لە نێوان فرانز کافکا و حاڵی کوردستاندا.. نەوزاد بەندی
لە چیرۆکی ( دادگا ) ی فرانز کافکادا ، کاتێ پیاوێکی دەشتەکی دێتە بەردەم دادگا و ناهێڵن بچێتە ژوورەوە .. هەموو ژیانی لەبەردەم دەرگای داخراوی دادگادا بەسەر ئەچێ ، کاتێکیش لە سەرە مەرگدایە ، بە پۆلیسەکە ئەڵێ : ( قەیناکا وا ئەمرم و دەرگای دادگاتان بۆ نەکردمەوە ، بەڵام ئەپرسم : لەو هەموو ساڵەدا هیچ کەسێکی تر پێویستی بە دادگا نەبوو ؟ بێجگە لە من هیچ کەسێک نەهاتە دادگا ..؟؟ )
پۆلیسەکە پێی ئەڵێ : ( بەڵێ ڕۆژانە خەڵکێکی زۆر دێنە دادگا ، بەڵام ئەم دەرگایە تایبەتە بە تۆ !! )
بە ڕاستی کە دەچیتە فەرمانگەکانی باج و باجی خانوو بەرە و تاپۆ و هاتوچۆ ، خەڵکێکی زۆر ئەبینی بە دەست مامەڵەکانیان و پارەدانەوە گیریان خواردووە ، یەک دەوڵەمەند نابینی ..یەک سیاسی ..یەک دەسەڵاتدار نابینی ، لەگەڵ ئەوەیشدا زۆرترینی زەوی و موڵک و ماڵ و باڵەخانە و تاوەر و ڤێلا و مۆڵ و بازاڕ و ئوتومبیل موڵکی دەوڵەمەند و سیاسی و دەسەڵاتدارەکانن .. ئەی ئەمانە کەی دێن باجی ماڵ و مۆڵک و ئوتومبیلە گرانبەهاکانیان ئەدەن ؟
لە ڕاستیدا هەر گریمانەکەی فرانز کافکایە ، فەرمانگەکانی باج تایبەتن بە فەرمانبەر و عەرەبانچی و هەژارەکانی ووڵات ..دەوڵەمەند و سیاسی و دەسەڵاتداران ناچنە ئەو جۆرە شوێنانە …ئەوان بە جۆرێ لە جۆرەکان هەزاران ئەوەندەی خەڵکە هەژارەکە ماڵ و موڵکیان هەیە ، باجیش نادەن ..هەروەها باجیش لە خەڵکەکە وەرئەگرن ، باجی تیکەنانێکی وشک کە پەیدای ئەکەن …
