چەخماخەی شۆڕش.. شیعری: ستیڤان شەمزینی
بۆ ڕۆژهەڵاتی کوردستان
لە رۆژهەڵات دەگەڕێم
لەو رۆژهەڵاتەی لە ناو رۆشنی خۆیدا و
لەگەڵ یەکەم تروسکەی ئازادییدا
دەیدۆزمەوە
هۆ رۆژهەڵاتی برینە دێرینەکان
ئەی بەلەمی نێو ئۆقیانووسی ئەسرین
هۆ رۆژهەڵاتی راپسکاوی
سەر نەخشەی ستەم
ئەی رۆژهەڵاتی یەکەمین کۆمار
هۆ رۆژهەڵاتی تینوو
بە قومێ ئاوی سەربەستی
ئەی رۆژهەڵاتی خنکێنراو
بە عەمامەی رەشی زەمەنی بەسەرچوو
هۆ رۆژهەڵاتی گۆرانییە تازەکان
گۆرانییەکی وەک خەنجەر تیژ
لە جەرگی مێژووی تاریک دەچەقێ
گۆرانییەکی تر وەک گۆزەی مانگەشەو
پڕ لە تیشک
کە تریفەی ئومێدی لێ دەڕژێ
دوا گۆرانیش بۆ ئەو رۆژەی
وا لە رۆژهەڵاتەوە هەڵدێتەوە
هۆ رۆژهەڵاتی شەڵاڵ لە خەون
هەرچی خەونەکانی گەیشتنەوەیە
بە نیشتمان
بە دڵی تۆدا تێدەپەڕن
هەرچی کەشتییەکانی ئازادییە
لە کەناری تۆدا لەنگەر دەگرن
هەرچی خەونەکانی رابردووە
لە ئایندەی تۆدا سەردەرهێننەوە
هۆ رۆژهەڵاتی رۆح داگیرساو
ئەی چرای میللەتێکی شەوارە کەوتوو
ئەوە تۆیت
لە زەمەنی بڕینی زمانی خۆرەتاودا
یەک یەک
کەلەپچەکانی دەستی تیشک دەکەیتەوە
بە پێچەوانەی رێساکانی سروشتەوە
لە وەرزی گەڵارێزاندا
چرۆی تازەی شۆڕش دەردەکەیت
ئەی رۆژهەڵاتی هەمیشە رووناک
چەند پێمخۆشبوو
ئێستا خۆم بە تاڵێک تیشکتا هەڵواسیبا
ئەی رۆژهەڵاتی چەخماخەی شۆڕش
ئای چەند تامەزرۆ بووم
خوێنی من چەشنی گۆلاوێک
خوڕ خوڕ بڕژێتە
دەمار بە دەماری خاکەکەتەوە
هەی رۆژهەڵاتی هەموو کات
خۆر لێ ئاوا نەبوو
ئەی تووڕەترین رەشەبا
حەزم دەکرد
بەسەر پشتی ئەسپی گەردەلوولەوە
بێمەوە ئامێزت و
جارێکی تر رۆژی تۆ
لەسەر باڵام ئاوا نەبووایە.
22-9-2022
فرانسیسکۆس هۆسپینەڵ
