لە ناو ئەشکەوتی داڵغەدا مردم.. شیعری: ستیڤان شەمزینی
گوناھی من چییە
پەروانە رێی شەمعی ون کردووە
نەورەس
دڵی لە دەریا شکاوە
پەنجەرە
بەسەر شەقامی شکاندا دەڕوا؟
خۆ من دەمویست
گۆزەی بە تاڵی ژیان
پڕ بکەم لە گۆرانی
گوڵە شەکەتەکان
لە جۆلانەی باخدا راژەنم
ختوکەی ئاو بدەم
تا باران بکەوێتە پێکەنین
خۆ من دەمویست
خۆکوشتن
لە مێشکی ھەتاو دەربھێنم
خەیاڵی مانگ
لێوانلێو بکەم لە تریفە
بەفر قایل بکەم
بە سپێتی خۆیەوە ببارێتە
سەر پرچی چیایەکی ھەڵکڕوزاو
خۆ من دەمویست
عەرەبانەی ژیان
بەرەو خۆشەویستی پاڵ بنێم
دەفری یادەوەریی
سەرەورێژ بکەم لە مێوژی ئەمڕۆ
جۆگەلە باریکەلەکان
لەسەر میراتی رووبار نەبێتە شەڕیان
شەوە برینگەکان
لە ناو نوێنی دوو عاشقی سەرشێتدا
وەکو نانی تیری تەڕ بکەم
خۆ من دەمویست
زمانی درێژی
بایەقووشی تفەنگ ببەستم
سەنگەرەکان
بە گوڵە بەیبوون بڕازێنمەوە
شەڕگاکان
گولەی گوڵاویان تێدا بتەقێندرێ
زۆرترین گوڵ بکوژرێن
زۆرترین گوڵاو بڕژێت
من دەمویست
ھێڵی سنووری وڵاتان
لە بری خوێن
بە بەرائەتی مناڵان قیرتاو بکەم
شۆڕشێک چێ بکەم
دژی شۆڕش
دژی ئەو شۆڕشانەی لەسەر
کەللەسەر بینا دەکرێن
قوتابخانەیەک ئاوەدان بکەمەوە
دژی ھەموو قوتابخانە نەریتییەکانی تر
لەوێ فەلسەفە
ھونەری مەرگ و
پیشەسازیی چەوساندنەوە نەبێت
تێیدا ژیان بخەمە
سەرشانی لێبوردەیی
من دەمویست، جیھان
باڵەخانەیەکی دوو نھۆمی نەبێت
ھەندێک لەسەر بورجی عاجی خۆشگوزەرانی
قاچ لەسەر قاچ دابنێن
ھەندێک تر لەژێرەوەڕا
دنیا فەرامۆشیان بکات و
بە دەم حەسرەتەوە چاو لێک بنێن
من دەمویست
عودێک بدەمە دەست مۆسیقارێک
ئاوازێکی نوێی پێ بژەنێت
گوێیەکانمان نەیبیستبێت
قەڵەمێک بدەمە دەست شاعیرێک
شیعرێکی تەڕی پێ بنووسێت
بۆنی ژیانی لێ بێت
فڵچەیەک بدەمە دەستی شێوەکارێک
پۆرترێتێک بکێشێت
ھەموو رەنگەکانی نیشتمان
لەناویدا بدرەوشێنەوە
من دەمویست
ھیچ مۆمێک نەکەوێتە
بەر نەفرەتی فوو
گۆزەی ھیچ لێوێک
لە کانی ماچ بە بەتاڵی نەگەڕێتەوە
بەردی گومان
ئاوێنەی خۆشەویستی
ھەپرون ھەپرون نەکات
ئاسمانی دڵی ھیچ عاشقێک
برینداریی لێوە نەبارێت
غەمگینی لێوە نەبارێت
خۆکوشتنی لێوە نەبارێت
تەنھایی لێوە نەبارێت
ھەڵوەرینی لێوە نەبارێت
کاتێک ھیچ شتێک
بە ویستی من نییە
لەم بەستەڵەکی مەنفایەدا
یەک یەک
خەونەکانم دەسووتێنم
داڵغە تەزیوەکانمی
لەبەر گەرم دەکەمەوە
