مەملەکەتە سەیرەکە.. شیعری نەوزاد بەندی
خەڵک ئەوەندە تووڕەن لە حوکمەت ،
لە بچووکترین دەمە بۆڵەی نێوانیاندا ،
کەسێ ئەکوژرێ ..
٭ ٭ ٭
دەوڵەمەند بۆ بەفر ئەگەڕێ و
هەژاریش بۆ دەبەیەک نەوت..
هیچ کامیان نایدۆزنەوە ..!
٭ ٭ ٭
لە هەموو ئەڵمانیا یەک باخ هەیە ،
لێرە هەرچی ڕاست ئەبێتەوە ،
باخێ ئەکڕێ ..!
٭ ٭ ٭
کە دوو مافیا ئەبێ به شەڕیان ،
ئەکەونە تەقەکردن لە یەک ..
قوربانییەکانی دەستیان ،
ئەبن بە دوو بەش ..
بە دوو بەشی دژ بەیەک…!
٭ ٭ ٭
ئەمزانی ئەو کاتەی ئەڵێی ئازیزم ،
لە هەموو کاتێ زیاتر ڕقت لێمە و
لە هەوڵی یەکبینەدای ،
یان گورگی تەنیایی بمخوا
یان بمخەیتە بیرەکەوە ،
پێشتریش ئەمزانی تۆ وای !
٭ ٭ ٭کە دەسەڵات ناشیرین بوو ،
لە کۆمەڵگادا بۆ جوانیی مەگەڕێ !
٭ ٭ ٭
میللەتی خوێڕیی ،
کە هەتاو دەرکەوت ،
ئەیکا بە نیوقۆڵ و
کە دوو نمە باران باری ،
خۆی لە بلوس و ساقۆ ئەپێچێ ، ( دوگ شۆڕ و گوێ کەڕیلە ) ..
کە خوا دوو دینار ڕزقی دا ،
تەنەکەی خۆڵەکەی پڕ ئەبێ لە خواردن .. تا پێی بڵێن VIP
با پێی نەڵێن ڕەزیلە ..
کە ڕۆژێکیش ڕیسوا بوو ،تەنەکەی خۆڵەکان ئەگەڕێ بۆ خواردن ، وەک پشیلە ..
٭ ٭ ٭
لە کۆمەڵگای گەمژە ،
نابێ شوێن پێ جێبێڵیت ،
چونکە بە هیچ شتێ ناسڕێتەوە ..
٭ ئەوەی ناو کەوانەکە ، دێڕێ شیعری (مەڕەکەم ) ــە کە لە ساڵی هەفتاکانی سەدەی ڕابوردوودا ، لە کتێبی خوێندنەوەی کوردی پۆلی دووەمی سەرەتاییدا هەبوو .
