… كورته چیرۆك – په‌رله‌مانێ مشكان عبدالرحمن بامه‌رنی
په‌رله‌مانێ مشكان نه چیرۆكه‌كه بۆ زارۆكان هاتبیته نڤیسین و نه ژی ژوان چیرۆكانه، ئه‌ڤێن چیرۆك نڤیس ژ دورهێلی دره‌ڤن و نه‌شێن راسته‌وخو كارێكته‌رێن خوه ب مرۆڤان ب شوبهینن.. راشكاوانه‌تر بێژم، په‌رله‌مانێ مشكان ده‌ركه‌فتنه‌كا دییه ژ تێكستی و ئه‌ڤه ئێكم جار ژی نینه وه‌ك چیرۆك نڤیس، من تێكست بجهـ هێلابیت و ئه‌گه‌ر راستگوتر ژی بێژم، من مشكینی پێخوشتره، ژ ئه‌وا نوكه ئه‌ز تێدا مرۆڤ!
سه‌رسورمان نه‌مینه خوانده‌ڤایێ هێژا، ژبه‌ركو ئه‌زێ چیرۆك نڤیس بخوه ژی ئێك ژوان كه‌سان بووم، یێن من قه‌ستا سندوقێن ده‌نگدانێ كری و من ده‌نگێ خوه دایه ده‌ركه‌فتنا مشكه‌كی و سه‌دا سه‌د ژی من دزانی، مشك بتنێ یێن به‌روكێن خوه نه و هه‌ر تشتێ ئه‌و بچنه دناڤدا، ئه‌و تشت ژ خێرێ دكه‌ڤیت و ئه‌گه‌ر تو هه‌ڤته‌مه‌نێ من ژی بی، دێ بیرا ته ل شه‌رێ گێسكی و ستێركی هێت، چه‌ند جاره‌كێ ژنكان قیژی ڤه‌دابانه و گوتبانه ئه‌ڤه مشكه! مه هندی ئێك د مالێڤه هه‌ی، ئه‌م لدوور ده‌رئێخستنا وی مشكی دئێك ده‌نگ بووین، ئه‌ڤه دیتنا من بوو، ژ بۆ (مه‌حشه‌رێ) مشكان، ده‌ما داخواز ژ من هاتیه كرن، كو ئه‌ز ژی بده‌نگێ خوه، به‌شداریێ د پروسێسا هه‌لبژارتنا په‌رله‌مانێ مشكاندا بكه‌م و من مافێ ده‌نگدانێ ژی هه‌بیت.
كاندیدكرنا به‌ربژێران ل سه‌ر بنه‌مایێ سه‌نگا عه‌شیرێ و پلا وی د پارتێدا و (واسته و واسته‌كاریێ) نه‌بوو، ببورن ئه‌گه‌ر شروڤه‌كرنه‌كا زێده‌تر بده‌مه سه‌ر شێوازێ ده‌ست نیشانكرنا كاندیدان.. ل به‌راهیێ، مشكێن گه‌ور هه‌بوون و مشكێن گوهـبه‌ل و مشكێن ره‌نگ خولیكی، هه‌لسه‌نگاندنا هه‌ر جوره‌كی ژی رێكارێن خوه هه‌بوون، ئه‌ڤ رێكارێن هه‌نێ ژی دبن چه‌ندین فلته‌ران را ده‌رباز دبوون، بۆ نمونه، مشكێن گوهـبه‌ل، سالوخه‌تێن وان چاڤێن وان د بلوق و دفنێن وان درێژ و كوریا وان یا كورت بوو، ئه‌زموونه‌كا درێژ دگه‌ل لێنانگه‌هێ هه‌یه و ئه‌وان كێمترین قوربانی د ده‌ستێن كابانیێن مالێدا هه‌نه و ب دروستكرنا كونێن ره‌ڤێ و خوه تێدا ڤه‌شارتنێ، د پێگوتینه.. مشكێن مه‌زن و گه‌ور، سالوخه‌تێن وان ژی د قت و قه‌له‌ون و ب ژیری و پلاندانانێن خوه، هه‌ر جهێ د لێنانگه‌هێڤه وان بڤێت ئه‌و قه‌ست دكه‌نێ و ئه‌و تشتێ وان دڤێت، دزانن ل كیرێ دێ بده‌ست كه‌ڤیت.. مشكێن خولیكی، سالوخه‌تێن وان ژی د كوری درێژ و ناڤ ته‌نگ زراڤ و سڤیلانكن، هه‌ر جهێ وان بڤێت دگه‌هنێ و بۆ ره‌ڤێ ل سه‌رێ رێزێنه و ئه‌گه‌ر پێدڤی بكه‌ت، ب دیواران ژیڤه هه‌لدچن.. نه بتنێ ئه‌ڤ فلته‌ره هه‌بوون، فلته‌رێن مه‌هـ و سالان و ئه‌ڤه ژی ب وه‌رزێن سالێڤه گرێدایی بوون و ئه‌و ده‌مێ هه‌لبژارتن تێدا دهێنه كرنێ، فلته‌رێن ناوچه‌یی و مه‌رجێن ده‌ست نیشانكرنا كاندیده‌كی ل گوندان جوداهیا خوه دگه‌ل ده‌ست نیشانكرنا كاندیده‌كێ دی ل باژێری هه‌یه و ده‌ست نیشانكرنا كاندیده‌كێ دناڤ خانیێ هه‌ژاره‌كیدا دژیت، جوداهیا خوه هه‌یه دگه‌ل ده‌ست نیشانكرنا كاندیده‌كێ دی د خانیێ زه‌نگینه‌كیڤه بژیت.
دا كو گه‌له‌ك ل سه‌ر ده‌ست نیشانكرنا كاندیدی نه راوه‌ستم، دێ زڤرمه سه‌ر ژمارا كورسیێن په‌رله‌مانی و جوداهیا دناڤبه‌را مشكان و مرۆڤاندا، ئه‌و هه‌ڤركیا دناڤبه‌را پارتێن مه یێن سیاسیدا هه‌ین، سالوخه‌تێن هه‌ر پارته‌كێ‌َ و ئامانجا هه‌ر پارته‌كێ، ئه‌گه‌ر پرانیا ده‌نگان بده‌ستڤه ئینان و دێ شێت چ خزمه‌تێ كه‌ت، هه‌مان ئامانج و هه‌ڤركی دناڤبه‌را مشكان ژیدا هه‌یه و كێبركیێ ل سه‌ر ده‌ستهه‌لاتێ دكه‌ن و ئه‌و ژی ل سه‌ر ڤی بنه‌مایی كاندیدێن خوه ده‌ست نیشان دكه‌ن.. لێ تشتێ من حساب بۆ نه‌كرین، دڤێ بگره و بكێشا به‌ربژێراندا و كی ژوان بهێته كاندیدكرن و كی بهێته دوور خستن، كی دێ شێت زێده‌تر ده‌نگان خرڤه‌كه‌ت و كی دێ ده‌نگێ خوه ده‌ت و كی ده‌نگی ناده‌ت، كی نیاسێ كێیه و كی دێ پاره‌ی زێده‌تر ده‌ت، كی دێ زێده‌تر ریكلاما خوه كه‌ت و وێنێن كێ دێ مه‌زنتر بن و كی دێ زێده‌تر سه‌ره‌دانان كه‌ت، هه‌میان دڤیان برییا ده‌نگدانا من، ئاشتیه‌كێ دناڤبه‌را مه‌حشه‌رێ مرۆڤ و مشكاندا دروست بكه‌ن، ل سه‌ر حسابا منێ مرۆڤ، بۆ خوه كونجه‌كێ، ئێكسه‌ر بۆ ناڤ لێنانگه‌ها مالێ په‌یدا بكه‌ن و ب ئازادانه، هه‌ر گاڤا ڤیا بچنه د سه‌تلا برنجی و تیركێ شه‌كرێدا وووووو..
ده‌ما هه‌لبژارتن بدوماهی هاتین و باشترین مشكێن سه‌ربور د هه‌ڤركیا دگه‌ل مرۆڤاندا هه‌ی و دێ چاوان شێن خوه ژ دربێن وان پارێزن، پرانیا ده‌نگان بده‌ست خو ڤه ئیناین.. هینگێ شنوی من زانی، جوداهیا دناڤبه‌را ده‌نگدانا مرۆڤ و مشكاندا چی یه و ئه‌و لدویڤ سه‌ربورێن ویێن لێنانگه‌هێ، بۆ تبلا خوه دحبری د هه‌لینن و ده‌نگێ خوه دده‌ن، ئه‌مێن مرۆڤ لدویڤ به‌رژه‌وه‌ندا پارتا خوه، تبلا خوه د حبری د هه‌لینن و ده‌نگێ خوه دده‌ین و ئه‌م قازین.
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
