دەنگەكان ماڵێك بۆ هەمووان.. سەدیق سەعید ڕواندزی
زۆرن ئەو سەكۆ و ماڵپەڕە ئەدەبییانەی، وەك مینبەرێكی نووسین و بوارێكی دەربڕینی بیرو ڕا كاردەكەن، بەڵام كەمیان یان بڵێم هەر نییە، توانیبێتی وەك ماڵپەڕی دەنگەكان، ببێتە سەكۆیەكی دیار و ئازادی یەكجار پڕ خوێنەر. دەنگەكان ماڵپەڕێكە، دەكرێ بڵێم لە گەلێك ڕووە تایبەتمەندی خۆی هەیە وەك :
یەكەم:_ نەیكردووە بە مەرج، كە ئەو وتارانەی تیایدا بڵاو دەكرێنەوە دەبێ چۆن بن و پەیڕەو لە كارنامەی ئەوان لە ڕووی گوتارو زمانەوە بكات، وەك ئەوەی لە ماڵپەڕەكانی دیكە دەیبینین، كە ئەمەش بوار ڕەخساندنە بۆ ئەوەی دەنگ و قەڵەمی تازە و نوێ، ئەم ماڵپەڕە وەك ئەزموونكارییەكی خۆیان بیبینن و وەك قوتابخانەیەكی نووسین لێیەوە فێر ببن.
دووەم:_ هەرگیز نەمبینیوە ئەو ماڵپەڕە سەنگینە، دەستكاری یەك پیت و وشەی خۆم بكات، لە كاتێكدا زۆرجار ئەو وتارانەی لە ڕۆژنامە و گۆڤارەكان بڵاویدەكەمەوە ڕێنووسەكەیان دەگۆڕدرێت. بۆ نموونە: من هەمیشە دەنووسم ( وەكو، چونكە ) كەچی زۆرجار ئەم وشانە لە نووسینەكانی مندا لە ڕۆژنامەكاندا دەگۆڕدرێن و دەكرێنە (چوونكە _ وەكوو) كە لەبنەڕەتدا هەڵەیە، بۆیە ئەمەی دەنگەكان بڕوابوونە بە سەربەستی و ئازادی نووسەر لە دەربڕین و شێوازی نووسینیدا.
سێیەم:_ دەنگەكان ماڵپەڕێكە، وەك سایەیەك هەرچی جیاوازی بیرو ڕا هەیە كۆییان دەكاتەوە، هەیانە قسە بە حزبێك دەڵێت، ئەویتریان ڕۆژی دواتر ستاییشی دەكات، یەكێكیان دژە ئایینە، ئەویتریان پەسنی ئایین دەدات، واتا بواری دەربڕینی بیرو ڕا بۆ هەمووان هەیە، كەچی هێنێك لە ماڵپەڕەكان كردوویانە بە مەرج بەنموونە وتاری مەلایەك بڵاو نەكەنەوە.
چوارەم:_ گومان دەكەم ماڵپەڕێك هەبێت، هێندەی دەنگەكان خوێنەری هەبێت، بۆیە هەر نووسەرێك مەبەستیەتی خوێنەران بابەت و نووسینەكانی ببینن، ئەوا دەبێ لە دەنگەكان بڵاوی بكاتەوە، گرنگ نییە پێشتر لە كوێ بڵاویكردۆتەوە و ئازادە لەوە، بەڵام گەر مەبەستی بێت خوێنەرانێكی بێ شومار بابەتەكەی ببینن، ئەوا دەبێ لە دەنگەكان بڵاویبكاتەوە.
پێنجەم: بەگشتی ئەو وتارانەی لە سەكۆ ئەلكترۆنییەكان، لە شێوەی فەیسبووك و ماڵپەڕەكان بڵاو دەكرێنەوە، بەراورد بە وتاری نێو ڕۆژنامە و گۆڤارەكان، نابنە سەرچاوە، هەر چەند زانستی و بە هێزیش بن، چونكە سەرچاوە دەبێ لە بڵاوكراوەیەكی كاغەزییەوە بێت و وەك دیكۆمێنتێك لە ڕووی مێژووییەوە بمێنێتەوە وەك ڕۆژنامە یان گۆڤار، كەچی بە پێچەوانەوە دەنگەكان بەدەرە لەم حاڵەتە، چونكە وتار و نووسینەكانی دەكرێنە سەرچاوەی نووسینی توێژینەوە و وەك سەرچاوە پشتیان پێ دەبەسترێت كە من خۆم لە میانەی خوێنەوەدا، دەیان جار ئەمەم بینیوە.
دواجار دەڵێم كاروانی دەنگەكان بە دەست و پەنجەی هاوڕێ گۆران عەبدوڵان، كە وەك سەربازێكی ون بیست و چوار ساڵە بێ پسانەوە ئەو ماڵپەڕە سەنگینە بەڕێوە دەبات، هەر بەردەوام بێت و خۆشەویستیشم بۆ هەموو ئەو قەڵەمانە هەیە كە بابەتی تیادا بڵاو دەكەنەوە بەوانەشی كە ڕقیان لێمە، گەر ڕەخنەیەكم لە نووسینەكانیان گرتبێت.
ڕواندز _ 30 /5 / 2026