کارەساتێکی ترسناك بەڕێوەیە.. نووسینی : گابریل گارسیا مارکیز- وەرگێڕانی: ڕزگار عومەر
گوندێکی زۆر بچووك بێننە پێشچاوی خۆتان، ماڵێك لە دانیشتوانی ئەم گوندە پێكدێت لە؛ ژنێکی بە تەمەن لە گەڵ کوڕە حەڤدە ساڵیەکەی و کچە چواردە ساڵیەکەی. ئەم بەیانیە مناڵەکان دڵتەنگی و ترسێکی قوڵیان لە دەم و چاوی دایکیان بەدی کرد کاتێ خەریکی ئامادە کردنی نانی بەیانی بوو، ئەوان لە دایکیان پرسی ئەم ترسە چیە دایپۆشیوی؟
دایکەکە ووتی :
-نازانم، بەڵام لەبەیانیەوە کە لەخەو هەڵساوم دڵم پێم دەڵێ کارەساتێکی ترسناك بەسەر ئەم گوندە دێ.
مناڵەکانی بە دایکیان پێدەکەنن و دەڵێن “وڕێنەی پیرەژن”. کوڕەکە دەچێ بۆ یاری بلیارد، لەوێ لەسەروبەندی نیشانگرتنێکی زۆر ئاساندا ئەوەی یاری لە گەڵ دەکا پێ ی دەڵێ ” گرەوت لە گەڵ دەکەم ناتوانی بیپێکیی”
ئەوانەی لەوێ بوون هەموو دایان لە قاقای پێکەنین، مناڵی ژنەکەش پێکەنی، نیشانەکەی ناو دەستی دەوەشێنیێ و بە تۆپەکە ناکەوێت، ئەوانەی لەوێن پێ ی دەڵێن ” ئەوە چیبوو! خۆ ئەوە زۆر ئاسان بوو بۆ نەتپێکا ؟
ئەویش لە وەڵامدا ووتی :
- ڕاست دەکەن، بەڵام من هێشتا شڵەژان بەری نەداوم لە قسەیەك کە ئەم بەیانیە دایکم درکاندی، دایکم ووتی کارەساتێکی زۆر ترسناك لەم گوندە ڕوودەدات.
دیسان هەموویان دایان لە قاقای پێکەنین، ئەوەی پارەی گرەوەکەی بردەوە بە خۆشحاڵیەوە دەگەڕێتەوە بۆ ماڵەوە، لەوێ دایکی لە گەڵ کۆمەڵێك میوان دانیشتوون وەکو نەنکی، کچە مام و چەند خزمێکیتری نزیكی خۆیان، بە پێکەنینەوە ڕووی لە هەموویان کردو ووتی : - ئەم پارەیەم لە “داماسۆ” بردەوە بە ڕێگایەکی زۆر ئاسان، چونکە گەمژەیە.
- پرسیان ؛ بۆ گەمژەیە؟
- لەبەرئەوەی لە یاری بلیارد دەرفەتێکی زۆر ئاسانی بۆ ڕێککەوت کەچی نەیپێکا، لە بەرئەوەی شڵەژابوو بە هۆی ترسێكەوە کە ئەم بەیانیە لە گەڵ لە خەو هەڵساندا لە دایکی نیشتبوو ، گوایە کارەساتێکی ترسناك لەم گوندە ڕوودەدات.
دایکی پێ ی ووت: - گاڵتە بە وەسوەسەی پیرەکان مەکە، چونکە زۆر جار ترسەکانیان دێتە دی.
دوای ماوەیەکی کەم لەم گفتوگۆیە خانمێك لە میوانەکان مالئاوایی دەکات و دەڕوا بۆ لای قەساب بۆ گۆشت کڕین، بە قەسابەکە دەڵێت :
-کیلۆیەك گۆشتم بدەرێ. کاتێ قەسابەکە خەریکی ئامادەکردنی گۆشتەکەیە، خانمەکە دەست بە قسە دەکاتەوەو دەڵێ : - واباشتر بیکەی بە دوو کیلۆ، چونکە دەڵێن ” کارەساتێکی ترسناك بەڕێوەیە” وا باشترە خۆمانی بۆ ئامادە بکەین.
قەسابەکە دوو کیلۆی پێدەفرۆشێت، دوای ئەو خانمێکیتر دێت و داوای کیلۆیەك گۆشت دەکات، قەسابەکە دەڵێت: - دوو کیلۆ ببە، چونکە خەڵك دێنە ئێرەو دەڵێن ڕووداوێکی ترسناك بەڕێوەیەو خەریکی کڕینی خواردمەنین.
خانمەکە لە وەڵامدا دەڵێت: - من مناڵم زۆرە، باشترە چوار کیلۆ ببەم.
کابرای قەساب چوار کیلۆی پێدەدا، هەرم بەم شێوەیە تەنیا لە نیو کاتژمێردا هەموو گۆشتی نێو دوکانەکەی دەفرۆشێت، دواتر مانگایەکیتریش سەر دەبڕێ ئەوەس هەر هەمووی تەواو دەبێ. قسەکە بە خێرایی بڵاودەبیتەوە، تا هەموو خەڵکی دێ دەگەنە حاڵەتێك هەر هەمووی چاوەڕوانی ڕوودانی کارەساتێکی ترسناکن. هەموو جموجۆڵێك وچالاکیەك بزێویەك لە گوندەکە دەوەستێت.
لە پڕدا لە کاتژمێری ١٢ ی نیوەڕۆ، کە هەروەکو هەموو ڕۆژانێکیتر ئاوهەوا لەم کاتەدا زۆر گەرم دەبێت ، یەکێك لە خەڵکی گوندەکە بە یەکێکیتر دەڵێ : - ئاگات لێیە چەند گەرمی کردووە؟
- ڕاستە، بەڵام ئاو و هەوای ئەم گوندە هەمیشە هەروا گەرم بووە.
ئەم گوندە بە جۆرێك گەرمە کە سازو عود ژەنەکان تەل و بەشەکانی ئامێرەکانیان بە چەسپی قەتران دەبەستن و هەرگیزیش لەبەردەم هەتاوا مۆسیقا ناژەنن چونکە ئامێرەکانیان ڕەنگە بە گەرما تەواو پارچەکانی بترازێ. سەرەڕای ئەم ڕاستیە زانراوەش هێشتا یەکێك لە خەڵکی دێ ووتی؛ - هەرگیز ڕووی نەداوە گەرما بەو تینە بێت لەم کاتانەدا
- بەڵام لە کاتژمێر دووی دوای نیوەڕۆ هەروا گەرم دەبێت
- گەرم دەبوو بەڵام بەو ئاستە نا!
لە نێو ئەم گوندە تەریکەدا، گۆڕەپانێکی چۆڵ هەیە، کە لە ناکاو چۆلەکەیەك لەم گۆڕەپانەدا دەنیشێ، ئەمە دەبێتە هەواڵێکی بە پەلەی بروسك ئاسا ” باڵندیەك لە گۆڕەپانەکە نیشتەوە” دانیشتوانی گوندەکە هەر هەموو بە ترس و تۆقینێکی زۆرەوە ڕادەکەن بۆ بینینی چۆلەکەکە. یەکێك بەرامبەر حەشامەتەکە هاواری کرد: - ئێ خۆ باڵندە پێشووترو ڕۆژانیتریش هەر لێرە دەنیشنەوە
وەڵام درایەوە ووتیان: - ڕاستە؛ بەڵام هەرگیز لەم کاتانە لێرە نانیشنەوە!
ئەم پەشۆکاویە قوڵە دەگاتە چرکەساتێك کەهەرهەموو پەرۆشی ڕاکردن و بەجیهێشتنی گوندەکەن بێ ئەوەی کەسیان جورئەتی دەستپێشخەری هەبێ. لەم دۆخەدا یەکێك هاوار دەکا: - من پیاوێکی خاوەن پیاوەتیم، من دەڕۆم.
شتومەکی ماڵەکەی هەمووی لە عارەبانەیەك دەپێچێتەوە، مناڵەکانی، ئاژەڵەکانی هەرهەمووی بە پێش خۆی دەداو لە ڕێگای سەرەکی بەڕێدەکەوی بەبەرچاوی شڵەژاوی هەمووان گوندەکە بە جێدەهێڵێ!
دۆخەکە گەرمتر دەبێت دەگاتە ئاستێك کە هەندێك هاوار دەکەن” مادام ئەم پیاوە جورئەتی بەجێهێشتنی هەبوو، ئێمەش هەموو دەڕۆین” هەرهەموو دەست دەکەن بە کۆکردنەوەی مەڕوماڵاتیان و ماڵەکانیان و دەست دەکەن بە کۆچی بە کۆمەڵ.
یەکێك لەوانەی گوندەکە چۆڵ دەکا هاوار دەکا ” نەوەك ئەم لەعنەتە بدات لەو شتانەی کە لە خانوەکەم بەجێماوە ماڵەکەی خۆم دەسوتێنم ” ئەو ماڵەکەی خۆی دەسوتێنێ ، لە دوای ئەوە چەندین کەسیتر دەست دەکەن بە ماڵ سوتاندن. هەرهەمووی بە ترس ولەرزو تۆقینێکی زۆرەوە ڕادەکەن گوندەکە چۆڵ دەکەن، وەك بڵێت لە ترسی جەنگێکی ڕاستەقینە ڕادەکەن، لە نێو ئەوانەی ڕایان دەکرد ئەو ژنەش بوو کە ئەم بەیانیە هەستی خۆی بۆ دوومناڵەکەی خۆی باس کردبوو، لەبەر خۆیەوە قسەی دەکرد و دیووت : - ئەم بەیانیە کە ووتم کارەساتێکی ترسناك بەڕێوەیە، پێیان ووتم تۆ شێتی!
نووسینی : گابریل گارسیا مارکیز
وەرگێڕانی : ڕزگار عومەر