![ئەنفال.. عەلی حەمەڕەشید ئەنفال.. عەلی حەمەڕەشید](https://dengekan.info/wp-content/uploads/2020/10/AliHamarashid.jpg)
ئەنفال.. عەلی حەمەڕەشید
Closed
زامی ئەنفال ساڕێژ نابێ و
ساڵانە نوێ دەبێتەوە
برینێکی بە ئازارە و
لە نیساندا دەکولێتەوە
…
وێنەکانیان ئەلبومێکی
پڕ یادگاریی نێو مێژووە
مۆسیقای ئازار و ژانە و
بەهەناوماندا ڕۆچووە
…
بەتەنها تاوانی ئەوان
ئەوە بووە کەوا کوردن
کەچی ڕژێم بێڕەحمانە
بەرەو دورگەی مەرگی بردن
…
وا بوون بە ناسنامەی گەلێک
تاهەتایە سەربەرز دیارن
لەنێو دڵی ئێمەی کورددا
وەک خۆرێکی پرشنگدارن