Skip to Content

پیتەکان… ئازاد سوبحی

پیتەکان… ئازاد سوبحی

Closed
by March 18, 2022 General, Literature

ئەی پەتریارکە پیرەکان
ئەوە گۆپکەی گوڵەخوێنی ئێمەیە ئەستێرەکانی پۆشیوە، یان دوومەڵی میکرۆبە نەمرەکانی تەوتەمەکان؟

-د-
دەستی ئاگردزەکان لەودیوی سنوورەکانەوە ئەندازەی ھێڵە نەبینراوەکان دەگۆڕن، حورمەتی مۆمە زەردەکان ڕیسوا ئەکەن، پەنجەرەی نوێ بۆ زوڕناژەنە فریودەرەکان واڵا ئەکەن.
گوڵەگەنم.
بە تاڵی مووی گایەکی گۆشتن بە کاغەزی دۆلارەوە ھەڵواسراوە.
لەمدیوی سنوورەکانەوە، گیرفان و نینۆکمان پڕن لە ھەڵدێر و سەرباز.
سپێتیمان دەخوێننەوە، لەسەر ڕوومەتی خەونەکانمان جارێکی تر وێنەی پلیکانە ونبووەکان دەکێشنەوە. ئەڵێن ئێمە خۆڵەمێشی لۆچەکانی دڵتان ئەسڕینەوە، فرمێسکی ڕژاوی دەزگیرانەکانی گوڵەگەنم ماچ ئەکەین. جووڵەی ئەسپە سیحرییەکان بەم ئەستێرە کڵۆڵە ئاشنا ئەکەین.

-و-
وێرانییەکان لە چەقی جەستە بازنەییەکانماندا کفن و تیزاب ئەڕژێنەوە.
ئەوە باڵای ڕۆحی شەرمنمانە لەژێر چەپۆکی تفەکانا ڕاوەستاوە.
دەست بۆ سێبەری درەخت بەرن، با پاسارییە کوێرەکانى مێژووی ئاسن بخوێننەوە.
ئەوە پلازمایە، یان ئەسید. ئەڕژێتە دەمارەکانمانەوە. ئەمە مەرگە، یان کەرنەڤاڵی نەعل و خوێن؟

ز-
زایەڵەی سەمای کانزاکان سروودەکانی گەنجێتی خۆی ئەڵێتەوە. (دڵە مەییوەکان لە ترسا باڵیان لە ئاسمانەکان ئەخواست و بە شڵەژاوی بۆ کەلێنە سەرابییەکان دەگەڕان.) لەسەر پلیکانەی ئاوازە ئاسنینەکان، کفنە بەتاڵەکان بۆ لاشەی ونبووی بۆشاییەکان دەگریان.
(ئەو بۆشاییانە پێش مردنیان ھەرەسی ئەفسانەکانیان بینی.)
ئەوان سیحری ترسیان بینی.
کێ فریا کەوت دڵۆپی ڕق بۆ مەرگی ھەوا بڕێژێ؟
شارەکان دەخزانە ناو گیرفانی یەکدییەوە، دایکەکان مەمکیان بۆ کۆرپە جێماوەکانیان دەبڕی.
سمۆرەکان چاویان لەژێر سێبەری دارگوێزەکانا لە بیر چوو.
شارەکان ڕژانە ناو چارەنووسی ئاسنەوە.
ئەوە سەفەری ئامادەبوون بوو، ویستمان لەسەر لووتکەکان، سەرەتاکان داگیرسێنین، کاتژمێری سەر تەنافەکان بە ئاگا بێنین، خۆمان باڵای زەمەنێکی مێیینە بین. چاویلکە و نەخشەکانمان ڕۆچوونە دۆڵەکانەوە. لەناو پاڵتۆ و ھەنگاوەکانمانەوە دڵ و فرمێسک دەردەپەڕن. خواوەندەکان نەیانتوانی گۆچانێک بۆ گریانەکانمان بدۆزنەوە. ئەوە پاشماوەی ڕۆحی تۆراومان بوو، لە پێچەکانا بە جێ ئەما.

-خ-
(خۆرەکان ئێستا لە تونێلەکانی کوێرێتیدا شیوەنی پارچەکانی ئاگر ئەکەن.)
ئەی تیشک
ئەی نھێنییە نەگۆڕەکەی نێوان بوون و نەبوون، تۆ نەبێ چۆن پەپوولە و تابووت لە یەکتری جیا کەینەوە؟ چۆن بتوانین مناڵ و گۆچان لە یەکتری جیا کەینەوە؟
ئێمە ھەروا لە بەر دەرگا داخراوەکانا نینۆکەکانمان بکرۆژین، یان لەناو وردوخاشبوونمانا بۆ پارچەکانت بگەڕێین؟

سەرچاوە:
ڕۆژنامەی ھەرێم، ژمارە (١٨)، 8/4/1993, ل:8.

Previous
Next