کورتەنامەی شیعریی -8-… فەتاح حەسەن

(بەشی هەشتەم)

بۆ هەرکوێ بڕۆی کەنیشکە
شوێن پێیەکانت هەنگاوی منە

• * *
  هەروەك دەڵێن:
  خودا تەنهایە..
  بۆ زانیاریت
  لە خودا تەنهاتر ئەمنم.
• * *
  پێکم دانە..
  سەرین دانە،
  من هەر خۆمم..
  دەپێمبڵێن
  خەمی کامیان بخۆم،
  ئێستا ئەمن؟؟!
• * *
  هیچ شتێك
  هێندەی دوری تۆ وەرسم ناکات
  گەر دەتەوێت وەڕس بم
  دە، دوربە لێم.
• * *
  هەموو کەس لەیلای خۆی پێ جوانە
  هەر بۆیە،
  ناشیرین.. بە لەیلای کەس ناڵێم
  تا کەس..
  بە لەیلام، نەڵێت ناشرین.
• * *
  میوانێکی رەزا گران و
  یەکێکی دیکەی ئێسك سووك
  پێویستان بە خوڵق نییە
  یەکەمیان مەرگە و
  دوەمیان، ئەتۆی، خانمەکەم.
• * *
  دەستم بگرە و سەرپشك بە
  بۆکوێم دەبەی بمبە
  بێگومان بە،
  ئەو شوێنەی کە، دڵت گرتی..
  ماڵی منە.
• * *
  منداڵت دیوە، بۆ یەکەم جار
  دەچێتە ژێر باران و خوازیارە
  تنۆکە باران بگرێت؟
  منیش ئاوها، گەردنی تۆ.
• * *
  نازانم
  دەست وەردێنمە نێو سینەت
  یا، دەم بنێمە نێو دەمت؟؟
  بەم دەست و دەمە،
  هەردووکیان بکەم
  هێشتا، لام کەمە

فەتاح حەسەن
دانیمارك/ڤالبی

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.