بەرامبەرێن… نەوزاد بەندی

تۆیش لەو خێزانانە بووی ،
هەتا پەلکێشی عەسکەری نەکرای ،
بەغات نەبینی ؟
کە میوانێک ئەهات بۆ ماڵتان ،
لەبەر بیجامە دڕاوەکانتان،
خۆتان ئەشاردەوە ؟
کە باوکتان لێی ئەدان ، ئەخەوتن ،
بۆ ئەوەی وابزانن ئەو لێدانە خەوێکی ناخۆش بووە ، ئەگینا نییە لە دنیادا دڵنەرمتر لە باوکتان ؟
کە مریشکتان لێ ئەنا ،
وەک قەسعەی عەسکەری ،
دابەش ئەکرا ؟
ئێوەیش لەو خێزانانە بوون کە هەمووتان بە لایەنی کەمەوە جارێک لە سەربان کەوتوونەتە خوارەوە ؟
کە خوشکە گەورەکەتان قاچی سووتاوە ؟
کە دایکتان بەسەر دووانتانەوە دوپشک پێوەی داوە ؟
کە دوو ئامۆزاتان شەهیدی یەکێتیە و
سێ پورزاتان شەهیدی پارتییە و
خاڵۆزایەکتان لە شەڕی قادسیە مەفقوده ؟
ئێوەیش لەو خێزانانە بوون ،
کە بە دزییەوە هەندێکتان بەعسی بوون ؟
ڕۆژی ڕاپەڕین کارتۆنێ جگەرەت
وەک دەسکەوتی جەنگ ، هێنایەوە بۆ ماڵەوە ؟
لە کۆڕەوەکە ، ڕۆژووەکەت شکاند و
خەریک بوو کفرێ بکەیت و نەتکرد ؟
تۆیش لەو خێزانانە بووی
کە عەسران لە سەربان ،
بە دارلاستیک نامەت هەڵئەدا بۆ کچی کۆڵانی ئەودیو ، بە بێ ئەوەی کچە ئاگای له مەحموی بێ زەواڵ بێ ؟
کە دایکی هاتە سەرتان ، باوکتان چەقۆ گەورەکەی مەتبەخی هەڵگرت و .. وتی : هەر ئێستا سەری ئەبڕم ؟
تۆیش لەو خێزانانە بووی ،
ئێوارەی دوا ڕۆژی جەژن ،
یەک نوقوڵ نەئەما لە ماڵتان ؟
نەتکردایه بە شەڕ و فەرتەنە ، جلی جەژنیان بۆ نەئەکڕیت ؟
ڕۆژانەی
دو هەفتە پێش جەژنتان ، کۆئەکردەوە بۆ جەژن ؟
کە یەکەم کچ وەڵامی بەیانی باشەکەتی دایەوە ،
یەکسەر پێت ووت : شووم پێ ئەکەی ؟
کافیتریای دایکتان بەر دەرگا بوو ..
کۆمپانیاکەی باوکتان چایخانە ؟
تۆیش لەو خێزانانە بووی ،
کە شەق و زله و تف و نەعل ،
مامۆستای تایبەتیی چوار وەرزەتان بوو ؟
کە بە پەلە شووتانکرد و ژنتان هێنا ،
بۆ ئەوەی ڕزگارتان بێ ،
کەچی هەر یەکەتان کەوتنە ناو مەنهۆڵێکەوە ؟
تۆیش لەو خێزانانە بووی ،
کە زۆرترین کاتەکانی بە خەو تێپەڕین و
هیچ خەونێکیشی تیادا نەهاتە دی ؟
کە برا ناوەنجێکەتان بە ڕێکەوت قاپقورعانێکی دۆزیەوە و ..واتانزانی ئاڵتون نیە و.. ئاڵتونیش بوو ؟
تۆیش لەو جۆرە خێزانانە بووی ،
کە یەکێکتان به دزییەوە تەنزیمیی بوو ،
دووانیشتان بە ئاشکرا ، جاش ؟
کە سەری مانگ ئەهات ،
ئەبوو بە شەڕ ،
دایکت داوای کراسی بی بی خانم ی ئەکرد و
برا گەورەکەتان داوای پانتۆڵی باندۆ ..
باوکیشتان تەڵاقی ئەخوارد
هەر بەشی قەرزی
قەساب‌ و
وشکەفرۆش ئەکا ؟
تۆیش لەو خێزانانە بووی ،
کە ژنتان هێنا ، حەیاتان چوو ..
کە کچتان دا بە شوو ، حەیاتان چوو ..
بە حەدیس ژنتان ماره کرد و
موئەخەرەکەی قورئانێکی کەریم بوو ؟
ئێوەیش لەو خێزانانە بوون ،
کە نە باوک و کوڕ قسەیان هەبوو ..
نە دایک و کچ ..
کە هەمووتان خوا خواتان بوو گەورە بن ،
بۆ ئەوەی بە لایەنێ کەمەوە
لە تێهەڵدان قوتار بن ؟
ئێوەیش لەو خێزانانە بوون ،
کە کوڕە ناوەنجێکەتان چواردە خۆرێکی لە لق وەرگرتبوو ،
ڕۆژی سێ چوار جار ،ئەیووت باوکم ئەکوژم و ..
دایکتان قورعانی ئەخستە باوەشیەوە …..و لە ژێریشەوە شانازی بە کوڕەکەیەوە ئەکرد کە چەند مەردە ..؟!
ئێوەیش لە پڕ گەوره بوون ..؟
لە پڕ خوا ڕزگاری کردن ؟
جەژنا و جەژن نوقوڵێک لە یەکتری وەرئەگرن و
خواخواتانە زوو بڕۆنە دەر ،
نەک فلیمە ترسناکەکە دووبارە بێتەوە ؟
شتی تریش …..

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.