ئەرگوێمێنتی منداڵی.. شەماڵ بارەوانی
دەمەوێ مۆسیقای وشەکانم بچنەوە سەر نەسەبی ئەلفوبێی سەراب و
ملوانکەی ئەم هەموو قەیرەحوزنە لە گەردنی شیعرەکانم دابماڵم
دەمەوێ بڕۆمەوە کەناری متبوون و بەدەم سیگاری حەسرەتەوە
بێدەنگی بکەم بە ناونیشانی دێڕەکانم
نامەوێ چیتر کانی مەراقم جۆگەلەی ڕەشبینی لێ بڕژێت و
هەوری ئاسمانی دیدەم بارانی قەڵەق ببارێنێت
نامەوێ جارێکی تر مۆرانەی هاڕین بە پلیکانەی ڕۆحم سەرکەوێت و
کۆرپەی سەرگەردانیم لە ئاستانەی خەونێکی نەزۆکەوە سەربنێتەوە
دەمەوێ بڕۆمەوە سەر لەهجەی بێتاقەتی و لە قافیەکانی زەمەن ڕەها ڕەها دەبم
هەرگیز نەدەبوو هەموو شتێک لە ڕوانگەی ئەرگوێمێنتی منداڵییەوە ببینم
دڵنیام دوای ئەم فەسڵەی فریودان مەوسمێکی تری کاڵبوونەوە
هەواری تەنیاییم بەسەردەکاتەوە و دووبارە ڕەنگەکانم دەڕۆنەوە دواسنووری ئاوابوون
ناچارم کاژی نیگەرانی فڕێدەم و فەسڵێکی تری ئالوودەبوون بە فرمێسک دەست پێبکەم
ناچارم پێکێکی تری عەزاب بنۆشم و پەڕە پەڕەی دەفتەری بیرەوەرییەکانم بدڕێنم
