شیعری تازەیان بۆ ژینگە و بابەتە ھەمەڕەنگەکانی ژیان و پەروەردەو ئۆپەرێت و چیرۆکە خەیاڵیانەی, كە ھەستی منداڵانیان گۆش دەکرد, زۆر کەم بوون، یان ھەر نە بوون, بۆیە حەزم کرد شیعر و چیرۆکی نوێیان بۆ بنووسم بۆ منداڵان, كه چێژبەخش بن.
دەمویست لە ڕێی نووسینەکانمەوە ڕێنمایی منداڵان بکەم و ژینگەیەکی دروستیان بۆ بڕەخسێنم تاخۆشیان بوێت و کەسایەتيی و بوونی خۆیانی تێدا بدۆزنەوە، درکم بەو قۆناغە گرنگەی گەشەی تەمەنی منداڵ کرد، بۆیە لەوکاتەوە دەستم بە نووسین کرد و ھەوڵم داوە پەرە بە ئەدەبیاتی منداڵان بدەم، دەمزانی چی بابەتێک بۆمنداڵان گرنگە. لەوکاتەوە بۆ ھەموو بابەتەكانی وانەکان و ڕێنمایی، چیرۆک و شیعر و ئۆپەرێت دەنووسم, ھەردەم لایان بووم لە چالاکییەکانماندا پێکەوە دەستی یەکترمان دەگرت و دەفڕین، خۆشبەختانە دوای ٣ ساڵ بووم بەبەڕێوەبەری باخچە و لەوکاتەدا دەستم کراوەتربوو بۆ خزمەتکردنی کار و بوارەکەم, ئێستاش, کە سەرپەرشتیاری پەروەردەیم بەگڕوتینێکی زیاترەوە کاردەکەم و مەودای پیشەکەم زیاتر بۆ ڕەخسا و بۆھەتایە منداڵان منیان لە نێو ئامێزی خۆیاندا ھێشتەوە. - چۆن پێناسەی ئەدەبیاتی منداڵان دەکەی؟
- ئەدەبیاتی منداڵان بريتییە لە ھەموو ئەو بابەتانەی وەک: شیعر و چیرۆکی شانۆیی و ئۆپەرێت, کە تایبەتن بە منداڵان، ئەدەبیاتی منداڵان وەکو لقێک لە نێو ئەدەبی کوردیيدا مێژوویەكی زۆرکۆنی نیە.
دوای ئەو ڕۆژگارە ناخۆشانەی, کە ھەرێمەکەمان لەڕابردودا تێیدا ژیاوە، لە داگیرکاريی و جەنگی بەردەوام و ژێر دەستەبوونی نەتەوەوەیی بەداخەوە, ئەو دۆخە کاریگەریی زۆرسەختی ھەبووە لەسەر گۆڕانکارییەکانی دەورو بەر، ئەو سەردەمە ئەدەبیاتی منداڵان نەبۆتە خەمی سەرەکییان، بەڵام ھەندێک لە نووسەران بەشێوەی لاوەکيی ھەوڵیان داوە لا لەئەدەبیات وخەونەکانی منداڵان بكەنەوە.
خۆشبەختانە لەڕۆژھەڵاتدا لەژێر ھەژمونی ئەو ژیانە سەختەدا وای کرد کۆمەڵێک لە نووسەران و شاعیران بێنە مەیدانەکەوە, ئەگەرچی لەسەرەتادا ئەو دۆخە توندوتیژییە لەزۆربەی نوسینەکانیان ڕەنگی دابۆوە, بەڵام ویستیان خەم و گرنگی نووسین لە ئەدەبیاتی منداڵاندا فراوان بکەن و وای کرد گرنگیدان بەئەدەبیاتی منداڵان ببێتە خەمی سەرەکیان، لەسەرەتادا نووسینی شیعر دەبێتە سەرمەشقی نوسین و دواتر چیرۆک و ئەفسانەکان لەژێر کاریگەريی نووسەرانی ڕۆژئاواو ھەروەھا خوێندن و نووسین و چاپکراوەکان پەرەی پێدەدرێت و ویستویانە دەستی خەون و خولیای منداڵان بگرن و گرنگیان پێ بدەن تا لە ژیاندا بەئاگاو چاوکراوەبن. لەبەر تایبەتمەنديی و ئەوخهسڵەتانەی نووسەرانی ئەوبوارە ھەیانە, وە ئەوانەی کاریشیان لە بەرەوپێش بردنی ئەدەبیاتی منداڵاندا کردوە دەگمەنن و ھەروەھا ئێستاش ئەوانەی کاری لەسەر دەکەن ھەر دەگمەنن.
بەداخەوە لەگەڵ ئەوھەموو بەرپرسیاریەتیە گرنگەی, کە بواری ئەدەبیاتی منداڵان لە خۆی دەگرێ لە پێگەیاندن و پەروەردە کردنی تاکێکی خۆنەویست و بێگەرد و ژینگەپارێزی دڵسۆز, کەچی لەلایەن حکومەتەوە کار بۆ پێشخستنی ئەوبوارە نەکراوەو ناکرێ, لە ھیچ ڕوویەکەوە گرنگی ھاندان و پشتگیری کردنی نووسەران نەدراوە, چەندین نامیلکەو کتێبی ئامادەکراو بۆ چاپ پەراوێزکەوتوون و گۆڤارەکانی منداڵان بێ سانسۆر و بەدواداچون لەسەر ئەرکی خۆیان چاپ دەکرێن, بەڵام سەرەڕای ئەوانەش بەھەوڵ و کۆششی خەمخۆران و یەک دەنگيی نووسەران و نیەتپاکيی و بەتەنگەوە ھاتنی نووسەرانی بوارەکە لەگەڵ یەکتردا
تاڕادەیەک بوارەکە قۆناغی باشی بڕیوە، گرنگە ھەموو ئەوە بزانین ئەدەبیاتی منداڵان بەحوکمی گرنگیی دانی بە قۆناغەکانی گەشەی تەمەنی منداڵ, پێویستە بابەتە باش و چێژبەخشەکانی نووسەران ببنە ھاوشانی پەروەردەیەکی دروست لە خوێندندا، کە ئەدەبیاتی منداڵان یەکێکە لە سەرچاوەو بناغە ھەرە گرنگەکانی دروست کردنی کەسایەتی تاکێکی دروستە بۆکۆمەڵگا. - تۆ، شیعر بۆ منداڵان دەنووسی، ئایا تایبەتمەندیی شیعری منداڵان چیە؟
- شیعری منداڵان تایبەتمەنديی و مەرجی خۆی ھەیە، دەبێ شیعری منداڵان جیابێت لەھی گەورە ساڵان، وشەکانی ئاسان بن لە دەربڕیندا, بڕگەی دوور و درێژ و سواو نەبن، وێنای جوان بنەخشێنێت و نزیک بێت لە قۆناغەکانی تەمەنی منداڵ و باشتر وایە شیعری منداڵان کۆتاییەکی جوانی ھەبێ و چیرۆک ئامێز بێت، بەشێوازێکی گونجاو و جوان کاریگەريی ئەرێنی لەسەر دەروونی منداڵدا جێبھێڵێت. واباشە یەکێتيی بابەت بپارێزرێت و شیعر ئەوەندە ئاڵۆز نەبێت سەر لە منداڵ بشێوێنێ، دەستەواژەی ڕوون و شیاوبن و دووربن لە وشەی نامۆ و توندوتیژيی و پێویستە پەروەردەیی و خەیاڵيی بن و دەبێ نووسەر ئەوەندە شارەزاو لێھاتوو بێت و ئاشنای تێگەیشتن و ئارەزووە کانی منداڵ بێت, شارەزای بڕگەو کێش و وێنای خەیاڵی سەرنج ڕاکێش بێت، لەسەرەتاوە تاکۆتایی سەرنجی منداڵ بەخۆیەوە وابەستە بکات، ھەتا پێویستە گرنگی بە ڕەنگ و وێنەو قەبارەی نامیلکە شیعریەکانیش بدرێت, ھەتا بەشێوەیەکی گشتيی لە داھاتوودا بیر و ھزری منداڵ جوان گۆش بکات.
- جگە لە شیعر نووسین، تۆ چیرۆکیش بۆ منداڵان دەنووسی، بە ڕای تۆ تایبەتمەندیی چیرۆکی منداڵان چیە؟
- باشتر وایە چیرۆک لەئاست زیرەکيی و ژیريی قۆناغی منداڵدا بێت، پەیوەندی ھەبێت بەحەز و خولیاو خەیاڵەکانی و سەرنج ڕاکێشی منداڵ بێت، (فەنتازیا و ئەندێشەی) ی تێدابێت, تاخەیاڵی منداڵ فراوان و فراوانتر بکات، چیرۆک مەودای کارکردنی تێدا فراوانترەو خەیاڵی منداڵ دهورووژێنێت, کەسایەتيی چیرۆکەکان ئاڵۆز و تەم و مژاويی نەبن و وشەو زاراوەکانی سەر بە فەرھەنگی منداڵ بن، سەرەتاو بابەتی سەرنج ڕاکێشی و ئامانجێ بپێکی و کۆتاییەکی خۆش و بنیانتەر لەناخی منداڵ جێبھێڵێ، لەژینگەی خۆیەوە نزیک بن و نامۆ نەبن باشتر وایە لەگەڵ کارەکتەری ئاژەڵ و باڵدارەکان خۆشەویستيی و دۆستایەتی پەیدا بکات و
پێویستە چیرۆک دوور و درێژ نەبێت منداڵ توشی بێزاريی بکات, توشی گرێ کوێرەی نەکات, دەبێت چیرۆک منداڵ فێری زمان پاراويی بکات, نابێت ناوەڕۆکی چیرۆکەکە توندوتیژيی تێدا بێت, منداڵ توشی ترس و شڵەژان بکات, دەبێت چیرۆکنووس لێھاتوو بێت لەداڕشتن و ئامانجی ھەبێ لە گەیاندنی بیرۆکەکەی، تا بارگرژی منداڵ نەھێلێ و چارەسەری بکات, پاڵەوانەکانی منداڵان فێری ھەڵگری ڕەوشتی جوان و مرۆڤایەتی بکات و لەدیاردە و وشە دزێوەکانیش دووریان بخاتەوە, دەبێت لەگشت ڕوویەکەوە گونجاو بێت لەگەڵ سەردەم و کلتورو ژینگەکەی و نیشتمان و سودی ھەبێ لە سەر فراوان کردنی خەیاڵ و بەکۆمەڵایەتيی کردن و ھزر و ھەڵسوکەوتی منداڵدا. - وەکو دەزانین شیعر بۆ منداڵان زیاتر نووسراوەو چیرۆک کەمتر، بەڕای بەڕێزت بۆچی چیرۆکنووسمان لە بواری منداڵان کەمترە، بەڵام خۆشبەختانە تۆ چیرۆکیش دەنووسی؟
- دروستە شیعر نووسمان زیاترن و چیرۆک نووسمان بەو ئەندازەیە نیە, ئەگەرچی چیرۆک بزوێنەری خەیاڵی منداڵەو لەڕێی چیرۆکەوە منداڵ دەتوانێت بەسەر گرژيی و ئاڵۆزییە دەروونیەکانی و کێشە کۆمەڵایەتیيەکان زاڵ بێت و ڕزگاری بێت و لەبەرئەوەی ناوەڕۆکی چیرۆکەکان دەبێتە ھۆی پێکەنین و گریان و گاڵتە جاڕيی و توڕەبوون و ھاوارکردن… ھتد. کەوایە ئەرکی چیرۆکنووس قورسترەو دەبێ نووسەر توانای داڕشتنی ئەدەبیانەی ھەبێ و بزانێ چۆن دەست پێدەکات و بابەت دەوروژێنێت و چۆن بەشێوەیەکی کارامەیی چیرۆکەکە کۆتایی پێ دەھێنێ و وادەکات ئامانجی خۆی بەدەست بھێنێت, کە دروست کردنی کارەکتەری پاڵەوانێکی بەھێزە لە نێو ناخی منداڵدا، ئەوەش ئەرکێکی ھەروا ئاسان نیەو دەبێ چیرۆکنووس لەخۆ ڕادی و بێت, بەڵێ چیرۆکیش دەنووسم، زۆر حەز بەچیرۆک دەکەم، ھەر شتێک یان بابەتێک سەرنجم ڕابکێشێ لای من دەبێتە بابەتێکی واقیعی و ڕاستگۆیانە, کاری دارشتنی تێدادەکەم، زۆربەی چیرۆکەکانم ھەڵقوڵاوی ژینگەی منداڵانن، ھەوڵ دەدەم چیرۆکەکان ئاوێتەی خەیاڵ بكەم بۆ ئەوەی چێژی زیاتر بەمنداڵ ببەخشێ.
- بە ڕای تۆ بۆچی تا ئێستا وەک پێویست لێکۆڵینەوە لەبارەی ئەدەبیاتی منداڵان نەکراوە، یاخود ڕەخنەگرمان لەو بوارە کەمە، بەڵگە بۆ پرسیارەکەمان کەمی کتێبە لەو بارەیەوە؟
- ھەرچەندە لە ڕابردوودا لێرەو لەوێ ڕەخنەو ڕەخنەگر ھەبوون, بەڵام بە پێی پێویست نەبوون, یەکێتی نووسەرانی کورد / لقی سلێمانی, ھەندێ ھەوڵ و لێکۆڵینەوەیان کردووە لەسەر ئەدەبی منداڵان لە بواری شیعر و چیرۆک و بڵاوکراوەکاندا, کە بەشێوەی فیستیڤاڵ پێشکەشیان کرد و دواتر کردیان بە کتێب، من ئەوە بەھەنگاوێکی گرنگ دەزانم سەرەتایەکی زۆر باشیش بوو دەستیان خۆش بێت و بەڕاستی ئێستا کەسانی دڵسۆز دەبینم بێ ماندو بوون کار بۆ پێشخستنی بواری ئەدەبیاتی منداڵان دەکەن, جاران باشتر بوو لە چەند دەزگایەک کتێب چاپ کردن ھەبوو, کۆڕو کۆبونەوە دەبەسترا بۆ ئاڵوگۆڕی فرە بۆچونەکان لەسەر نووسین و بابەتەکان, بەڵام بەداخەوە لەھەموو بوارەکاندا ئەگەرھەنگاو نرابێت چیتر ھەنگاو ی جدی لەو بوارەوە نەنراوە, گەر نرابێش لەئاست ویست و خواستی ئێمەدا نەبووە، بەداخەوە ئەوەش بەرە بەرە ڕوو لەلاوازيی دەکات, ئەویش بەھۆی کێشەی داراییەوە, لەم چەند ساڵەی دوایيدا, ئەگەرچی ئیستا کۆمەڵێکی باش لە ھاوڕێیانم بەتوانای جۆراو جۆرەوە ماندونەناسانە بەحەزەوەن بۆکارکردن چ لە بواری نووسیندا, یان چاپەمەنيی گۆڤارەکان, بەڵام بەداخەوە لەبەر دۆخە نالەبارەکانی ژیان, ھەموو لەدۆخێکی نەخوازراو و چەق بەستوو ماون.
بواری ئەدەبیاتی منداڵان پێویستی بە لێکۆڵینەوەو بەدواداچونی بەردەوام ھەیە
بۆ زیاتر وتوو وێژو ھەڵوێستە لەسەر ئەو نووسین و بابەتانەی, کە زۆر باش و ناوەزەن و گشت ڕەگەزە بەھێزەکانی ئەدەبیاتی منداڵان لەخۆدەگرێت، بەبەراورد بەو نووسینانەی, کە زیانیان ھەیە ئاسەواری نەرێنی لەسەر زیھنی منداڵدا جێدەھێڵن، بەگشتی بوارەکە پێویستی بە دیالۆگ و سیمینار و ھەتا بەستنی کۆنگرەش ھەیە, بەھەموو توانایەک کار بکرێت تا لەداھاتودا کاریگەریی جدی بخاتە سەر بواری پەروەردەش و بۆ ئەوەی بەگڕوتینی زیاتر تا لەڕێی ئەدەبیاتی منداڵانەوە خزمەتی زیاتری مافەکانی منداڵ بکرێت, پێویستە لێکۆڵهران و ڕەخنەگران لەداھاتودا ئەو ڕۆڵە بەھێزە بگێڕن. - بۆچی تا ئێستا شیعر و چیرۆکەکانت لە دوو توێی کتێب بۆ منداڵان چاپ نەکردووە؟
- لەکارو پیشەکەمدا زۆر سەرقاڵ بووم, لەبەر ئەوەی لەمنداڵەوە نزیک بووم, دەمزانی چیان گەرەکە, بۆیە بەردەوام بەبابەتی جۆراوجۆر فیستیڤاڵەكانمان دەڕازاندەوەو جگە لە ھاوکاری چەندین باخچەی ناوشار و دەرهوهی شار بەتێکستەکانم ھەروەھا بەشداری سەرجەم گۆڤارەکانی کوردستان و جارجاریش دەرهوهی کوردستانم کردوە، بەداخەوە بەھۆی سەرقاڵیم و بوونی بەرپرسیارییەتی گەورەتر لە ئەستۆم, نەپڕژاومەتە سەرئەوەی بابەتەکانم لە دووتوێی کتێب چاپ بکەم، پێش ئەو قەیرانە بەنیازبووم, کەچی بەداخەوە دۆخەکە خراپتر بوو, ھیوام وایە لەداھاتوودا خەمخۆران و دەست ڕۆیشتوان لەخەمدابن بۆنووسەران لەڕووی ئەوبابەتەوە و ببێتە جێی گرنگیی پێدانیان.
دوو کتێبی شیعری و دوو کتێبی چیرۆکم ئامادەن بۆ چـاپ خۆشحاڵ دەبم, كە لەدووتوێی کتێبدا بگەنە بەردیدهی منداڵانی خوێنەر. - تۆ, کە تا ئێستا کتێب و نامیلکەت نیە، چۆن توانیوتە شیعر و چیرۆکەکانت بگەیەنیتە بەر چاوی گەشی منداڵانی کوردستان؟
- لەڕێگای سەرجەم ئەوگۆڤارە ئازیزە تایبەتانەی, کە بۆ منداڵان دەردەچن, شیعر و چیرۆکەکانم بڵاودەکەمەوەو دەیخەمە بەر دیدەی خوێنەرە ئازیزەکانم، سەرەڕای ئەوەش بەپێی کارەکەم, کە بەرکەوتەی ڕاستەوخۆم لەگەڵ منداڵ ھەیە و منداڵم خۆشدەوێت, بەحەزەوە بۆیان دەنووسم، دەزانم چۆن بیردەکەنەوە, چی دەیانھێنێتە پێکەنین و سەماو چی سیمایان گرژ دەکات و چی پەستیان دەکات، ھەر بۆیە لەگەڵ گشت ئەوبابەتانەی بۆیان دەنووسم پێکەوە گۆرانيی دەڵێین و غار دەدەین و ژینگە سەوز دەكەین, بابەتەکانم ھەڵقوڵاوی نێو ژینگەی خۆیانن، ڕاستگۆم لەگەڵیانداو لەخەمیاندام. منداڵ چۆن بی لەگەڵیدا, ئاوا مامەڵەت لەگەڵ دەکات، بۆیە ئەوکەسەی گرنگی پێ دەدات کاریگەريی گەورەی لەسەر بەجێ دەھێڵێ, ھەرچەندە چاکتر و باشتر لەھەڵسوکەوت و ویست و ئارەزووەکانیان بگەین, ئەوەندەی بەسەرکەوتوویی ڕەفتاریان لەگەڵدا بکەین ئەوانیش زیاتر بەکۆمەڵایەتی دەبن و کەسایەتیان پتەو دەبێ و متمانەیان بەھێزتر دەبێ بەخۆیان و لاواز نابن و گۆشەگیر نابن و بەھەموو شتێک ڕازی نابن و ناھێڵن دەست بخرێتە کارو باریانەوە، لەداھاتودا خاوەن کەسایەتی دروست و بەھێز دەبن و بناغەو پێگەی ھزری و فکری خۆیان بەدەست دەھێنن, ئەوە منی سەرقاڵتر کردووە.
- وەکو دەبینین و دەزانین منداڵ زۆر حەز بە نیگارکێشان دەکات، یان کاتێ شیعر و چیرۆک دەخوێنێتەوە، پێی خۆشە وێنەی لەگەڵدا بێ، بۆچی؟
- زۆربەی زۆری نووسەرانی بواری ئەدەبیاتی منداڵان كۆكن لەسەرئەوەی لە شیعر و چیرۆکدا, نیو بە نیو وێنەو نووسین تێکەڵ بن, ئەوە ستانداردی جیھانیە بۆ گەیاندنی بیرۆکەی نووسەر, زۆرجار لە نووسەرانی جیھانيی, چیرۆکێک کتێبێکیانە. وێنەی ڕەنگاو ڕەنگی نێو گۆڤار و کتێبەکانی تایبەت بۆ منداڵان, یەکەم ھەنگاو و ھاوکاری باشە بۆ گەیاندنی بیرۆکەی نووسەر بەمنداڵ.
منداڵ زاتێکی پاک و بێگەردە, وەک گەورە نیە, زۆر بەدەگمەن, ئەگینا ناتوانێت شتەکانی ناخی بشارێتەوە, ھەرچی ھەبێت ھەوڵی دەربڕینی دەدات, یەکێک لە گرنگترین ئامرازەکانیش, کەمنداڵ لە ڕێگەیەوە گوزارشت لە ناو دڵ و دەروونی دەکات, نیگارکێشانە, دەتوانین لە ڕێگای نیگارکێشانەوە ناوەوەی منداڵ بخوێنینەوە، لەبەرئەوەی وێنەی ئەوشتانە دەکێشێ, کە لە چواردەوریدا ھەیەو کاریگەريیان لەسەر دەروونی منداڵدا ھەیە. ئەوەی کاریگەريی خۆشەویستيی لەسەریانی ھەبێ, وێنەی بەگەورەیی و خەندە ئامێز, یان لە وێنەی چیایەکی بەرزدا, یان دارێکی قەدو قەبارە گەورە دروست دەکات, بەپێچەوانەوە ئەوەی کاریگەريی نەرێنی ھەبێ و کەم بێت, بچووک و لاواز وێنەی دەکێشێ,
ھەر بۆیە پێویستە ژینگەی منداڵ لە خێزان و دەرهوهی خێزان ڕەنگاو ڕەنگ بێت و ژینگەیەکی پڕ لە ئاسودەیی بێت و تەواوی مافەکانی وەدی ھاتبێ و وەدی بێت تا منداڵ لە ھزری خۆیدا وێنای ئەرێنی و ڕەنگاوڕەنگ بکێشێ، منداڵ ناتوانێت ھەموو بابەتێک بخوێنێتەوە, بەڵام دەتوانێت بە توانای خۆی وێنای وێنەجوان و ڕەنگاو ڕەنگەکان بخوێنێتەوەو بە دەروونێکی ئارامتر گوزارشتیان لێ بکات، ھەنگاو بەھەنگاو تێگەیشتنی بابەتەکە ئاسانتر دەبێت, پرۆسەی گەیاندن بەئەنجام دەگات. - لەوەتەی بۆ منداڵان دەنووسی و لە پای نووسینەکانت بۆ زارۆکان، چیت پێشکەش کراوە، کە دڵت پێی خۆشبێ، یان هەست بە چی دەکەی، کە پێنووسەکەت بۆ خزمەتی منداڵان تەرخان کردووە؟
- ھاندانی بەردەوامی مامۆستا خۆشەویستەکانی باخچەکەمان بەتایبەتی, وە یان دەستخۆشيی و ھاندانی ھاوڕێ و کەسانی دڵسۆز, کە ئاڕاستەیان کردبم بۆھەمیشە جێی شانازيی منن، بەڵام ئەو دەست خۆشی و بەھەند زانینەی, کە وەک نووسەری بوارەکە ئاڕاستەم کراوە, ھەرگیز بیرم ناچنەوەو وەک سمبولێک دەیان پارێزم و زۆر زۆر دڵیان خۆش کردووم, ئەوانەن: وەرگرتنی یەکەم خەڵاتی ڕێزلێنانی گۆڤاری گوڵەکان بەبۆنەی ساڵڕۆژی جیھانيی منداڵان و دەرچوونی ژمارە ( ١٠٠ ) گۆڤارەکە، لە چەمچەماڵ ساڵی ٢٠١٥، ھەروەھا ڕێزلێنانی ڕێخراوی نەسیم بۆژینگەپارێزی لە ڕۆژی 16/4/2015، ھەروەھا خەڵاتی ڕۆژی جیھانی زەوی لە لایەن جێگری سەرۆکی لیژنەی تەندروستی ساڵی ٢٠١٧، خەڵاتی فەرمانگەی ژینگەی ڕاپەڕین ساڵی ٢٠١٨، ڕێزلێنانی خانەی دەروازەی ڕۆشنبیری منداڵان لەڕانیە، خەڵاتی ڕێزلێنانی ماڵی کتێب ساڵی ٢٠١٩, خەڵاتی کتێبخانەی گشتی ڕاپەڕین لەلایەن وەزیری ڕۆشنبیری. دوا دەست خۆشی و پێزانیمان لە لایەن ڕێکخراوی هاوڕێیەتی منداڵانی كوردى – ئەمریکی بوو, کە پێمان بەخشرا, دەست خۆشییان لێدەکەم.
پرۆفایل:
- زارا ئەحمەد جاف
- شوێنی لەدایک بوون و نیشتەجێی شاری ڕانیه.
- ھەڵگری بڕوانامەی دبلۆم.
- سهرپهرشتیاری پهروهردهییه له دهڤهری ڕاپهڕین.
- یهكهم شیعری بۆ منداڵان بهناوی (ئاسمان) له گۆڤاری پهپووله بڵاوكراوهتهوه.
- یهكهم چیرۆكی بۆ منداڵان بهناوی (لانه بوو بههاوڕێی گوڵ و پهپووله) له گۆڤاری مشكه بڵاوكراوهتهوه.
- دهستهی نووسیاری گۆڤاری مشكه بووه، كه لهلایهن دهزگای چاپ و بڵاوكردنهوهی ئاراس له ههولێر دهردهچوو.
- چوار كتێبی ئامادهن بۆ چاپ، كه دوانیان چیرۆكن و دوانهكهی دیكهش شیعرن.
- چهندین شیعری كراون به گۆرانیی بۆ منداڵان.