سەفەرکە.. نووسینی: محمد ماغوط.. وەرگێڕانی: پشکۆ ناکام
بە بێ دوودڵی سەفەرکە..
ئەو چەن ساڵەی لە تەمەنە بە هەدەر چوەکەت ماوە ڕزگارکە..
سەفەرکە و جگە لە خۆمان میللەتانی تر ئەبینی لە مانای”ژیان” و”ئینسان پەروەری” تێئەگەیت،ئەزانیت کە ئێمە نە باشترین و نەدێرین ترین میللەتی دونیاین ، هیچ کەس لەوێ دەربارەی پاڵەوانە وەهمییەکانمان و قارەمانیەتیەکانیان نازانێ.
درۆی هەزاران ساڵەی شارستانیەتەکەمانت بۆ دەرئەکەوێ و ئەشزانی کە ووڵاتەکەت زەرد”پایز” و سەوز”بەهار”ی نیە وەک ئەوەی خۆت حیسابت بۆ کردوە.
بۆت دەرئەکەوێ کە ئێمە باشترین نەتەوە نین بۆ بەشەریەت هاتبێ و ئێمە تەنها بارگرانییەکین بەسەر بەشەرییەت و شارستانیەتی ئینسانیەت و تەنانەت بەسەر خۆشمانەوە.
دڵنیا ئەبی لەوەی کە لای ڕۆژئاواییەکان نە کات و نە گەرم و گوڕی ونە ئارەزویان هەیە بۆ پیلان گێڕان دژمان، چونکە ئێمە خۆمان شارەزای پیلان گێڕانین دژ بە یەکتر و ئەوان بەو شتانەوە خەریکن کە زۆر لە ئێمە گرنگ ترن.
سەرت ئەسوڕمێ لە بەشووشی و لوتفی شوڤێری تاکسی و پۆلیس و کارمەندی فڕۆکەخانە و فەرمانبەری دایەرەکان و تەنانەت چایچی و شاگردی کافترییەکان.
سەرت سووڕ ئەمێنێ لەوەی کە تیمەکانی ئاگرکوژانەوە هەموو بەدەم ڕزگارکردنی پشیلەیەکەوە ئەچن کە لە قاتێکی بینایەیەکی بەرز گیری خواردوە و پۆلیسی هات و چۆ ئۆتۆمبیلەکان و ترافیک ڕائەگرێ قازێک و بەچکەکانی بێ مەترسی بپەڕنەوە.
ئەحەپەسێ ی کە “فەرمانڕەوا” !بە تەنیا! لەسەر جادەکان پیاسە ئەکا بێئەوەی خەڵک لە چواردەوریا بە شان و باڵیا هەڵبەن و باس لە عەبقەرییەتیەکەی بکەن کە گوایا هەموو میللەتانی سەرئەرز بەغیلی پێ ئەبەن و بێ ئەوەی کاروانێک ئۆتۆمبیلی جام ڕەش و مودەڕەعەی بە دواوە بێ وەک لەکاروانی مناڵێکی دە ساڵانی سەر بە بنەماڵەی ” فەرمانڕەوا” ئەیبینی کاتێ ئەچێ بۆ کڕینی ” “ئایس کرێم” یان یاری کردن بە “پلەی ستەیشن” لەگەڵ هاوڕێکانی قوتابخانە سەرەتاییەکەی.
تووشی سەرسووڕمان ئەبی کە چۆن خەڵک بە ڕووخسارێکی گەش بە ڕووتا زەردەخەنە ئەگرن و لەگەڵ نەناسیاوێکا لە ڕێستوران یان قاوەخانەیەک لەسەر مێزێک دائەنیشی و بە ڕوویەکی خۆشەوە لە یەکتری ئەڕوانن یان لە شەقامێکا لەگەڵ خانمێکی شۆخ و شەنگا زەردەخە لەگەڵ یەکترا ئەگۆڕنەوە بێ ئەوەی هیچ کەسێک بە شێوەیەک سەیرت بکا جگە لەو تێڕوانینەی تۆ ئینسانێکی و چی تری تۆ بە لایانەوە گرنگ نیە.
بەڵێ : فێر ئەبی کە ڕێز لە خەڵک بگری تا ڕێزت بگرن و تەریق ئەبیتەوە لەو ڕەفتارە نا بە جێیانەی کە لە ووڵاتەکەی خۆتا وەک ” مافی خۆت” کردوتە وەک: بەرتیل بەخشين و وەرگرتن..تێکشکانی
كورسی پارکە گشتی و پاسەکان ..فڕێیانی خۆڵ لەسەر شەقامەکان و شانازی کردنت بە خزمایەتیت لەگەڵ کەسێکی پلە دە و یانزەی ئاسایش یان هاوڕێیەتیت لەگەڵ خزمێکی”فەرمانڕەوا” کە بە پەنجا ژن و ژنخوازی خزمایەتی لەگەڵیا هەیە..دزینی کارەبای گشتی بۆ خۆت ، یان دزینی مراوییەکی حەوزی یەکێ لە سەیرانگاکان.
بەڵێ : بیری کەس و کار و هاوڕێکانت وزۆر شتی تر ئەکەی ، بەڵام ئاواتەخواز نابی بگەڕێیتەوە ژیانە قوڕاوییەکەی جارانت دوای ئەوەی بەسەر بردنی ژیانت وەک بەشەر هەڵبژارد و چاوەڕێت نە ئەکرد وابێ…
گەر گەڕایتەوە بێ شک یان بەسەردان یان بە مردوویی ئەگەڕێیتەوە..هیچ سەرزەنشتی کەسێک مەکە ووڵاتەکەی بەجێ هێشتوە ..گەر ووڵات بوایە جێ ی نەئەهێشت.
