كۆچ … عه‌بدولوه‌هاب شوانی
له‌م هیچه تاریكه ده‌رم بێنه
گیانی منت زۆر ئازاردا
له دووباره‌ی ووته‌كانی تۆ بێزارم
دڵم به‌م شه‌قامانه ته‌نگه
ته‌مه‌نێك له‌گه‌ڵ تۆ گفتوگۆم كرد
په‌نجه‌ره‌ی ئه‌وینێكت نیشان نه‌دام
ئێستا هه‌ر یه‌كێكتان پاشایه‌كن ، ئیمپڕاتۆرێكن بۆ خۆتان
من سوپام نه‌بوو ، وه‌ك تۆ بوونه‌وه‌رێك نه‌بووم
پڕ بم له منداڵی و نیوه‌شم له ئه‌هریمه‌ن.
هێزی من خۆشه‌ویستی بوو
له‌شكری تۆ ڕق
ووزه‌ی من ته‌نها سۆزبوو
سوپای تۆ كینه
ئاخر تۆ ده‌ستت له ته‌ور و
دڵت له كێو خواستووه
په‌نجه‌كانت له چڕنووك و
ددانه‌كانت له كه‌ڵبه‌ی گیاندارانی تر دزیوه
ئاخر تۆ دڕنده‌ی
تۆ به شكانی دڵی من، دڵت خۆش ئه‌بێ و
له نێو فرمێسكه‌كانم كه‌ف و كوڵت داده‌مركێته‌وه
تۆ، كوا وه‌ك (سوهراب) تیشكه جوانه‌كانی خودا ده‌بینی؟
كوا له‌وه تێده‌گه‌ی باخچه‌ش توانای گۆرانی گوتنی هه‌یه؟
من دام نابوو تۆ دیواری ته‌نهاییم بڕوخێنی
وه‌ك خوێن و له‌ش
وه‌ك لێو و هه‌ناسه له لات ئۆقره بگرم
به‌ڵام منت دایه ده‌ست ژووره نه‌خۆشه‌كان
ئیدی ده‌بێ ئه‌مشه‌و بڕۆم
خه‌ریكه بۆنی كۆچم لێبێ
ته‌نیا له‌گه‌ڵ خۆمدا ده‌ڕۆم
ده‌ڕۆم و منداڵیت بۆ جێده‌هێڵم
ئاخر هیچ نیگایه‌كی عاشقانه‌م له تۆ نه‌بینی
هیچ كات نه‌گوت: ڕه‌نگی شیعره‌كانت له خۆت ده‌چن
جاریك نه‌تووت: شوانی
ده‌ڕۆم و هه‌ر ناڵێی: عه‌بدولوه‌هاب كێوه ؟.
………..
عه‌بدولوه‌هاب شوانی
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
