پریاسكه.. ستار ئه‌حمه‌د
به‌ده‌م خه‌نده‌ی گوڵه‌وه
شنه‌ی با ده‌خۆمه‌وه
له‌كوێی جه‌سته‌مدا
گوێ له‌ده‌نگی تۆ بگرم
بوومه‌ته پارچه‌ی شكاوی شووشه
هه‌ر كه‌رتێكم له‌خۆمدا
خووی داوه‌ته ته‌كانی مردن
به‌ره‌و كوێ ته‌رمم هه‌ڵده‌گرن
له‌پاڵ كام داردا ده‌مشۆنه‌وه
بسمیلم به‌چی ده‌رده‌كه‌ن
من خۆم داره‌مه‌یتێكم
له‌ژاڵه‌ی به‌رده‌رگه‌ی ماڵه‌كه‌تان
سازیان دام و
به‌به‌رامه‌ی تۆ بزه‌یان پێبه‌خشیم
له‌خۆم تێناگه‌م
له‌تۆشدا گومان ده‌مگه‌ستێ
چاوه‌ڕوانی ده‌مفڕێنێ
ژوان ئاڵای سنوورم بۆ هه‌ڵده‌كا
خۆزگه به‌خۆڵ ده‌مپێچێته‌وه
دابڕان ده‌مداته ده‌ستی چاره‌نووسی به‌رده‌وه
له‌چیدا شانۆی به‌خشین بنوێنم
له‌كام شه‌ڕگه‌دا پریاسكه‌ی تاسه بكه‌مه‌وه
رابوورد .. ئه‌و كاتانه‌ی به‌دوو ده‌ست
لوتكه‌مان ده‌گووشی
خاكمان ماچ ده‌كرد
ئه‌و ساتانه زه‌مه‌نی عه‌شق بوون
مه‌ودای دڵو خۆزگه
په‌نجه‌و قه‌ڵه‌م بوون
ئه‌مێستا بارێك له‌تریفه
پڕ ده‌مێك وشه داناگیرسێنێ
په‌رچه‌می رسته‌یه‌ك ناكاته‌وه
شیعرێك له‌پاژنه‌ی هه‌نگاوا نادوێنێ
ده‌ڕۆم چۆن باران
ئه‌مساڵی تۆراندووه
پشتی كردووه له‌خاك و
هه‌نسكێك بۆ گوڵێك ناڕژێنێ
روومه‌تی مناڵێكی گرینۆك ناشواته‌وه
به‌و شێوه‌یه ده‌چم
له‌خۆم ده‌رباز ده‌بم
له‌تۆدا ده‌بمه ئاڵای سره‌وتن
به‌ده‌م شكانی خۆمه‌وه
له‌ژانی ده‌روونتا یه‌ك ده‌گرمه‌وه‌ز.
ستار ئه‌حمه‌د
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
