فەنابوون لە تۆدا.. شیعر/کاوە عوسمان عومەر
خونچەی خوێنی گرتوە، هاتنێکت..
زەنگی بروسکەیەکی ناوەختەش ، بێدەنگی ..
مەلێکی شکاند، پرسیاری بوون..
و نە بوون..
بە لقی داری دڵەوە جێما،،،
خوێنی قورمزی غوربەتی..
مانگ،بە پەنجەرەی ژورێکا،،
پێڵووی …
پڕفرمێسکی داخست،
پێش گەیشتنی کۆچەرێ..
بە گالیسکە ئەفسوناویەکانی سپێدە،
وانەیەک ، لە جوانی فێربوو!،،
هەموو ڕێگاکان ئەچنەوە..
دارستانی چاوت،،،
من ئیتر بەرەو ڕۆشنایی ڕەها،
پێهەڵئەگرم،،،
ڕێمداوە، جازی یاخیبوون..
ڕۆحم هەڵگرێ،،،
یەک لە دوای یەک،،
ناوی ئەو مەلانە ئەنوسم،،
خۆیان ئەدەن،،،
بە پەنجەرەی دۆزەخی گڕ هەڵساو..
وەرزی قات وقڕی عەشقە..و..
ووشکە ساڵی تەنیایی.. و..
چاوەڕوانیە،،
لە فیردەوسی خود خۆیدا،،
وون ئەبمەوە،،
لە خودی خۆما،،
سەفەر ئەکەمەوە،،،
تێئەپەڕمەوە …
بە کەنارە ڕەنگاوڕەنگی ڕۆحێک..
لە گزنگتا فەنا،،،
لە بوونی تۆ دا…
فەنا ببمەوە!
ئای ئازادی!
ئەی تاکە نزرگەی پیرۆز!
چاوم هەورە، و..
ڕوخسارێکت نابینمەوە،،
تا شکۆفە شیعری ئەرخەوانیت،،
بەسەرا ببارێنم،،
گەرچی نوسین دەربارەی ..
گەردوونی ڕوخسارت،،،
هەسارەکانی خەیاڵمی زیندانی کردوە!
………………………………………………………………..
وێنەکە تابلۆیەکی نیگارکێشی فەڕەنسی
Claude Monet
Cliffs of Varengeville, Gust of Wind
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
