سۆراخ … شوان سەعید

ئێوارانێک بە ڕێکەوت
نزیکی یەکێک لە دارسنەوبەرەکانی ئەو شەقامەی
جاران ماڵی ئێوەی لێ بوو
کچێک پێی دەخاتە سەر سێبەرەکەم،
کچێک…
ڕەنگی چاوەکانی لە ڕەنگی چاوی تۆ دەچێت،
منیش ڕووی لێ وەردەگێڕم و وەک ئەوەی
سێبەرەکەم ئازاری هەبێت،
لەناخی دڵمەوە دەگریم
پێی ناڵێم پێشتر کچێکم خۆشدەویست چاوەکانی
لە چاوەکانی تۆ دەچوون،
بەڵام ئەو بانگم دەکات و داوای لێبوردن دەکات و
پێیەکانی لەسەر سێبەرەکەم لادەدا و لە سووچێکی
شەقامەکە لە چاوم ون دەبێت…!!

ڕۆژێک کچێک بە تەنیشتی کوپە قاوەکەیەوە
دەستی لەسەر تەنیاییم بوو
ڕۆژێک کچێک لەناو دەنگی هەناسەمدا
بۆ برینەکانی ڕابردووم دەگەڕا،
ڕۆژێک کچێک جانتای کەلوپەلەکانی
ڕابردووی لێ دزیم و
لەناو دەفتەری ئازارەکانم،
لەناو ئەلبوومی ساڵانی زانکۆم
بۆ ڕەنگی چاوی تۆ دەگەڕا،
چاوی تۆ، کە ببوون بە برین”
“بەسەر دڵی منەوە
هەر ئەوەندەی زانی ڕەنگی چاوی خۆی،
لە ڕەنگی چاوی تۆ دەچێت،
بە هەزار قاچ لە ژیانی من هەڵهات و جێیهێشتم،
ئەو دەیوت:
خۆشەویستنی تۆ ترسناکە،
مرۆڤ، لەناو ئەو هەموو خۆش ویستن و
گرینگی پێدانەی تۆدا هەناسەی تەنگ
دەبێت و دەخنکێت ..!!

بەیانییەک .. بوونی تۆ کەمێک ڕژابووە
ناو لەچکی سووری کچێکەوە،
بەیانییەک .. هەستێک پێی دەوتم: ڕەنگە
تۆ لەم نزیکانە بیت،
بەیانییەک چاوم لەسەر دەرگەی داخراوی
تەکسییەکان بوو،
بەیانییەک دوای ئەو هەموو ساڵ و مانگ و
ڕۆژە،
من هێشتا تۆم لەبیر نەکردبوو…
بەیانییەک ئەو کچە لەچک سوورەی
لە تێرمیناڵی باکوور، پشتی لە من بوو
ئەوکچەی پێی لەسەر سێبەری
یەکێک لە موسافیرەکان دانابوو،
حەزمدەکرد کاتێک ئاوڕ بۆ لای من دەداتەوە،
بەتەنها تۆ بیت،
تۆ بیت و کەسی تر نا ..!!

شوان سەعید

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.