Skip to Content

پێنج ‌هەستی جیاواز .. شیعر/ کاوە عوسمان عومەر

پێنج ‌هەستی جیاواز .. شیعر/ کاوە عوسمان عومەر

Closed
by November 22, 2020 General, Poems

(١ )

لە چاوەڕوانی دەرگا لێدانێکی..

 درەنگ وەختە،

کورسیەکەم هێنایە..

 ژێر نوری ئاوریشمی

مانگێکی وێڵ  وتەنیا،،

شوشە شەرابێکی کۆنیشم

لە بەفرگرەگە دەرهێنا،

پیکێ،،

دوو پێک،،

 لەوانەیە شەویش دابێ،

 پێکەکانیش..

یەک لە دوای یەک،

وەک ترپە لاوازەکانی دڵ،

 کۆتاییان بێ،

 لەوانەشە لە ژێر پرچی..

 زیوینی مانگیشا ..

خەوم لێ کەوتبێ،

 هێشتا نووری هاتنی ئەو

هەر دیار نەبێ

(٢ )

لەوێ نیشتمانێ…

 لەت لەت ئەکرێ

من دەفتەرە نە نوسراوەکان

توڕ ئەدەمە نێو زەریاوە

بڵێی ماسی و نەهەنگ

 حەزیان بە خوێندنەوەی..

  شیعری کۆچەرێ بێ

بڵێی نەورەسەکان

هۆنراوەکان

بەرنە لای مانگێکی خەمگین

بڵێی وشەکان،،

 ببنە یاقیق و مرواری،،

بۆ جەستەی ئەو هاوڕێیانەی

باوەشی گەرمی نیشتمانیان لێ دزرا

پێشڕانەگەیشتن

لێویی شەختەیان

وەک پەپولەیەکی …

بێ لانەو سەرگەردان

لەسەر ڕومەتی …

کچێکی تەنیای وڵات

نەخشەی ماچێ بکێشێ

(٣ )

لە ژێر دار ئەرخەوانەکان ..

پیاسەمان کرد،،

 منداڵ ترو شادترو پاکتر  بوینەوە

چرۆی گوڵە ئەرخەوانیەکان،

 لە ڕومەتی ئەو ئەچوون،

 گەرچی هەموو شار..

 لە ژێر  بەیداخی خەوا ڕاکشابوو،

بەڵام ئێمە بەئاگابوین

لە جوانی گوڵە ئەرخەوانە…

 تەڕو درەوشاوەکان

ئێوارەیەک لە هەموو ڕەنگێ

ئێمە لە ژێر دار ئەرخەوانە درەوشاوەکان

پیاسەمان کرد،،

وشەکان بوونە چرا،،

گەڵاکان بڵێسە،

فڕەی سوێسکەیەک..

لە ئاسمانی شینی بێگەردا..

بڵند هەڵکشا

 بوە دێڕە شیعرێکی باڵگرتوو،

(٤ )

بێزار نیم لەو گڵۆپانەی..

لە ژێر بارانەکەدا

وەک خۆری ووردیلە دەگەشێنەوە

هەربۆیەکیشە تا درەنگانی شەو ،

لە پەنجەرەی نوقم لە تەما

تەماشای وردە ئاوی وەریوی..

 بەهەشتم کرد

(٥ )

زەنگی تەلەفونەکەش،،

 بێدەنگئەکەم،

 ڕادیۆکەش …

لە شوێنی خۆی ..

با کوژاوەبێ،

ڕۆژنامەیەک..

 ئەخەمە سەر چاوم،

 دەزانم دەرەوە جەنگە،

 ماڵوێرانیە،

تەلەفزێۆن و ئینتەرنێتیش،،

لە سوچی دیوارەکە..

 جێ دەهێڵم 

من هەست ئەکەم..

 خەو بردوومی،

لە خەوی تۆدام،

بەدڵنیایی،  ئازیز..

لە خەوی تۆدا..

نە جەنگ هەیە،

نە ماڵوێرانی و نە هەڵهاتن

 نە درۆی سیاسیەکان،

نەئاگادارکردنەوەی بڵندگۆی..

 نزرگە زۆرەکانی شار

دەربارەی ئازاری …

ڕۆحهەلکیشان و..

 سزای سوتانی..

بەردەم خواوەندە دڵڕەقەکان

وێنەکە کارێکی هونەری فۆتۆگرافەری ڕۆمانی
(Adina Voicu)
بە سوپاسەوە لە پەیجی فەرمی خۆی وەرگیراوە

Previous
Next