Skip to Content

پێنج بروسکەی شیعریی.. دەق: ستیڤان شەمزینی

پێنج بروسکەی شیعریی.. دەق: ستیڤان شەمزینی

Closed
by February 6, 2021 General, Poems

“یەک”

رۆژ و وەرزەکانم
بەیانیان لە پیاڵەی قەسیدەدا دەتخۆمەوە
نیوەڕوان لەسەر زنەی شیعر پێکدەگەین
ئێواران لە ئاسمانی عەشقدا دەفڕین
شەوانیش دەتگرمە چوارچێوەی شیعر و
لە ژوور سەری خۆما هەڵتدەواسم


هاوینان لە گەرمی لەشتا دەتوێمەوە
پایزان وەگ گەڵایەکی زەردهەڵگەڕاو
رەشەبای عەشقت دەمبا
زستانان لە بەفری جەستەتا
سەمایەکی جادوویی دەکەم
بەهاران لە رۆحی تۆدا
سەرلەنوێ چرۆ دەکەمەوە


“دوو”

سەدای عەشق
کە لێت دووربم هێندەی ئاوی دەریاکان فرمێسک دەڕژم
کە ناتبینم ئەگەر بۆ چەند چرکەیەکیش بێ
وا هەست ئەکەم کەوتوومەتە ژێر هەرەسی چیایەکەوە
ئازیزم، بیر لە عەشقی من بکەرەوە چەند گەورەیە
کاتێ کردیانە سەر باڵی هەور شی بووەوە بۆ باران
ساتێ کردیانە سەر زەوی بێروون سەرتاپا بووە باخ
بیر لەو سۆزە بکەرەوە لە دەنگ و پێکەنینەکانما هەیە
چی مۆسیقارەکانی دنیایە ئەیانەوێ بیکەنە ستران
رازی دڵم بۆ تۆ و خودا ئەکەمەوە ئەی شازادەترین یار
با سەدا و ناڵینی دڵم بگاتە دوورترین شوێنی ئاسمان


“سێ”

تۆ نیگارێکی جادوویت
تۆ نیگارێکی هیچ وێنەکێشێک ناتوانێت تەفسیرت بکات
تۆ حکایەتێکی هیچ حکایەتخوانێک ناتوانێت بتگێڕێتەوە
تۆ سنەوبەرێکی هیچ باخچەیەک لە زمانت حاڵی نابێت
تۆ شەپۆلێکی لە دڵی هیچ دەریایەکدا ئۆقرە ناگری
تۆ فرمێسکێکی هیچ چاوێک ناتگرێتە خۆی
تۆ خەندەیەکی هیچ نیشتمان و زێدێکت نەماوە
تۆ نەوڕەسێکی هیچ کەناراوێکی هێمن شک نابەی
تۆ پەروانەیەکی هیچ رووناکییەک بانگهێشتت ناکات
تۆ بەیتێکی لە چوارچێوەی هیچ قەسیدەیەکدا جێت نابێتەوە
تۆ وشەیەکی ناسکی لە هیچ زارێکدا کپ ناکرێی
تۆ بەیانییەکی لەگەڵ هیچ غروبێکدا یەکناگریتەوە
تۆ خەیاڵێکی لە هیچ خەونێکدا نادۆزرێیتەوە
تۆ ئەفسانەیەکی لە هیچ واقیعێکدا نابینرێی
کەچی ئەوە منم
کە تۆ خۆتم تێدا دەبینیتەوە


“چوار”

مەمکی تۆ و شیعری من
ئەگەر هەستت بە گەرمییەک کرد لە سینگی خۆتدا
شیعری منە زمان لە گۆی مەمکەکانت دەخشێنێ
ئەگەر رۆژێک جووتە مەمکەکانت وەک کۆتر هەڵفڕین
دوودڵ مەبە بەرەو قووڵایی شیعرەکانی من دێن
هەر ساتێ گوێت لە ئاوازێکی ناوازە بوو لە دەروونتا
دەست و پەنجەی شیعرەکانمە شمشاڵی مەمکت دەژەنێ
گەر مەلێکی سەرکەش لەسەر بەرزایی سینگت نیشتەوە
ئەوە بولبوولی شیعرمە هاتووە بۆ مەمکەکانت بخوێنێ
ئەگەر رۆژێک ئازادیت بۆ مەمکەکانت ویست
شمشێری شیعرەکانم ئامادەیە ستیانەکەت بدڕێنێ


“پێنج”

یەکەمین ئاشق
من یەکەم راهیبی ئاینی عەشقم
یەکەم وەحی عەشق بۆ من هاتە خوارەوە
یەکەم ئایەتی عەشق من نووسیوومە
یەکەم قوربانی عەشق هەر من بووم
یەکەم دۆڕانی عەشق لە چارەی من نووسرا
یەکەمجار من عاشق بووم
ئەوانیدی هەریەک گاڵتەجاڕانە شوێن هەنگاوەکانم کەوتن
یەکەم ئاوی ئەم عەشقە نەفرەتییە من رشتم
یەکەمین وانەکانی عەشق لە قوتابخانەکەی مندا وترایەوە
یەکەمین ئاوازی عەشق بە پیانۆی رۆحی من لێدرا
یەکەمین ئاگری عەشق لەسەر دڵی من کرایەوە
یەکەمین عاشق خۆم بووم و
کەس ئەم سەروەرییەم لێ زەوت نەکات
یەکەمین عاشق خۆم بووم


بەلجیکا – ئەڵمانیا – سوێد
2014- 2015

Previous
Next