Skip to Content

مروارییەکانی ئەوین.. مرواری حەوتەم/ شیعر: ستیڤان شەمزینی

مروارییەکانی ئەوین.. مرواری حەوتەم/ شیعر: ستیڤان شەمزینی

Closed
by April 7, 2021 General, Poems

هەر بیر لەوە ئەکەمەوە
کە تۆ هیچ سووچێکت نییە لە ئازارچەشتنی منا
ئەوە کڵپەی ئاگری رۆحی خۆمە
گڕی لە هەموو کامەرانییەکانم بەرداوە


باسی مەرگت بۆ ئەکەم
کە تەنها ئەو کاتژمێری دڵم لە عەشقت رائەگرێ
باسی ژیانت بۆ ئەکەم کە تەنها ئەو
داهاتووم پڕ ئەکات لە ئێستای تۆ


بەدرێژایی شەو نانوم ناڵێم بەهۆی تۆوە
بەڵکو لەبەر دڵی تەنگی خۆم
بە بەرینی رۆژ خەون ئەبینم
ناڵێم بە تەنهایی خۆمەوە بەڵکو بە تۆوە


دڵڕەقیش بنوێنی دڵنیایت “ناتبوورم”ی من
درۆیەکە عەشق فێری کردم
شەقامی چۆڵی ئومێدم بە گوڵی شیعر رازاندۆتەوە
لەبەردەم هەنگاوەکانتا


هەمیشە دڵە خورپەمە نەکا ماندوو بیت
لەم خەرابستانەی رۆحی بریندارم
هەمیشە لەوە دڵنیام دیدەنی تۆ
ئەبێ بە ساڕێژی برینێکی قەتماغە نەبوو


کە تۆ دەرکەوتیت سروودی فرمێسکت
بۆ گۆڕیم بە گۆرانی پێکەنین
کە من دەرکەوتم گریانی نائومێدیم
بۆ گۆڕیت بە سەمای بەختەوەریی


ئەوینت دەنکە مروارییەکە
لە قووڵترین قووڵایی دەریای دڵما رۆچووە
عەشقی من هەورە برووسکە و نەشئەیەکە
سەرتاپای رۆحتی گرتووە


لەوەتی مەی چاوەکانت ئەنۆشم
بادەم لە تامی هەنگوین شیرینتر بووە
لەوەتی ئاگری سەرکێشیم ئەسووتێنێ
بۆنکڕزوت بۆتە خۆشترین عەترم


کتێبی دڵم بکەرەوە و
تێر تێر لەو شیعرانە بڕوانە بۆ تۆم نوسیووە
چرای چاوەکانم داگیرسێنە و
لە ناویدا تابلۆی نیگا بێزارەکانم ببینە


دەروونم بۆتە خەرابستان و
چیتر گوڵی ئارەزووی تێدا سەوز نابێت
سپێدەیەک وەرە و ئەسپی حەزەکانت
لە کەلاوەی جەستەمدا زین بکە


باخێکی پاراو بووم
ئێستاش شارێکی خۆڵەمێشی بەدەست “با”وە
بارانێکی چاوباز بووم
ئێستاش شەپۆلێکی سووتاو لە هەناوی دەریاوە


سوێد – ستۆکهۆڵم

Previous
Next