Skip to Content

ده‌رده‌ كورد … عه‌بدولڕه‌حمان فه‌رهادی

ده‌رده‌ كورد … عه‌بدولڕه‌حمان فه‌رهادی

Closed
by شوبات 19, 2017 General

خه‌ریكه‌ بڵێم كورد بوون ده‌ردێكی كوشنده‌یه‌ و ئه‌م ناوونیشانه‌ی سه‌ره‌وه‌ش له‌ كتێبێكی مه‌ڕحووم مه‌حموود زامدار وه‌رگیراوه‌ كه‌ باسی له‌و ده‌ردانه‌ كردووه‌. كورد میلله‌تێكی زیندوو كوژی مردوو په‌رسته‌، ئه‌م په‌نده‌ له‌خۆڕا له‌ناو خه‌ڵكدا نه‌هاتووه‌ته‌ گوتن، ده‌سه‌ڵاتدارانی كورد به‌ درێژایی مێژوو له‌ڕاست میلله‌ته‌كه‌یان تا ئه‌وپه‌ڕی بێوه‌فایی و بێهوده‌یییان نواندووه‌.

تاكی به‌توانا و داهێنه‌رانی كورد له‌ بواره‌ جۆراوجۆره‌كان تا له‌ ژیاندان، به‌هۆی دژایه‌تی و ڕه‌زاڵه‌ت و كێشه‌ لابه‌لاكان و خه‌می گه‌وره‌ و ناله‌باریی ژیان، یان ده‌بێ سه‌ر هه‌ڵگرن یان به‌ خه‌ون و خولیاو برسێتی و كێشه‌ی بێماناوه‌ سه‌ربنێنه‌وه‌، تا زیندووی ده‌تهاڕن، سه‌ركوتت ده‌كه‌ن، له‌برسانت ده‌كوژن، ڕێگریت لێ ده‌كه‌ن، به‌رپێنه‌ت ده‌ده‌نێ و خه‌ریكی مل شكاندنتن، وه‌ختێ كه‌له‌واژ ده‌بییه‌وه‌ و سه‌رت ئاودیو ده‌بێ، ئیتر كه‌سانێك دێن له‌ شینوشه‌پۆڕان ده‌ده‌ن، كورد ده‌ڵێ هه‌ر شه‌ڕه‌و بۆ جوامێرێكه‌، چه‌ند جوامێرێك دێن له‌سه‌ر كه‌لاكت ده‌گرین و یاری وشه‌سازیی به‌ مه‌دحوسه‌ناته‌وه‌ ده‌كه‌ن و له‌ هوورگیشیان ده‌ئاخنن.

یادی به‌خێر مه‌حموود زامدار گێڕایه‌وه: بیرمه‌ چه‌ند مانگێك به‌ر له‌ مردنی، خوالێخۆشبوو حه‌سه‌نی جزیریی هونه‌رمه‌ندی گه‌وره‌ و نابینا و ده‌نگخۆشی ناودارم له‌ به‌غدا له‌ناو پاس بینی كه‌ یه‌كێك ده‌ستی گرتبوو، ئه‌و پیاوه‌ گه‌وره‌یه‌ له‌ناو پاسه‌كه‌ سواڵی ده‌كرد و دواتریش كه‌ سه‌ری نایه‌وه‌، له‌ بێكه‌سییان شاره‌وانیی به‌غدا كه‌ پێێ ده‌ڵێن (امانه‌ عاصمه‌‌) ئه‌و و نه‌سرین شێروان یشی ناشت و ئێستاشی له‌گه‌ڵدابێ كه‌س نازانێ گۆڕیان له‌ كوێیه‌.

چه‌ند ساڵێك له‌وه‌به‌ر له‌و هه‌ولێره‌، ئێواره‌یه‌كیان له‌گه‌ڵ كاك حاكم شاكر ڕۆژبه‌یانی بۆ كات به‌سه‌ربردن، خه‌ریكی كۆنكان بووین، كاك شاكر ئه‌و وه‌خته‌ به‌ڕێوه‌به‌ری گشتیی دیوانی وه‌زاره‌تی ڕۆشنبیری بوو، زه‌نگی مۆبایله‌كه‌ی لێیدا و كه‌ وه‌رامی دایه‌وه‌ دیار بوو جه‌نابی كاك فه‌له‌كه‌دین كاكه‌ییی وه‌زیری ڕۆشنبیری بوو و هه‌واڵی ئه‌وه‌ی پێ ڕاگه‌یاند كه‌ هونه‌رمه‌ند سه‌ڵاح داوده‌ مردووه‌، هه‌واڵه‌‌كه‌ ناخۆش بوو و خه‌مگینی كردین، چه‌ند ڕۆژێك له‌مه‌وبه‌ر له‌ ڕیپۆرتاجێكدا ماڵه‌كه‌ی سه‌ڵاح داوده‌ م له‌ شاشه‌یه‌كدا بینی كه‌ له‌ گه‌ڕه‌كێكی میللیی په‌رپووتی كه‌ركووك له‌ خانووچكه‌یه‌كی دیوار بلۆك به‌ده‌ره‌وه‌ی ته‌نگوتریسكدا ده‌ژیا، ئه‌و شوێنه‌ شایسته‌ی ئه‌و نه‌بوو، من ئه‌وكات كۆڵێ خه‌مم خوارد كه‌ بۆ ده‌بێ هونه‌رمه‌ند و نووسه‌ر و به‌هره‌مه‌ندانی كورد ئه‌وه‌ قه‌ده‌ریان بێ؟ زه‌نگێكی دیكه‌ بۆ مۆبایله‌كه‌ی كاك شاكر هاته‌وه‌ و دیار بوو داوای لێ ده‌كرا هه‌واڵ بۆ خانه‌واده‌ی خوالێخۆشبوو بنێرێ كه‌ خه‌رجییه‌كانی ناشتن و پرسه‌ و پێداویستیی تر ده‌كه‌وێته‌ ئه‌ستۆی وه‌زاره‌تی ڕۆشنبیری، مه‌سه‌له‌ په‌نده‌كه‌یه‌! به‌ خه‌مبارییه‌وه‌ قسه‌مان له‌مباره‌وه‌ ده‌كرد و دیسانه‌وه‌ زه‌نگێكی تر بۆ مۆبایله‌كه‌ی كاك شاكر هاته‌وه‌ و داوای لێ كرا كه‌ واز له‌ مه‌سرووفاتی پرسه‌كه‌ بێنێ، چونكه‌ ئه‌و مه‌سرووفاته‌، خانم هێرۆ خان له‌ ئه‌ستۆی ده‌گرێ.

ئیتر به‌مجۆره‌ ببووه‌ پێشبڕكێ له‌سه‌ر خه‌رجییه‌كانی ناشتن و پرسه‌ی هونه‌رمه‌ندێك كه‌ به‌درێژایی ژیانی به‌ده‌ست نه‌بوونی و برسێتییه‌وه‌ تلاوه‌ته‌وه‌. ده‌رده‌ كورد جۆری یه‌كجار زۆره‌ به‌ڵام له‌ هه‌موویان كوشنده‌تر (زیندوو كوژی مردوو په‌رسته‌)، په‌ندێكه‌ قه‌ت قیمه‌تی ته‌واو نابێ، چونكه‌ بۆ كورد فیت هاتووه‌ و پڕ به‌ به‌ریه‌تی.

Previous
Next
Kurdish