Skip to Content

پێنج کورتە شیعری ستیڤان شەمزینی

پێنج کورتە شیعری ستیڤان شەمزینی

Closed
by November 13, 2020 General, Poems

1
توانەوە
ئێوارەیەک مەستی عەشق ئەبم
دلبەرەکەم ئەگرمە ئامێز و
بە ناخی ماچی لێوەکانیدا رۆ ئەچم
بەیانییەک تێر عەشق ئەبم
دلبەرەکەم ئەگرمە باوەش و
جەستە سپییەکەى هەڵدەکرۆژم
نیوەڕۆیەک شەڵاڵی عەشق ئەبم و
ئاوێتەی دلبەرەکەم ئەبم
تێر رایدەموسێنم بەجەستەی سڕمەوە
رۆژێک پڕ دەبم لە عەشق و
وەک گەڵای رووت لەگەڵ دلبەرەکەمدا
یەکتر ئەگرینە باوەش

2
ئەمەوێ
ئەمەوێ دڵۆپەکانی بارانت یەک یەک بۆ تەفسیر بکەم
بە مەرگی ناوادەی گەڵاکانی پایز ئاشنات بکەم
هاوار و ناڵەناڵی رەشەباکانت بۆ شی بکەمەوە
بێ ئۆقرەیی و سەرشێتی دەریاکانت بۆ حنجە بکەم
هەر دڵۆپە بارانێک قەترەیەک ئەشکی منە
لە چاوەڕوانی گەڕانەوەتا دادەبارێ
خەزانی هەر گەڵایەکی رەنگ زەردهەڵگەڕاو
بزەیەکی منە لە تاسەی بێ تۆییدا دەوەرێ
لەرینەوەی ژێی تووڕەی هەر رەشەبایەک
نرکە نرکی دڵمە شینی دووریت ئەگێڕێ
شەپۆلی یاخی هەر دەریایەک
هەڵچوونی رۆحمە بۆ نیگایەکت شاڵاو دەهێنێ

3
بەختگرەوە
هەر ئەو ساتەی بەختگرەوەکە
دڵی بلووری منی لە مرواری رۆحتا بەدی کرد
لە تەوێڵی منا رەنگی فریشتەیی تۆی دۆزییەوە
تەڵیسمی خەونەکانمی ورد ورد شی کردەوە
مزگێنی هەڵاتنی خۆری لەنێو شەوەزەنگی دڵما پێدام
لە نیشتنەوەی کۆترە سرکەکە لە سەرشانم بێداری کردمەوە
هەر ئەو ساتەی بەختگرەوەکە
راماڵینی منی وەک بەردێکی کەنار رووبار لێکدایەوە
هێرۆگلیفیای ئاورنگی سەر پەلکە گیای بۆ خوێندمەوە
گزنک و کازیوەی هەموو رۆژەکانمی تەفسیر کرد
لەو ساتەوە بێ پشوودان لە سەفەردام و
بەڕێوەم بەرەو دوورگەی ئەوینی تۆ

4
ئەمەوێ لەگەڵ تۆ بم
لەگەڵ تۆ
شار بە موزیکی ئەوین خەبەر بکەینەوە
ئاسمان بە پەلکەزێڕینەی ئەشق رەنگ بکەین
شەوەکان بسپێرین بە تریفەی مانگ و
رۆژەکانیش بە ئەمانەت بدەینە دەست ئەستێرەناسێک
باخچەکان تەژی بکەین لە لاولاوی باڵامان
ئەستێرەکان بکەین بە شایەت بەسەر یەکەوە
دەریاکان بە سەوڵی خۆشەویستی ببڕین و
لە ئامێزی یەکتردا تەرمی خۆمان بنێژین

5
دەستگرتن
دەستم بگرە بەرەو مەملەکەتی جەستەت
دەستم بگرە بۆ سەرچاوەکانی چێژ
دەستم بگرە بەرەو کانگای ماچ
دەستم بگرە بۆ دنیای رامووسان
دەستم بگرە بەرەو چرکەکانی ئاوێتەبوون
دەستم بگرە بۆ قووڵاییەکانی دڵت
دەستم بگرە بەرەو مەرگی پێکەوەیی
دەستم بگرە توند توند دەستم بگرە
تەنها بۆ دابڕان دەستم مەگرە

Previous
Next