Skip to Content

بۆ ئەوانەی هەڵە تێگەیشتوون، یان بە هەڵە تێدەگەیەندراون.. هوشیار برایم

بۆ ئەوانەی هەڵە تێگەیشتوون، یان بە هەڵە تێدەگەیەندراون.. هوشیار برایم

Closed
by ئایار 30, 2023 General

درۆ، یان نەفامیەکی زەقە کە دەڵێن ئەردۆغان لە تورکیا و باکوری کوردستان لە نێو کوردان دەنگی لە هەدەپە زیاترە، (وانییە).

هەدەپە و پەکەکە کە تەمەن و هێزیان بە بەراورد لەگەڵ دەوڵەتێکی 700 ساڵی و سوپایەکی 600 ساڵی ناهاوسەنگە، بە خۆڕاگریەکی گەورە و قوربانیەکی زۆرەوە، ئینجا توانیویانە ئەوەندە کوردەی لایەنگریانن بێننەوە بارێک کە بەرگری لە هەبوونی خۆیان بکەن، ئەوەی تا ئێستا کردوویانە و بەو ئاستەیان گەیاندووە، وەک ئەوەیە بە دەرزی بیر-یان کۆڵیبێت، بۆیە ئەگەر ئەو ڕاستیانە لەبەرچاو نەگیرێن، بێگومان دەکەوینە هەڵسەنگاندنێکی سەقەت و بێ واتا!.

هەر بۆ زانیین:

– ژمارەیەک لەو 27 شارە کوردستانیەی باکوور، ئێستا زۆرینەی دانیشتوانەکەی کورد نەماون، لە هەندێکیان نیوەن، یان ئەو بە ڕەچەلەک کوردانەن، لە ئەنجامی سیاسەتی 100 ساڵەی نکۆڵی و قڕکردن، دروشمی(چەند بەختەوەرم کە تورکم)یان قبوڵکردوە.“

– دەنگدەرانی شارە کورستانیەکان تەنیا خەڵکی شارەکە نیین، بەڵکو سەرباز و پۆلیس”کە سوپایەکن” و فەرمانبەرانی دەرەوەش کە لەوێن، لای ئەوان دەنگ دەدەن و لەسەر شارەکە حساب دەکرێن.

– بەشێک لەو کوردانەش کە ناوکیان لە جاشێتی بڕاوە، وەک پیشەی کۆنی خۆیان، دەنگ بە حزبی دەسەڵات-سیستەم دەدەن، پێش ئەردۆغانیش دەنگیان بە ئەجەوید و تانسۆ و دیمیرەیل دەدا، هەمیشە خۆیان فرۆشتووە.

– شەڕ و ڕوداوە وێرانیەکانی 30 ساڵی ڕابردوو، هەروەها نەداریی و هەژاری، ناچاریکردوون بۆ دۆزینەوەی کار، کۆچی گەورەشارەکانی تورکیا بکەن.

– سەیری ئیستەنبۆل بکەن، هەدەپە تەنیا لەوێ 11 پەرلەمانتاری بردۆتەوە، بۆ ناڵێن هەدەپە چۆن توانیویەتی 10%ی کۆی ژمارەی دەنگدەرانی ئەو شارە تورکیە بباتەوە !

– رەوشی جوگرافیی باکووری کوردستان بە هەرێمی کوردستان مەچوێنن، هەڵەیەکی گەورەیە، ئاخر لەخۆڕانییە کە هەدەپە بەرنامەکەی بۆ تەواوی تورکیایە و هاوپەیمانییش لەگەڵ چەپ و دیموکراتە غەیرە کورد دەکات.

لێرە لە هەرێم، هەندێ بە ناو شرۆڤەکار، ڕاگەیاندنەکانی دەربار و ئیسلامی سیاسیش، هەرچی ڕاستدەبێتەوە، شەلم کوێرم حوکمی ناڕاست و بێوێژدانانە دەدات، بە نەزانی بێت یان بە ئەنقەست، دەکەونە خزمەتی نەیار و دەزگا دڕندە و چەواشەکارەکانی دەوڵەتی تورک و شەڕە تایبەتەکەی و بەشداردەبن لە هەوڵی سڕینەوەی رۆحی ئازادی و لاوازکردنی متمانە بەخۆبوون.

جا ئەگەر بەراوردێکیش بکرێت، فەرموون ئەوە هەرێمێکی فیدرالی، بە دەستوور چەسپاو و دانپێدانراو ناتوانن بپارێزن، دە خۆتان بخەنە شوێنی هەدەپە و ئینجا دەزانن بەرخودان و فیداکاری چییە و قسە و حوکمی بندیوار و بێ مەسرەف چییە!

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish