دەقی واڵا.. ستیڤان شەمزینی
ئەی ژن
ھەر دەبوو ئەمەت پێ بڵێم
ئەی ژن
ھەرگیز ئەو ھەڵەیە نەکەیت
باوەڕ بە ئێمەی پیاو بکەیت
ئێمە تەنھا لە بۆتەی شیعردا
بەرگی خواوەند بە بەرتدا دەدورین
لە گۆرانییە درۆزنەکانماندا
خۆمان بە بێ دەسەڵات
لە بەردەمتدا نیشان دەدەین
تا شەوێکی سوور مسۆگەر دەکەین
دوای ئەمە گورگەکەی ناوەوەمان
لە دڵی نەرمت بەردەدەین
شانامە بە باڵاتدا دەھۆنینەوە
تاکو ئاوی روونی ژنێتیت لێڵ دەکەین
نەکەیت باوەڕمان پێ بکەیت
ئێمە کۆمەڵێک راوچین
تۆ دەکەینە نێچیری حەزەکانمان
ھەوڵی دەستەمۆکردنت دەدەین
چون ھیچ شەرەفێکمان نییە
دەتکەینە شەرەفی ناچاریی خۆمان
ھەر کات یاخیبوویت
بێ ویژدانانە سەنگەسارت دەکەین
گەر زۆر پێشکەوتووخوازیش بین
نامانەوێت تۆ بۆ خۆت سەما بکەیت
ناچارت دەکەین
بە زوڕنای دەنگ گڕی ئێمە ھەڵپەڕیت
نامانەوێت دنیای خۆتان ھەبێت
ھەموو بەدەنگێکی کۆراڵئاسا
ئەنەڕێنین و ئەقیژێنین
ئێوە جیھانی ئێمەن
وەک ئەو منداڵە گڕو دەگرین
بە میکانۆکانی جیھانێک دروست دەکات
نەکەن، بیرتان بچێت
ئێمەی پیاو
ئێوە بە میکانۆکانی گەورەییمان دەزانین
ئارەزوو دەکەین
جیھانێکی بێ رەنگ بخوڵقێنین
بە دڵی ئێمە و لەسەر ئێسکی ئێوە
نامانەوێت ھەست بە بوونتان بکەن
باشترینمان ئەوەیە
وا بیر دەکاتەوە لە پەراسووە گێڕەکەیەوە
ھاتوونەتە دەرێ و
ئەکتەری شانۆگەرییەکن
ھەر خۆی نووسەر و دەرھێنەریەتی
ئەی ژن ھەرگیز نەکەیت
باوەڕ بەم قسانەی منیش بکەیت
وا بزانی پیاوێکی جیاوازم
ھەرگیز بەم قسەی باق و بریقانە تێمەکەوە
ئێمە ھەموو یەک میتاڵین
جیاوازییەکە لەوەدایە
ھەندێکمان لە یاری شێوەگۆڕیندا
کارامە و لێھاتووترین
ئەگەر بۆمان بلوێ
دوا بە یەکتان دەخەینە
تۆڕی خولیا شەھوانییەکانمانەوە
گەر بۆشمان نەکرێت
وەک ماری سڕ دەچینە قاوغی متبوونەوە
ھەندێکی ترمان
مێشکیان لە خوار ناوکیانەوەیە
ھەزاران تۆپ قوماشت تێوە پێچرابێت
ھەر وەک لەشێکی رووت دەتبینن
ئەمانە لەو پیاوانە پێکنەھاتوون
بە ئەبجەدیات نەخوێندەوارن
ھەمانە کتێبی قەبە دەنووسێت
ھەمانە چارەنووسی ملیۆنانی بەدەستە
ھەمانە ئێوە زۆرتان خۆشدەوێت
ئاە کەمتان دەتوانن لە سۆنەرێکدا
ناوەوەی ببینن، تا بزانن
چ کەمتیارێکە لە پێستی کەروێشکدا
ئەی ژن
ئەمەت با بیرت نەچێت
ئەوانەی دەڵاڵی بە لەشتەوە دەکەن
ھەموو پیاون
ئەوانەی خوێنت حەڵاڵ دەکەن
ھەموو ھەر پیاون
گەر بە رێکەوت
مێینەیەکیشیان لەگەڵ بوو
خوێنی پیاوسالاریی
بەدەمارەکانیدا دەگەڕێت
دەبێت ئەویش حسابی نێری بۆ بکرێ
ئەوانەی دەتکەنە کاڵا
لە جەمخانەکانی بازاڕی ئازاددا
یەک بە یەکیان پیاون
ئەوانەی فوو بە شەیپوری جەنگدا دەکەن
کە تۆی تێدا لاقە دەکرێیت
ھەر ھەموو سمێڵ بابڕن
ئەوانەی تەنیا لە شیعردا
تۆیان خۆش ئەوێ
ھەموو ھەر نێرە زەلامن
ئەوانەی لە ژوانەکاندا
درۆتان لەگەڵ دەکەن
ژمارەیەکی بێشووماری کەر پیاون
رەنگە بڵێن
تۆ بۆ ئەم دێڕانە دەنووسیت؟
پرسیارێکی زۆر بەجێیە
لەوانەیە ھیچ وەڵامێکم نەبێت
تەنھا ئەوەندە نەبێت
ئەی ژن
باوەڕم بەوە ھێناوە
تۆ ھەر جەستە نیت
تۆ بۆ بێتاقەتی دەرکردنی من
نەئافرێندراویت
دەرچەیەک نیت بۆ خاڵیبوونەوە
لە ھەڵچوونی غەریزە ھەراشەکانم
نا، شتێکی گرنگتر ھەیە بیڵێم
تکایە گوێم بۆ بگرە
بە خاتری گەیاندنی ئەم مەسیجە
رەچاوی شیعرییەتی ئەم دەقە ناکەم
دەمەوێت پێت بڵێم
وەک مرۆڤێک قبوڵت دەکەم
تۆش وەک مرۆڤ نەک پیاو
تەماشای خۆم و شیعرم بکە
دیسامبەری ٢٠١٤
ناو شەمەندەفەر
لە کۆڵن – ئەڵمانیاوە
بۆ ئاڕنھێم – ھۆڵەندا
