Skip to Content

وێستگه‌.. ستار ئه‌حمه‌د

وێستگه‌.. ستار ئه‌حمه‌د

Closed
by كانونی یه‌كه‌م 2, 2022 General, Poems

حه‌سره‌تێك ده‌مكوژێ
نه‌نێشه‌ بتوانم له‌ناخمی ده‌ركه‌م
زامێك نییه‌.. مشتێ گڵ له‌ چاوی بیماری وه‌رده‌م
گڵكۆیه‌كه‌ له‌ ئه‌ندێشه‌و خه‌رمانێك له‌ خۆزگه‌
شه‌وانه‌ رامده‌پێچن.. ده‌مده‌نه‌ ده‌ستی شه‌وه‌ی مه‌رگه‌وه‌
ده‌روازه‌ی په‌نجه‌ره‌كه‌م واڵا ده‌كه‌م‌و له‌ ئاسۆ ده‌ڕوانم
ده‌بینم چۆله‌كه‌یه‌ك به‌ ده‌نووكی داڵێكه‌وه‌ ده‌جروێنێ
روحی تۆم دێته‌ یاد ,
هه‌ناسه‌یه‌ك ده‌مباته‌وه‌ رێگای دووری
ده‌ڕۆم نه‌چیا ئه‌نگوستم ده‌پێوێ ,
نه‌به‌ردێك به‌ نسێی هه‌ڵوێستم ده‌نه‌وێ
ته‌مێك له‌ ره‌نگی به‌ورو
هه‌ناسه‌ی كۆڕه‌وی ئه‌و ساڵه‌ ده‌چێ
رووی حه‌زم داده‌گرێ
بارانێك به‌ لێزمه‌
چاوانم پڕده‌كا له‌ نوور
به‌ دوای ره‌شه‌بای ئه‌جه‌لا هه‌ڵدێم
گه‌یشتن ترۆپكی ئاگره‌ ,
هه‌نگاویش جۆگه‌له‌ی برین.
سره‌وتن سنگۆڵه‌ی زریانه‌ ,
هه‌وری سیا تارای بووكێنی مه‌م‌و زین
هه‌وارگه‌ی شه‌وانه‌م , ئه‌ندێشه‌ی چه‌ندین ساڵه‌
گه‌ڵای دار گوێزێك شیعرێكم نانووسێته‌وه‌
لاسكێ نابینم قه‌دی هیوایه‌ك به‌ رووما هه‌ڵواسێ
دوا وێستگه‌م , ئه‌شكی خوێنینی دیده‌ی هه‌وره‌
ده‌ستێك ده‌مژه‌نێ
چۆپیكێش شه‌كره‌ به‌فره‌.

ستار ئه‌حمه‌د

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish