Skip to Content

کازمیش باجەکەی دەدات.. شوانە حەسەن ئەبوبەکر

کازمیش باجەکەی دەدات.. شوانە حەسەن ئەبوبەکر

Closed
by December 23, 2020 General, Opinion

سیاسەتی ئەمڕۆی دراوی وڵاتان کارکردنە بۆ بەرزکردنەوەی نرخی دراوی نیشتمانی لەبەرامبەر نرخی دراوە بیانیەکان، ئەگەر لەحاڵێکدا سیاسەتی داشکاندنی نرخی دراوی نیشتمانیش لای هەندێ لە وڵاتان پەیڕەوبکرێت ئامانجی پشتەوەی سیاسەتێکی ئابوریە، بەڵام لەعێڕاقی نوێ سیاسەتی دراوی تەواو پێچەوانەیە، حکومەت لەبودجەی (٢٠٢١) دا سیاسەتی بەرزکردنەوەی نرخی دۆلاری لەبەرامبەر دینار داڕشتوە، بەڵام ئەم سیاسەتە گرفتەکەی ئەوەیە کەهەڵگری ئاقارێکی دارایی ڕووتە، بەجۆرێک ئامانج لەداڕشتنی تەنیا پڕکردنەوەی کورتهێنانی داراییە و دورە لەهەموو ئاقارێکی ئابوری چونکە:

١- وڵاتان کاتێک ڕووبەڕوی کورتهێنانی دارایی دەبنەوە لەبودجەدا هەندێ جار پەنا بۆ بەرزکردنەوەی نرخی دراوی بیانی دەبەن بەئامانجێکی ئابوری، چونکە کاتێک نرخی دۆلار لەبەرامبەر دراوی نیشتمانی بەرزدەبێتەوە ئەوکات نرخی هاوردەکان بەرزدەبێتەوە، حکومەت بەپلانێکی عەقڵانی ئابوری کاردەکات لەڕێگەی هاندان بۆ بەرزکردنەوەی وەبەرهێنانی ناوخۆ بەدیل بۆ هاوردەکردنی کاڵای بیانی دروست بکات و وڵات لەوڵاتێکی بەکاربەرەوە بکات بەوڵاتێکی بەرهەمهێن، ئەم سیاسەتەش ئەمڕۆ لەلایەن وڵاتانی تورکیا و ئێران پەیڕەو دەکرێت بەئامانجی بوژانەوەی ژێرخانی ئابوری وڵاتەکانیان و وەک دەرچەیەکیش بۆ کەمکردنەوەی کاریگەریە نەرێکانی سیاسەتی ئابڵوقەدانی ئەمریکی و ئەوروپی لەسەریان.

٢- لەوانەیە هەندێ جار داڕشتنی ئەم سیاسەتە عەقڵی گەمارۆدانی کڕین و حەواڵەکردنی دۆلاری لەلایەن ژمارەیەک لەوڵاتانی دراوسێ و ئیقلیمی لەپشت بێت، چونکە هەمیشە ئەو وڵاتانەی ڕوبەڕوی گەمارۆی ئابوری ئەمریکا دەبنەوە بۆ پڕکردنەوەی پێداویستی ناوخۆییان و ڕێگری کردن لەزیاتر بەرزبونەوەی نرخی دۆلار لەبەرامبەر دراوی نیشتمانیان لەوڵاتەکانیان پەنا بۆ کڕینی دۆلار لەو وڵاتانە دەبەن کەنرخی دۆلاری تیادا هەرزانە، بەنمونە ئێران بۆ پڕکردنەوەی بەشێک لەپێداویستیەکانی لەدۆلار ساڵانێکە پەنا بۆ کڕین و حەواڵەکردنی دۆلار دەبات لەبازاڕەکانی عێڕاق بەوپێیەی نرخی دۆلار لەبازارەکانی عێڕاق هەرزان بووە.

مادامەکی سیاسەتی بەرزکردنەوەی دۆلار هیچ پلانێکی ئابوری عەقڵانی نیە و سیاسەتێکی دارایی ڕوتی ڕۆژە، بۆیە ئەم سیاسەتە جێکەوتە سلبیەکانی زیاتر دەبن لە ئاقارە ئەرێکانی لەسە کۆمەڵگەی عێڕاقی، لەجێگەی ئەوەی هۆکار بێ بۆ بەرزکردنەوەی بەرهەمی ناوخۆ هۆکارێک دەبێ بۆ بەرزکردنەوەی کاڵا هاوردەکراوە بیانیەکان لەسەر هاوڵاتیان، بەڵام بیرمان نەچێت بەرزبونەوەی نرخی دۆلارو نرخی کاڵاکان بێ جێکەوتەی سیاسی نیە و لەکۆتایدا شەقامێکی توڕەتری عێڕاقی دروست دەکات و سەرئەنجام کازمی و لیستەکەی وەک داڕێژەری ئەم سیاسەتە لەهەڵبژاردنی داهاتوودا بەقورسی باجەکەی دەدەن و لەبەرامبەریشدا سەدریەکان بەرهەمی ئەم توڕەییە دەچننەوە.

Previous
Next