دوو گێڕانەوە.. پشکۆ ناکام
(1) لە شارۆچکەی “ناز آباد”ی ئەفغانستان “کەر”ێک لە برسا بە دوای پاشماوەی خواردن و تەنەکەی زبڵا ئەڕوا تا لە ساحێبەکەی وون ئەبێ و بە غەڵەت خۆی ئەکا بە مزگەوتێکا ، کە ئەچێتە حەوشەکەوە موسڵمانانی هەڵگری ئایینی ئاشتی و لێبوردەیی لە تووڕەییا کە ئەم کەرە حەرەمی مزگەوتی بەزانوە و بێ”ئیجازە” خۆی پیاکردوە و گڵاوی کردوە دەست ئەیەنە چەکەکانیان کە هەموویان لەبەر ئەوەی”تاڵیبان”بوون چەکدار بوون ، کەرەکە گوللە باران ئەکەن ، کە ساحێبەکەشی ڕەحمەتی بە کوژراوی ئەدۆزێتەوە ئەویش ئەچێ چەن کەسێکی چەکداری نزیک لە خۆی ئەهێنێ و جەماعەتی بکوژانی کەرەکە ئەیەنە بەر دەستڕێژ و چەن کەسێکیان ڕەوانەی ئەو دونیا/بەشی بەیتەرە ئەکەن ، پاشماوەی مزگەوتەکە کە بەر ناکەوون ، دواتر هەڵئەکوتنە سەر گوندی ساحێب کەرەکە و گوللە بارانی خەڵکەکەی ئەکەن و چەن کەسێکیان ئەنێرنە کاروانی کەرەکەوە ، بەو کارەساتە کەرێک ، هەشت لە بکوژەکان ، حەوت لە کەس و کاری ساحێبی کەرەکە ئەم دونیایە جێ ئەهێڵن تا ڕۆژی قیامەت هەق و حیسابیان لەگەڵا بکرێ..!!
ڕۆژنامە نووسێک لە کۆمێنتێکا نووسیوێتی: یا ڕەبی زۆر شوکر ” کەرێ”ک نەبووم بە غەڵەت بچمە مزگەوتێ و ” تاڵیبان”ێک نە بووم لە جەزای کوشتنی کەرێ گوللە باران بکرێم!!
(2) ڕەنگە هیچ لایەن و کەسێک بەقەد خودی ئیسلامەکان بابەتی و سەیر و عەجایب و کۆمیدی لەسەر ئیسلام باس نەکەن کە ببێتە مایەی زیاتر گومان و ڕامانی خەڵک لەسەر ئایینەکە ، ….
لە تازەترین ڤیدێوی ئایینیا “مەلا”یەک باس لەوە ئەکا :کە پێغەمەری ئیسلام بە جلی کوردییەوە نوێژی کردوە!!! ئەمەش بە حەدیس باسی لێکراوە ( لەوانەیە سورەی ڕانک و چۆغە بێ..).. گوایا کوردێک لە کوردستانەوە ، جا نازانرێ لە هەرێمەوە یان لە بەشەکانی ترەوە بوە ، چوە بۆ مەدینە و دەستێ جلی کوردی بە دیاری یاوە بە پێغەمەری ئیسلام ، و زۆریشی پێ جوان و کەشخە بوە ، بەداخەوە ئەو کاتە کامێرا و مۆبایل نەبوە دەنا رەسمێکیشی پێوە ئەگرت ،!!دیارە زیرەکی کوردەکەش لەوەیا بوە بێ ئەوەی باڵا و پان و پۆڕی پێغەمەری زانی بێ ئەو قاتەی بردوویەت ڕێک بە بەری وە…!! بەڕاستی ئەم گێڕانەوەیە دەرگایەک ئەخاتە سەر پشت بۆ زیاد بوونی پرسیار و باوەڕ نەبوونەکان لەسەر ئەو ئایینە …چونکە لەوانەیە سبەی مەلایەکی میسری بڵێ : كاتی خۆی میسرییەک چوە بۆە مەدینە و “طەڕبوش” بە دیاری یاوە بە پێغەمەر و زۆر دڵخۆش بوە پێ ی و نوێژیشی پێوە کردوە !! یان بووترێ یۆنانیەک لە ئاسینا وە چوە بۆ مەدینە و قاتێ جلی جەنگاوەری یۆنانی بە شمشێر و قەڵغانەوە بە دیاری بردوە و پێغەمەریش خۆشحاڵ بوە تەنانەت نوێژیشی پێوە کردوە..!!
” ئەم بابەتە مێژووی دیاردەی مۆدێل/ فاشیون ئەوروژێنێ….”
