نزایەکی پاییزی.. شیعری: عەبدولڕەحمان فەرهادی
بای وەشت ھەڵدەکا لێرانە
بە نەغمە و نەیژەنینەوە
پاییز پڕ دەکا لە حوزن
بە ھەڵبەستی غەمگینەوە
شەماڵ بە ھەگبەی پڕەوە
شمشاڵی پاییز دەژەنێ
لەنجەولاری گەڵاڕێزان
میلۆدیی عیشقی دەدەنێ
چوومە نێو ماڵی شەماڵێ
پڕ بوو لە ناڵە و گریەی نەی
چوومە ڕەشماڵی خەیاڵێ
ڕەباس بووم بە مەستبوونی مەی
سەرێکم دا لە شنەیێ
تێر بووم لە چریکەی شالوور
باوەشم بە سروەدا کرد
بردمیە نێو خەیاڵێ، دوور
نامەیەکم بە دەبوور نارد
بۆ دڵبەرەکەی دوورە ڕێم
گوتم ئاخۆ کەی بتبینم!
گوتی تۆ وەرە، چاوەڕێم
شەماڵ ھات بە ھاتوھاوار
قژی تێکدایت و شێوانی
ھەر تاڵێکی بردە لایێ
ھیچ تاڵێكی بۆم نەھانی.
ده‌ڵێی لووزه‌وه بارانی
له‌پڕ دێی به‌خوڕ داده‌كه‌ی
برووسكه‌ی گه‌واڵه هه‌وری
عیشقت له ناخم ڕاده‌كه‌ی
- * *
وه‌ك په‌ڵه هه‌وری ناو ساوی
بریقه‌ت دێ و ده‌چیته‌وه
یان ڕه‌نووه به‌فری لاپاڵی
بۆ ناخم شۆڕ ده‌بیته‌وه - * *
چما تۆ شنه‌ی شه‌ماڵی
یان ده‌بووری لای هێواره
سروه‌ی سپێده و به‌یانی
یا بای وه‌شتی له‌م هه‌واره - * *
چركه‌یێ نییه له ژینما
لێت دابڕێ بیر و هۆشم
چیی تێدایه ئه‌گه‌ر تاوێ
ئازارت له‌ده‌ست نه‌نۆشم؟! - * *
ته‌مه‌ن چه‌شنی دره‌ختێكه
له پاییز نزیك بۆته‌وه
سایه‌ی عیشقت زیندانێكه
بۆ ساتێك لێی نه‌بۆته‌وه
عیشقت ئه‌وه‌نده به‌سۆیه
شه‌و و ڕۆژم لێ گۆڕاوه
هه‌موو كاتێ وا ده‌زانم
ته‌مه‌ن له ڕێتا دۆڕاوه
به‌سه تاكه‌ی ببمه دینی
ده‌شتوده‌ر و شاخوداخان
ته‌زووی عیشقی پر له ژانت
ڕۆژێ دەمكوژێ له داخان
