ئێوارەیەکی نامۆیە …. سەرهەنگ خامۆش
Closed
خۆم بۆ دووبارە بونەوەی
ڕازی شەو ئامادە کردووە
مۆبیلەکەم دەگرمە دەست
دوا نامە دەخوێنمەوە
کەباس لە دواساتەکانی فیراق دەكات…
بەر لەوەی قاوەیەکی تاڵ بخۆمەوە
خەیاڵ دەمباتەوە کەنار دەریا
ئای دەریا
چ پێکێکی گەورەی تۆ
بە هیچ شتێک ناخورێیتەوە…
دەڕۆم…
چیتر ئاوڕ لە سێبەری خەم نادەمەوە
بەدەم ڕێگاوە لەگەڵ ئەزەل
ڕۆدەچینە ناخی یەکتر
چ حەشاماتێکە بوون…
نامەوێ چیتر
بەو کۆڵانانە ڕەت بم
کە پڕن لەو بیرەوەریانەی
لەوەرینی گەڵا دەچن
وێڕاناگەم کۆیان بکەمەوە…
لەگەڵ ئاوازی جریوەی
چۆلەکەکانی سەر دارتێلی شەقام
چاو دەبڕمە ئەو هەورۆچکانەی
لە نێو کەلێنی پەنجەکانی (با)دا
سەما دەکەن…
لە دوا وێستگەی زەمەن
ناچار دڵم دەخەمە نێو زەرفێکەوە
بمبمورە ئەی عیشق
کە نەمتوانی
داوای لێبوردن لە حەبیبە بکەم…
