پرسیارە بێ وەڵامەكانی زنجیرەی پێستی شێر.. نووسینی: شوان عەباس بەدری
دواجار زنجیرەی پێستی شێریش كۆتایی هات و ئەڵقەی كۆتایی زنجیرەكەش هەر وەك ئەڵقەكانی پێشووتر بینەر و عاشقانی زنجیرەكەی خاچ ئاسا لەبەردەم تەلەفزیۆندا دانیشاند و بینەر چاوەڕێی وەرگرتنەوەی وەڵامی ئەو پرسیارانەی دەكرد كە بە درێژایی سێ وەرزی زنجیرەكە لە ناو مێشكیدا درووست ببوو و هەر یەكەو بە پێی تێگەیشتن و لێكدانەوە و بەستنەوەی ڕووداو و كەسایەتی و كارئەكتەرەكانی ناو زنجیرەكە ڕاڤە و پێشبینییەكانی خۆی دەخستە ڕوو .
ئەم زنجیرەیە كە هەر لە سەرەتاوە و لە ئەڵقەی یەكەمییەوە بینەری تێگەیاند كە زنجیرەیەكی پۆلیسی ،تاوانكاری،درامی،نهێنی ئامێزە و ڕووداو و چیرۆك و پێشهاتەكانی تەزبیح ئاسا دەچنە پێشەوە و هەموو كارئەكتەرەكانی گەر دووریش بن لە یەكەوە و بۆ یەكتر نەناسراو بن ،بەڵام لە چركەیەك لە چركەكانی ناو زنجیرەكە دەبەسترێنەوە بە یەكەوەو یەكتر بۆ لای یەك و ناو ڕووداوەكان پەلكێش ئەكەن و دوای ئەو پەلكێش كردن و پێكەوە گرێدانەش چەندین نهێنی تازە و پرسیاری بێ وەڵامی تازە لەناو مێشكی بینەردا درووست ئەكەن !
گومانی تیا نییە كە زنجیرەی پێستی شێر لە ڕووی نواندن و گریم و وێنەگرتنەوە تەواو كارێكی پڕ و تێر و ئاست بەرزە و ئەكتەرەكان بە شێوەیەكی تەواو و بێ كەم و كوڕی كارئەكتەرەكانیان بەرجەستە كردووە و كورد قسەیەكی هەیە كە دەڵێت : ((كەسی شیاو بۆ شوێنی شیاو)) ،بە ڕای من ئەم زنجیرەیە یەكێكە لەو زنجیرە كەمانەی كە ئەكتەری شیاوی بۆ كارئەكتەری شیاو هەڵبژاردووە و لەو ڕووەوە بێ كەم و كوڕی و بێ هەڵەیە ، بەڵام ئاخۆ لە ڕووی چیرۆك و سیناریۆ و كۆتابەندی و وەرگرتنەوەی پرسیارە نهێنی ئامێزە بێ وەڵامەكان بە هەمان ئەندازە سەركەوتوو بووە !؟
بێگومان نەخێر .
ڕەنگە لە خۆتان بپرسن بۆ چی !؟
بۆ وەڵامی ئەم بۆ چییەی ئێوە دەبێت بڵێم لە ئاڵقەی كۆتایی زنجیرەكە هەست بە كەشێكی بەتاڵی دوور لە ڕووداوەكانی پێشوو دەكرا و بینەری شارەزا یەكسەر تێدەگات كە دەرهێنەر لە ڕێی چەند گرتەیەكی جیاوازەوە هەوڵی پڕكردنەوەی كات و فریو دان و دوورخستنەوەی بینەر دەدات لەو هەموو پرسیارانەی كە هەر لەسەرەتای ڕفاندنی نەعیم و ساحل و ڕووداوەكانی دوای ڕفاندنەكە لە ناو مێشكیدا درووست بووە !
دواجار ئێمە تێنەگەیشتین كە پەیوەندی نێوان ((درەختی )) و ((مەنسوور)) چی و چۆن بووە و ((مەنسوور)) دۆسییە و نهێنی ناو دۆسییەكەی ((درەختی)) چۆن دەست كەوتووە و بۆچی ئەو دۆسییەی بەكار هێناوە ؟!
ئەو تەرمەی كە لە جیاتی ساحل سووتێنرا بوو و لەسەر جادە فرێدرا بوو هی كێ بوو و ئاخۆ مەنسوور كووشتبووی و سووتاندبووی یان خود نا ئەو كچەش بە دەستی ئەو كەسانە كووژراوە كە دەستدرێژیان كردبووە سەر ساحل ؟!
كەسایەتی ((سەمەد)) كە كەسایەتییەكی كلیلی ناو زنجیرەكە بوو و مەنسوور ئوتۆمبیلەكەی بە كار دەهێنا و بە كەسێكی نزیك و بە جۆرێ لە جۆرەكان بە دەستەڕاستی مەنسوور ئەژمار دەكرا بە جۆرێ كە نەعیم و ڕەزا و سەدرا دەباتە ئەو ڤێلایەی كە مەنسوور ساحلی تیا شاردۆتەوە ، بە بێ ئەوەی لە پەیوەندی نێوان ئەو دوانە تێبگەین لەناكاو و بە پەلە دەكووژرێ !؟
كاتێ نەعیم و ڕەزا و سەدرا دەچنە ناو ڤێلاكە مەنسوور پێش ئەوان ئاگادارە و ڕادەكات و هەروەها نامەیەك دەنێرێ بۆ ژمارە تازەكەی نەعیم و دەست خۆشی لێدەكات كە ئەوەندە لێی نزیك بۆتەوە و خەریك بووە بیگرێت ، ئەمەش پرسیار و نهێنییەكی دیكەی بێ وەڵامە كە ئاخۆ مەنسوور چۆن زانی نەعیم لەوكاتە دێت بۆ ڤێلاكە و كێ ژمارە تازەكەی نەعیمی داوەتێ !؟
لەلایەكی دیكەوە بە بێ ئەوەی ئاماژەیەكی سادە بە چۆنییەتی پەی بردنی پۆلیس بدەن بە هاوكاری نێوان بەهرۆز و مەنسوور ، پۆلیس یەكسەر دەچێتە بەردەم ماڵی بەهرۆز و خۆی و ژن و مناڵەكانی دەستگیر دەكەن و بەهرۆزیش كە پێشتر خۆی و خێزانەكەی شایەتی درۆیان لەبەرژەوەندی مەنسوور دابوو بە بێ هیچ ڵێكۆڵینەوە و خستنەڕووی بەڵگەیەك یەكسەر دان بە هاوكاری خۆی و مەنسووردا دەنێت و شوێنی شاردنەوەی كەل و پەلەكانی مەنسوور پیشانی پۆلیس دەدات !
ڕەزا پەروانە و سەدرا كە لە ڕووی یاساییەوە بە هاودەستی نەعیم ئەژمار دەكرێن لە تاوانی كووشتنی نەریماندا و پۆلیسیش ئاگاداری ئەو تاوانی كووشتنەیە، بە بێ ئەوەی هەر بانگ بكرێن بۆ لێكۆڵینەوە ئازاد ئازاد تا كۆتایی زنجیرەكە بە ناو شاردا دەسووڕانەوە!
چەند جارێك ئاماژە كرا كە مەنسوور هاودەستێكی هەیە لەناو بنكەی پۆلیسدا و لە ئەڵقەیەك لە ئەڵقەكانیش ئاماژە بەوە درا كە سیستمی كۆمپیۆتەری پۆلیس لە توركیاوە هاك كراوە و ڕەنگە تاوانبار لەو ڕێیەوە دۆسییەكەی درەختی و وردە كارییەكانی دەست كەوتبێت ، بەڵام تا كۆتایی زنجیرەكەش نە هاودەستەكەی مەنسوور لەناو بنكەی پۆلیسدا یەكلا كرایەوە ، نە كەسیش زانی ئەو هاكە چۆن و بۆ چی ئەنجام دراوە!؟
بە تایبەتیش كە مەنسوور ئاگای لە ورد و درشتی لێكۆڵینەوەكانی پۆلیس بوو لە دۆسییەی ساحل و كووشتنەكەی و ئەو سەرە داوانەی كە پۆلێس پێی گەیشتبوو !
لە تیزری زنجیرەی پێستی شێردا ، دوو دیالۆگی شیرین ی ژنە كۆنەكەی مەنسوور پەخش دەكرێت كە ئەتخاتە گومانەوە هاودەستی مەنسوور بێت لەو تاوانەدا و كەسایەتی شیرینیش كەسایەتییەكی كلیلی و بنەڕەتی ناو زنجیرەكە بێت ، بەڵام نەك كەسایەتییەكەی بەو جۆرە نەبوو بگرە ئەو گرتە و دیالۆكانە لە زنجیرەكە هەر پەخش نەكران !
زڕ باوكەكەی ساحلیش لەولاوە بمێنێ كە بە بێ هیچ ئاماژەیەكی ڕوون لە پڕ وون دەبێت !
ئەمانەو چەندین پرسیاری بێ وەڵامی دیكە .
هەر چەندە ئەڵقەی كۆتایی زنجیرەكە پەلەپەل و كەت و درێژكردنەوەیەكی بێ مانای زۆری پێوە دیارە ، بەڵام لە گەڵ هەموو ئەمانەشدا هەر وەك لە سەرەتادا ئاماژەم پێدا هیچ لە نواندنی ئاست بەرزی ئەكتەرەكانی كەم ناكاتەوە و بە بڕوای من ڕەنگە ئەم زنجیرەیەش هەر وەك هەموو زنجیرە و فیلمە سینەماییەكانی دیكەی ئێران ، بەر نەشتەری سانسۆرێكی لە ڕادەبەدەر كەوتبێت و هەر بۆیە ڕووداو و كەسایەتی و پێشهاتەكان لە ئەڵقەی كۆتاییدا وەك پێویست نەخرانە ڕوو و پرسیار و گومانەكانی بینەریش بێ وەڵام و یەكلا كردنەوە مانەوە ، بە تایبەتیش وەك ئاشكرایە ئێران مێژوویەكی دوور و درێژی لەگەڵ سانسۆر و شێواندنی كۆتابەندی بەرهەمە هونەرییەكاندا هەیە .
لە كۆتاییدا هیوادارم ڕۆژێك بێت شانۆ و زنجیرە و سینەمای كوردی لە ڕووی چیرۆك و سیناریۆ و كاری دەرهێنان و نواندن بگاتە ئاستێك كە هەر وەك پێستی شێر لە كاتی پەخشكردنیدا خاچ ئاسا لەبەردەم تەلەفزیۆن دانیشین و چێژی لێوەربگرین .
