ئێوارانە ١٨.. سەردار جاف
ئەم ئێوارە
گوندێک خۆر بەڕێ دەکا
شاخێ دەيشارێتەوە
دۆڵێک لە ئامێزی دەنێ
رووبار و دەريا نغرۆی دەکەن
تاريکی رووناهی شەق دەکا و
شەوەزەنگ رێ دەبڕێ
ئێوارەيەک
خەون بە جريوەی چۆلەکەوە دەبينێ
بە پێکی مەستبوون
بە ئاوێزانی شەوانی سەر سەکۆ دەريايەک
خەون بە خەون و شەوەوە دەبينێ
بە خەندەيەک لێوی شەهلايەک
بە ئاوێتەبوونی جووتێ
ئێوارەيەک
لە لاسارييەکانی خەون بە تاريکييەوە دەبينێ
بە شەپۆلە هاروهاجەکانی ئاو
بە لاساری گەنجان و کيژانی رێی کانی
بە زەبوونی و کەساسی خۆيەوە خەون دەبينێ
ژنێ سەرپۆشەکەی دەکاتە بەرماڵ و
نوێژی پاکبوونەوە و بۆ موفڕکی دادەبەستێ
پياوێ وەک زريان
هاوارەکانی دەبێتە شاخێک و خۆر دەشارێتەوە
لە خەونی غەفڵەت هەڵدەستێ
دەداتە هەنسک و هەسرەت و گريان لە پياو جوان دەکا
نزا پووچەڵ
نوێژ بە تاڵ
ئێوارە لە شيوەن و کپبوونی ژاوەژاو
گەورە بێدەنگێکی گڕوگاڵ
کفنێ سپی سپی
ئێوارە خۆی پێدەپێچێتەوە
خەون دەبێتە ئەفسانە و شەوارە بوون
درێژە دەکێشێ
زەردەی ئاوابوون
دەبێتە رووفات و بە دەم ئازاری خنکانی دەرياوە
خەونی ديسان پووچەڵ
هەتوانی ياخی
هەر بەو ئازارەوە هيواکانی دێشێ
لە بيرت ماوە کە خۆشم دەوێی خۆشەويسترين کەسم
٢٤ / ٢ / ٢٠٢٣
ئەڵمانيا
