کێ هەواڵی شارم بۆ دێنێتەوە؟ .. شیعری: ستیڤان شەمزینی
خودایا چەند بیری شار ئەکەم
شار چەند بیری پیاسەی ئێوارانی من ئەکا؟
کێ دەتوانێت شار و من بخاتە رستەیەکەوە؟
کێ دەتوانێ خەیاڵم لە جەستەی شار بکاتەوە؟
کێ وەنەوزی منی دیوە بۆ حەسرەتی شار؟
کێ لەم خەوە قووڵە رامدەچەڵەکێنێ لەدووری شار؟
خودایا چەند بیری شار ئەکەم
چەند بیری زەردەخەنەی شەرمنانەی کچانی شار ئەکەم
چەند تامەزرۆی بینینی نیگای نەرمی ئاشقانی شارم
چەند ئاه هەڵدەکێشم لە ژانی دابڕانی شار
چەند جار بە خەون بە کۆڵانەکانی “حاجیحان”دا شۆڕبوومەتەوە؟
چەند بیری دۆڕانی دۆمینەکانم دەکەم لە “چایخانەی شەعب”
چەند بیری سەرەتاتکێی مناڵانی گەڕەک دەکەم
چەند جار یادی “سەهۆڵەکە” ئاگری لە دەروونم بەرداوە؟
چەند جار با گالیسکەی ئەندێشە گەڕاومەتەوە “عەقاری”؟
چەند جار بە بوراقی داڵغە چوومەتەوە “باخی گشتی”؟
چەند جار لە زیندە خەوندا کتێبم لە “ئەنوەر برزۆ” کڕیوەتەوە؟
ئاه خودایا چەند بیری شار ئەکەم
کێ هەواڵێکی شارم بۆ دێنێتەوە؟
کێ دڵی من لە کۆڵانە تەسکەکانی “سابونکەران” ئەدۆزێتەوە؟
کێ شوشەی شکاوی رۆحم لە جادەی “کاوە” کۆ دەکاتەوە؟
کێ پێکەنینە نەپساوەکانی من لەگەڵ شار ئاشت ئەکاتەوە؟
کێ هەیە سڵاوی من بگەیەنێتە “حەمە شێت” گیان؟
کێ هەیە بە کڵافەی خەونێک من و رۆحی شار پێکەوە بدورێتەوە؟
کێ هەیە شیعرێکی من لە “هۆڵی رۆشنبیری” بخوێنێتەوە؟
کێ هەیە تۆزێک بۆنی خۆڵبارانی شارم بۆ بهێنێ بۆ ئەم غوربەتە؟
کێ هەیە چنگێ ئاوی سازگاری شار بکاتە سەر ئاگری غەریبیم؟
کێ هەیە خەبەری شاری لا بێت؟
کێ دەبێت بە “سالم”ی من، تا وەک “نالی” چامەیەکی بۆ بنێرم؟
کێ هەیە باری قورسی ئەم بیرکردنەی شارم لەگەڵ هەڵگرێت؟
کێ هەیە چەند گرام تامی هەنگوینی شاری لا دەستکەوێ؟
کێ ئازاری ئەم دوورییەم لە شار بۆ ئەکاتە بە رۆمان؟
کێ هەیە رەشەباکەی شارم بە پۆستا بۆ بنێرێ؟
کێ هەیە گەرمای شارم بۆ رەوانە بکا بۆ ئەم سەهۆڵستانە؟
کێ هەیە هەواڵی شاری لا بێت؟
کێ هەیە فرمێسکەکانی من بگەیەنێت بە شار؟
کێ هەیە بە شار بڵێ کەمێک لەسەر ئەم شاعیرە بوەستە؟
ئاخ لە دووری شار
شار و شەکرە شار، سلێمانی
6-2-2016
ئەڵمانیا- شتاینهاگن
ئەم شیعرە پێش چوارساڵ و نۆ مانگ نوسراوە و لە یادی بیناکردنی شاری سلێمانی پێشکەشی دەکەمەوە بە خوێنەران. بەڵام خوێنەر دەبێت بزانێت ئەمە نەک ختوکەدانی هەستی ناوچەگەریی نییە بەڵکو من هەر بڕوام بە ناسیۆنالیزمیش نییە. تەنیا مامەڵەیەکی شیعرییە لەگەڵ لەگەڵ نوستالیژیاکانم لەو شارە.
