پرووشەکانی ئەوین… 3- شیعری: ستیڤان شەمزینی
بەشی سێهەم…
هەرچی شاڕێگاکانی رۆحمەوە
دێتەوە بەردەم ماڵی ئەوینی تۆ
هەرچی رووبارەکانی خەیاڵمە
دەڕژێنە نێو دەریای خەونی تۆ
هەرچی تنۆکە بارانەکانی هەستمە
ئەبارێنە سەر دڵی نەرمی تۆ
تاکوو تۆ دەریا بیت
بەڵێن بێ منیش شەپۆلی عەشق بم
تاکوو تۆ ئاسمان بیت
بەڵێن بێ منیش خۆری ئەوین بم
بیرت بێت کە جۆرێکی ترم لە باران
لە بری ئەوەی بڕژێمە سەر جەستەت
دڵۆپ دڵۆپ ئەبارێمە ناو دڵت
رۆژژمێری تەمەنم رووەو کۆتایی ئەڕوا
جەستەی تەزیوم بە کورەی مەرگا گوزەر ئەکا
نەغمەی زیکری ئەشقم بە گوێی مەعشوق ناگا
بەپێوە ئەمرم و شیعرەکانم لای تۆ هەر هەناسە ئەدا
پێشتر نوقمی شەوەزەنگ بووم،
ئێستا لە رووناکی ئاهورامەزدا هەڵکێشراوم،
پێشتر پارچەیەک لە تووڕەیی بووم
هەنووکە لە میهری مەسیحدا تەعمید کراوم
ئەوسا وشکەساڵی رۆحی خواردبووم
ئێستا شەستە بارانی ئەشقی تۆ سەوزم ئەکاتەوە
ئەچمە ئەشکەوتی بێ بنی فەرهەنگ
ئەڕۆمە قووڵایی ئۆقیانووسی زمان
تا بە رازاوەترین شێواز بۆت بنووسم
بۆ ئەوەی هەستی شەیدابوونم
بە گەرم و گوڕیی ئاگری دڵمەوە بگاتە لات
تۆ چەشنی موعجیزەیەک هاتیت
لاپەڕەکانی دڵمت یەک یەک خوێندەوە
لە کۆتا لاپەڕەدا بەخەتێکی درشت نووسیت:
خۆشم ئەوێی و کتێبەکەت داخست!
لە بەرەبەیانی تەمەندا قاوەیەکم بۆ خۆم گرتەوە
لە بەختی مندا پەرییەکی دەریا دەرکەوت
لەوساوە تا ئێستا هەر چاوەڕوان بووم
وەختێک تۆ دەرکەوتی،
پەری ناو قاوەکەم ناسییەوە و
بڕوام بە جادوو هێنا
رەشەبای حوزن هات، تۆ هەر نەهاتی
گەردەلولی بێهودەیی هات، تۆ هەر نەهاتی
زریانی کوێرەوەریی هات، تۆ هەر نەهاتی
چرکە بێزارەکەرەکان هەموو هاتن، تۆ نەهاتی
رۆژەکان هاتن و رۆیشتن، تۆ هەر نەهاتی
لە کۆتاییدا مەرگ هات و
تۆ چەند خولەک دواتر گەیشتیت
بۆ ئەبەد ئەڕۆم، ئیدى
لەناو کتێبەکاندا بۆم بگەڕێ
لەناو حکایەتەکاندا گوێم لێ بگرە
لە ئەفسانەکاندا بمدۆزەرەوە
چوونکە، عەشق
باڵی دوا سەفەری پێبەخشیووم و
ئەبەد ناگەڕێمەوە
