Skip to Content

لە پیشوازی ساڵی نوێدا ئومێد یان خۆشخەیاڵی … جەزا حسێن

لە پیشوازی ساڵی نوێدا ئومێد یان خۆشخەیاڵی … جەزا حسێن

Closed
by كانونی یه‌كه‌م 30, 2016 General

لە پیشوازی ساڵی نوێیدا کەسانێکی زۆر بە ئومێدەوە دەڕواننە ساڵی نوێ و پیرۆزبایی لە دۆستان و ئازیزانیان دەکەن. جێی خۆیەتی کە هەڵوەستەیەک بکەین و لەساڵی ڕابردوو ووردبینەوە تا بزانین ئەو ئومێدە یان ئەو هیوا و ئاواتانەمان چی بوون کە لەساڵی رابردوودا نەهاتنەدی و لەساڵی نوێدا دووبارە ئومێدەوارین کە پێیانبگەین.

زۆرینەی خەڵک لەساڵی نوێدا ئومێدەوارن کەساڵی نوێ ساڵی خۆشی و شادی بیت و ساڵی هاتنەدی ئاوات و ئارەزوەکانیان بێت. هەتا ئێرە لە جێی خۆییدایە و ئومێد بەژیانێکی باشتر هەمیشە خاڵێکی پۆزەیتیڤە بۆ هەموومان. بەڵام ڕاستیەک هەیە کە گرنگە لە هەموو کاتێکدا لەبیرمان بێت، ئەویش ئەوەیە کە بەدیهێنانی ئومێد و ئاواتەکانمان کاری دەوێت. ئاوات و ئامانجەکانمان تەنها بە خەون نایەنەدی، تەنها ئومێدخواستن بەس نیە، بەڵکو کاری جیدی بۆ بکەین و ڕیگەکانی گەیشتن پێیان بدۆزینەوە. لێرەوەیە کە پیاچوونەوەیەک بە ساڵی ڕابردوومان پێویستە تا ببینین کە ئەو هیوا و ئاواتانەمان چین کە نەهتنەدی و و پاشان بزانین ڕێگرییەکانی بەردەم ئەو ئاواتانەمان چی بووە؟ ئایا تەنها ئومێد و هیوای تاکە کەسی بوون یان خەڵکانی تریش چاوەڕێی گەیشتن بەو ئاواتانەن و چاوەڕێن ڕۆژێک هەناسەیەکی خۆشی هەڵکێشن و بگەن بەو ئاواتانە و لەگەڵ یەکدا شادبن پێی؟

کاتێک ئاوڕێك لەساڵی ڕابردوو دەدەینەوە و ئەو ڕوودا و کارەساتانە دەژمێرین کە ڕێگربوون لەبەردەم بەدیهێنانی خۆزگەکانمان، دەگەین بەو حەقیقەتەی کە هەوڵدانی تاکە کەسی بۆ بەدەستهێنانی ژیانێکی ئاسودە خەیاڵە و دەرئەنجامەکەی نائومێدیە. ئاخر لە دنیایەکدا کە کاولکاری، قازانجپەرستی و سەرهەڵدانەوەی کۆنەپەرستی دڕندانەترین بیروباوەڕ لەهەموو کات زیاتر بازاڕی گەرمە، مەحاڵە تەنها بە ئومێدخواستن و داگیرساندنی چەند مۆمێک بگەین بە بەهەشتی خۆزگە و ئاواتەکانمان.

لەژێر سایەی سیستەمی سیاسی و ئابوری ئەم سەردەمەدا، مرۆڤ و ئاوات و ئامانجە ئینسانیەکانی بیبەهاترین کاڵان. ڕۆژانە بەبەرچاومانەوە بەسەدان خەڵکی مەدەنی دەکرێنە قوربانی ساغکردنەوەی کێشمەکێشە سیاسیەکان و پاراستنی بەرژەوەندییەکانی دەسەڵاتداران و ئەو کۆمپانیایانەی کە زۆرینەی سەروەت و سامانی کۆمەڵگایان مۆنۆپۆلکردووە. ئەوانەی یاری بەژیان و گوزەرانی ملیۆنان مرۆڤەوە دەکەن. لێرەوەیە کە لە سیستەمێکی سیاسی لەم جۆرەدا هیچ ئومێدێک بەدیناکرێت بۆ باشترکردنی ژیانی زۆرینەی خەڵک.

بۆ کەسانێک کە ئومێدمان بەژیانێکی باشتر و ئومێد و ئارەزوەکانمان هەیە، دەبێت لەدەوری یەکتری کۆببینەوە. زۆرن ئەو مرۆڤە بێبەشانەی یەک ئاوات و ئامانجیان هەیە کە گەیشتنە بە ژیانێکی ئاسودە. بەڵام ئەگەرچی یەک ئامانجمان هەیە و سەرچاوەی بێمافیەکانمان یەکن، کەچی بەتەنها خەریکی ئاواتخواستن و خۆزگەین بۆ گەیشتن بە ئامانجەکانمان.

با لەم کۆتایی ساڵەدا ووردبینەوە لەساڵی ڕابردوو، بزانین ئایا چیمانکردووە و چەند هەنگاو بەرەو گەیشتن بە ئاواتەکانمان چووینە پێشەوە؟ ئایا لە خەمی هەمواندا بووین یان تەنها خەمی خۆمان؟ با لە خۆمان بپرسین ئایا بەدەربەستبووین بەرانبەر ئەو دۆزەخەی لەم ژیانەدا بۆمان دانراوە؟ ئایا لەخەمی ئەمڕۆ و سبەینێی نەوەکانمانداین؟ ئەگەر وایە چی بکەین و چۆن کاربکەین بۆ سبەینێیەکی باشتر لە ئەمڕۆ؟
ئێمە گەر کەمێک دیقەتبدەین ئەوا لەهەر جێگایەکی ئەم دنیایە دەڕوانین باسی ڕۆژ هەر باسی نادادپەروەری و نارازیبوونە لەم ژیانەی کە هەیە. بەڵام ئەم گلەیی و گازاندەیە بەبێ کارکردن و هەوڵدان بۆ دنیایەکی باشتر بێسودە. ئەگەر بمانەوێت لەساڵی نوێدا بگەین بە خۆزگە و ئاواتەکانمان ئەوا دەبیت بەرنامەی کار و چۆنیەتی کارکردنمان هەبێت. یەکگرتوبوونی ئەو مرۆڤانەی کە ئاواتیان ژیانێکی ئاسودەیە گەررەترین و بەهێزترین هەنگاوە لەم پێناوەدا. ئەمە چونکە ئەگەر نەتوانین کارێک بکەین بۆ هەنگاونان بەرەو ژیانێکی باشتر، ئەگەر نەتوانین لەخەمی یەکتریی و دابینکردنی سبەینێی نەوەکانماندا بین ئەوا ئیتر بەتەنها پیرۆزبایکردن و داگیرساندنی مۆمی سەری ساڵی نوێ دەبێتە خۆشخەیاڵی.

جەزا حسێن

دیسەمبەری ٢٠١٦

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish