Skip to Content

رەهەندەکانی ژنبوون.. شەماڵ بارەوانی

رەهەندەکانی ژنبوون.. شەماڵ بارەوانی

Closed
by كانونی یه‌كه‌م 11, 2021 General, Poems

پێشکەش بەهەموو ژنە چەوساوەکان…

لەوەرزێک لەدایک بووم
لێوان لێو بوو لەکاتژمێرەکانی ژن کوشتن

ویستم دەنگی ژن بنووسمەوە
گوتیان
لەهجەی ژن عەورەتە
و
ئارەزووی پیاو دەجوڵێنێت

ئوە خودایە
من تێناگەم
بۆچی مێ باجی شەهوەتەکانی نێر بدات
و
ئەو هەموو گوناهەیان
لە ڕەشنووسی ژن
بارکرد

خودایە
ئەوە چ مەوسمێک بوو
خەندەکانی ژنیان
لەتابووتی هەڵوەرین ناشت

ئەوە ڕەهێڵەی چ بارانێکی دڵ ڕەق بوو
فەرهەنگی ژنی پڕ کرد
لەدڵۆپە خوڕافە

خودایە
هێشتا وەرزی ئێستام دانەگیرساندبوو
چاوی خەیاڵە شینەکانیان کوێرکردم
و
مۆمی ئایندەیان کوژاندمەوە

هێشتا هێشووی هیواکانم
پێنەگەیشتبوون

درەختی تەمەنیان بڕیمەوە
و
ڕەهەندەکانی ژنبوونیان ئیکمال کرد

چ زوو زەمەنی ژنیان پڕکرد لە گۆچان
و
ژنبوونیان بە تخوبەکانی پیری
و
نەسەبی ژنیان بە دەروازەی
سەراب سپارد

خۆمن
تازە خەریک بووم
ئینشای یەکسانی بنووسم
و
نەخشەی ژن بوون بکێشم

کەچی
لەپڕ کۆمەڵێک تاریکی
لەنەژادی مەرگ
کۆمەڵێک تەمتوومان
لەخێڵی جەهالەت
بە باوەشێک ڕەجم و
دەرزنێک دۆگمەوە

بە حەشاماتێک قامچی و
ڕستێک قانونی کۆنەوە

هاتن
و
حەقیقەتی ژنیان
موتوربەی ئەفسانەکرد
و
هەرێمی ژنبوونیان
پڕکرد لە تابوو

ئاواتەکانی ژنیان
خەساند
و
هەموو ڕەنگەکانی ژنبوونیان
بردەوە سنووری کوێری

من تێناگەم
خودایه بۆچی
بەرلەمێژوو ژن و هەڵە
خرانە تای تەرازووەک
و
خەتاکەی ئادەمیان خستە ئەستۆی ژن!

خودایە
ڕاستە دەڵێن ژن بوو مەسیحی
لەخاچدا
و
هەر ژنیش بوو
فووی کرد بە ئاگرەکەی ئیبراهیمدا؟

من تێناگەم
بۆچ دەبێ خنکاندنی خەونەکانی
ژن شەڕەفی پیاو
و
هەڵوەرینی خۆزگەکانی ژن
قەدەری خودا بێت

گلەیی بێ خودایە
گەر ئەو جارە ژنت دروست کرد
با لە میهرەبانی خۆت بێت
نەک پەراسووی پیاو

من نامەوێ چیتر لەڕەگی خەم بم
بمبەرەوە
سەر ڕەچەڵەکی خۆت ئەی خودا

خودایه
تاکەی ژن
هەر سێبەری پیاو کۆپی
و
بێدەنگی خۆی ئەرشیف بکات

خودایە
لەکامە سورەتت هاتووە
پیتەکانی ژن دەبێت بچێتەوە
ڕستەکانی پیاو
و
دەنگی ژن
لەناو تەرمی عەورەت
مۆمیا بکەن

خودایە
بە مەنتقی کامە
قەبیلەبوو
مەلەفی کوشتنیان بۆ ژن کردەوە

بە فەتوای کامە
مەزهەب بوو
ژن بوون حەرام کرا

ئەوە ڕدێنی چ ڕێزمانێک بوو
عەورەتی ئاوەڵناوی کرد بەبەر ڕستەی ژنبووندا

بە وڕێنەی
کامە عەقیدە بوو
ڕێنووسی ژنیان
لەدەفتەری ژیان نەزیفکرد

بە سمێڵی کامه نیچەبوو
تواناکانی ژنیان بەستەوە

بە ئاگری کامە نیرۆن بوو
ژنیان سوتان
و
بە میزاجی کامە ڕادیکاڵ بوو
ژن بەردباران کرا

خودایە
چۆن ڕێگەت دا
ئەلف و بێی ژن بوون
لەقەفەسی پیاودا
ئیعراب بکرێت

چۆن هێشتت
قیژەکانی ژن
بپڵیشێتەوە
و
ئەبجەدیەتی ژن
بوون
لەبەردەم
منارەی پیاودا
بسڕدرێتەوە


Previous
Next