دوو كتێبی نوێی شاخه‌وان سدیق بڵاوده‌بێته‌وه‌ ….

به‌م زووانه‌ ده‌زگای نووسیار
دوو كتێبی نوێی شاخه‌وان سدیق بڵاوده‌كاته‌وه‌

له‌ درێژه‌ی كاروچالاكیه‌كانیدا نووسه‌رو ڕۆژنامه‌نووس (شاخه‌وان سدیق) دوو كتێبی نوێ بڵاوده‌كاته‌وه‌. كه‌ پێكهاتوون له‌ دیداری ڕۆژنامه‌وانی به‌ دوو شێوازی جیاواز. كتێبی یه‌كه‌میان به‌ناونیشانی (چێژی نووسین)ه‌و كتێبی دووه‌میان به‌ناونیشانی (چێژی گێڕانه‌وه‌)یه‌. كه‌ ئێستا هه‌ر دوو كتێبه‌كه‌ له‌ چاپخانه‌ن و به‌مزوانه‌ بڵاوده‌كرێته‌وه‌.
تایبه‌ت به‌ بڵاوبوونه‌وه‌ی كتێبه‌كانی شاخه‌وان سدیق ووتی: ئه‌م كتێبه‌ نوێیانه‌ درێژكراوه‌ی كتێبی یه‌كه‌من، كه‌ ماوه‌یه‌ك پێش ئێستا بڵاوكرایه‌وه‌، به‌ناونیشانی (چێژی خوێندنه‌وه‌) واته‌ له‌گه‌ڵ ئه‌م دوو كتێبه‌ی دیكه‌دا پڕۆژه‌ی كتێبی سیانه‌ن, كتێبه‌كان هه‌ر سێكیان كاری ڕۆژنامه‌وانی ئه‌ده‌بین، و به‌شێوه‌ی دیدار له‌گه‌ڵ نووسه‌رانی بواری ئه‌ده‌بدا سازدراون، كتێبی یه‌كه‌میان (چێژی خوێندنه‌وه‌) بریتی بوو له‌ ئه‌نجامدانی (13) دیداری ئه‌ده‌بی له‌گه‌ڵ (13) نوسه‌ردا, كه‌ تیایدا ده‌رباره‌ی پرسی (خوێندنه‌وه‌و چێژی خوێندنه‌وه‌ی كتێب) هه‌ریه‌كێك له‌و به‌شداربووانه‌ سه‌رنجه‌كانی خۆیان خستبووه‌ ڕوو, ئه‌م شێوازه‌ له‌ كتێبی دووه‌میشدا په‌یڕه‌وكراوه‌ به‌ناوی (چێژی نووسین) كه‌ به‌هه‌مان شێوه‌ له‌گه‌ڵ (20) نووسه‌ردا ده‌رباره‌ی پرسی (نووسین و تایبه‌تمه‌ندی و شێوازه‌كانی و چێژی نووسین) دووباره‌ قسه‌كراوه‌, هه‌رچی كتێبی سێیه‌مه‌ جیاواز له‌ هه‌ردوو كتێبه‌كه‌ی كه‌، پێك هاتووه‌ له‌ (28) دیداری ئه‌ده‌بی تایبه‌ت له‌گه‌ڵ (28) نووسه‌روو شاعیرو چیرۆكنووس و ڕه‌خنه‌گری بوری ئه‌ده‌ب دا, كه‌ هه‌ریه‌كێك له‌وانه‌ ناوی ئاشكراو ناسراو دیارن له‌ناو دونیای ئه‌ده‌بی كوردیدا, وه‌ ئه‌م دیدارانه‌ به‌ شێوه‌یه‌كی زانستی و ئه‌كادیمی واكراون كه‌ له‌ داهاتوودا ببنه‌ سه‌رچاوه‌ بۆ نووسین و لێكۆڵینه‌وه‌ی ئه‌ده‌بی له‌ سه‌ر ژیان و دونیابینی هه‌ریه‌كه‌ له‌و ئه‌دیبانه‌ی كه‌ دیداریان له‌گه‌ڵ كراوه‌. ماوه‌ته‌وه‌ بڵێین ئه‌م كتێبانه‌ له‌لایان ئه‌م شوێنانه‌وه‌ چاپده‌كراون.
كتێبی یه‌كه‌میان (چێژی خوێندنه‌وه‌) كه‌ 128 لاپه‌ڕیه‌, به‌ سپۆنسه‌ری ڕۆژنامه‌ی هاوڵاتی چاپكراوه‌.
هه‌ردوو كتێبی (چێژی نووسین) كه‌ 310 لاپه‌ڕه‌و (چێژی گێڕانه‌وه‌) كه‌ 312 لاپه‌ڕه‌یه‌ له‌ بڵاوكراوه‌كانی ده‌زگای نووسیارن. به‌ڵام كتێبی (چێژی نووسین) به‌سپۆنسه‌ری سندوقی هاوكاری كتێبی ڕۆژنامه‌ی كوردستانی نوێ و كۆمپانیای یوكه‌ی بۆ بازرگانی گشتی چاپكراوه‌.و هه‌ر سێ كتێبه‌كه‌ له‌ چاپخانه‌ی (كارۆ)ی شاری سلێمانی چاپكراون.
ئێستا هه‌ردوو كتێبی (چێژی نووسین) و (چێژی گێڕانه‌وه‌) له‌ قۆناغی چاپكردندان و به‌مزوانه‌ ده‌كه‌ونه‌ به‌ر دیده‌ی خوێنه‌ران.