Skip to Content

يەکەمین ديداری شاعیرێکی مەزن .. سەردار جاف

يەکەمین ديداری شاعیرێکی مەزن .. سەردار جاف

Closed
by December 10, 2020 General, Literature


لێرەوە دوای چل رؤژ بە سەر ئۆغرکردنی يەکجارەکی شاعيری پايە بەرز و هەميشە لە ياد و هزرمان جەلالی مەلەکشا چەپکە گوڵی رێز و وەفا و خۆشەويستيم بۆ رۆح و قەڵەمی پاک و جوان و بوێری، و سەری رێزيشم لە ئاست گڵکۆی بە قەدر دادەنەوێنم. پێم وابێ هاوینی ١٩٩٩ بوو ئێوارانێک بەڕێز د. عومەر نورەدێنی لە يانەی مامۆستايان لە هەولێری پايتەخت داوەتێکی بۆ چەند برادەرێک ساز کرد بوو، بەندەيش يەکێک بووم لەو سێ و چوار کەسەی داوەتی کرد بوون، تازە بە تازە دانیشتبووين حەمە جافی شاعیر……
بە دکتۆر نورەدینی گوت: ئەوەيش کاک جەلالی مەلەکشايە بە تەنیایە، شاعیرێکی هەست ناسک خاوەن قەڵەمێکی ناوازە لەم غوربەتە بە تەنێیە پێتان چۆنە بانگێشتی لای خۆمانی بکەین .
بە ڕاستی هەم دکتۆر هەمیش ئێمە زۆرمان پێخۆش بوو، کاک حەمە جاف چوو بۆ لای و لە گەڵ خۆی و پێکەوە هاتن و لە گەڵ يەکدی ناسینی هەموو برادەران و گەیشتە ئاستی بەندە هەڵوێستەیەکی کرد و……
وتی : ئێوە سەردار جافی شاعیر و نوسەر ..
گوتم : ئەرێ .
گوتی : خۆشحاڵم پێشتر هەم نوسینتانم خوێندۆتەوە، هەمیش سووکە شەڕێکم لە سەر کردوون.
گوتم : زۆر خۆشحاڵم کەسێکی وەک جەنابتان نوسينم بخوێننەوە جا چ جای بگاتە بەرگری کردن، بە ڕاستی قەرزار بارتان کردم ، دەکرێ بزانم بەرگری کردن و سووکە شەڕەکە چۆن بووە.
گوتی : ماوەیەک بەر لە ئێستا نوسینێکی جوانتان لە لاپەڕەی یەکەمی ئەدەب و هونەری برایەتی بڵاوببۆوە، رۆژێ لای کاک حوسەینی یەزدان پەنا بووم، ئەو گوتی :{ تەماشا فڵان کەس چی نوسيووە و بڵاو کراوەتەوە}، منیش گوتم ئەو کەسەی باسی دەکەی هەرگیزاو هەرگیز ناتوانێت شتی وا بنوسێ، ئیدی لە من قسەیەک و لەو قسەیەک مشت و مڕێکمان بۆ دروست بوو، بەو جۆرە بوو بەرگریم لە ڕاستی کرد نەک تۆ، جونکی نە ناسيوتم نە زانیوم کێی، ئێستا وا بە خزمەتتان دەگەم.
زۆر زۆر کەیف خۆش بووم کەسێکی وەک جەلالی مەلەکشا بەرگریم لێ بکات، رێک هەستامە سەر پێ و سوپاسم کرد و دەستم بە سينگەوە بۆ گرت . ئەوە یەکەمین ناسین و ديداری من و رەوانشاد جولالی مەلەکشا بوو ، دروود و سڵاو لە رۆهی پاک و پەپوولەیی ئەم شاعيرە قەدر گرانە ….. حەيف و جەغار زوو جێی هێشتین ……. لەم يادەدا ئەو دەقە شیعرە جارێکی دی پێشکەشی رۆهی نەسیم ئاسای دەکەم ……
جەلالی مەلەکشا
لە بروسکەی هەورێکەوە،
چەخماخەی شین بارانت دێ
دەنک دەنک وشەی شيعرت
هەناسەی پڕ، رۆژانێ ختوکە دەدا
لە پریاسکەی ئەندێشەوە
لە هەولێرە ئێوارانێک
بە دەم پێکی درەختەوە ،
گەڵاڕێزانی پاییزی لە بەر دەکا
تۆ هەر نها لەو ديو باخچەکانی سڕینەوەی ‌غوربەت
مژ لە جگەرەی خەم دەدەی
ئەمێستاکە گولە بەرۆژەی بە دەم مانگەشەوەوە
قەف قەف دووکەڵی نێرگەلەت
بە هەناسەی خەیاڵدانی خاوما دەدەی
بيرە هاروهاجەکانم
لە ڕەقتاڵەیی و قوڵایی دييەکانتا
چەپکە شەونم بە سەر سپێدەی پەڕە گوڵی شيعرتا
دەبارێنێ
ئەمشەو بووی بە
خەونی خۆشخۆش، لە دەرگای پێکەنینمت دا
کەصی هێشتا هەروەک جاران
بە ئاسپایی دەنگت تێکەڵ هارمۆنی لاساریم دەبوو
ديسان پێکڕا ڕۆژی تاران، لێرە و تەواو سەنگەرەکەت
ئیدی شەوم بۆ نامرێنێ
٩- ٥ – ٢٠١٧

                                                                     ئەڵمانیا 
                                                             ٠٩ _ ١٢_ ٢٠٢٠
Previous
Next