Skip to Content

پیره‌كانی دۆزه‌خ … ئه‌حمه‌د حاجی سامی

پیره‌كانی دۆزه‌خ … ئه‌حمه‌د حاجی سامی

Closed
by ئاب 31, 2019 General, Poems


دۆزه‌خ ..
جوانترین مه‌مله‌كه‌ت.
له‌ ده‌قه‌كاندا،
بۆنی خوێنی شه‌یتانه‌كانت ده‌كه‌م.
شه‌ڕابی پاسه‌وانه‌ خه‌واڵوه‌كانت ده‌خۆمه‌وه‌.
چاوشاركێ له‌گه‌ڵ جنۆكه‌كانت ده‌كه‌م.

عاشقی بلێسه‌ی ئه‌و ئاگره‌م،
كه‌ به‌دوای موسا ڕیش درێژه‌كانی فیرده‌وس و
عه‌باسه‌ چڵكنه‌كانی زه‌وییه‌.
بۆ ئه‌و فریشتانه‌ خه‌مبارم،
هیوایان گه‌یشتنه‌ به‌ ئازادی و
پێی ناگه‌ن.

من كه‌ كوڕی پیرترین قه‌سابی ئه‌و جه‌نگه‌ڵه‌ خۆڵاوییه‌م،
هه‌رگیز،
گومڕابوونی خۆم به‌ بته‌ شكاوه‌كان نه‌فرۆشته‌وه‌،
تاڵیه‌كانی ئێواره‌م بۆ عیسا كوژراوه‌كان نه‌گێراوه‌.
به‌ڵام،
ده‌ستم بۆ زێره‌كانی ئه‌و زه‌مه‌نه‌ سه‌رمایه‌دارییه‌ برد و
گۆڕم بۆ ژنه‌ مه‌مك بڕاوه‌كان هه‌ڵكه‌ند.
تاجه‌ گوڵینه‌م خسته‌ سه‌ر مه‌زاری شێخه‌ ده‌ستبازه‌كان و
فووم له‌ خۆڵه‌مێشی گوناهه‌كانم كرد.
له‌ خودا پاڕامه‌وه‌:
له‌گه‌ڵ ئه‌هریمه‌نه‌كان بمسووتێنه‌،
ده‌ستنووسه‌كه‌ی خۆتم لێ بستێنه‌،
به‌ خاچ و ئاگر و تاریكم بسپێره‌.

پیره‌كانی دۆزه‌خ،
له‌ باره‌گای ئاسمان دابه‌زین و
به‌ گوێی جه‌نگاوه‌رانیان چرپاند:
شه‌هیدیش بن،
ناچنه‌ ئه‌و عه‌ده‌مه‌ی خه‌ونی په‌مه‌یتان پێوه‌ ده‌بینی.
چێژ له‌ باوه‌شی ئه‌و حۆریانه‌ ناكه‌ن،
بێ ئه‌ده‌بانه‌ له‌ قووڵایی زوڵمه‌تدا نامه‌تان بۆیان ده‌نارد.

ئه‌و جیهانه‌ چه‌نده‌ غه‌ریبه‌ به‌ شیعره‌كانی من!
كه‌ هاوارم ده‌كرد:
تكایه‌،
با نه‌بینه‌ ڕووبارێكی ئه‌تككراو،
كه‌ به‌ هه‌ناسه‌ی خۆمانه‌وه‌ بێگانه‌ین.
با نه‌بینه‌ شه‌وێكی فه‌رامۆشكراو،
كه‌ وڕێنه‌ بۆ پاسارییه‌ خه‌مگینه‌كانی خۆی ده‌كات،
به‌ڵام نه‌یانده‌زانی،
ئه‌و ئاوازه‌ی سینه‌م،
خوڕه‌ی ده‌ریایه‌كی سارده‌ به‌ ناو تاریكیدا.
ئه‌و هه‌وره‌ چڕه‌ خاڵیبووانه‌ی ئاسمانم،
په‌یامی شانازیكردنی منی نه‌خۆشه‌ به‌و حه‌رفانه‌ی برینداریان كردم.

پیره‌كان هاتنه‌وه‌ ..
له‌ دیوه‌خانی ئاغا دزه‌ قه‌ڵه‌وه‌كانه‌وه‌ نووزانه‌وه‌،
ئاگر له‌ جه‌سته‌یان وه‌ك نوێژه‌ به‌په‌له‌كانی من هه‌ڵده‌وه‌ری،
كه‌ به‌رانبه‌ر خودا ده‌وه‌ستام و
بیرم له‌ خامۆشی ڕۆژه‌كانم ده‌كرده‌وه‌.
مینبه‌ر ئاسا:
مۆسیقا و شیعریان حه‌رام ده‌كرد.
سه‌ما و پیاسه‌یان قه‌ده‌غه‌ ده‌كرد.
ده‌یانگوت:
په‌رتوكه‌ ئاسمانییه‌كان بپارێزن،
په‌یامبه‌ره‌كانتان خۆشبوێت،
خودا هه‌موو كات مێهره‌بان نییه‌!

دۆزه‌خ ..
ئه‌ی دوا نیشتیمانم،
ئه‌ی دوا وڵاتی دێرینم.
خه‌ون و قوفڵ و برینه‌كانی منت پیرۆز.
چونكه‌،
من تاكه‌ ڕێبواری شه‌كه‌تی نێو تۆفانه‌كه‌تم،
دێمه‌وه‌ و
له‌ دیواره‌كانته‌وه‌ په‌شیمانیم ڕه‌نگ ده‌كه‌م.
من تاكه‌ منداڵی ده‌ربازبووی نێو ئاگره‌كه‌تم،
دێمه‌وه‌ و
به‌ په‌ڕی كتێبه‌كانته‌وه‌ خۆم هه‌ڵده‌واسم.

ئه‌ی دۆزه‌خ،
بۆ ئه‌به‌د بمگره‌ خۆت؛
كه‌ له‌ به‌هه‌شتێكی خه‌یاڵاویدام.
ئاخر،
ئه‌و زه‌مینه‌ دۆزه‌خی شاعیرانه‌،
نه‌فره‌ت له‌و په‌نجه‌ قه‌یره‌ جوانه‌مه‌رگانه‌ی خۆیان به‌ مۆسیقا سپارد،
نه‌فره‌ت له‌وانه‌ی خه‌ون به‌ شاعیربوونه‌وه‌ ده‌بینن.

بێپسانه‌وه‌ ده‌نووسم و
هه‌میشه‌ برسیم ..
هیچ قه‌سپێكی چنراوه‌ سكم تێر ناكات،
كه‌ به‌درێژایی ڕێگه‌كه‌كان خه‌نده‌قی به‌رگری له‌ كافره‌كان هه‌ڵده‌كۆڵم.
ئاوی هیچ گۆمێك توێنوێتیم ناشكێنێت،
كه‌ خۆم به‌ وه‌همی دارستانه‌ تووڕه‌كان ناساند و
ئاینده‌م ونكرد.

ئه‌ی پیره‌كانی دۆزه‌خ،
بڕۆنه‌وه‌ ماڵه‌ گه‌رمه‌كه‌ی خۆتان و
بۆشاییه‌ك بۆ ئه‌و ته‌نهاییه‌ی من بدۆزنه‌وه‌،
كه‌ من له‌ دوای ئێوه‌،
ناوی خۆم له‌ ده‌فته‌ره‌كانی مردن ده‌نووسمه‌وه‌.
چونكه‌،
من دواهه‌مین جێنشینی بام و
له‌ دۆزه‌خ تووڕه‌ییه‌كانم به‌ ئاگر داده‌مركێنمه‌وه‌.

ئه‌حمه‌د حاجی سامی – 2019

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish