ناجێگیری ڕەوشی جیهان ، و نا خۆڕسکی خۆپیشاندانە کانی عێراق… ن/ موتەلیب سەعید عومەر
لەهەموو وڵاتانی دونیا دەنگی ناڕەزایی و ناڕازیبوون هەوڵێکە بۆ چاکسازی و گۆڕینی ئەو شێوازە نادروستە لە حکومڕانی کەئیدارەی وڵات بەڕێوە دەبات ، بەدرێژە کێشانی ئەو بارودۆخە نەخوازراوە باری ژیانی خەڵک و داواکارییەکانو کێرڤی ناڕەزاییەکانیش تادێت بەرزتر دەبێتەوە، زۆرینەی ناڕەزاییەکانیش دەرئەنجام و نائومێدی خەڵکە بەگوێنەگرتنی داواکارییەکان و پێشێلکردنی مافە مەدەنی و سیاسی و کۆمەڵایەتییەکان .
لەدونیای سەردەمی خێرایی گۆڕانکارییەکان لەجیهاندا سەرباری ئاڵۆزی بارودۆخی سیاسی ئێراق و وڵاتانی دەوروبەر لەنمونەی دەسوەردانی ئێران لە هاوکاری کردنی گروپ و ڕێکخراوە ئیسلامیەکان دژ بە ئیسرائیل دروستبوونی پشێوی لەناوخۆی وڵاتی سوریا بۆ ماوەی زیاتر لە دەساڵ ، هێرشو شاڵاوەکانی تورکیا بۆ سەر باشووری کوردستان و ڕۆژئاوا ، تۆپ بارانکردنی ئێران بۆ سەر سنورەکانی هەرێمی کوردستان و گرتنەوەی بەنداوەکان بەمەبەستی سیاسی و پاساوی جیاواز دروست بوونی کاریگەریی قەیرانی ئاو ، سەرهەڵدانی جەنگی ئۆکرانیا و ڕووسیا وەک دوو دەوڵەتی بەرچاو لەجیهاندا بەرفراوانی جەنگەکە بەپشتگیری و کۆمەکی ئەمریکا و ئەوروپا هاوکات پێداگیریی و توندگیری دەوڵەتی ڕووسیا لەهەمبەر پشتگیرییەکانی ئەمەریکا دژ بەڕووسیا ، لایەکی تر جەنگی ساردی نێوان چین و ئەمریکا سەرباری هێرشەکانی ئەم دواییە نێوان ئیسرائیل و بزوتنەوەی حەماس ئەم ڕووداوانە وایکردوە جیهان بارودۆخێکی ئاڵۆز و نائارام بەخۆیەوە ببینێت .
لەم نێوەندەدا ناڕەزاییەکانی شەقامی عەرەب بەتایبەتی باڵی شیعی موقتەدا سەدر کەڕەوتێکی بەهێزی ئایینی ، شیعی ناو گۆڕەپانی سیاسی ئێراقە وێڕای ڕۆڵ و پێگەی موقتەدا سەدر ڕێبەری سوپای مەهدی هەژمونێک و ڕۆڵێکی ئۆپۆزسیۆنی هەیە دژ بە چەند لایەنێک لە حکومەتی ئێستای عێراق ئەم دەنگو هەژمونە ناڕەزاییە نەک ئێستا بەڵکو لەساڵانی ڕابوور دوو شدا هەڵوێست و دەنگی ناڕەزایی هەبووە بەرامبەر سیاسەتو ستراتیجی حکومەت و لایەنەکانی تری دەسەڵات بەشیعەو سونەوە .
لێرەدا بەگرنگی دەزانم سەرنج بدەینە گوتار و دروشمی خۆپیشاندەرانی شەقامی بەغداد لە دەربڕینی سکاڵاو داواکارییەکان لە ڕووی ناعەدالەتی و گۆڕینی ئەم حکومەتە بە بەدیلێکی تر حکومەتێک کە خاوەنی سەروەری خۆی بێت و لەژێر کاریگەری وڵاتانی دەوروبەردا نەبێت حکومەتێک هەڵقوڵاوی هەستو بیرو موعاناتەکانی خەڵک بێت ، بەڵام لەڕابووردوودا زیاتر داواکارییەکان بۆ چاکسازی گۆڕینی ئەو شێوازە بۆ نەهێشتنی گەندەڵی و نایەکسانی ، دابینکردنی هەلی کارو خزمەتگوزاری و ئاوەدانکردنەوە بوو کەئەمەیان مافی هەموو کۆمەڵگەیە بەڵام ئەم ناڕەزاییانەی شەقام لەناو بەغداد لەڕووی ئاکارەوە جیاواز و ڕەهەندێکی ناشارستانی پێوە دیارە لەهەڵکوتانە سەر دامەزراوە باڵاکانی حکومەت لەهەمانکاتدا ڕەهەندێکی دەروونی نائومێدانەی شەقامی ئێراق و تاکی عەرەبە بە چارەسەر نەکردنو نەبوونی چاکسازی بە دەسەڵاتدارانی ئێراق بەگشتی سەرباری زاڵبوونی هەژموونو بیری تاکڕەوانەی هەوادارانی موقتەدا سەر بە سەرکردەکەیان وەک کارێزمایەک و فریاد ڕەسێک لێی دەڕوانن هەوادارە کانی پێیان وایە تەنیا کارێز ماو کەسایەتییەکە بۆ گۆڕین و چارەسەرکردنی ئەم مۆدێلە لەدەسەڵاتو بەدیهێنانی داد پەروەری و سەربەخۆیی تەنیا ڕابەرەکەیانە ئەمەش پێویستی بەشرۆڤە و لێکدانەوەی زانستی هەیە نەک دەربڕینی هەستو سۆزی دەروونی ، عاتفی بۆیە ڕام وایە کاریگەر بوون بەکەسایەتیەک دادو فریادی هیچ کۆمەڵێک نادات لەبەرئەوە کێشە وگرفتی وڵاتێک لەوە زیاترە بەلایەنێک چارەسەر بکرێ ، لێرەوە ڕام وایە ئەم خۆپیشاندانو ناڕەزاییانە خۆڕسک نین دەنگە ناڕەزاییەکان ناتوانن گۆڕانکاری بەدەست بێنن بە پێچەوانەوە گۆڕینی سیستم بە سیستمێکی دامەزراوەیی نیشتمانی کە یەکسانی و ئارامی و داد پەروەری بۆ هاوڵاتیانی عێراق بێنێتە دی چارەسەری بنەڕەتی کێشەکانی خەڵکی ئێراق خەباتێکی دوورو درێژی دەوێ دوور لە دیدگاو بیری زاڵی ئایینی و مەزهەبی ،وخێڵەکی .
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
