” لەنێو گێژاوی ژیاندا “
لەلایەن کاک ” گۆران سەمەد ” نووسراوە .

پێش هەر شتێک دەمەوێت ئەوە بڵێم، مێژووی نووسینی چیرۆک بۆ هەزاران ساڵ پێش ئێستا دەگەڕێتەوە .
مرۆڤ هەوڵیداوە هەموو ئەو شتانەی دەیانبینی و گوێی لێدەبێت و بیری لێدەکاتەوە یانیش رووبەڕوویان دەبێتەوە وەک ترس یا بوێری ، سەرکەوتن یا شکست یا پەیوەندییەکانی لەگەڵ دەوربەری هەیەتی ، یاداشت بکا و بینووسێتەوە .

سەردەمانێک /
هەموو شتێک بەشێوەی دەقی شیعر و یاداشتدەکرا و گێڕانەوەکان موڵکێکی شیعری بەسەرەوە بوو ، چونکە ئەو شێوازە لەنووسین ئاسانبووە و ئاسانیش ئەزبەر دەکرا و لەبیریش نەئەکرا .
بۆیە :
گێڕانەوەکان بەشێوەی ستوونی نووسراوە و یاداشتکراوە و کاریگەری زمان و لەقالبدانی بۆگۆکردن ئاسانبووە .

لە داستانی کارگامێش یانیش گلگامێش چیرۆکی :
گوڵی نەمری کۆنترین دەقی چیرۆکە بۆمان ماوەتەوە ، کاتێک مرۆڤ هەوڵی داوە نەمرێت و لەم سەردەمەدا دەنگۆیەک هەبوو گوڵێک هەبووە هەر کەسێک بیخوات نامرێت ، کەسێک هەوڵێکی زۆریداوە و ئەم گوڵەی دۆزیتەوە لەکاتی گەڕانەوەی بۆ شوێنی خۆی خەوی لێدەکەوێت کاتێک چاوی دەکاتەوە گوڵەکە لەدەمی مارێکە ، دوای ئەم ڕووداوە مرۆڤ بێئومێد بووە دەبێ بمرێت و تاوەکو ئێستا مرۆڤەکان چیرۆکەکان دەگێڕنەوە و ئاواتیانە نەمرن !
دوای پێشکەوتنی ڕۆژئاوای ئەوروپا و هاتنی سەدەکانی ڕۆشنگەری .
وایکرد دەقی نووسین گۆڕانکاری بەسەردا بێت و چیرۆکنووسینیش لەڕووی فۆڕم و ستایلی نووسین و تەکنیک و خێرایی ڕووداوەکان گۆڕاوە دەستپێک و کۆتایی نییە .
لە سەدەی هەژدەیەم و نۆزدەیەم و بیستەم سێ سەدەبوون چیرۆکنووسین گۆڕانکاری گەورەی بەسەرهات و بوو بەئەمری واقیع .
فۆڕمی نووسین گەیشتیە لووتکە و گۆڕانکاری جددی بەسەرهات .
ئەو گەیشتنە لووتکەیە وادەکا
بپرسین
بۆچی تاوەکو ئێستا مرۆڤ پەنا دەبات بۆ نووسینی چیرۆک ؟
لە گێژاوەی ژیاندا چیرۆک دەرەقەتی ئەم هەموو رووداوە دێت ؟
هەربەجددی چیرۆک دەتوانێ پەرجوو ” موعجیزە ” دروستبکا ؟
لەواقیعی ژیاندا :
چیرۆکەکان دەکەونە کوێی ئەم دۆخەی ئێستامان و بۆچی مرۆڤەکان دەستبەرداری نووسینی چیرۆک نابن ؟
دەتوانم بڵێم وەڵامێک نییە بەڵکو دۆخێک هەیە وەک پیرۆزی و نەفرەت و خۆشەویستی و ڕق و ڕاستی و درۆ و بەهێزی و بێهێزی و خۆشەویستی و ژیان و مردن و ترس و بوێری بەشی هەمووان دەکا .
ئەم بەشکردنە وایکرد مرۆڤەکان تاوەکو ئێستا بە حەسرەتەوە بژین و دەستبەرداری چیرۆک و ژیان نابین .

دەتوانم بڵێم /
” کاک گۆران سەمەد ” لەڕووی ستایلی چیرۆک نووسین بەفۆڕمێکی نوێ و ورد دەنووسێت و فێرمان دەکا گومان بکەین .
گومان لەبارەی:
_ دوادێری کۆتایی وشەکان شۆکمان دەکات و ڕاستیەکان دەردەکەون .
_ پەشیمانبوونەووەیەک هەیە دادی مرۆڤەکان نادات .
_ بەهەڵە تێگەیشتووین بژین .
_ مرۆڤەکان لەشەوی سپی ناچارن درۆی ڕەش بۆ یەکدی بکەن .
_ ناچارانە دەژین کەچی ڕقمان لە مردنە .
_ ڕەوشتی مرۆڤەکان شکست بەجیهانی ئێستامان دەهێنێت .
_ خۆبەدەستەوەدان هەیە و لێبوردنیش وەکو هەر شتەکی دیکە هەیە و گرنگی ئەتۆی نییە .
_ لەبەرامبەر ڕق پاڵەوانن و لەبەرامبەر خۆشەویستی لەرزۆکن .
بۆیە بەلای منەوە چەندە گرنگە کۆد و ڕەمز و ووشەی نهێنییەکان بدۆزرێتەوە .
جار هەیە ساتێک یا شکستێک یا کەوتنێک هەیە تووشی بارێکی دەروونی قورسمان دەکاتەوە .
دەتوانم بڵێم /
وەک گێژاوی فکری و کۆمەڵایەتی و دەروونی و پەیوەندییە کۆمەڵایەتییەکان دەبینرێت .
لەجیاتی ئەوەی :
شتەکان بەئاراستەی باشبوون ببات بەپێچەوانەوە دۆخەکان خراپتر دەکات ، وادەکات لەیەککاتدا هەم پاڵەوانین و هەم دۆڕاوبین .
لە چیرۆکی یەکەمدا
پاڵەوانی چیرۆکەکە بە 2 خولەک و پەنجا و سێ چرکە حەسایەوە ، لەکاتێکدا تەمەنێکی بەفیڕۆ رۆیشتووە .
لە چیرۆکی دووەمدا
کاتێک دەتەوێت بمری و هەموو کەرەستەیەکی مردنیشی هەیە کەچی ژیان دەڵێ بوەستە گەنیووبوونی زۆرتر مایە ببینی .
لە چیرۆکی سێیەمدا
ئاخێز ساتێک هەیە مرۆڤ هۆشیار دەکاتەوە و وادەکا ئێستای ژیانی قبووڵ بکات و حەسرەتێکی قووڵیشی هەیە ئەم ساتە پیاوەکان شێت دەکا و ژنانیش فشەیان پێدێت و گاڵتەیان پێدێت .
لە چیرۆکی چوارەمدا
وێنەیەک هەیە هەموو کەسێک حەسرەتی بینینی بۆی هەیە دەکرێت ئەم وێنەیە بگیرێت و دواساتەکانی ژیانمان بێت کەچی ئیهمالی دەکەین و نامانەوێت لەگەڵی بژین .
لە چیرۆکی شەشەمدا
ساردییەک لە ژیانی کچەکان هەیە رۆژێک دێت تێدەگەن تەنهایی ناتوانێت قەرەبووی هەموو شتێک بکاتەوە هەستێک دێتە پێش وادەکات بترسن مرۆڤی بێروح چەندە ترسناکە ، تێربوون بەبێ خواردن و ژیان بەبێ هەست و نەبوونی خەونی ڕەنگا و ڕەنگ چەندە بەترسە .
لەکۆتایی دەمەوێت بلێم
لە پەنای ئەو ژیانەدا لەخۆتت پرسیووە ڕووداوێک یاخود کارەساتێک یاخود ناخۆشییەک یاخود ترسێک یاخود هەرشتێک بەخێرایی تیشکی خۆر بەنێو ژیان یانیش روحت تێپەڕنەبووبێت نەتزانیبی .

ھەمیشە ھەروا بووە, کۆتایی عیشق تاریکی و تێکشکانێکی گەورە بووە, عیشق ھەرگیز کۆتایی نییە، واتە کۆتاییەکی پڕ شادیی و کەیف و خۆشی. بە پێچەوانەی ریتمی سینەماوە عیشق ماراسۆنە بەرەو مردنی ئەبەدیی, عیشق نغرۆبوونە لە دەریای وەھم و خەیاڵ و داڵغە بەدینەھاتووەکان. عیشق چیتر نییە جگە لە ئازار، بەڵام بەدەستی جەلادێکی بێڕوحم کە ھیچ بەزەییەک لە دڵیدا نییە, ئەگەر بتەوێت عاشق بیت پێش ھەرشتێک پێویستە شێت بیت، چونکە ئەقڵی ئاسایی توانای بەرگەگرتن و بڕینی ئەو ھەموو کۆسپ و کەندەڵانانەی نییە, ھەرگیز توانای ئەوەی نییە, دەبێت خۆت خاڵی بکەیتەوە لە ھۆش, دەبێ لە سەوداسەریدا بژیت, دەبێت بەو بڕیارە بەرەو رووی بچیت کە دەتەوێ بەرەنگاری لەشکرێ یان سوپایەک سەرباز ببیتەوە, ئەگەر ئەم بڕیارەت نەدابێ ھەروا ئاسان نییە لافی عاشقبوون لێ بدەیت. خۆشەویستی لە ژیاندا قورسترین بارە, ئاخر خۆشەویستی لێوانلێوە لە مازۆخیەت, لێوانلێوە لە بێھۆشی, لێوانلێوە لە سووتان لە مەعشووقدا, ونبوونە لە خۆشویستراودا, گەڕانە بە دوای خۆتدا لە ئەشکەوتە تاریکەکانی دڵی یاردا, گەڕانە بە دوای نەمریدا. بۆ ئەوەی عاشق بیت پێویستە ھەندێک لە شێتی, ھەندێک لە یاخیبوونت تێدا بێت، ئەگەرنا ھیچ ساتێک ناتوانی بەو پلەیە بگەیت, ئەمە رەھایە و رێژەی نەگۆڕە بۆ ھەتاھەتایە.

لە جەژنی کریسمسدا

لاوە گەنجێکی خۆشڕوو, دڵپاک, ھەست بەرز, ھەژار و کەمدەرامەت, لە بنەماڵەیەکی ئاینی ئیسلامی گەورە بووە, بەڵام لاوە ھەمیشە بە چاوێکی یەکسانەوە لە دین و باوەڕەکان دەڕوانێ و تا راددەیەکیش مەیلی چەپایەتی لە کەللەی داوە. بەڵام سەرسامبوونی بە مەسیحییەت و عیسا شتێکە بە ھیچ شێوەیەک نایشارێتەوە, ئەمە وای لێ کردووە لە بۆنە و یاددە ئاینییەکاندا سەردانی کەنیسە بکات، بێ ئەوەی ھیچ لە رێوڕەسمەکان بزانێت. لاوە بەیانییەکی زوو لە پێش زۆربەی دیانەکانەوە ھاتە کەنیسە, بەڵام وەک ئەوەی فریشتە بیخاتە دڵییەوە چاوی گێڕا تا لەسەر بەژن و باڵای (لیندا) ئیستی گرت, ئەو کەشە ئاینییەکەی لە خۆی و کچە گۆڕی بۆ کەشێکی عاشقانە, ھێدی ھێدیش خۆی نزیکی خستەوە تا چووە بەردەمی و بە کوردیی سڵاوی لێکرد و ئەویش بە سریانی وەڵامی دایەوە!. لاوە ھیچ نیگەران نەبوو, بەڵام دوای تەواوبوونی کەشە ئایینیەکە و بڵاوەکردنی دیانەکان, لاوە کەوتە شوێن لیندا تا توانی ماڵیان بدۆزێتەوە و دواتر بەھۆی دۆزینەوەی ماڵەکەیانەوە قوتابخانەکەشی دۆزییەوە و بەم ھۆیەشەوە توانی ھەموو نھێنییەکانی ئەو کچە بدۆزێتەوە و ئاشکرای بکات. لیندا بێئاگایە لەوەی کوڕێکی موسڵمان قومارێکی ئێجگار گەورە دەکات لەسەری, بەو جۆرە کەوتە دوای عەشقێکی تەواو فاشیلەوە.

بەڵێ خۆشەویستی

یەکەم جار لاوە توانی لە رێگەی قوتابخانە لیندا بگرێت و بە روونی پێی بڵێ خۆشمدەوێی!, بەڵام ئەمە لای ئەم کچە بڕیارێکی تەواو بێ عەقڵانە بوو, ھەرچەندە جێگەی ھەڵوەستەکردن بوو بەلایەوە, دەیزانی ھاتنی ئەم گەنجە بۆ ناو ژیانی شتێکی ئاسایی نییە و چارەنووسەکان شتی لەو جۆرە زۆر پێکەوە دەبەستنەوە, بێجگە لەم جارە لاوە زیاتر لە بیست جاری تر بە ھەمان شێوە، ھەروەک ئەوەی بۆ یەکەم جار بێ رێگەی لە کچە گرت و داوای خۆشەویستی لێ کرد. تا لیندا گەیشتە ئەو باوەڕەی لە قووڵایی دڵی ئەو کوڕەدا رستەیەک ھەیە ئەویش ئەمەیە: لیندا من تۆم خۆشدەوێت.

منیش تۆم خۆشدەوێ

سەرئەنجام دوای ئەوەی لیندا بۆی دەرکەوت ھەروا ئاسان نییە، بێ وەڵام بمێنێتەوە لە بەرامبەر کەفوکوڵی ئەم کوڕە گەنجەدا, تووشی دڵەڕاوکێ و شڵەژانێکی دەروونی بووەوە, نەیدەزانی بەشێوە ژیانە ئاساییەکەی خۆی ملی رێگە بگرێت یان یاخی بێت و لە پێناوی عەشقدا سەرچڵی بکات. ئەو خۆشەویستیی لاوە لە دڵیدا چرۆی کردبوو، بەڵام دەیزانی رێگەی بە یەکگەیشتن ھەروا سانا نییە و لەو جیاوازییە کولتوورییەی نێوانیان تەواوێ حاڵی ببوو, رۆژان رۆیشت و ھات، لاوە زیاتر سوور بوو لەسەر خۆشەویستی لیندا، ھیچ باکی نەبوو لە ھەر تەگەرە و گرفتێک کە دەھاتە پێشی, تا دواجار لە ئێوارەیەکی ساماڵی بەھاردا لە کاتێکدا زەردەپەڕ بەرەو تاریکیی ملی رێی گرتبووە بەر. جڵەوی شل کرد بۆ ئەو ھەستەی دەمێک بوو لە دڵی لینداشدا چەکەرەی کردبوو، بۆیە بە لاوەی وت: منیش تۆم خۆشدەوێت.

ویستی قەدەر

لە کتێبە پیرۆزەکاندا باسی ئەوە کراوە ھەموو مرۆڤێک قەدەری خۆی ھەیە و ژیانی لە چوارچێوەی ئەو قەدەرەدا دەخولێتەوە. لیندا و لاوە قەدەریان جیاوازە بەڵام دەیانەوێت بیکەنە یەک, خۆ شەڕکردنیش, لەگەڵ ئەو قەدەرەدا کارێکی دۆنکیشۆتانەیە, ھیچ ئەنجامێکی نابێ جگە لە سەرکێشییەکی دۆڕاو. ئەو دوو گەنجە گەیشتنیان بەیەک ئاسایترین کردە بوو، بەڵام ئەو بەربەستە بێ مانایەی بە ناوی جیاوازیی دینەوە قووت کرابووەوە ژیانی ئەو دوو عاشقەی بە دۆزەخ سپارد. ھێشتا لە وڵاتی قەدەرە رەشەکانی ئێمەدا شتێکی لەو جۆرە رووی نەداوە, بەڵام لاوە دەیگووت خۆ من لە شێخی سەنعان موسڵمانتر و زاھیدتر نیم ئامادەم لەپێناوی عەشقدا تەنانەت ببمە زەندیک. بەڵام ئەمانە ھەموو گوزارەی ناو ئەندێشەیەکی پڕ لە عیشق بوون، ئەگەرنا لەسەر زەمینی واقیعدا کارێکی ئەستەم و بڤە بوو. ھەموو قەدەرەکان دژی بەیەکگەیشتنی ئەم دوو لاوە بوون, ھەموو ھەوڵەکانیان بێ سەرەنجام بوو, دواتریش ویستی قەدەر بەسەر ویستی عەشقدا زاڵ بوو.

دابڕان

ھەروەک وتمان لیندا و لاوە سەر بە دوو نەتەوە و دینی جودا بوون، ئەمەش بووە خاڵی ھەرەسھێنانی عەشقەکەیان, بنەماڵەی ھیچکامیان ئامادە نەبوون کارێکی لەو جۆرە پەسەند بکەن، تەنانەت لیندا ھەر نەیدەوێرا لە ماڵەوە باسی خۆشەویستی کوڕێکی موسڵمان بکات، چونکە دەیزانی تووشی گەورەترین کۆسپ و ناڕەحەتی و ئازار دەبێتەوە. لاوە دەیزانی نەک ھەر ئەوەی ببێتە دیان بەڵکو ئەگەر ببێتە قەدیس ھیچ شتێکی بۆ ناکرێ، بۆیە ناچاربوو بە وەھمیی و لای خۆیەوە درێژە بە عیشقەکەی بدات. ئیدی کولتووری جیاواز کارێکی کرد سەرئەنجام عەشقەکەیانی کاڵ کردەوە, لیندا گەڕایەوە بۆ دۆخی ئاسایی, بەڵام لاوە بووە گەنجێگی تووڕەی ھەڵەشە و نائارام و تا راددەیەکیش بەرەڵا کە خووی بە خواردنەوەی ئەلکھولەوە گرتبوو، بە بەردەوامی درەنگانێکی شەو دەگەڕایەوە ماڵەوە و ھەندێ جاریش کوڕانی گەڕەکەکەی دەیانگووت موخەدەرات دەخوات و ئاگای لە دنیا نەماوە.

بەرەو سنوورەکانی شێتبوون

لاوە چونکە کەسێتی خۆی لە مەعشوقەکەیدا ون کردبوو نەیدەتوانی و ئاسان نەبوو بۆی، بتوانێت جارێکی تر خۆی بدۆزێتەوە, دایکە پرچ سپییەکەی ھەمیشە لەسەر بەرماڵ نزا و داوای ھیدایەت و ئاساییبوونەوەی بۆ لاوە دەکرد, بەڵام نەک ھەر ھیچ سوودی نەبوو, بەڵکو بارودۆخی لاوە رۆژ بە رۆژ بەرەو خراپی دەڕۆیشت، لەگەڵ زیادبوونی تووڕەییەکانیشی، زیاتر مودمین دەبوو لەسەر خواردنەوە و حەب و شروب و ھەندێ جۆری موخەدەرات. وردە وردە ھاوڕێکانی جێیان دەھێشت و ھەریەک بەلایەکدا, تەنیا ئەوە نەبێ چەند ھاوڕێیەکی مابوو ئەوانیش بە مەستیی ناسیبوونی، باوەڕ ناکەم لە دۆخی ئاساییدا بیناسینایەتەوە, بەم جۆر و شێوازە بەردەوام بوو ھەتا ئەو کاتەی بەشێوەیەک لەڕ و لاواز ببوو, جلەکانی دڕابوون, بە لای ھەر کەسدا دەڕۆیشت وەک شێت دەھاتە بەرچاویان, زۆرێکیش لە ھاوڕێ کۆنەکانی بە دەم قاقای پێکەنینەوە دەیانگووت دنیا ئەوە ناھێنێ وەک ئەو برادەرە خۆتی بۆ شێت بکەیت, لەولاشەوە کچی دیان شوی کرد، بێ ئەوەی لاوە ئاگای لەمە بێت، چونکە بە راددەیەک لە دەوروبەر بێ ئاگا ببوو کە نەیدەتوانی تەنانەت لینداش بناسێتەوە.

سەفەری نادیار

ئەو بەیانییە کەمێک لە بەیانییەکانی تر ئاساییتر بوو, لە بەردەم گازینۆکەدا لەگەڵ (شوانە) قسەی دەکرد و دەیووت منیش دێم, وەڵڵا دێم ئەگەر بشکوژرێم. ئیتر ئاشکرا بوو لاوە دەیەوێ سەفەر بکات، بەڵام تەنیا خۆی و شوانە دەزانن. کەسیش نازانێ لاوە پارەی ئەم سەفەرەی چۆن پەیدا کرد, بەڵام ھەرچۆنێک بوو دوای سێ رۆژ لاوە بە ڕێ کەوت بۆ سەفەری دەرەوەی وڵات, ھیچ کەس نەیدەزانی جگە لە (مام باپیر)ی چایچی چونکە لای ئەو باسی کردبوو, لاوە سەفەرەکەی سەرکەوتوو بوو, تا مانگی یەکەم ھەواڵی ھەبوو, بەڵام لەو کاتەوەی لاوە گەیشتە وڵاتی یۆنان و زەنگێکی بۆ (ئیدریس)ی برای لێدا، دوای ئەوە ئیتر دەنگی نەما. ئەوە شەش ساڵە کەس نازانێ لە کوێیە؟ کەس نازانێت ئایا لە ژیاندایە یان لە بەرزەخ؟!, سۆراخێک نییە بۆی, ھەروەک ئەوەی فڕی بێت. ئێستا ھەندێ کەس دەڵێن خۆی بێدەنگ کردووە و لە ئۆکرانیا دەژی. برادەرێکی تر دەڵێ: عەقڵم ھەبێت لەناو قەرەجەکانی ئیتالیایە، یەکێکی دەڵێ لەوانەیە مرد بێت، ھەشە دەڵێ خەریکی کاری نایاسایی بووە و گیراوە, بەڵام ئەوەی ئێمە دەیزانین ھیچییان نییە، چونکە لاوە ویستی خۆی رەش کاتەوە لە لیستی کولتووری دواکەوتوودا, ویستی لە دۆزەخی ئەم وڵاتە خۆی بشارێتەوە جا گرنگ نییە لە ژیاندا بێ یان لە مردندا.

——————————————-

سەرنج: ئەم چیرۆکە بنەمایەکی راستەقینەی ھەیە و بە کەمێک دەستکاریی و گۆڕینی ناوی کارەکتەرەکانەوە لە کۆتایی دیسامبەری ساڵی ٢٠٠٠دا نووسراوە. بەڵام پێنج ساڵ دواتر بڵاوم کردووە.

تێبینی: ئەم چیرۆکە ھەواڵە لە ژمارە “٢٠”ی رۆژنامەی “نێوەند” لە ساڵی ٢٠٠٥ بڵاوکراوەتەوە و پاشتر لە بەرگی سێیەمی کتێبی (قوتووی عەتار) لاپەڕە ٤٧٥-٤٧٩ بەشێوەی کتێبی کاغەز چاپ و بڵاوبووەتەوە.

(1)
ژنـانی ئه‌‌ورووپا

خەمبار
بەسەر پێخەفە نەرمەكەدا ،
پاڵ دەكەوم ..
ڕووم بەلای دیواردا وەردەگێڕم
زەردەمسكە دەبمەوە ..
بە پەنجەم
ناوت لەسەر دیواردا دەكێشم
لەگەڵ دەنگی تەقینەوەی دوورەوە
چاو دەنووقێنم
ئێستا دەتوانم بنووم ،
بێ‌ ئەوەی خەون بە هیچەوە ببینم
بێ‌ ئەوەی چاوەڕێی هیچ بكەم ..
دەزانم زۆرن ئەوانەی
وەكو تۆ
كۆچیان بۆ ئەوروپایێ كرد
كۆچیان بۆمەرگ و زیللەت كرد
بەڵام پاش چەندان ساڵ
كە منداڵەكانیان
هۆی هاتنیان لێ‌ دەپرسن
دەڵێن :
چونكە جەستەی ژنانی ئەورووپا
لە ژنانی ئێمە گەرمترە ..
ژنانی ئێمە ،
كە لەوێ‌
لە بەتەنێیدا مردن .

                                                  (2)
                                                له‌ ملدا

هەمیشە زانیومانە
شتێك لە ملدا هەیە
لێی دەترسین ،
نابێ‌ لە پەتی لوولدراو
نزیك بینەوە ..
چەقۆیەك
یا دوو مشتی بێ‌ بەزەیی
كەواتە ئێمە مەرگ دەناسین !
ئەو مەرگەی ڕێك لە ملدایە
لە جێیەك
لە هەموو جێیان پتر لێ دەدا
لە هەموو جێیان گەرمترە
لەوێدا ماچـیش هەیە .

                                                       (3)
                                                    هه‌ناسه‌بڕكێ

ئەمڕۆ
بە كیسەی زۆرانبازیم هاتییە بەرچاو
بە مشتان وەرتگەڕامێ‌ ،
ئەوەی لە كاتی خۆیدا نەمدایتێ ‌ ..
كیسەكە دەهات و دەچوو ،
دوور دەكەوتەوە ..
پاشان بە هێزێكی زۆرترەوە
دەگەڕایەوە ،
مشتی دیكەی لێبوەشێنم
جارێكی دی وەك دڕندەیەكی برسی
دەهاتەوە ..
وا مامەوە ،
تا هەستم كرد شەكەت بووم ..
بە دەستەكانم گرتم
بە جومگەی پەنجە قڵیشاوەكانم
سەرم پێ كرد
پڕ بوون لە خوێن و
بە ڕوونی
گوێم لە هەناسەبڕكێی خۆم بوو
وێنەی ئاژەڵێكی تۆقیو
خێراتر دەبوو .

(*) خانمه‌شاعیرێگی گەنجی سورییە ، یەكێكە لەو شاعیرە ژنانەی ڕەخنەگران ئایندەیەكی لە شیعری نوێی عەرەبی تیا دەبینن .

• له‌ سايتى گۆڤاری (كـيـكا)وه‌ كراون به‌ كوردى . بڕوانه‌ :
  http://www.kikahmagazine.com/?p=5486

ناوی كتێب: ریشاڵی تیۆریی رۆمانی كوردی
بابەت : توێژینەوە
نوسین : سەڵاح جەلال
دیزاین: هونەری: سەركەوت پینجوێنی
دیزاین بەرگ : محمد علی قەرەداغی
ساڵی چاپ : 2023سلێمانی
چاپخانەی جارانی سلێمانی
نرخ : 2000 دینارە
چاپ : چاپی یەكەم
لەبەرێوەبەرێتی گشتی كتێبخانە گشتییەكان ژمارەی سپاردنی(1422)ی 8/3 ی ساڵی 2023ی پێدراوە ..

بۆ خوێندنەوەی ئەم کتێبە کلیکی ئێرەبکەن..

چاوخشانێک بەسەر رۆڵی سوپای پاسدارانی دەسەڵاتی ویلایەتی فەقێ لە شەڕی رۆژهەڵاتی ناوەڕاستدا!

بە پشتبەستن بە ڕاگەیاندنەکانی سوپای پاسدارانی ویلایەتی فەقیهی ئێران، سوپای پاسداران لە شەوی ٢٥ی ڕێبەندانی ١٤٠٢ (2024) بە ٢٤ مووشەک هێرشی کردە سەر هەرێمی کوردستانی عێراق و ناو خاکی سوریا. پێش هەموو شتێک ئەم دەستدرێژیکردنە ئاماژەیە بۆ ئەوەی کە دەستپێشخەر و دەستپێکەری شەڕی ڕۆژهەڵاتی ناوەڕاست ڕژێمی ویلایەتی فەقێ بووە. چونکە ئەم مووشەکانە ڕاستەوخۆ لە ناوخۆی ئێرانەوە هاوێژراون و سوپای پاسداران بە فەرمی بەرپرسیارێتیی لە ئەستۆ گرتووە و وەزارەتی دەرەوەی رژێمی ئێرانیش چەندین جار پشگیریکردنی خۆی لەم تاوانە راگەیاندووە!
ئێستا پرسیار ئەوەیە، بۆچی رژێمی ئێران بڕیارێکی ئاوا مەترسیداری دەرکردووە؟ لە کاتێکدا خامنەیی و ئۆرگانی سوپای پاسدارانیش زۆر باش دەزانن، درەنگ یان زوو، کۆمەڵگەی نێودەوڵەتی درک بەو ڕاستییە دەکات کە “سەری رەشەماری شەڕخوازی لە ڕۆژهەڵاتی ناوەڕاست” لە “تاران”ە و ئەوانیش بە ناچاری “هەنگاوی بەرامبەر” دەگرنەبەر!
سەری رەشەماری ویلایەت لە تارانە!
ئەمە فۆرمولەیەکی وردە بۆ دۆزینەوەی ڕەگ و ڕیشەی زۆرێک لە کێشەکانی ڕۆژهەڵاتی ناوەڕاست، کە خاوەن و ئاڵاهەڵگرەکەی، هەر ئەو تاکە لایەنە مەترسیدار و بەرانبەرە سەرەکییەی دەسەڵاتی دیکتاتۆریی ئایینی لە ئێرانە. واتا “ئەنجوومەنی نیشتمانی موقاومەتی ئێران”!
ئەم فۆرمولەیە باس لە ستراتیژییەکی رەسەن و بە پرەنسیپ و جەماوەری دەکات کە خاوەنەکەی، هەمیشە و لە چەند دەیەی ڕابردوو و بە تایبەتی لە چەند مانگی ڕابردوودا، سەرنجی کۆمەڵگەی جیهانیی بۆ ئەم راستییە راکێشاوە و بانگەشەی بۆ داوە! چونکە دەسەڵاتی دیکتاتۆریی ئێران، هەڵگر و خاوەنی کارنامە و پێشینەیەکی پڕ لە پێشێلکردنی بەها و یاسا مرۆییەکانە لە ناوەوە و دەرەوەی ئێران!
تا ئێستا هیچ حکومەتێک بانگەشەی ڕووخاندنی دیکتاتۆری لە ئێران نەکردووە و هیچ تاک و لایەنێکی خەباتکار و جەماوەری لە ئێرانیش چاوی لەسەر شتێکی لەمجۆرە نەبووە و نییە. ڕووخاندنی دیکتاتۆرییەت لە ئێران، کاری گەل و موقاومەتی ئێرانە. بەڵام سیاسەتی (سازان لەگەڵ دیکتاتۆرییەت لە ئێران)، هەمیشە “بەربەستێکی گرنگ” بووە لەسەر ڕێگای بەرخۆدانی گەل و لە ئەنجامدا فاکتەری مانەوەی دیکتاتۆرییەت بووە لە ئێراندا. بە واتایەکیتر، ئەگەر سیاسەتی (سازان لەگەڵ دیکتاتۆرییەت) نەبوایە، ئێستا دەسەڵاتی ئایینی بوونی نەدەبوو و بارودۆخی ئێران و ناوچەکەش جیاواز دەبوو!
زەمەن گۆڕاوە!
بە ڕاپەڕینی جەماوەری و سەرتاسەری لە ئێران لە ساڵی ١٤٠١ (2022)و بە تایبەتی شەڕخوازیی ئەمدواییەی حکومەتی ئایینیی ئێران لە ڕۆژهەڵاتی ناوەڕاست، ڕووبەڕووبوونەوەی گەل بەرانبەر دیکتاتۆرییەت “خاڵی وەرچەرخان”ی تێپەڕاند! و چەند هۆکارێکیشی ئەمانەن:
• هەموو گەلانی جیهان بینییان و بیستیان کە دەسەڵاتی دیکتاتۆریی ئایینی لە ئێران، دەسەڵاتێکی ناشەرعییە و خەڵکی ئێران نایانەوێت. ئەنجامەکەشی ئەوەیە کە ئەم حکومەتە، نوێنەرایەتی خەڵکی ئێران لە کۆمەڵگەی نێودەوڵەتیدا ناکات!
• لە ماوەی 45 ساڵی ڕابردوودا، خەڵکی ئێران باجی زۆر قورسیان داوە بۆ ئازادی و دیموکراسی، نەک هەر بۆ ئێران، بەڵکو لە مێژووی گەلانی جیهاندا و لە پێناو گەیشتن بە ئازادی و مافی مرۆڤدا!
• سیاسەتی (سازان لەگەڵ دیکتاتۆرییەت) هەمیشە لە خزمەتی مانەوەی دیکتاتۆرییەتدا بووە و یەکەم قوربانی ئەم سیاسەتە ترسناکەیش، خەڵکی ئێران بووە!
کەواتە، دۆزینەوەی وەڵامی ئەو پرسیارەی سەرەوە ئەوەندە قورس نییە! چونکە دەسەڵاتی دیکتاتۆریی ئایینی لە چوارچێوەی سنوورەکانی ئێراندا زۆر لاواز و ناسک کراوە و بەرەو داڕمان و رووخاندن دەچێت. ئەم دەسەڵاتە، لە پرۆسەی داڕماندا، پەنا بۆ هەموو تاوانێک دەبات، ئەمەش یەکێکە لە نیشانەکانی بەرەوکۆتایی چوونی ئەم دەسەڵاتە!
ئەگەرچی لە کۆڕ و کۆبوونەوەکانی جیهاندا و لە ناو خەڵک و موقاومەتی ئێراندا گومانی تێدا نەبووە کە دەستپێکەری شەڕ لە ڕۆژهەڵاتی ناوەڕاست، دیکتاتۆریی ویلایەتی فەقێهی بووە، بەڵام مووشەکبارانکردنەکانی ئەمدواییەی هەرێمی کوردستانی عێراق و سوریا و پاکستان، لە لایەن سوپای پاسدارانەوە هیچ گومانێکی نەهێشتەوە کە “سەری رەشەماری ویلایەتی فەقهیی شەڕانگێز لە تاران”ە.
ئیدیعای گاڵتەجاڕانەی دیکتاتۆریی ویلایەتی فەقیهی دەربارەی شەڕخوازی و مووشەکبارانکردنەکەی ئەمدواییەی، سەبارەت بە (پاراستنی ئاسایشی نەتەوەیی وڵات)، وەبیرهێنانەوەی ئیدیعا و ناونانی شەڕی هەشت ساڵەی ئەم ڕژێمەیە بەرانبەر بە عێراق لە ژێر ناوی (دیفاعی موقەدەس) واتە “بەرگریکردنی پیرۆز”. شەڕێک کە (خومەینی) بونیاتنەر و دەستپێکەر و هۆکاری سەرەکی بوو تیایدا و سازشکارانی ڕۆژئاوایی “یارمەتیدەرە نەبینراوەکانی” بوون، واتا (ئیمدادگەرانی غەیبی). بەڵام هەر لە سەرەتاوە بۆ خەڵک و بەرخۆدانیان روون و ئاشکرا بوو کە، شەڕهەڵایساندن و شەڕفرۆشیەکانی رژێمی ئێران، پۆششێک بوو بۆ سەرکوتکردنی ئازادییەکان لە ناوخۆی ئێران و لەباربردنی دیموکراسی لە ناو کۆمەڵگای ئێراندا!
لە کارنامەی ڕژێمی ویلایەتی فەقیهیدا “شەڕفرۆشتن” و “هەناردەکردنی تیرۆریزم” ناو نراوە (بەرگریکردنی پیرۆز) و (پاراستنی ئاسایشی نەتەوەیی)، “سەرکوتکردن و ئەشکەنجەدان و لەسێدارەدان و کوشتنی نەیاران” ناو نراوە (سزای ئیسلامی) و هەر نەیاربوونێک بەرانبەر بە دیکتاتۆرییەتی ویلایەتی فەقیهیش بە (دژایەتیکردنی ئیسلام) ناوزەد کراوە! هەر لەبەر ئەم هۆکارەیە کە زیاتر لە چل ساڵە خەڵک و موقاومەتی ئێران، لە هەوڵی ڕووخاندنی دەسەڵاتی دیکتاتۆریی ئایینیدان لە ئێران و پاشەکشەیان نەکردووە لەم داواکارییە ڕەوایە و تێچووی زۆریان بۆ داوە. گەل و موقاومەتەکەیان پێیان وایە ئەم دەسەڵاتە، دوژمنی ئێران و دوژمنی ئیسلام و دوژمنی خەڵکی ئێران و ناوچەکەیە. هەر لە بەر ئەمەشە دەسەڵاتی ئێران لە ڕاپەڕینی گەل و بەردەوامبوونی راپەڕین بە تەواوی تۆقاوە!
مێژووی هەموو نەتەوەیەک، بەڵگەیە لەسەر ئەوەی کە، گەل ئەوەی دەیەوێت بەدەستی دەهێنێت. بە تایبەت کە ئێستا خەڵکی ئێران خاوەن تۆڕێکی بەرفراوانی ناوەندەکانی شۆڕش (کانونەکانی شۆڕش)ە لە سەرتاسەری ئێران. ئەم ناوەندانە سەرنجیان لەسەر پانکردنەوەی سەری ماری ویلایەتی فەقێهی و کۆتاییهێنانە بە کارنامەی لێوانلێو لە تاڵان و کوشتن و شەڕخوازاییەکانی ویلایەتی فەقیهی و، بە تایبەتی نەهێشتنی ئۆرگانی سەرکوتکردن و کوشتاری گەل، واتە سوپای پاسداران. هەروەک چۆن (دیکتاتۆرییەتی شا)یان بۆ هەمیشە رووخاند، دۆسیەی ئەم دەسەڵاتەیش دابخەن. ئەوان موژدەهێنەری ئارامی و ئاسایش و پێکەوەژیانی هێمنانەن لە ئێران و ناوچەکەدا!

عەبدولڕەحمان گەورکی، نووسەر و شرۆڤەکاری سیاسی

---

یەکێک لە دەستکەوتە گرنگەکانی شۆڕشی ژن ژیان ئازادی خستنەبەرچاوی شۆڕشە وەک تاکە ڕێگا بۆ ڕزگارکردنی کۆمەڵگا لە ئاستێکی کۆمەڵایەتی فراوان و جەماوەریدا. هەر لە سەرەتاوە گەنجان و خەڵکی ڕاپەڕیوو ڕایانگەیاند، “پێی مەڵێن ناڕەزایەتی ،ناوی بووەتە شۆڕش” و هەموو ڕۆژێک جەختیان لەسەر ئەوە دەکردەوە “تا کۆتایی دەوەستین”!
ئەم دەستکەوتە لە ئاسمانەوە نەهاتە خوارەوە. شۆڕشی ساڵی ١٤٠١ لەسەر شانی ڕاپەڕینەکانی ٧٨ و ٨٨ و ٩٦ و ٩٨ دروست بووە و لە هەر یەک لەو قۆناغانەدا حیزبێک هەبوو کە ئەم ڕاپەڕینانە بە بزووتنەوەیەکی جەماوەری بۆ ڕووخاندنی حکومەت و ڕاپەڕینێکی شۆڕشگێڕانە و بە شۆڕش بۆ ئازادی و یەکسانی ناوی دەبردن، تەنانەت ئەگەر وەک مانگی تیری، لە ساڵی ١٣٧٨دا بزووتنەوەکە لە چوارچێوەی هێڵی ڕیفۆرمخوازیدا دروست بوو بوو، یان وەک ڕاپەڕینی ١٣٨٨ بیانوویەک بوو بۆ دەستپێکردنی بزووتنەوەکە.
قۆناغێک بوو کە هێڵی گۆڕانکاری و چاکسازی لە کەشوهەوای ناڕەزایەتی کۆمەڵگادا دەستی باڵایان هەبوو. لە سەردەمی خاتەمی و ڕوحانی و تەنانەت پێش ئەوەش لە سەردەمی سەرۆکایەتی ڕەفسەنجانیدا، باس وخواستی چاکسازی و گۆڕانکاری لە نێو هێزەکانی ئۆپۆزسیۆن و لە کۆی کۆمەڵگادا بەربڵاو بووە. قۆناغێک بوو کە ئۆپۆزسیۆنی ڕاستڕەو ئاڵای گۆڕینی ڕژێم و دەستووری بنەڕەتی و قەیران دروست کردنیان لە سنوورەکان و لەگەڵ بزووتنەوەی سەوز و وەنەوشەیی بەرز کردبووەیەوە، سەردەمێک بوو تەنانەت بەشێک لە هەڵسوڕانی بزووتنەوە ناڕەزایەتییەکان بوون پەڕۆی بەختی خۆیان بە پێشهاتەکانی ناو حکومەتەوە بەست بوو. هه موو ئه و هێز و بزوتنه وه ڕاستڕه وانه نەک ته نیا باسی گرنگی و خواستراوی شۆڕشیان نەدە کرد، به ڵکوو به نموونه ی توندوتیژی و ئاژاوه یان له قه ڵه م ئەدا و به ووشه ی وه ک فیتنه و ئاژاوه و خەیاڵ ناویان دەهێنا. تەنانەت هەندێک لە چەپەکان پێیان وابوو کە قۆناغی شۆڕشەکان کۆتایی هاتووە. بەڵام حسابی جەماوەری خەڵک جیاواز بوو لەو هێزانە.
لە هەموو ئەو قۆناغانەدا، جەماوەری خەڵک لە هەر شوێنێک هاتبنە مەیدانەوە، ئامانجیان ڕوخاندنی تەواوی حکومەت بوو. وە لە هەموو ئەو قۆناغانەدا حیزبێک بوو کە بەردەوام ئاماژەی بەم خاڵە دەکرد، جەوهەر و مانای ڕاستەقینەی بزووتنەوەی جەماوەری خەڵکی پیشان دەدا، ئاسۆی شۆڕش و گۆڕانی ڕیشەیی تەواوی سیستەمەکەی بە هێزی شۆڕشەوە دەخستە بەردەم کۆمەڵگە، لە چوارچێوەی ڕواڵەتی دووی خوردادی-لەو هەڵبژاردنانەی کە بزووتنەوەی ڕوخاندنخوازی خەڵک لە هەندێک کاتدا لەخۆی دەگرت، لەوە زیاتر تێپەڕی و بە بڵاوکردنەوەی مانیفێستەکانی ڕووخاندن، دە داواکاری شۆڕش، چوار پایەی شۆڕش، مانیفێستی شۆڕش و لێدوان و بانگەوازی شۆڕشگێڕانە، خەباتی کرد بۆ قووڵکردنەوەی تەوەری شۆڕش و داواکارییەکانی شۆڕشی خەڵک. پەرەسەندنی کۆمەڵگاش بە هەمان پرۆسەیدا تێپەڕی.
ڕاپەڕینی ساڵی ١٣٧٨ بە ناڕەزایەتییەک دژی داخستنی ڕۆژنامەی دووی خۆردادی سەلام دەستی پێکرد و بە شەڕی شەقام لەگەڵ بەکرێگیراوانی حکومەت کۆتایی هات و بە ڕاپەڕینی دیمە و دروشمی مەرگ لەسەر بنەمای ڤێلایەت الفقیح کۆتایی هات. لە ساڵی ١٣٩٦ کۆمەڵگە بە دروشمی “ریفۆرمخوازی ئوسوڵگەرا، ئیتر چیرۆکەکە کۆتایی هات” دەستی پێکرد و تەحەدای تەواوی حکومەتی کرد و ئەمەش سەرەتای ڕووبەڕووبوونەوەی ڕاشکاوانە و بێ پەردەی شەقام بوو لەگەڵ هەموو حکومەتەکەدا. لە ڕاپەڕینی ساڵی ١٣٩٨دا کۆمەڵگە وەڵامی تاوانەکانی حکومەتی دایەوە، تەنانەت دوای تەقەکردن لە فڕۆکەی ئۆکرانیش، بە دروشمی “دەبێت کۆماری ئیسلامی لەناوببرێت” و لە ساڵی ١٤٠١دا ڕایدەگەیەنێت کە ناونراوە شۆڕش! ڕایگەیاند ژن ژیان ئازادی، ڕایگەیاند کە حیجابی بێ حیجابییە، ڕایگەیاند کە ئەمە شۆڕشی ژنانەیە ڕایگەیاند کە هەموومان پێکەوەین، ڕایگەیاند کە سزای لەسێدارەدان بۆ هەر تاوانێک تاوانە ، یەکێتی یەکێتی دژی هەژاری و گەندەڵی ڕاگەیاند، ڕایگەیاند کە تا کۆتایی وەستاوین و… وایکرد جیهان پێی سەرسام بێت!
ئەمە مێژووی ئاڵوگۆڕو لەهەمان کاتدا مێژووی پێشکەوتنەکانی حیزبێکیشە کە بە درێژایی چالاکییەکانی بەردەوام جەختی لەوە دەکردەوە کە شۆڕش تاکە ڕێگای دەربازبوونە، حیزبێک کە ٢٣ ساڵ لەمەوبەر ڕایگەیاندبوو کە شۆڕشی ئێران شۆڕشێکی ژنانە دەبێت، ڕایگەیاندبوو کە هەموومان پێکەوەین، ڕایگەیاندبوو حیجاب دیواری ئاپارتایدی سێکسییە، ڕاگەیاندبوو شۆڕشی ئینسانی بۆ کۆمەڵگایەکی ئینسانی ، و بەردەوام لە دژی لەسێدارەدان و ئیسلامی سیاسی، ئاپارتایدی سێکسی و حیجاب، و دژی تەواوی سیستمی کۆماری ئیسلامی لەشەڕدا بوو.
شۆڕشی ژن ژیان ئازادی ڕەنگدانەوەی دیداری کۆمەڵگا بوو لەگەڵ حیزبی شۆڕش: حیزبی هەقانیەت و خواستراو سیاسەت و هەوڵەکانی دەیان ساڵەی خۆی لە شێوەی کۆمەڵگەیەکی ڕاوەستاودا وەرگرتەوە و کۆمەڵگاش نوێنەرایەتی خواست و ئامانجە ئینسانیەکانی خۆی لەسیمای حیزبە شۆڕشگێڕەکەی خویدا!
بژی شۆڕش!
بژی حزبی کۆمۆنیستی کرێکاری!
٢٠ی دی مانگی ١٤٠٢، ١٠ی جانیوەری ٢٠٢٤

من ئەمرم و

تۆ ئامادە نابیت ،

فاتیحایەک و پەرداخێ ئاوی سەفەریی بخۆیتەوە..

لە شارێکی ئەڵمانیی ،

خۆتت داوە لە تەل ،

قژت زەرد کردووە ..

دەستبەندێکی پەلکە زێڕینە ،

لە مەچەکتا ئەبریسکێتەوە ..

بە تەمای ئەڵمانییەک پێت بڵێ :

مۆگن ..

بەڵام بە قێزەوە تەماشات ئەکەن و

جنێوی ناشیرینت پێدەدەن ،

یەکێکیان ئەڵێ :

Heimatverkäufer, schmutzig

وەرگێڕی گۆگڵ پێت ئەڵێ :

نیشتمانفرۆشی گڵاو !

من ئەمرم و

تۆ هەر نایشتەوێ بزانیت ،

لە گەلەرییەکی لەندەن ،

خۆت وا نیشان ئەدەی وەجاخزادەیەکی ئێرلەندیت ..

مستیلەی ئەڵماس و

سەعاتی ڕۆلێکس نیشانی هامشۆکەران ئەدەی ،

دوو ئینگڵیز ئەڵێن :

ئەم ڕێوییە ڕۆژهەڵاتییە،

بە چ بوێرییەکەوە گەیشتۆتە ئێرە ؟

دانەیەکیان ئەڵێ :

ببوورە ! ئێرە جێی سواڵکەر و سۆشیاڵخۆر نییە ،

بڕۆرە دەرەوە هەتا سەگەکەم تێ بەرنەداوی ..!

من لە ئێوارەیەکی بێ حوکمەتیدا ..

لە میللەتێکی بەرەڵڵاکراودا ..

لە شارێکی بێ شارەوانیدا ..

لە کۆڵانێکی پڕ لە پشیلەی برینداردا  ..

سەگەلێکی بەرەڵڵا ئەمخۆن

تۆ لە کتێبخانەیەکی نەمسادا ،

وا خۆت نیشان ئەدەی پسپۆڕیت لە فریدریک نیتشەدا هەیە و

داوای دەستنوسێکی ئەکەیت ،

سمێڵ بابڕێکی وەک گۆنتەر گراس ،

داوای ناسنامەت لێ ئەکا ..

تۆ ئەڵێی پاسپۆرتەکەم لە هۆتێلە ..

پاسپۆرتی سان لویسە !

سمێڵ بابڕەکە هەناسەیەک هەڵئەکێشێ  و

بە تووڕەییەوە ئەڵێ :

لەعنەت لە دۆمینیکان و سان لویس و هەرچی دورگەی ئینگڵیز هەیە!

هەر ئێستا ئەڕۆیتەوە بۆ هۆتێل و

جانتاکانت ئەپێچیتەوە و

ئەگەڕێیتەوە کاولبووەکەی خۆت ..

نە دەنگتان ، نە بۆنتان ، نە عەقڵتان لێرە جێیان نابێتەوە ..

لەبەر دەرگا ،

سەگێکی وۆڵف دۆگ بە دەستی خانمێکەوە ،

خۆی ڕائەپسکێنێ و

قەپاڵێ لە ڕانت ئەگرێ ..

ئەو ڕانەی لێرە پەمەیی بوو ،

لەوێ شین و مۆر هەڵئەگەڕێ ..

یەکسەر پۆلیسێ داوای کارتی نیشتمانی و کارتی تەندروستی و بانکیت لێ ئەکا ..

کە ئەزانێ هیچیانت نییە و

هێشتا بە سەفتە پارە وەرئەگری ،

پێت ئەڵێ : سوپاسی خوا بکە ، کەڵبەیەکی سەگەکە نەشکا ،

ئەگینا ئەبوو قەرەبووی بکەیتەوە ..!

ئەڵێ خۆت و ڕانت ، بڕۆن لە کلینیکێکی پریڤەیت چارەسەری خۆتان بکەن ، تەنانەت سەگەکانیشمان نایەوێن ..

منیش بە دەم گیاندانەوە ،

لە تەلەفزیۆنی قاوشێکی کەڕواویی

نەخۆشخانەیەکی میرییدا ، کە بێجگە له ئیزرائیل ، کەسی تری لێ نییە ..

لە بەرنامەیەکی حیزبیدا ،

سەرۆک ئەبینم ، بەرگدرووەکەی پێی ئەڵێ :

قوربان ئەم بۆینباخە ڕێک هەمان بڕاندی بۆینباخەکەی بەرلسکۆنییە و

چاکەتەکەیشت هەمان چاکەتەکەی

ئیمانوێل ماکرۆن …!

سەعاتەکەیشت،ڕێک ئەوەی دەیڤید بێکام ..

مەرگ ڕێگام نادا بزانم فانیلە و دەرپێکورت و گۆرەوییەکانی سەرۆک ،

چ بڕاندێکن و.. ڕێک وەک ئەوەی چ شا و شاهانشایەکن ..

بۆ خوێندنەوەی كتێبی: زانین سەرت دەخات.. کلیکی ئێرەبکەن..

گلێنه‌ی شه‌وی ئه‌ستێره‌نشین
ویستی تاریكی له‌ روو داماڵێ
چوار كێلی بڵند له‌ زامی گێتی
جریوه‌ی مه‌لی خزانده‌ چاڵێ
پرسه‌ی رۆژێكی سامناكیان سازدا
ئاسمان له‌ شینی په‌پووله‌ی ژاكاو
خه‌ناوكه‌ی ئه‌شكی خاكیدا له‌ چڵ
به‌رامه‌ی خه‌نده‌ی پێڵووی ئاوی وێڵ
تیشكی ره‌وه‌ندیان له‌ ده‌روون تاسان
مانگ له‌ ژێر تیله‌ی زمانی ئه‌سكڵ
په‌لكی هه‌ڵاڵه‌ی كه‌شی هه‌ڵوه‌شان
زریزه‌ی خوێنی وه‌رزی سه‌ربڕاو
له‌ ناڵه‌ی رۆژدا سه‌ری نایه‌وه‌
تروسكه‌یه‌ك له‌ دووره‌وه‌ ده‌ركه‌وت
گزنگ چاوه‌ڕێی ژوانی به‌یان بوو
به‌ ده‌رفه‌تێكی ئاوه‌ژووی مه‌ییو
له‌سه‌ر شه‌خته‌ی روح
وه‌كوو كۆترێكی هاوجووت نێژراو
گمه‌ی غه‌ریبی ده‌نگی دایه‌وه‌
چوار كێلی بڵند له‌ زامی گێتی
بوونه‌ ناونیشان چوار گۆڕی تاساو
ئه‌درێسی شاریان له‌ روو داماڵی
به‌ره‌و په‌رستگای دونیایه‌كی راست
به‌های شه‌وگاریان به‌ ئاسمان سپارد
له‌گه‌ڵ جووتێك رێ
بۆ سه‌فه‌رێك دوور
بوون به‌ دوو هاوڕێ
هه‌ر كه‌س به‌ ژانی شه‌وه‌ زه‌نگه‌وه‌
ده‌ستیان نا به‌ رووی به‌ره‌ی جه‌نگه‌وه‌
له‌ مه‌زارێكا بێ وێڵگه‌ی هاوشین
بوونه‌ چراخان بۆ گرده‌ نشین

ستار ئەحمەد