شیعر\ بسکێن سۆر.. هەژار حوسێن

زستانێکی درێژە ناوت
خەونێک بوو ڕۆحت
جێی هێشتم

کەزییەکانت لەتەنافەکان دەئاڵان
بۆنی پرچت هەناسە سوارەکانمی سیخ کرد
حەزم لەبۆنی خەنەیە
کەیفم بە بسکێن سۆردێ

لە خەونەکانم بۆت ڕادەچڵەکێم،
وڕێنەدەکەم، هاوار…
بۆ لەبیر بردنەوەت، ترسان دەکەمە بەهانە

لە دوا هەناسەکانت، دەستت لەنێو دەستەکانم بوو
ڕۆحم بە دەنگت سپارد
بەڵکو ئەم هەناسەیەت ببێتە ڕستەیەکی نەمر
دەتویست شتێک بێژی، نەتگوت!
بشترازێی لەگەردەنم، هەر تەوقی ئەبەدیی
لە بەژنی سنەوبەرێک ڕا تا شتڵە ڕەیحانێک،
لە گوڵێکی ئەرخەوانیی ڕا تا زەردەپەڕ
لە ڕووبارەوە تا چیا
لە بەفرەوە بۆ خۆرەتاو
من تەنها ڕەنگەکانی تۆ دەبینم.
ڕەنگەکانت دەبینم
کەچی بەبێ ڕەنگی
دەگریم.

2

دەبا تەنیابین
پێکەنینە هیچەکانتان
بەڕووخساری زەرد هەڵگەڕاو
ئێوە چەندە بۆنتان ناخۆشە
چەنده ئاسودەن لەنێو زبڵدانی ئەو وڵاتەی
خۆتان تیا کوشت
چەند خۆشحاڵن دەبینن و نوقەتان لێوەنەهات
پیره پیاوێکی بۆیاغچی و ژنێکی گۆرەویفرۆش .

3

خۆنەچەمینن ڕۆژانێک بەڕێوەن
ئەمجارەیان جەنگ ئاودیوی شاخانمان دەکاتەوە
ئەمجارەیان ئامان دەسکی چەکەکانتان قورسمەکەن
جەنگێک بەرۆکمان دەگرێت ڕەش تروسکای خۆریش دەشارێتەوە
ئەمجارەیان لێ بگەڕێن خاک بۆ ئێمەبێت

4

دەمانزانی بەیەکەوە بەدبەخت دەبین
پێکڤەبووین
سینگمان دووبەربو بەگوڵی دۆستان
ئەو هەڤاڵانەی
بێباک دەهاتن تەنیاییان دەحەساوە
مە مالەکاهەی
ڕازەکان و درۆکانی دۆستانمان لێ دەنێژین
ڕۆژ دێ زڤڕن
چیا بە چیادەکەوێت
چاو بەچاڤان ناکەوێتەوە

5

گوڵێکی زەرد لەسەر گۆڕم دەڕوێت
ڕەنگی پێستی تۆیە
تەنیایی دوماهیکەکا بەرینە
من تەنیایی نەی کوشتم
مرۆڤ و خودا بوون
خاکیان پێ داین
وشک
داری ڕزیویان پێداین
بۆ سێبەری گۆڕەکانمان