ئیش.. نەوزاد بەندی
زۆر ڕقی لە چەناگەی خۆی بوو ، لە ئاوێنەدا تاکو دەمی تەماشا ئەکرد یان بەجۆرێک خۆی لە ئاوێنەکە نزیک ئەخستەوە نەتوانێ چەناگەی پەخش بکا ..هەندێ جار بۆ ماوەی چەند هەفتەیەک بە ڕیشێکی پچڕ پچڕ دایئەپۆشی کە هەر تاڵەی ڕووی کردبووە مەملەکەتێک .. هاوڕێکانی هەر چەند هەفتەیەک تەحەمولی ئەو ڕیشەیان ئەکرد ، ئیتر ناڕەزایی و گوشاری مەدەنی و گردبوونەوە ڕووی دەدا ، تەنانەت یەکێکیان پێی وتبوو : ئەم سەکسوکەیەت گو تێکە و ببڕێتەوە ..!
دانەیەکی تریشیان پێی وتبوو : بەم باڵا مەتر و نیوە و ڕیشی چەناگەیەوە ، لە فڵچەی ڕیش تاشین ئەچی ..پیرەمێردێ بتخاتە ناو قوتوی تەراشەکەی چی ئەکەیت ؟
ڕاستێکەی لەو کاتەدا خۆی زۆر نیگەران کردبوو ، بەڵام لە ناخەوە ئەو دوو باری سەرنجەی زۆر پێ خۆش بوو ، بە جۆرێ کە گەڕابووەوە بۆ ماڵ ، ئەوەندە پێکەنیبوو ، ڕەنگی سوور هەڵگەڕابوو ، چاوەکانی فرمێسکیان دەرپەڕاندبوو …بە کەسیشی نەوتبوو هۆکاری پێکەنینەکەی چییە، دڵی خۆشە و پێ ئەکەنێ ..خەڵک حەقی چییە؟
بەیانیان لە نەخۆشخانەیەکی میریی کاری ئەکرد ، کاری ئەم بێ هۆشکردنی نەخۆشەکان بوو ، بۆ ئەوەی پزیشکەکان هەڵیدڕن ..ئەوەندە بۆنی ناوسکی نەخۆش هاتبوو بەسەریدا ، گۆشتی لەبەر چاو کەوتبوو ..ئەوەیش بوو بوو بە هۆی ئەوەی پارەیەکی باشی لە موچەکەی بۆ بمێنێتەوە ..
دوای نیوەڕۆیش ئیشی مەغسەل فرۆشتنی ئەکرد ..ئاگاداری نرخ و جۆری هەموو مەغسەلەکان بوو ..هەر کە سەیری موشتەریەکەیشی ئەکرد ، یەکسەر ئەیزانی بۆ مەغسەلی ڤێترا هاتووە .. یان لاتە و بەو حاڵە مەغسەلێکی ئێرانی پێ هەڵئەسوڕێ ..یەک دوو جاریش حەوزی مەغسەل کەوتبوو بەسەر پەنجەی قاچیا ..جاریش هەبوو لێی تێک ئەچوو ، وای ئەزانی نەخۆش لەبەردەمیدا پاڵ کەوتووە ، دەستی ئەبرد مەغسەلێک بێ هۆش بکا بۆ ئەوەی پزیشکەکان هەڵی بدڕن .. جارێکیش لە نەخۆشخانەی میریی لێی تێک چووبوو بە نەخۆشێکی وتبوو ، ڕاستە حەوزەکەی ئێرانییە ، بەڵام بەلوعەکەی تورکییە .. پزیشکەکان نەیانزانیبوو باسی چی ئەکا ، بەڵام نەخۆشەکە دەشتەکیی بوو ، لە ژێر لێوەوە پێی وتبوو : حەوزی پورت ..ئەمیش باش لێی تێ نەگەیشتبوو ، ئەگینا بێ هۆشی نەئەکرد ، با پزیشکەکان هەروا بنیشتنایەتە سەری و هەڵیاندڕیایە ..
دوای نوێژی ئێوارە هەتاکو بەرە بەیان ، لە بارەگایەکی حیزبیی پاسەوان بوو ..بەڵام شەوانی پێنج شەممە پشووی بوو ..ئیتر ئەو شەوە خۆشترین خواردن و ..خۆشترین سەرجێگای ساز ئەکرد ..خێزانیشی هەندێ جار شانازی پێوە ئەکرد کە وەکو کارخانەی نانەقەیسی ، شەو و ڕۆژ گرمەی دێ و کار ئەکا .. هەندێ جاریش ئەیووت باشە شوم بە تراکتۆرێ بکردایە باشتر نەبوو ؟ هەر نەبێ ..هەر نەبێ ، هەموو شەوێ لەبەر دەرگا ڕائەوەستا ، یان دەرگای گەراجەکەم بۆ ئەکردەوە با به گاسنەوە بهاتایەتە ژوورەوە ..
کەس بۆی نەبوو دەست وەرداتە ژیانی و کار و پڕۆژەکانیەوە .. تەنانەت نزیکترین کەس لێیەوە کە خوشکەزایەکی بوو ، نەیئەزانی چەندێک پارەی خەوتووی هەیە .. خۆ پرسیاری ئەوەی ئاخۆ پارە خەوتووەکانی بە دۆلارن یان دینار ، ئەوە مەگەر هەر خوا زانیبێتی ..
خەڵک حەقی چیە ؟ گرنگ ئەوەیە ئەم بەیانیان بە باشترین شێوە نەخۆشەکان بێ هۆش ئەکا ، بۆ ئەوەی پزیشکەکان تێی بەربن و هەڵیدڕن .. عەسرانیش زۆر بە دڵسۆزیی مەغسەلەکانی ئەفرۆشێ ، تا ئێستایش هیچ کەسێ مەغسەلی بۆ نەهێناوەتەوە ..کارمەندێکی هات و چۆ نەبێ ، جارێکیان مەغسەلێکی بۆ هێنایەوە پێی وتبوو من پیازیم ویستووە تۆ بێجیت داومەتێ ..ئەمیش وتبووی ئادەی بگەڕێ بزانە کامە پیازییە ..کارمەندی هاتوچۆ زۆر گەڕا بوو بۆ پیازیی ، تا له کۆتاییدا ددانی پیانابوو بە درۆوە وا ئەڵێ.. ڕاستێکەی کە مەغسەلەکەی کڕیوە جا بۆی دەرکەوتووە موچەی ئەو مانگە زۆر دوا ئەکەوێ و کەسیش قەرزی ناداتێ ..
پاسەوانێکەی شەویشی زۆر ڕێک و پیکە و ..جارێک مەدالیای ئازایەتی وەرگرتووە ، چونکە یەک دوو سەرخۆش بە ناوی ئۆپۆزیسیۆنەوە ، لە نیوەشەوێکی باراناویدا ، دابوویان بەسەر بارەگای حیزبدا ، ئەمیش نیشتبووە سەریان ..فیشەکی بەملاولایاندا تەقاندبوو ، سەیر ئەکا مێش میوانیان نیە ، جا چەکەکەی دانابوو ، بە شێنەیی هەردووکیانی بە پشتا و پشت بە ستوونی کارەبای موەلیدەوە بە ستبۆوە ..هەرچەند گریا بوون و پاڕابوونەوە ، دەردی نەخواردبوو ، تەنانەت زیاتریش تووڕە بوو بوو ..جنێوی زۆر سێکسیی بە دایک و ژن و خوشکیان دابوو ..وتبوویان تا بەیانی لەبەر باران ئەتۆپین ..پێی وتبوون : بارانی بەهارە ، هیچتان لێ نایەت ..
ئیتر خەڵک حەقی چیە ؟
ڕۆژێک ژنەکەی لە دەمی دەردەچێ پێی ئەڵێ : تۆ کچێکی خەستەخانەت بهێنایە و ..منیش مجەورێک هاوسەرم بووایە ، ڕەنگە باشتر بووایە ..
ئەم سەرەتا تێ نەگەیشت .. بەرە بەرە تێگەیشت . . هەر بۆیە بەرە بەرەیش تووڕە بوو ، نەڕاندی :ْ تۆ چیت ئەوێ بەس پێم بڵێ ؟ ڕیخۆڵەت خوساوەتەوە ، هار بووی ..
دوای هەفتەیەک ماڵە خەزوورانی نیمچە دادگاییەکیان کرد ..خەزووری فەیلەسوف بوو ، پێی وت : زیاد لە ڕادەی پێویست خۆت ماندوو بکەی ، زوو کەمئەندام ئەبیت .. هەر بەیانیان نەخۆشەکان هەڵدڕە ، کیفایەتە ..
ئەم وتبووی : مامە! من نەخۆش بێ هۆش ئەکەم ، نەک هەڵیبدڕم ..
ئینجا با پێت بڵێم ، چوار هاوڕێم هەیە ، عەبدول بەیانیان مدیر ئیدارەیە ، عەسران لە عیادەیەک بیتاقە بڕە ، بە شەویشدا لە یانەیەکی شەوانە نێرگەله ئەگەشێنێتەوە .. مەنوچەر بەیانیان مامۆستایە ، عەسران کیفی دەمانچە ئەدورێ ، بە شەوانیش لەبەردەم مۆڵێکدا سواڵ ئەکا …حەمەسێن بەیانیان ژمێریاری بانکە ، عەسران ماسی ئەفرۆشێ ، شەوان مەندوبی کۆمپانیایەکی کۆرییە …سیراج بەیانیان لە فەرمانگەی ئاو بەڕێوبەری بەشێکە ، عەسران لە مەعرەز ئاڵ و وێڵی ئوتومبیل ئەکا ، بە شەویشا لەسەر مەرز محەویلەی کارەبا دێنێ و دەبا ..
خەزوری خەوی لێ ئەکەوێت و ئەمیش ژنەکەی و شاهیدەکانی ئەخاتە ناو پیکابەکەی و ئەیانباتەوە بۆ ماڵ ..
ئەمە شەوی پێنج شەممە بوو ..پەلەی خواردن و سەرجێگەکەی بوو.
