ئێوارانە ٥٩.. شیعری سەردار جاف
ئێوارەيەک
قريوەکانی جاڕدان، زارۆکان کاس دەکا
ئەم مەنفايە دەربازبوونی بۆتە مەحاڵ
تەوژم و لرفەی رۆخانە
مێژووی رۆحێ
هێندەی چنگێکی دەمێنێ
لم شەق نابا
دەبێتە رەقەڵانێک و ناتوانێ خۆی تيا نوقم دا
ئەم ئێوارە هەتاکو دێ
تاريکی خۆی دوا دەخات و
حەشاردانی خۆر ون دەکا
شەوێ لە رۆژانی رابردووی من دەچێ
شێت بوونە ؟
يا قەرەجێکی سەرەڕۆ ؟
لە نێوان رەهایی و يەخسيری پەنگ دەخوا
يەکێ بۆنی شەکر دەکا
ئەوی دی جاڕدانی پياو
يەکێ ڤالانتاين دێنێ
ئەوی دی وێنەی پۆست و نامەی بەر ئاو
لێوەکان هەڵدەلەرزن
ژاوەژاوی دەنگەکان سووژنێکن
لە تارمایی خۆيدا ئەوا
مەڵاسدانی لێ ياساغە
چما دەبێ
بێتەوە ناو ئامێزی توانەوەی غوربەت
بێتەوە سەر
پەڕينەوەی ئەم قايەغە
قريوەی شيرينی
لە حەوشەکە
سووربوونی شەهلا رەنگ دەکا
پڕپڕن لە شەرم
لە رۆچوونی زەوی دەچێ
نە خواردنەوەی خودە
نە گێڕانەوەی دوێنێ
کێ لە دەردی کێ تێدەگا
من هەر دەڕۆم و راناگەم
لە پەرتەوازەیی خۆما
پارچەکانم کۆوە دەکەم
کە ونيش بم من هەر هەسم
خۆشم دەوێی خۆشەويسترين کەسم
٣ / ٢ / ٢٠٢٣
