Skip to Content

شیعر\ دوای تەواو بوون.. نەوزاد بەندی

شیعر\ دوای تەواو بوون.. نەوزاد بەندی

Closed
by تشرینی یه‌كه‌م 31, 2022 General, Poems

هێشتا کلیلی ئەو دەرگایانەم لا ماوە ،
بوار نەبوو بیانکەمەوە و ..
جێم هێشتن ..
ئەو هەڵماتانەی یەک جاریش ،
کاتم نەبوو ڕیزیان کەم و ..
ئەو پەرداخە کریستاڵانەی
قومێ ئاوم پێ نەخواردنەوە ،
هەر ماون …

ژوورێکم هەیە ،ناوێرم
بیکەمەوە ..
ئەویش تەواو عاجزە لێم ..
ئێ دەرەقەتی یادگاری و
ئەو شتانە نایەم کە هێشتا ،
بەکارم نەهێناون و ..
کات کەم کەم ئەیانڕزێنێ ..
هیچ دەسەڵاتیشم نیە ،
ڕێ نەدەم ئەو هەموو دەسکەوتە
خەمگینەم هەڵوەرێنێ ..!

ناخم پڕە لەو کەسانەی
هیوادار بووم یەک قسەیان لەگەڵ بکەم ،
بوار نەبوو ..
هیواداربووم یەک پیاسەیان لەگەڵ بکەم ..
یەک چا ..
یەک قاوەیان لەگەڵ بخۆمەوە و ..
کاتم نەبوو ..
کاتیان نەبوو ..
وەک پەڕی باڵندەیەکی نەناسراو ،
زریانی ڕۆژگار بردنی ..
زریانی ڕۆژگار بردمی ..

دڵم پڕە لە بۆیاخی
ئەو تابلۆ بێ هاوتایانەی
کە ویستم بیانکێشم و ..
پێم نەکێشران ..
پڕە لەو ووشە و پیتانەی
بە تەما بووم ،
ڕۆمانێکیان پێ بنوسم و
شەڕی براکوژی نەیهێشت ..
ئابڵوقەی ئابووری نەیهێشت ..
ژنێک و کۆمەڵێ مناڵ ..
کۆمەڵگایەکی بێ کتێب ..
پاشەکەوتی موچە نەیهێشت …

ئێستا ئیتر
بە دیار پەڕەیەکی ساردی
فەیسبوکەوە ..
بە بیجامە و
یەک دنیا نەخۆشییەوە ..
فریای هیچ شتێ ناکەوم ..
هەموو شتێکیش بێ بەهایە .
تەنها چاوەڕێی زریانێ ئەکەم بمبا ..
ڕزگارم کا لەم دنیایە …

ـــنەوزاد بەندی ـــــــــــــــــ

Previous
Next
Kurdish